مطلوب استشارة فى شيرى qq

[h_hafez79]

السلام عليكم:
بعد اّذنكم ممكن حد يفيدنى انا معروض عليا عربية qq 2006 ستبترونيك مش راشه برا او جوا بس الصالون محتاج شوية تظبيط وفيها بداية صدأ فى طرف احد الابواب
ومطلوب 28000 ج
كدا كويس ولا ايه
وهل العربية كويسة مع العلم انى عايز عربية صغيرة

ولكم جزيل الشكر

[tarekjwal]

لو الصالون حالتة زي ما قلتي يبقي مش هاتزيد عن 25000 لأن في معروض ب 30000 وحالة ممتازة لكن للعلم العربية ممتازة مافيش منها شكاوي تذكر لحد دلوقتي غير ان الفتيس الأستبترونك الكنترول بتاعة احيانا يعلق او عايز صيانة وكشف دوري لكن العربية راسية جدا علي الأرض وقطع غيارها متوفرة
شكرا
طارق اسيوط

[h_hafez79]

شكرا لاهتمام حضرتك

[mous6fa]

أنا معايا qq بس مانيوال ومعنديش خلفية عن الفتيس ده ... ولكن لو هتكلم عن العربية بصفة عامة بحكم إستخدامي ليها يوميا هقولك إنها رائعة بكل المقاييس ... عربية حجمها عبقري جدااا وسريعة وفيها أوبشنز جميلة وكمان العربية شيك وفخمة من الداخل .. قطع غيارها متوفرة ورخيصة وأى حد يشتغل فيها ... بأمانة تحفة

[h_hafez79]

الحمد لله انا توكلت على الله واشتريت العربية .. وهى بجد حميلة
بس لاحظت وجود رجرجة عند بداية الحركة...هل دى حاجة بسيطة

[mous6fa]

إن شاء الله حاجة بسيطة ... ممكن تكون قواعد الموتور مثلا .. وعموما يفضل ميكانيكي يعمل مراجعة ع أجزاء الموتور والفتيس بالكامل مع عمل طقم السرفيس ... وألف مبروك

[h_hafez79]

شكرا لحضرتك
بس هو ايه طقم السرفيس ده ؟
وازاى نشيك على الفتيس؟ يعنى على الزيت بتاعه؟
ممكن حضرتك توضحلى

[mous6fa]

شكرا لحضرتك
بس هو ايه طقم السرفيس ده ؟
وازاى نشيك على الفتيس؟ يعنى على الزيت بتاعه؟
ممكن حضرتك توضحلى

طقم السرفيس مصطلح شائع معناه إننا بنعمل صيانة وقائية للسيارة بعد الشراء ... يعني هنغير زيت الموتور .. نغير سيور الكاتينة والدينامو .. نبص ع البوجيهات ونشوفها محتاجة تتغير ولا لأ .. دى أهم نقط الصيانة الوقائية اللى تخلينا نركب العربية وإحنا مطمئنين ومش خايفين إن سير من السيور يتقطع فجأة لا قدر الله أو مثلا زيت الموتور يكون قليل او لزوجته قليلة ويسبب مشكلة ف الموتور ..
طالما عملت النقط دي يبقى هتركب وإنتا مش خايف من حاجة .. بالنسبة لزيت الفتيس خلي حد يبصلك عليه إنما مش هتغيره طبعااااااا لإنه مش زيت إستهلاكي زي زيت الموتور ...
بعد كده هتعمل الصيانة الدورية العادية اللى كل الناس بتعملها ... يعني حالة العفشة .. الكاوتش .. التكييف .. على مهلك يعني واحدة واحدة ... إنما طقم السرفيس هو اللى يهمنا دلوقتي ويتعمل بصورة عاجلة ..
سير الكاتينة بيعمل بين 80 لـ 100 جنيه .. وبالنسبة للزيت أنصحك تحط زيت شل 5000 كيلو الأصفر وبيعمل 120 جنيه .. سير الدينامو طبعا سعره اقل بكتير من سير الكاتينة .. البوجيهات مش هنغيرها الا لو الميكانيكي قال إنها محتاجة تتغير .. وزيت الفتيس غالبا مش هيبقى ناقص ولا فيه اى حاجة..