حد عنده معلومات عن شيري a15

[tiggo80]

انا معاى العربية واتفضلوا اسالوا وانا هجاوب

الأخ إمام
السلام عليكم
أنا إسمى محمد خيرى عضو جديد فى المنتدى
من الأخر عايز أعرف كل حاجة عن العربية وتقيمك الشخصى بالنسبة لإستخدامك وأخبار قطع الغيار والوكيل والخدمة الى بيقدمها والمشاكل الى واجهتك فى العربية
شكرا

[emam]

الأخ إمام
السلام عليكم
أنا إسمى محمد خيرى عضو جديد فى المنتدى
من الأخر عايز أعرف كل حاجة عن العربية وتقيمك الشخصى بالنسبة لإستخدامك وأخبار قطع الغيار والوكيل والخدمة الى بيقدمها والمشاكل الى واجهتك فى العربية
شكرا

اهلا بيك يا استاذ محمد اخ جديد معانا فى المنتدى وسط اخواتك

اولا المميزات من وجهة نظرى "

1- جميع الكماليات موجودة فى العربية (تكييف - مرايات كهرباء - لمبة ستوب خلفى - باور ستيرنج - طى الكرسى الخلفى لتوسيع الشنطة - اسبويلر - جنوط سبور - كشافات ضباب- 4 زجاج كهرباء - التحكم فى اضاءة التابلوة - فرامل abs - تسخين الزجاج الخلفى - )

2- شكل مقبول وارى انه جيد جدا من وجهة نظرى

3- ارتفاع عن الارض معقول مما يساعد على عدم الاحتكاك بالمطبات

4- سعر قليل مقابل الاوبشن الموجود فى السيارة

5- ثبات عالى فى السرعة (جبت بيها 180 مرة ومعملتهاش تانى وكان الثبات ما شاء الله وال ار بى ام موصلش للمنطقة الحمراء )

6- استهلاك اقتصادى للبنزين تقريبا بتعمل من 260 الى 280 فى السفر و من 220 الى 240 داخل البلد ودة يعتبر معدل حلو لسيارة 1600

7 - تكييف قوى على 2 فى الجو العادى ممكن تسقع منه لكن لو الجو حار اوى 3 بيكون مناسب جدا


ثانيا : العيوب من وجهة نظرى برده :-

1- عفشة ناشفة نوعا ما ولما سالت فى التوكيل قالوا ان دى طبيعة العفشة الالمانى حتى تعطيك ثبات عالى وبعض الناس قالولى لو حبيت تغير حاجة فى العفشة هاتها جولف بتركب بدون مشاكل .

2- البنزين المستخدم لها طبقا لمصنع السيارة 93 - (يعنى مينفعش تحط بنزين 90 ) واقل حاجه 92

3- الناس هتقعد تقولك انته راكب صينى والكلام الى انته عرفه دة

4- عدم الانتشار

5- قطع الغيار مش متوفرة غير فى التوكيل وبعض المحلات القليلة نوعا ما (على فكرة اسعار قطع الغيار كانت غالية بس حاليا اخر مرة سالت عليها لقيتهم رخصوها كتير اوى عشان ينافسو وبقت مقاربة للفيرنا ويمكن ارخص كمان فى بعض الحاجات) .

6- سعر اعادة البيع هينزل بنسبة مش قليلة



بالنسبة للعربية هى معاى من 3 سنوات تقريبا والحمد لله مقابلتنيش مشاكل - بس انا استعمالى للعربية خفيف شوية يعنى عامل بيها 25 الف كيلو بس يعنى بمعدل 8 الاف كيلو فى السنه بس ونصفهم سفر كمان الغردقة ومرسى مطروح واسكندرية


اما الوكيل فهو معقول الناس هناك بتسمع منك وبيعملوا الى انته قولت عليه بس لازم تراجع الى انته طلبته منهم واسعارهم معقول يعنى تقربيا تديلهم 7 من 10 والحمد لله مقابلتنيش مشاكل فى العربية وضمان الى 3 سنوات خلص ومحتاجتوش والحمد لله فى حاجه .

واخيرا ربنا يوفقك فى اختيار العربية المناسبة

[tiggo80]

أ/ إمام
حقيقى أنا عمرى ما قابلت واحد محترم ومهذب ومتعاون بالشكل ده بأتمنى كل المصريين يبقوا زيك كده
طبعا شكرا جزيلا على تقديرك وردك عليى الرد القوى ده أعتقد إنت كده ردت على كل حاجة بتدور فى دماغى
ربنا يبارك فيك ويبارلك لك فى العربية ويبعد عنك كل سوء وإن شاء الله تفضل معاك مش 3 سنين بس لأ 30 سنة إن شاء الله
أتمنى أن نكون أصدقاء لأنى دايما أحب معرفة الناس المحترمة
على فكرة أنا صاحب شركة إستيراد وتسويق مستلزمات طبية إسمى محمد خيرى وده رقم تليفونى 0123898912 والأيميل mhmdkh1980@yahoo.com
شكرا لك للمرة الثانية ولكن فى حاجة أخيرة لو سمحت بالنسبة لإختبار التصادم أنا شايف أن العربية لم تنجح فيه بشكل واضح لو سمحت لو عندك تعليق ياريت أعرفه سامحنى أنا صعب قوى فى الشراء
ألقاك دائما على خير

[emam]

شكرا يا استاذ محمد على المجاملة الرقيقة و الكلام الجميل اوى دة وشرف ليا يا افندم اننا نكون اصدقاء - وانا معملتش حاجه غير انى نقلت انطباعى عن العربية بكل امانة - وان شاء الله ربنا يوفقك فى اختيار العربية المناسبة

اما بخصوص اختبار التصادم انا بصراحة شفته بعد ما اشتريت العربية - بس انا لى رأى فى هذا الموضوع احنا هنا فى مصر مبنجريش بالسرعة العالية اوى دى لأن معندناش طرق فى مصر تساعد على كدة - ثانيا انا سمعت والله اعلم ان الاختبار دة اتعمل فى بداية تصنيع العربية وشيرى عدلت فى التصميم (والله اعلم مش متأكد من المعلومة) بس مدخلوش الاختبار الاوروبى ثانى ونزلوا عربيات ثانية - ثالثا - اختبار الافيو متهيألى نتائجه قريبه جدا من نفس نتيجة اختبار الشيرى وحضرتك شايف العربية بتتباع ازاى فى مصر واختيرت كاحسن سيارة سيدان صغيرة فى مصر لعام 2009 فى استفتاء مجلة عربيتى .

اخيرا هذه ليست دعوة للشراء او التراجع - حضرتك تصلى صلاة الاستخارة وربنا يوفقك لما فيه الخير ان شاء الله .

[tiggo80]

صباح الخير يا أ/ إمام
من حسن حظى إنى أقابلك النهاردة
متشكر جدا لزوقك