المراوح كلاكيت تانى مره

[hazoom2006]

انا كنت عملت موضوع عن مراوح الردياتير هنا وانها بتشتغل بعد تدوير بخمس ثوانى
غيرت اكتر من ساعه حرارة او صباع حرارة زى مابيقولو عليه لما اتجننت
روحت لكهربائى قعد يفك فى السلوك اقوله بتعمل اية يقولى سلك مفصول طيب بعد البحث والتفتيش ولما زهق قالى هاتهالى بكره افك الضفيره كلها ونجيب السلك قولتله على اية قلبك ابيض سلام عليكم
روحت لواحد تانى قالى المشكلة فى الكمبيوتر نفسة ماشى هتعملها يا معلم قالى اه يا باشا طلع الكمبيوتر
وجاب افوميتر وبيقيس اى حاجة فى اى حاجة وسلك الافوميتر بيعلق
قالى فى الاخر دى اى سي المراوح هتتكلف 180 جنيه قلته اعملها وانا فاقد الامل واهو مش هيخسر يلعب شوية زى اخواته وانا متاكد انه مش هيجيب نتيجة زى اخواته برده :
دخل جوه 10 دقايق وطلع خير يا ريس تمام نركب يا باشا ركب يا برنس
ركبنا ادور العربيه استنيت شوية المراوح تشتغل ماشتغلتش باينه هيعملها ولا اية استنيت شوية كمان لفى يا مروحة ماتكسفنيش ابداااا قولت الحمد لله .... اية دة طب افرض ماشتغلتش خالص وفضلت كده المكنه تسخن وتضرب قولت اشغل التكيف لقيتها فضلت شوية كده واشتغلت افصل التكيف وقفت الحمد لله الله ينور عليك

روحت مشوار المراوح ماشتغلتش قولت تمام الحرارة فى النص والمفروض سخنه وهيه الف جزمة مش بتشتغل غير مع التكيف

روحت البيت سامع الميه بتغلى والمراوح مواليد برج الطور ومركبة جزمة مابتشتغلش غير مع التكيف المهم احرق واسخن فى المكنه لحد ماالمؤشر طلع فوق النص بهفوه كده لقيت المراوح اشتغلت شوية ووقفت تانى
بس الميه بتغلى وحاسس ان المكنه سخنه اوى
هل كده فى ريلاى بايظ والمفروض بتشتغل على السرعه الاولى امته والسرعه التانيه امته برده ..... وهل لو بطلت العربيه وهيه سخنه المراوح بتلف شوية وهيه مبطله علشان تبرد المكنه ولا العربيه دى مافيهاش الكلام ده

اسف جدا على الاطاله بس مشكلة المروحة دى تعبتنى جداااااااااااااااااااااااااااااااااا وعايز اطمن اكتر

[عماد تامر]

المراوح طبيعي بتشتغل اول ما مؤشر الحرارة يرتفع عن النص بشويه بسيطه جدا ولما بينزل عند النص تقف المراوح يعني لو المؤشر عند النص على طول يبقى كله تمام

[Abo_Mazen]

المراوح طبيعي بتشتغل اول ما مؤشر الحرارة يرتفع عن النص بشويه بسيطه جدا ولما بينزل عند النص تقف المراوح يعني لو المؤشر عند النص على طول يبقى كله تمام

طيب حضرتك هو بيقول إن المؤشر بيعلى عن النص وبعدين المراوح تشتغل ..وبعدين المفروض المؤشر ما يعلاش أصلا عن النص ..

[hazoom2006]

المراوح طبيعي بتشتغل اول ما مؤشر الحرارة يرتفع عن النص بشويه بسيطه جدا ولما بينزل عند النص تقف المراوح يعني لو المؤشر عند النص على طول يبقى كله تمام

لا الميه بتغلى وبسمع صوتها ولما يطلع عن النص مسافه ملى المراوح تشتغل شوية وتفصل
هل طبيعى المية تغلى بالطريقة دى

[hazoom2006]

ولو العربيه سخنه وطفيت الموتور هل المراوح بتفضل شغاله شوية وتفصل ولا لا

[Abo_Mazen]

ولو العربيه سخنه وطفيت الموتور هل المراوح بتفضل شغاله شوية وتفصل ولا لا

بص ..المفروض المؤشر ما يعلاش عن النص ..والكلام ده بالنسبه للعربيات الحديثه ..إنك لما تطفي العربيه المراوح تفصل علطول ولا تفضل شغاله لغاية ما تبرد ..دي بتختلف من عربيه للتانيه ..حسب الكهربا بتاعتها عامله إزاي ..حكاية إن المراوح بتشتغل بعد طلوع المؤشر عن النص ..دي فيها كلام

[ahmed2801]

ولو العربيه سخنه وطفيت الموتور هل المراوح بتفضل شغاله شوية وتفصل ولا لا

يا عزيزى العربية بتاعتنا دى لما تطفى الموتور المراوح تطفى واعتقد العيب عندك فى صباع الحرارة... انت حاطط مية من الحنفية ولا مية خضرا؟؟؟ علشان مية الحنفية بتعمل طبقة صدأ وبتعزل صباع الحرارة وبتأخر الاستجابة.
وخلى بالك بنزين 80 ده ح يبوظلك موتورك وربنا يستر.

[عماد تامر]

يا عزيزى العربية بتاعتنا دى لما تطفى الموتور المراوح تطفى واعتقد العيب عندك فى صباع الحرارة... انت حاطط مية من الحنفية ولا مية خضرا؟؟؟ علشان مية الحنفية بتعمل طبقة صدأ وبتعزل صباع الحرارة وبتأخر الاستجابة.
وخلى بالك بنزين 80 ده ح يبوظلك موتورك وربنا يستر.

الكلام ده صح جدا المشكله في صباع الحرارة ممكن يكون عليه طبقة صدأ من الميه ولو مفيش عليه طبقة صدأ او املاح ممكن يكون محتاج تغيير

[hazoom2006]

غيرت صباع الحرارة امبارح جديد برده نفس الموضوع
هل طبيعى الميه تغلى

[hazoom2006]

نضفت الردياتير عند واحد عايز اعرف اخد الهوا ازاى

[borio1704]

غيرت صباع الحرارة امبارح جديد برده نفس الموضوع
هل طبيعى الميه تغلى

نضفت الردياتير عند واحد عايز اعرف اخد الهوا ازاى

لأ.. مش طبيعي إن المية تغلي

حتى لو وصلت درجة الحرارة لحد 105 مئوية... المفترض ما تغليش لإن دايرة التبريد تحت ضغط عالي... والضغط العالي بيزود درجة الغليان


واضح جدا إن الديرة عند حضرتك مش مقفولة كويس... وغالبا المشكلة جاية من غطا الرادياتير

هي المية بتنقص عند حضرتك؟؟



أما بالنسبة لموضوع إن المروحة مش بتشتغل إلا لما تعدي النص... فده موضوع تاني

أنا قريت الموضوع اللي حضرتك كاتبه عن المراوح
http://www.nilemotors.net/Nile/425636-a.html

أنا شايف إن عدم وجود ثرموستات الكوعة سبب أساسي في اللي حضرتك شايفه ده


وباختصار.. واضح إن دورة التبريد عند حضرتك محتاجة تفويرة علشان ترجع تشتغل صح.



دورة التبريد السليمة لازم تكون كالتالي:

1- محكمة الغلق ولا يوجد بها أي تنفيس.. بمعنى إن كل الخراطيم والمواسير تكون سليمة، وكمان غطاء الرادياتير يكون سليم... بالإضافة طبعا إلى عدم وجود تسريب من جوان وش السلندر .

2- نظيفة ولا يوجد بها ترسبات... علشان تقدر تبرد بمعدل عالي وتمنع الصدا... فلازم تحط مية خضرا

3- درجة حرارة ثابتة في جميع ظروف التشغيل... علشان تاخد أداء كويس واستهلاك بنزين منخفض... وده لا يمكن يحصل إلا إذا كان ثرموستات الكوعة موجود وشغال صح.

4- كفاءة تبريد عالية... وده عن طريق التأكد من نظافة الرادياتير الخارجية.. وسلاسة مرور تيار الهواء بين ريش الرادياتير.. وكمان تتأكد إن الريش كلها سليمة ومفيش حاجة مكسورة... ده غير كفاءة دوران مروحة التبريد... وما تنساش كمان إن الطلمبة تكون كويسة.



شوف حضرتك إيه اللي ناقصك من الحاجات اللي فوق دي وابدأ اعمله واحدة واحدة.



...

[hazoom2006]

استاذ borio1704 شاكر جدا لرد حضرتك وربنا يباركلك يارب
انا نضفت الردياتير عند واحد طلعه ونضفه ونضف دورة التبريد وللاسف صباع الحرارة اللى جايبه من يومين بس باظ جبت واجد تانى امبارح وربنا يسهل همشى على الخطوات اللى حضرتك قولتلها وان شاء الله خير