تيجو ٢٠١٨

[Hani Hegazi]

السلام عليكم ،،،
محتاج النصيحة بخصوص شراء تيجو ٢٠١٨، عايز اعرف مميزات وعيوب السيارة، وهل بالنسبة لثمنها عيوب مقبولة ؟ لاني محتار، ناس بتشكر فيها جدا وناس بتشتكي مش عارف اصدق مين؟

[samakaerror]

بسم الله الرحمن الرحيم
بقالي كتير جدا مدخلتش هنا ولا كتبت .... بس سؤالك شدني لأن محدش لسه رد عليك
بص يا سيدي.... العربيات في بلدنا الحبيبة ; زي البطيخه .. بالذات لما تكون حاجه متجمعه محلي.
العربية معايا بقالها -الحمد لله- سنة و 8 شهور ... مشيت بيها 55 الف كيلو ... انا كنت بسافر بيها كتير جدا لأني غطاس ... فا مشيت بيها تقريبا في كل انواع الطرق و المدقات لأني بحب التخييم و الصحرا كمان
رأيي المتواضع:
- لازم تركب و تجرب بنفسك لأن تجربتك غير تجربة غيرك
- موتور و فيتيس اللهم صل عالنبي حاجه كده تحسسك بلأمان و الراحه
- عفشة ما شاء الله ناعمه و قوية و كلها حنية .. مش هتحس بدبدبة لو مشيت مظبوط حتى فالمدقات و الجبال
- عالية و دة مناسب جدا في شوارع مصرنا الحبيبة
- الصيانات انا شايف انها سعرها مقبول نظير الغلو المبالغ فيه حوالينا
- قطع الغيار : ده موضوع ظريف بقى لأني الحمد لله عملت حادثة و غيرت اكصدام و فانوس شبورة شمال و سألت على كل حاجه لقيتهم موجودين و بأسعار مقبولة جدا فالتوفيقية و في كذا جودة وانت تختار
- حتى نظام الصوت إللي نازل صوته ظريف جدا
- التكييف تلاجة ... تلاجه بمعنى الكلمة

العيوب من رأيي:

- استهلاك بنزين عالي شوية ... من 9 إلى 12 لتر فال 100 كيلو تقريبا
- الأنوار مع الاتربة و الطرق الوعرة ساعات بتقل و لازم انزل امسح الفوانيس و اظن الحكاية دي تتحل بالزينون
- الفرامل ال ABS بحث انها بطيقة شوية مع اني بجري كتير و بتسعفني جدا ... بس انا كنت راكب بريليانس و افتكر انها كانت بتستجيب اسرع
- الكاسيت مافيهوش ولا وصلة AUX ولا Bluetooth
- فتحة السقف الميكانيزم بتاعها ساعات كتير بيبوظ

بس كل ده نتغاضى عنه عشان لو حسبناها قيمة مقارنة بالمبلغ و الفلوس المدفوعه ... العربية تكسب بكتير

عربية: عالية - ثابته - لكل الظروف -- عائلية -- شبابية -- عفية و بتستحمل (ربنا يبارك)

فا انت يا باشا روح اعمل تست درايف و شوف بنفسك ... و قبل ما تركب اي عربية لازم تكون مقنع جداّ ... لأنك لو مش مقتنع 200% عمرك ما هاتبقى مبسوط
و ربنا يوفقك و انا موجود لو عندك اي اسئلة