تجربتي مع الشورت بلوك

[nubera97]

السلام عليكم ..
احبائي اعضاء المنتدي . سيارتي نوبيرا ( ١ ) وبتطلع دخنة بيضا بكثافة المهم ذهبت لأكثر من ميكانيكي واجمعوا اما عمرة او شورت بلوك نسبة ٤٠٪ نصح بعمرة و ٦٠٪ شورت بلوك المهم انا ساكني قريب من شلبي واعرف الذهاب للحرفيين ، فأرجو إفادتي بالأتي :
١. كيفة معرفة حالته
٢. قيمته الان
٣. الضمان الذي اسأل عليه
٤. الأوراق المطلوبه اخذها معي عند الشراء
٥. الأوراق اللي سأخذها من التاجر
٦. اسماء محلات سواء فجي شلبي او الحرفين
٧. اشياء سأشتريها عند التركيب
٨. قيمة مصنعية الميكانيكي
٩. بعد التركيب كيفية معرفة ان العملية تمت بنجاح وما هي الأشياء الواجب ملاحظاته بعد التركيب
١٠. هل العربية بعد التركيب ستكون في مرحلة تلين وبتكون كام كيلو متر
ادري اني اثقلت عليكم فعذرا لذلك فأنها تجربتي الأولي في ذلكشراء

[hema111]

وعليكم السلام ورحمة الله
كنت اتمنى افيدك اكثر من كدة ولكن المعلومات اللى عندى قليلة
بالنسبة للشورت بلوك تمنه مابين 2500-2800 جنيه حسب شطارتك فى الفصال وحسب المكان اللى هاتشترى منه
العلامات الدالة على حالة الشورت بلوك منها: حالة البوجيهات (يعنى لو عليها زيت او كربون اسود تبعد عنها) ومن العلامات الاخرى حالة فرن الشكمان وهنا الميكانيكى اللى معاك هاتخليه يفك الفرن بتاع المكنة ويشوف حالة الفرن من الداخل (يعنى لو مجمع كربون اسود مع بقايا زيت تبعد عنه) وتاخد الشورت بلوك اللى فيه أنضف فرن
مصنعية تركيب الشورت بلوك من 500 الى 600 جنيه لانه هايغير سير الكاتينة وهايفك ترس الفولام ويبدله بالقديم أويمسحه على المخرطة
متوسط تكلفة العمرة الكاملة بتكون حوالى 3000 جنيه (800 مصنعية + 800 خراطة ورودية + 1400 قطع غيار تشمل جلد صبابات و طقم شنبر و4 مكابس جديدة وطقم سبيكة وجوان وش سلندر وجوان التاكيهات وجركن زيت وفلتر زيت و50 لتر بنزين) ونثريات أخرى
قد تزيد تكلفة العمرة عن المبلغ المذكور نتيجة انك قد تجد اثناء الفك مثلا ان شجرة المياه بها مشكلة فتلجأ الى تغيرها اوأن الردياتير محتاج يتغير أو محتاج طقم طبب مياه امامى وخلفى جديد أو .... الخ
العمرة مش مضمونة لانها محتاجة واحد ميكانيكى شاطر جدا وعنده أمانة وقطع غيار أصلية وده صعب تلاقيه وحتى لو العمرة اتعملت كويس والمكنة بقت كويسة ومعتش فيه حرق زيت المكنة مش هاترجع زى الاول وده لسبب بسيط لان حجم غرفة الحريق تم تغييرة عن طريق التوسيع بالخراطة ومسح وش السلندر وبالتالى لوكانت بتجيب 180 كم/س قبل العمرة صعب جدا ده يحصل بعد العمرة
وبناء عليه لو ربنا وفقك فى شورت بلوك تكون حالته ممتازة ها يكون أفضل لك من العمرة وبهدلة الوقفة جنب الميكانيكى لمدة أسبوع العمرة
بالنسبة للورق الخاص بالشورت بلوك اتمنى حد من الاخوة فى المنتدى يفيدك به لاننى لا اعرف عنه شيئا
وبالتوفيق فى الاصلاح ان شاء الله

[nubera97]

اشكرك حضرتك جزيل الشكر وبالفعل اعطيني معلومات قيمة جزاك الله خيرا اخي الكريم ،، وفي انتظار احد الأخوة افادتي في موضوع الورق
تحياتي لحضرتك

[crazy car]

مفيش ورق لان الموتور اللى بيتغير فيها قلبه ان صح التعبير
واستنى برده حد يفيدك