السيارات الكورى

[ehab4367]

لية بيقولو عليها سيارات شعبية ودون الكفاءة ولا يعتمد عليها؟
انا معاكم انى اليابانى والالمانى احسن
,بس هل الكورى للدرجة دى وحش؟

نقل للكورى العام بمعرفتى

مشرف المنتدى العام

[waelwael]

إنا قلت إرد عليك علشان كل الناس بتخش ومبتردش مساء الفل
المقوله دى زمان دلوقتى لأ i30 عمرها ما تكون شعبيه إبدا وهى كورى

[unounobebo]

العربيات الكوري و غيرها كويسة كلة محتاج عناية بس الكوري محتاج عناية أكتر شوية من الياباني مثلا بس مش معني كدة إن الياباني لو إتبهدل هيستحمل .كل حاجة محتاجة عناية

[khater87]

الكوري كصناعه بقت مشهوره جدا
هيونداي وكيا ودايو طبعا اسامي لايمكن الاستهانه بها
هيونداي اكبر شركه مصنعه للبواخر ومعدات السفن وطبعا صناعه السيارات
كيا من الشركات الكبيره
دااايووو
علي الاقل هي احسن من صناعات تانيه
الصيني والماليزي والروسي والهندي
وطبعا سوقها في مصر بقي من الاسووواق الكبيره جدا
مثلا مبيعات الهيونداي افضل مثال
من حيث الشعبيه الناس بتحكم عليها كده لانها المتاحه لمعظم فئات الشعب وده بالنسبه لسعرها المتاح للجميع
انا رأيي الكوري كصناعه تأخد درجه جيد

[Hosam_Optrawy]

لأ طبعا مش وحشه
الكورى بيتقدم كل يوم عن اللى قبله

[maka]

الكورى ممتاز ويعتمد عليه

[blazer]

الكورى من بعد الموديلات الجديده
زى موديلات الالنترا والسيراتو الجديده اتنقل نقله تانيه
بس ليه فى عربيات مش على نفس مستواهم زى الفرنا و الماتريكس مثلا

[hazoma_nubira]

الكورى مش وحش ابدا وبص لمعيار السعر مقابل القيمة

[tutankhamoun]

الكوري حلو ......... و الياباني حلو
و فيه كوري عادي .......... و برضه فيه ياباني عادي

بس الفكرة كلها في الأرتياح النفسي للشئ و سمعته ...... و أيضا الفكرة المأخوذة عنه مُسبقاُ
أنا شخصيا لا أعترف بموضوع بلاد المنشأ ده
أنا بنظر للمنتج نفسه .......
يعني أبص أشوف العربية دي حلوة و لا وحشة و مليش دعوة مصنوعة فين ..
أهم حاجة
خاماتها تكون معقولة
و طبعا تكون متجربة علشان تقدر تحكم
متوفر لها قطع غيار
سعرها مناسب
سعر اعادة بيع لو أنا من هواة التغيير

إنما أروح أشتري عربية علشان خاطر أسم بلد المنشأ اللي هو مكتوب على العربية بدون النظر إلى العوامل الأخرى
يبقى طبعا بأضيع على نفسي فرصة أفضل لأقتناء منتج أخر أفضل أو حتى بنفس المستوى و لكن أرخص .
دي هي نظريتي في الموضوع كله


بالمناسبة
الكوري لو وحش
كان زمان العربيات اللانوس و النوبيرا و الليجانتزا القديم متكهن و مفوت .... بس ما شاء الله لسة شغال زي الفل
أي عربية تحافظ عليها ....... هاتعيش و تعيش و تعيش
لو جبت عربية ألماني و محافظتش عليها ..... هتتهلك بسرعة و مش هاتعيش

[tutankhamoun]

الكورى مش وحش ابدا وبص لمعيار السعر مقابل القيمة

مش كدا بس
فيه عربيات بيبقى سعرها مغالى فيه بسبب بلد المنشأ
يعني ممكن يكون بسبب أستغلال الوكيل لأسم بلد المنشأ

و فيه أسعار أصلا بتكون غالية نتيجة بلد منشأ معين بسبب أسعار العملة و أسعار العمالة و أسعار الضرائب
علشان كدا الشركات الكبيرة بتفتح مصانع تجميع في بلاد نامية و العمالة فيها رخيصة علشان تقدر تنزل بالسعر علشان تقدر تنافس

و برضه السعر لوحده مش معيار الجودة للأسباب السالف ذكرها .

يعني أنا مثلا هاقول على مثال :
الهيونداي الالنترا ..... و تويوتا كورولا
الأثنين في فئة واحدة
و الأثنين تقريبا حجم واحد
و الأثنين موتورهم متقارب في القوة جدا .

و أنا شايف أن الالنترا أحسن
علشان سعرها أفضل
و كل اللي هاخده من تويوتا .... أسم فقط ..
يعني بأدفع 40 ألف زيادة علشان خاطر .. تويوتا و صنع في اليابان
مع أن هيونداي أدتني نفس العربية و بشكل أحلى و بجودة عالية جدا حسب السوق الأمريكي و الجوائز اللي حصلت عليها
و مع ذلك وفرت 40 ألف جنيه .

يبقى ليه أروح أشتري عربية علشان خاطر أسمها فقط ؟؟

خصوصا أن أحنا مش بنتكلم عن ماركة رفاهية زي مرسيدس أو ليكسس اللي هي من ابداع تويوتا . و لكن قسم السيارات الفارهة .

محدش يفتركني بهاجم تويوتا أو بهاجم اليابان
أنا بتكلم من نظرة شخصية للأمور و نظرة موضوعية بحتة و أقتصادية أيضا .

[M.Osman]

ي عربية تحافظ عليها ....... هاتعيش و تعيش و تعيش
لو جبت عربية ألماني و محافظتش عليها ..... هتتهلك بسرعة و مش هاتعيش

... طب و الكلام ده ممكن ينطبق على العربيات الصيني كمان ؟؟

بصراحة انا شايف ان العربيات الصيني بتتقدم و ممكن في خلال اقل من 5 سنين تلاقيهم دخلوا اوروبا و اجتازوا اختبارات الأمان و الكلام دا ... و ساعتها هيقبلبوا صناعة السيارات بجد !!

شكراً

[tutankhamoun]

... طب و الكلام ده ممكن ينطبق على العربيات الصيني كمان ؟؟

بصراحة انا شايف ان العربيات الصيني بتتقدم و ممكن في خلال اقل من 5 سنين تلاقيهم دخلوا اوروبا و اجتازوا اختبارات الأمان و الكلام دا ... و ساعتها هيقبلبوا صناعة السيارات بجد !!

شكراً

طبعا ممكن .... ليه لاءة ؟؟؟
بس مش دلوقتي
لأن الصين مازالت بتقلد ..... مش بتبدع أو حتى تشتري منتجات قديمة و تعيد انتاجها .

بس لو الوكيل المحلي للصيني دعمها بقطع غيار متوفرة باستمرار و مراكز خدمة محترمة
مع الارتفاع بجودة الخامات المصنوع منها العربية
هاتعيش طبعا و تعيش و تعيش لو حافظت عليها .

أصل الصيني ده حكاية لوحده ( بسبب التقليد و أسترخاص الخامات )

يعني مثلا كوريا تعاونت مع شركات أمريكية و ألمانية لأكتساب الخبرة و شوف وصلوا لأيه

و ماليزيا مثلا .... منتجاتها ممتازة في السيارات علشان برضه بدأو مع شركات كبيرة لغاية ما أشتروا شركة كبيرة اللي هي لوتس من أكبر شركات سيارات السباق في أوروبا .

إنما الصين مختلفة شوية .
و لكن كلام حضرتك مظبوط ....... كلها كام سنة لما يتعلموا صح زي كوريا و ماليزيا مثلا ........ و هايكلوا الكل .

[ehab4367]

كلام سليم بس لسة بردة الناس بتاخد التقييم على بلد المنشا
يقولك مثلا:يا عم دا راكب بى ام..... المانى
او يا عم دا راكب لانسر,,,,,, يابانى
وبعض الناس بتقول انى الكورى دا مش عربية ولكن( اشباة عربية)
انا معاى عربية كورى على فكرة بس مش عارف لية فى شريحة من الناس بتفكر كدة
مع الشكر

[tutankhamoun]

كلام سليم بس لسة بردة الناس بتاخد التقييم على بلد المنشا
يقولك مثلا:يا عم دا راكب بى ام..... المانى
او يا عم دا راكب لانسر,,,,,, يابانى
وبعض الناس بتقول انى الكورى دا مش عربية ولكن( اشباة عربية)
انا معاى عربية كورى على فكرة بس مش عارف لية فى شريحة من الناس بتفكر كدة
مع الشكر

الناس اللي بتفكر بالطريقة دي غير متفتحة على العالم الخارجي و لا يدرون ماذا يحدث خارجه و منغلق على نفسه .

و ناس بتضيع على نفسها فرصة أقتناء نفس المنتج بسعر أقل لمجرد الذهاب لأسم مشهور أكتر .

و فيه ناس تحب تشتري الحاجة الغالية علشان تبقى مميزة و دول مفيش مشكلة بالنسبة لهم .

إنما اللي بيسيب منتج كويس و يشتري أخوه بثمن أغلى بيضيع علىنفسه فرصة كويسة لتوفير شوية فلوس محترمين .

و بعدين في الأول و في الأخر ..... السلع أذواق و لولا أختلاف الأذواق لبارت السلع .

و مش دايما المنتج الأغلى أفضل
لأن ساعات بيدخل عوامل زي
أختلاف أسعار العمالة
أختلاف أسعار الضرائب
أختلاف أسعار العملة من دولة لأخرى بيأثر في السعر
فممكن أشترى عربية
ب 150 ألف من بلد ( أ )
و أشتري أختها ب 100 ألف من بلد ( ب )
لأن بلد ( أ )
أغلى في العمالة و الضرائب و العملة لذلك عربيتهم أغلى في السعر و مش معنى كدا أن عربيتهم أحسن في الجودة
ممكن قوي تكون الجودة متقاربة جدا أو فرق الجودة لا يساوي فرق الفلوس .

نرجع لموضوع الكوري و نظرة الناس له
أولا لا تنسى أننا في مصر .....بلد الناس المتعقدين بعقدة أسمها عقدة الخواجة .
و مش أي خواجة .... الخواجة له تصنيفات في الثقافة المصرية .
يعني فيه ألماني .... و ده قمة الخواجة عند المصريين
ووصلت لدرجة أن ناس بتقول أن العربيات الألماني هي الأقوى و الأكثر عمرا من أي سيارة تانية على وجهة الكرة الأرضية و طبعا ده كلام مُرسل .
أيوة العربيات الألماني معمرة لمن يصونها
و نيجي في المرتبة التانية و هي بقية السيارات الأوربية
و بعدين فيه الياباني رقم 3

و بعدين بقى الباقي عند ناس كتير ملهمش لزمة .

بس بقى أنا شايف أن الكوري بيعرض حاجات كتيرة في السوق
بيبدأ بالعربيات الصغيرة زي بيكانتو و عربيات أكبر شوية زي أكسنت و فيرنا . و لانوس و نوبيرا
و دي أكتر عربيات مشهورة في الكوري و الناس دايما تقارنها بالياباني .

الكوري عنده حاجات متفوقة على الياباني زي الألنتر مثلا في السوق الأمريكي واخدة جوايز أفضل سيارة في عام 2008 ..... و متفوقين على الهوندا سيفيك و اللانسر الشارك و التويوتا كورولا .

فأنا شايف أن موضوع بلد المنشأ ليس زي أهمية كبيرة إذا كان المنتج له الدعم الكافي من وكيل محلي جيد يقوم بتوفير قطع الغيار و مراكز الاصلاح و ده متوفر جدا في الكوري .


فيه كمان حاجة مهمة قوي قوي قوي قوي .
سوق اعادة البيع .
مصر سوق مختلف تماما عن أي سوق تاني
فبالتالي ثمن العربية مش سهل تجميعه
و لكن مثلا في أوروبا السيارات بنفس الثمن في مصر و لكن مع ارتفاع قمية عملتهم مما يجعل ثمن السيارة مقدور عليه من كافة الطبقات تقريبا فلذلك السيارة المستعملة برخص التراب .
و هناك دورة الاستهلاك قصيرة يعني العربية مش بتقعد تمشي على الطريق أكتر من 10 إلى 15 سنة بالكتير
فلا يهمهم هذه النقطة مثل المصريين
المصري عايز عربية يتشريها النهاردة بجنيه و يبعها بكرة بجنيه و نصف .
فهمت التفكير ماشي ازاي .
و بما ان الثقافة العامة في تقديس بلد المنشأ
فلذلك كلما أرتفع أسم بلد المنشأ في السوق ... كلما حافظت السيارة على قيمة مرتفعة عند اعادة بيعها .
و لكن الموضوع معادلة
يعني أنت أشتريت أيه و أستهلكته أد أيه و بعدين خسرت فيه كام .

و بعدين أنا عايز أضيف أهم اضافة في الموضوع ده .
العربيات الكوري عربيات كويسة و معمرة و عملت أسم عالمي
فكبر دماغك و أشتري اللي يريحك و اللي أنت حابه و ماتأخدش على كلام الناس .
لأن كلام الناس لا بيودي و لا بيجيب

[ehab4367]

انت موسوعة متحركة,بتعرف تفكر على السريع وترد
وتفند وتشرح.