أنا وصديقى.....والجين تو

[مصطفى_صديق]

قابلنى صديق لى...لم اراه من فترة طويلة .....وكان معترضا على شرائى السيارة.......ودار بيننا هذا الحديث بخصوص سيارتى الجين تو

• أخبار العربية ايه

• تمام الحمد لله

• مفيش مشاكل ظهرت
  

• لا عادى....الطبيعى يعنى

• أنا مش عارف ايه اللى عاجبك فى العربية دى

• مانا قلتلك قبل كده

• مش مقتنع

• عنك ماقتنعت....دى حاجة انت متفهمهاش

• مفهمش ايه.....انت هاتتفلسف ...الموضوع مش مستاهل ....

• لا يستاهل ....فى شئ غريب فيها..تحس انها مختلفة

• ايوة ازاى يعنى....بتطير زى اللوجان كده

• لا يا أخى....

• يبقى بتمشى على الحيط

• لا ياسيدى.....

• امال ايه...انجز

• حاجة كده زى علاقة.....

• علاقة بينك وبين العربية....اهلا....باين على الربع اللى فاضل عندك ضرب...وعلاقة ايه بقى ان شاء الله يا خفيف.....حب ولا خطوبة ولا ايه

• مش قلتلك ...دى حاجة انت متفهمهاش

• لا لا ...قول بس

• يعنى تحس كده ان اللى عمل العربية دى....عملهالك مخصوص

• أه ...فهمت....يعنى كلمك فى التليفون قبل مايعملها.....وقالك...ايوة ياباشمهندس مصطفى.....أنا بصمم عربية دلوقتى...تحبها إزاى ؟

• والله انت اللى خفيف....لا يا أخى....يعنى عمل فيها حاجات.....مختلفة....وفنفس الوقت ....جميلة

• وضح بقى....علشان أنا اتخنقت منك

• يعنى ....ممكن تحلم بيها....بس تقدر تجيبها

• وايه الغريب فى كده

• لا طبعا.....أنت ممكن تحلم بكل العربيات اللى نفسك فيها......لكن مش ممكن تجيب أى عربية منهم....لكن دى....ممكن تجيبها

وهنا بدأ صديقى يشعر أننى غير طبيعى....وبدأ ينظر لى وكأنى أعانى من مبادئ لوثة عقلية

• يا سلام............وايه كمان

• لما تبصلها تحس كده انها....حلوة

• اممم.......وايه تانى

• وتحس كده انك ممكن تعمل بيها اى حاجة انت عاوزها

• اه طبعا...مصدقك.....

• وكمان بحس معاها بالامان

• أكيد..أكيد...دى حاجة معروفة

• ده غير بقى انى ببقى مبسوط وانا سايقها...ودى حاجة متتقدرش بتمن

• طب ثانية واحد وهاجيلك تانى ...على طول......اوعى تتحرك...هاكلم واحد صاحبى فى التليفون

وسمعت صديقى يتصل بالدليل سائلا عن رقم مستشفى الامراض العقلية...ومستفسرا عن وجودقسم خاص بالسيارات

• وسالته بسذاجه

• انت ليك واحد صاحبك هناك والا ايه

• اه اه....بطمن عليه بس

وماهى الا دقائق ...حتى وصل الى شخصان...وغمز صديقى لهما باحد عينه مشاورا تجاهى وجاء الى قائلا

• تعالى يا قناوى (كان يقصد مصطفى طبعا) ...أنا هاجيبلك الجين تو....وهاخليك تسوقها.....انت لوحدك...محدش هايركبها غيرك....وتلف مصر كلها.....تعالى يابنى

• ايوة بس أنا عندى جين تو....ومش عايز واحد تانية....ممكن تجيبلى واجا

• تعالى بس...متخافش

وهجم على الشخصان ...والبسونى البالطو الابيض.....وأخذونى الى سيارة مكتوب عليها....مستشفى الامراض العقلية وركبت معهم وأخذ صديقى سيارتى الجين تو.....قائلا لهم...

• هاحصالكو بعربية صاحبى

• وقاد السيارة وأنا أنظر اليه ....

حتى اذا وصلنا الى باب المستشفى......ودخلنا.....قال صديقى للدكتور

• ممكن أحجز جين تو ....فضى لو سمحت...بس اوتوماتيك الله يخليك

وهنا......أخذنا الدكتور أنا وصديقى الى قسم السيارات......وأخذ هو مفتاح الجين تو....ونادى على الممرض بصوت عالى

• ورينى يابنى العربية دى..................................

[eslam_wega]

هههههههههههههههه
جميلة جدا
المهم طنما خرجت من هناك ولا لسة ههههههههههه
تسلم ايديك بجد استمتعت وانا بقراء القصة الروعة دى

[seeker]

• تعالى يا قناوى (كان يقصد مصطفى طبعا) ...أنا هاجيبلك الجين تو....وهاخليك تسوقها.....انت لوحدك...محدش هايركبها غيرك....وتلف مصر كلها.....تعالى يابنى

• ........................

[tutankhamoun]

عسل يا باشمهندس
أنا الأول أفتكرتك بتتكلم جد ....... و بعدين أكتشفت أنكم في العباسية

[Abo.Mayyam]

ههههههههههههههههههههه

تحفة بجد ضحكتنى والله

صحيح هو التسليم هناك فورى ولا بيتأخروا زى عزو

لو كده حصلكوا على طول

[alfa]

ايه ياعم مصطفى ؟ انا ماقولتلكش المرة الماضية انك تنفع تكتب افلام عربي ..... ام الاجنبي
لا... بجد اسلوبك روعة

[XXXMEMOXXX]

بجد اسلوب رائع
بس ياريت تكتبلنا شعر كده (جمل بسيطه ) عن ال gen 2 نرد بيها على الناس وممكن نحطها في التوقيع كمان
تحياتي يا بشمهندس

[M.Osman]

هههههههه
اسلوب روعة الحقيقة
استمتعت ! :)

[YoussefMostafa]

يا راجل انا فكرتك بتكلم جد وكنت هقولك صاحبك ده دمه خفيف اوي

ههههههههههههه

بس بجد اسلوبك جامد

[DR_EMAD]

أكثر من رائع

تحياتى

[gagareen]

ها ..؟ ماكملتش يا هندسه .. والدكتور عملتوا فيه ايه؟
بجد حلوه برافو عليك

تحياتى

[Ayman_52]

طب كنت بشبه باردوا على حضرتك :))

اصلى انا كنت قاعد فى الجنينه تحت وشفتهم وهما واخدينك فوق ...

هما كده عندنا كل يومين تلاته الاقيهم جايبين لينا 2 , 3 جداد

منورنا والله يابشمهندس ... انت هتلاقينى فى الجناح الملكى فوق فى الدور الــ 5 ... اصلى بقف اتفرج طول اليوم على جينا من فوق

انا مستنيك ... ابقى اطلعلى نسلى بعض واعرفك على بقية الاخوه



..
..

Gen2 Gen2 Gen2

[مصطفى_صديق]

ايه ياعم مصطفى ؟ انا ماقولتلكش المرة الماضية انك تنفع تكتب افلام عربي ..... ام الاجنبي
لا... بجد اسلوبك روعة

اتمنى انها تكن عجبتك...شكرا ليك....

:ta_clap[1]:
بجد اسلوب رائع
بس ياريت تكتبلنا شعر كده (جمل بسيطه ) عن ال gen 2 نرد بيها على الناس وممكن نحطها في التوقيع كمان
تحياتي يا بشمهندس

شعرمرة واحدة ....صعبة عليا دى...خلينا فى القصص القصيرة.....شكرا لانها قرأتها وعلقت عليها

هههههههه
اسلوب روعة الحقيقة
استمتعت ! :)

الحمد لله انها عجبتك...اتمنى تكون ضحكتك

يا راجل انا فكرتك بتكلم جد وكنت هقولك صاحبك ده دمه خفيف اوي

ههههههههههههه

بس بجد اسلوبك جامد

ماهو صاحبى هو انا ..وانا صاحبى.....والدكتور كمان...شكرا

أكثر من رائع

تحياتى

تسلم يا دكتور.....بس اوعى تكون انت نفس الدكتور اللى فى القصة

ها ..؟ ماكملتش يا هندسه .. والدكتور عملتوا فيه ايه؟
بجد حلوه برافو عليك

تحياتى

الدكتور ياسيدى خد العربية ومرجعش لغاية دلوقتى....فى ناس شافوه ماشى فى طريق مصر اسكندرية الصحراوى وناس تانية شافوه فى طريق السخنة ....ومجموعة تانية شافتوه على الطريق الدولى....وفى بعض الاخبار عن وجوده فى مكان سرى فى جبال الهيمالايا

طب كنت بشبه باردوا على حضرتك :))

اصلى انا كنت قاعد فى الجنينه تحت وشفتهم وهما واخدينك فوق ...

هما كده عندنا كل يومين تلاته الاقيهم جايبين لينا 2 , 3 جداد

منورنا والله يابشمهندس ... انت هتلاقينى فى الجناح الملكى فوق فى الدور الــ 5 ... اصلى بقف اتفرج طول اليوم على جينا من فوق

انا مستنيك ... ابقى اطلعلى نسلى بعض واعرفك على بقية الاخوه



..
..

gen2 gen2 gen2

حلو يازميل يبقى نتقابل.....بس ابقى شمر البنطلون علشان الميه

[مصطفى_صديق]

هههههههههههههههه
جميلة جدا
المهم طنما خرجت من هناك ولا لسة ههههههههههه
تسلم ايديك بجد استمتعت وانا بقراء القصة الروعة دى

لسه هناك...قاعد مع ايمن

شكرا ...مبسوط جدا انها عجبتك

عسل يا باشمهندس
أنا الأول أفتكرتك بتتكلم جد ....... و بعدين أكتشفت أنكم في العباسية

منور يا استاذ توت.....ماهو اللى بيتكلم بجد...لازم يروح العباسية
ومبسوط والله انك قرأت الموضوع

ههههههههههههههههههههه

تحفة بجد ضحكتنى والله :ta_clap[1]:

صحيح هو التسليم هناك فورى ولا بيتأخروا زى عزو

لو كده حصلكوا على طول :f_eyeb1[1]:

فورى على طول.....بس انت سلم نفسك الاول........شكرا ياباشا انك قرأتها

[ahmed_h_g]

هموت وأعرف مكان المستشفى
ههههههههههههههههههههه
شديييييييييييييده .......تسلم