خبطت كلب بالعربيه على طريق الصعيد الزراعي

[momenhamdy]

الحمد لله علي كل حال يا استاذ احمد

وقدر الله و ماشاء فعل

و هو دا قدر الي يفكر يركب عربيه في البلد دي

تحياتي ليك يا باشا و طمنا علي العربيه

[XXXMEMOXXX]

حمد لله على سلمتك استاذ احمد
وتمام ان العربيه ماحصلش فيها حاجه جامده عشان الكلاب عظمها ناشف جدا وممكن تدمر وش العربيه بالكامل
ربنا يسترها علينا
حضرتك منين يا استاذ احمد ؟؟

[mimo3000]

الحمد لله انها جت على قد كده قدر الله وما شاء فعل
وكله هيتصلح ويبقى تمام انشاء الله
وربنا يعوضك خير ويحفظلك العربيه ويكفيك شر الطريق

[didooo1]

الحمد لله إنها بسيطة وإنك بخير وربنا يعوضك ..

يا جماعة برضة الكلب يستحق منكم تعاطف أكبر من كده، لوكان فيه كوبري مشاه مكانش حصل كده

[KHALED AYMAN]

احمد ربنا يا باشا ..
الحمد لله على كل شىء ..
انا بسبب كلب بس كبير شويه ..
لبست 11 الف جنيه عشان اصلح العربيه ...

[حاتم سليم]

ويا تري الكلب حصلوا ايه

فى الأنعاش ...

[ayman_83]

علي فكره انا كنت ماشي علي نفس الطريق ولاقيت كلب صغير ماشي بيعرج وكان عماله يشتم ويلعن بس مكنتش عارف ليه دلوقتي عرفت

والف سلامه عليك يابوب

[ahmad alshaaer]

هجاوب على اسئلة الاعضاء

انا اساسا من الصعيد ولكن بسافر بكثره وااكاد مافيش مكان ماروحتوش

ثانيا اللي كانوا بيسألوا على الكلب
اطمنكم انو توفى في الحال ولو ماكانش توفى في الحال كنت من غيظي بعد ماشفت العربيه لما ركنت كنت ضربته بطلقه في دماغه

ثالثا انا رحت اشتريت النهارده فوج ب 125 جنيه
وايمن باشا ربنا يكرمه واللي جمايله مافيش واحد في المنتدى ماعدتش عليه جميله من ايمن حبيب الملايين كان في التوكيل وكلمني وجابلي الكارتيره بتاع الرفرف لحد مكاني في مصر الجديده وكان سعرها 255 جنيه وكمان من نفسه جابلي خصم 15 جنيه ليصبح ثمنها 240 جنيه
ثالثا جبت لمبتين فوج لونهم تلجي الواحده ب 15 جنيه من عند الحاج مصطفى محل المدينه صناعه كوري
ونورهم طبعا ضعيف شويه ولكن شكلهم روعه وطبعا ايمن كان قايلي كده
بس انا حبيتهم كمنظر وقلت يمكن الكلاب تخاف من النور ده مع انه هيلم الناموس على وش العربيه

هههههههههههه

وكمان لقيت العلبه السودا دي اللي كنت بسالكم عليها بتاع ايه
اتضح ان اسمها كواستر باين مش متذكر اللي هي وظيفتها انها بتققل من عادم البنزين اعتقد زي ماقالولي
المهم لقيتها سليمه ولكن مكان مابتمسك في العربيه هو اللي مكسور فقط

رابعا جبت تيل فرامل امامي من المدينه بردو ونوعه ايطالي مكتوب عليه كده ب 175 امامي طبعا وقلت اجربه

نيجي بأه لتغيير الحاجات دي
طبعا غيرتها في مركز الخدمه بتاع البشمهندس مصطفى وكريم
اللي في اخر فيصل
وتم عمل الاتي
قاموا بفك الاكصدام لتركيب الفوج وتغيير اللمبات
وتركيب الكارتيره بتاع الرفرف
وغيرولي التيل علما بأني كده اكون جربت كل انواع التيل اللي موجوده في التوكيل والسوق
ركبت الاف بي كيه مش وحش ويمكن يكون ارخصهم واحسنهم الا لو طلع الايطالي ده احسن بس لسه تحت التجربه
اللي كان راكب قبل ده الريمسا الاسباني قعد معايا حوالي 13000 كم فقط وكان بيصفر احيانا ولكن مش كتير ولكن كان بيعمل حكه كده مش كويسه والفرامل كانت ضعيفه شويتين
وركبت زمان التيل اللي كان في التوكيل اسوأهم
اما بالنسبه للعلبه الكواستر دي ربطناها بحزام زي بتاع الطاسات ده وتمام
واخدوا مصنعيه 80 جنيه بالعافيه

طبعا بعد ده كله اخرج من الموضوع بالاتي
1- ماتجريش في اماكن متوقع منها ان ممكن يعدي شيء مفاجيء قدامك سواء حيوان او انسان او عربيه مع العلم اني والله كنت ماشي لما خبطت الكلب ده اعتقد بالكتير 110 لو ماكانتش 100
2- كل شيء نصيب واقولكم ليه والله ماكنت رايح المشوار ده وترددت واخدت قرار اني مش هروح وجالي ناس وماروحتوش ولكن جالي تليفون تاني ورحت
3-الرزق بتاع ربنا فقط ومش لازم ربنا يرزقك بفلوس حيه كده قدام عينك وفي ايديك
لألأ
الرزق بيجي بكذا شكل زي ماربنا عاوزه بمثال انه لو لاقدر الله انت جالك شوية برد هتروح للدكتور وتدفع كشف وتجيب علاج وتتعب وماتروحش الشغل كل دي فلوس انت صرفتها وماجتلكش كمان فلوس من شغلك فبالتالي لوكان ربنا رزقك و[اكد على كلمة رزقك وماجالكش البرد كنت هتوفرلك بتاع 300 جنيه
من مثالي ده انا ربنا ماكانش كاتبلي رزقي ده واللي هو مثلا 700 جنيه تقريبا في خبطه زي دي واللي هي كمان ممكن كانت كلفتني 15000 جنيه لو كانت الخبطه جات جامده شويه ( مع العلم اني مش مأمن وعربيتي كنت شاريها كاش وذلك لان كثير من الناس الافاضل شككوني في ان التامين في حرمه) لاني مجرب خبطة كلب بالعربيه بتعمل ايه ولكن من عفو الله عني اني حاولت انحرف يسارا شويه عشان اجيب الكلب في جمب واحد وكمان انه كان صغير مش كبير
4-الحسد مذكور في القران والسنه وانا حاسس انه كان كده لاني يوميا بتعرض للحسد وبسمعه في ودني ووللاسف ماقرتش اي معوذات اليوم ده وتهاونت
5- فعلا دعاء السفر مهم وزي ماقالت الاخت ميرا مار
الدعاء الجميل ده فعلا مهم جدا
6-اتمنى من الله ان يسترها علينا جميعا
واشكركم على تعاونكم معايا
ووالله بحبكم كلكم في الله من غير ماشوفكم واتمنى ان ربنا يدوم بيننا الامل والمحبه والاحترام

اخوكم احمد الشاعر

تحياتي

[eslam_wega]

الله ينور عليك فى الرد دة يا احمد انا استفدت كتير منه

[saryrabie]

الحمد لله على كل حال يا تويتي
وقدر الله وماشاء فعل
وفعلا اهم حاجه سلامتك

لكن بجد يا جماعه الجين 2 محسوده
انا من اول مجبت الجين 2 وعلطول لازم العربيه يحصل فيها حاجه

يالا الحمد لله على كل حال

مع خالص تحياتي

[mfhabib]

الكلب برضك روح . بس حياة الانسان اغلي

[eslamkasem]

الله يرحمه ...والف حمدلله علي سلامتك

[MeSho_Evo]

حصلت معانا قبل كدة بس كان كلب كبير وعملاق

والخسائر

خدوش في الاكصدام و الفوج الشمال ساب

وفي دعامات صفيح كدة ورة الاكصدام اتعجنت

و الكلاكس اتكتم وحوالي 4 كلبسات اتكسروا من اللي بيثبتوا الاكصدام

[powerofhelll]

الحمد لله انك بخير

[tamer_aj]

يا ريت تقولنا جيبت الفوج بكام؟

و الحمد لله علي سلامتك