معايا 20 ألف و عايز اشترى برسونا تقسيط

[Medoz100]

السلام عليكم ...
أنا معايا 20 ألف جنية و عايز اشترى برسونا بالتقسيط لإن بصراحة العربية دى بعشقها ...
بس المشكلة انى مش عارف اروح فين و اعمل ايه بالتفصيل عشان اشتريها ...
ياريت لو حد يقدر يفيدنى فى الشراء بالتقسيط مع العلم ان كل اللى معايا حاليا 20 ألف ...

و ألف شكر ........

[ahmed_h_g]

يا ريت تزود المقدم شويه علشان ممكن متلاقيش حد يقبل المقدم ده ولو لقيت هتلاقى القسط كبيييير جدا" ... شوف كونتاكت كار أو عز العرب أسعارهم كويسه ...

[rony]

ContactCars

[XXXMEMOXXX]

شوف لو حضرتك اعمال حره ولا موظف عشان هتفرق في المقدم والضمانات وكل حاجه
وياريت فعلا لو تزود المقدم عشان كده هيبقى المقدم كبييير وكمان العربيه هتكون وقعت عليك بسعر خيالي

[Abo.Mayyam]

بنك التمويل المصرى السعودى بيقبل 18% مقدم وتقسيط لغايت 7 سنين

أو بنك فيصل بس لازم 2 ضامن يكون شغالين فى الحكومة ومرتبهم يغطى القسط

وربنا يوفق

[mnabil1980]

أنا قريت هنا فى المنتدى ان بنك ناصر الاجتماعى كويس و بيقسط بفايدة 6 %

[ahmed_h_g]

حضرتك تقدر تدفع كام فى الشهر ولمدة كام سنه ؟؟؟
وعايزها مواصفاتها أه ؟

[Abo.Mayyam]

بنك التمويل المصرى السعودى بيقبل 18% مقدم وتقسيط لغايت 7 سنين

أو بنك ناصر الإجتماعى (مش فيصل) بس لازم 2 ضامن يكون شغالين فى الحكومة ومرتبهم يغطى القسط

وربنا يوفق

أنا قريت هنا فى المنتدى ان بنك ناصر الاجتماعى كويس و بيقسط بفايدة 6 %

أسف بنك ناصر الإجتماعى مش فيصل
فيصل سفاح ومش هينفع معاك. تقريبا 35% مقدم

ربنا يوفقك للخير إن شاء الله

[mby]

تجربتي مع بنك ناصر

أنا قريت هنا فى المنتدى ان بنك ناصر الاجتماعى كويس و بيقسط بفايدة 6 %

تجربتي مع بنك ناصر
بنك ناصر فائده 6% في السنه واقل مقدم 15%
بس لازم 2 ضامنين موظفين حكومه كل واحد مرتبه يساوي القسط او اكتر(ممكن اي عدد من الضامنين المهم مجموع المرتبات تساوي ضعف القسط ) او تحط وديعه ب50% من اجمالي الدين ( الباقي بعد المقدم +الفوائد) في بنك ناصر نفسه او ودائع في بنوك اخري تساوي 60% من اجمالي الدين .
لو المشتري موظف حكومه ومرتبه يساوي القسط ينفع ضامن واحد
لو المشتري صاحب عمل وعنده بطاقه ضريبيه وسجل تجاري له حلول اخري لكن لم ادرسها لعدم تطابق الحاله معي.
لو عايز برسونا كامله اتوماتيك وحصلت علي عرض السعرمن الوكيل او المعرض ب89000 بعد الخصم مثلا
يكون المقدم =89000*100/15=13350 جنيه + شويه مصاريف ادرايه
الباقي (الدين بدون فوائد) =89000-13350 = 75650 جنيه
يضاف لها مبلغ تامين علي الحياه مره واحده يتوقف علي سن المشتري ومده التقسيط تقريبا في حدود 3000 جنيه =75650+3000=78650 جنيه
لو هتقسط علي 5 سنين مثلا
يكون اجمالي الفائده =78650*100/6*5( عدد سنوات التقسيط)=23595 جنيه
اجمالي الدين =78650+23595 =102245 جنيه
القسط الشهري =102245 /60 شهر=1704 جنيه
الحقيقه ان دفعت 14000 مقدم والقسط 1709 في 5 سنوات
ويعتبر هذا البنك هو الاقل في الفائده والاقل في التامين مع ملاحظه ان التامين في البنوك الاخري علي السياره ويشمل الحوادث والسرقه وهو هي حدود 3% من ثمن السياره بالكامل سنويا اما التامين في بنك ناصر علي حياه المشتري بحيث لو توفي في فتره التقسيط لا يتم مطالبه الورثه بالاقساط ولو حد عايز نوعيه التامين الاخري(علي السياره ) يعمل وثيقه تامين علي السياره مع ائ شركه تامين منفردا عن البنك
اتمني اكون قدرت افيدك

[Medoz100]

معايا 20 ألف جنية و عايز اشترى برسونا قسط

انا عايز اشترى البرسونا الـ base line مانيوال ...
اللى سعرها 79 ألف جنية ...
و اقدر ادفع فى الشهر لحد 1500 جنية
و بالنسبة لبنك ناصر الاجتماعى اروحله على طول والا لازم اروح لمعرض سيارات ؟
ياريت حد يقولى الخطوات بالتفصيل ...
و آسف على الإطالة

[someone24]

جرب عبد اللطيف جميل ليه معرض إسمه العالميه ف المهندسين تقسيط مباشر من غير بنك
أنا جيب منه