صيانة ال الاربعين العجيبة

[aapaap855]

السلام عليكم ورحمة الله وبركاته
بكل اختصار احب اعرفكم بنفسي الاول
انا اسمي عبدالفتاح
معايا Gen 2 2008 auto Black
كنت بشارك كتير زمان بس للاسف انقطعت فترة واديني راجع تاني (رجعت لصوابي)
الموضوع : صيانة الاربعين الف كيلو (في سنة بالظبط one year )
اليوم: 5-12-2009

بداية الموضوع اتصلت كالعادة عشان احجز معاد الصيانة وحددت المعاد السبت الي قبل العيد وبدات احكي مع الراجل على المشاكل الي عندي في العربية
1- الباب الي ورايا مبيفتحش مع السنتر.
2- المفاتيح مبتفتحش السنتر (طبعاً بتفتح قدام بتوع التوكيل كالعادة ويطلع منظرك وحش)
3- مثبت السرعة مش شغال.
4- المالتي فنكشن كالعادة بيعلق. (مع انوا اتصلح الصيانة الي فاتت) بس الفرق ان الزراير اليمين كانت بتعلق بس بعد متصلحت الزراير الشمال هية الي باظت.

وبالصدفة بسال هية الصيانة هتتكلف كام (الراجل الله يكرموا اداني السعر في العضل (اصل انا صيدلي متاخذونيش) 1300 جنيه فقط لا غير

انا متعود اني بدفع 300 400 مش 1300 مرة واحدة .
المهم خدت الصدمة وسالتو انتوا بتغيروا ايه عشان ادفع 1300 قالي :
1- زيت الفرامل
2- زيت الفتيس الاوتوماتك
3- البوجيهات
4- فلتر البنزين
5- فلتر الهوا
6- فلتر الزيت
7- مية الرادياتير

قلت ماشي بس شوفلي بقة حجز اي يوم سبت في شهر 12 عشان اكون قبضت المرتب(اصل الشهر دة كان فيه اضحية كل سنة وانتو طيبين) قالي في يوم 5-12-2009
اكدت الحجز ورحت النهاردة من الساعة 9 كنت هناك (كنت تاني عربية في الطابور)
قابلتني مهندسة الاستقبال :
اسمك ايه؟ جاوبت عبدالفتاح
اسمك مش موجود(صدمة جميلة) . انتا جاي تعمل صيانة ايه . قلتلها 40 الف .
قالتلي (كانت متاثرة بجد) كان نفسي اساعدك وكان نفسي اسمك يكون موجود
معلش استنى الي حجزلك لما ييجي ؟
استنيت عشر دقايق
بكل ذوق المهندسة قالتلي روح للمهندس الي هناك دة وقولوا عالى حصل (طبعاً انا رايح ومدايق وبجهز الكلام الجميل الي بيتقال في المواقف دي) انتو توكيل تعبان عشان انا حجزت والكلام الفاضي دة
روحت قبل متكلم قالي يا باشا العربية هندخلهالك دلوقتي حالن بس مليني الحاجات الي فيها عشان مش موجودة معانا
رصيتلو الرصة الي فوق دي وانا عارف ان نصها مش هيتعمل(زي الصيانات الي فاتت)
قولتيلو المالتي فنكشن (قالي في شحنة جاية في يناير استناها)
قولتلو هستلم امتى؟ قالي الساعة 4.30 (عرفت اني هستلم كالعادة على 5.30 )(زي الصيانات الي فاتت برضو)

بخبرتي السابقة مع الصيانات (من اول 1000 مروراً ب ال 5000 ثم ال 10000و 20000و30000) كنت مجهز عدة الشغل بتاعتي
شنطة فيها اللابتوب وسماعات ودن وفلاشة عليها افلام جديدة والموبايل مشحون. (لزوم تضييع الوقت)
اتفرجت على فيلم لحد الساعة 12 وبعدين صليت الظهر ورحت داندي مول اكلت وبعدين دخلت سينيما (بضيع وقت بقى)
رجعت الساعة 3 وانا زعلان اني هستنى كمان ساعتين.
طلعت اللاب توب بتاعي ولسة هفتح فيلم جديد لقيتهم بينادوا على اسمي
انا قولت في حاجة بايظة وهيسالوني تتغير ولا لاْ(زي الصيانات الي قبل كدة برضو)
المفاجئة انهم قالولي ان العربية خلصت والمفاجئة الاكبر انهم قالولي ان كل حاجة اتعملت والغريب اكتر واكتر واكتر
ان في حاجات مقولتلهمش عليها عملوها هية كمان

انا صعقت
ومسدقتش
لميت اللابتوب في الشنطة وجريت ادفع قبل ميرجعوا في كلامهم
خرجت من التوكيل وانا مش مصدق الصدمة (الصدمة دي كانت في الوريد المرادي)
جربت كل حاجة شغالة (طبعا مجربتش جوة التوكيل يحسن يرجعوا في كلامهم)
المساحات كانت بايظة بقت شغالة
كان في لمبة محروقة غبروها
الريموت شغال
مثبت السرعة شغال
احمدك يا رب

بجد انا بحيي التوكيل المرادي على مجهودهم الرائع وبجد لو فضل التوكيل على كدة هيبقى اجمد توكيل في مصر

طولت عليكوا انا عارف بس قولت احكيلكو الموضوع بالتفصيل

انا على فكرة قابلت ناس من نايلموتورز بس للاسف معرفهمش يا ريت الي كان موجود النهاردة يقولي عشان نعرف بعض
شكرا

[XXXMEMOXXX]

الف مبروك على الصيانة وعقبال الــ 100 الف على خير ان شاء الله,,
وفعلا قليل اللي شكر في التوكيل ويارب يستمر على المستوى دا على طول .
تحياتي

[rony]

مبروك علي التجربة الجميلة دي :b4_388:
عقبال كل مرة يا رب

[midooo2002]

انا على فكرة قابلت ناس من نايلموتورز بس للاسف معرفهمش يا ريت الي كان موجود النهاردة يقولي عشان نعرف بعض
شكرا

ألف مبروك يا معلم أنتا بسطتني جدا أصلي كنت هناك النهرده و بحجز عربية المستقبل. أنا أسمي محمد فرج وكنت لابس لبس بني.

[Raul_7]

أصلي جداً و الله. :)

[hanyetsh]

1000 مبروك وعقبال صيانة ال100000

[Osama.shihata]

مبروك الصيانة الجميلة دى وعقبال 200000
وربنا يحفظهالك

[Abo.Mayyam]

ألف مبروك الصيانة يا فندم وربنا يباركلك فى جينا

[ahmed_h_g]

تانى تجربه ايجابيه مع التوكيل واليومين دول كمان... أحمدك يا رب
الف مبروك وعقبال ما تعمل صيانة ال300000 ان شاء الله ... متفتكرش ان ال300 الف دول مجامله لا والله
أنا امبارح أجرت عربيه لايونسيل (صينى ) عدادها عامل 325000 كيلو وما شاء الله الموتور زى الزيرو بس الحاله العامه مش ولا بد علشان صينى طبعا" موديل 2006
ربنا يباركلك فيها ويبعدلك عنها الشر ان شاء الله .

[khaledmontero]

1000 مبرووووووووك يا رب دايما يفضل احسن

[ahmad alshaaer]

مبرووووووووووك الصيانه 40000 كم
بس انت لسه بدري لما تجيبني انا بلعب في ال 70000 كم دلوقتي
واستنى بأه 2400 جنيه صيانة ال 60000 كم

ااااااااااااااه ياقلبي فكرتني ليه

بجد ربنا يباركلك وعقبال كل الصيانات تكون راضي عنها وربنا يباركلك في عربيتك

تحياتي اخي الكريم

[aapaap855]

شكرا يا جماعة على الردود الجميل دي
تويتي باشا وحشتتني جداً

[khpopo]

الف مبروووك الصيانه وعقبال كل صيانه تبقى احسن من الى قبلها
ربنا يوفق

[ahmedsiyam]

كلام جميل و مشجع ربنا يبارك فيها ان شاء الله

[tutankhamoun]

ما شاء الله ..... أيه الناس الحريتة دي !!
40 ألف في سنة ........ و تويتي 70 ألف في سنة ...
ما شاء الله ربنا يباركلكم يا جماعة في عربياتكم

==========================
دكتور عبد الفتاح ....... ربنا يباركلك يا باشا في عربيتك و مبروك الصيانة على خير و الأهم أن كل حاجة أنت كنت عايز تعملها عملوها في التوكيل ..... يعني فيه تحسن ... ما شاء الله .
و برضه بنشكرك على توصيلك للمعلومات الأيجابية زي ما لكنا بندخل نشتكي ...

و على فكرة بمناسبة التحسن في مستوى الخدمة
فيه يا جماعة تقريبا 4 كوريك هاتدخل الخدمة قريب علشان الصيانات السريعة اللي مفيهاش فك الموتور .
زي تغيير الزيت ... و تربيط العفشة و الكشف على العربية ...

و الورشة الكبيرة اللي عرفته أنها إن شاء الله هاتكون مخصصة للصيانات الكبيرة زي صيانة 60 ألف و تغيير حاجات محتاجة فك زي أسطوانة الدبرياج و السيور و خلافه .

ربنا يهدي عز العرب