واجا ولا برسونا

[AbuHusam]

يا جماعة أنا كنت في معرض العجوزة النهاردة.. وشفت البرسونا 2010 والواجا 2009 علشان الـ 2010 لسة ما جاتش..
أنا عاوز رأيكم في الآتي:
1- لاحظت إن تقفيل البرسونا أحسن من الواجا (مع ملاحظة فرق سنة الموديل):
مثلاً تبطين غطا الشنطة مش موجود في الواجا.. وكمان فيه سلك ظاهر وماشي جنب دراع غطا الشنطة مع إنه كان ممكن يمر من داخل الدراع المجوف.. في البرسونا مش ظاهر خالص.. كمان الموتور في البرسونا متحزم من فوق بقضيب عرضي واصل بين الرفرفين من مكان تثبيت المساعدين.. علشان تثبيت مقدمة العربية مع بعضها بالعرض.. في الواجا مش موجود.. شكل حوض الموتور وتوزيع المكونات فيه مش عارف ليه حسيت إنه مرتب ومنظم في البرسونا عن الواجا.. أكرة باب السائق في الواجا بتعلق.. بتفتح لكن الدراع الصغير اللي انت بتحركه بيفضل متعلق ثواني قبل ما يرجع تاني مكانه.. ومسؤول المعرض قالي ده من تسريب مياه الغسيل داخل الباب.. طبعاً تفسير أسوأ كتير من إنها بتعلق.. لأن ده معناه كارثة في الأكر أو الإزاز أو السنتر أو كل دول بعد كام غسلة للعربية.. إذا كانت لسة في المعرض وحصل لها كدة..
2- في المقابل الواجا أوسع.. فرق بسيط قوي في عرض الكنبة الخلفية.. وفرق أوضح شوية في المسافة الطولية علشان في البرسونا الشنطة أعمق فضاغطة على الصالون وواخدة من المسافة بين السائق أو الراكب الأمامي والكنبة الخلفية فضيقة حوالي 10 سم عن الواجا..
وكمان الواجا أعلى قليلاً عن البرسونا.. يمكن العتب اللي في البرسونا مخليها تبدو أقل في الاترفاع لكن الفرق واضح أكتر في مقدمة العربية.. البرسونا بتصميمها تلاقيها مايلة شوية ناحية الأرض من قدام.. صحيح الرفق بسيط قوي يمكن ما يزيدش عن 2 أو 3 سم لكنه يفرق لصالح الواجا خصوصاً إن المقدمة دي اللي فيها الموتور يعني أخطر جزء بيقابل مطبات وحجارة وبلاوي في شوارعنا..
3- فيه حاجات تانية أنا مش عارف أحكم عليها.. زي مكونات وتصميم العفشة.. في الموديلات السابقة للواجا كانت نسخة من ميتسوبيشي.. موتور وعفشة وفتيس ومكونات أخرى.. دلوقتي الموتور كامبرو لكن هل بقية المكونات لسة ميتسوبيشي؟؟ يعني عفشتها والمساعدين وتيل الفرامل أو الجنوط وغيره لسة ميتسوبيشي؟ ولا بقت نسخة من الجين والبرسونا زي الموتور؟ المسألة دي مهمة علشان قطع الغيار ومدى انتشارها.. انتو طبعاً عارفين إن حاجة الجين والبرسونا دلوقتي موجودة كتير.. أما الواجا فالعربية نفسها مش منتشرة.. فلو قطع غيارها زيهم يبقى شيء رائع.
4- أنا دورت العربية وسبتها دايرة حوالي 7 دقايق ولاحظت إن صوت الموتور مسموع حتى بعد ما العربية سخنت.. صحيح الصوت قل شوية بعد 4 دقايق تقريباً.. لكنه برضه مسموع وواضح من جوا العربية والإزاز كله مقفول.. والأهم إن فيه زنة أو ورررة غريبة حسيتها بوضوح ومسمعة في الكرسي كمان.. والمسؤول اللي في المعرض بقى مش عارف يقولي عليها إيه.. أول ما دورت العربية قال لي علشان لسة بتسخن.. وبعد كدة لما الصوت قل شوية لكن الورررة فضلت موجودة اضطر يقولي ده بس علشان المكان هادي وساكت فالإحساس بالصوت وذبذبة الموتور
عالي.. طبعاً كان رد مش مقنع.. هل فيه حد عنده معلومة عن الحكاية دي؟

أجو الإفادة يا جماعة علشان أنا رحت معرض العجوزة وشبه مقرر إني أحجز برسونا ولما شفت الواجا بصراحة غيرت رأيي لأني لقيتها فخمة جدا ومش كلاسيكية قوي زي ما كنت متخيل أو زي ما باشوفها في الشارع.. بالعكس أنا شفتها بي إم.. بدون مبالغة أنا حسيت إني واقف قدام بي إم ولما قعدت فيها زاد إحساسي بالفخامة وإني راكب عربية كبيرة في الحجم والمقام.. مع إني لسة شايف برضه إن البرسونا أشيك وشبابية أكتر وانسيابية..


معلش أنا طولت عليكم.. لكن أنا حيرتي زادت خصوصاً إن اتساع الواجا ميزة علشان أنا معايا زوجتي وثلاث أولاد بيكبروا بسرعة (أسرع من بقية الأطفال!!!) فهل ملاحظاتي على تقفيل الواجا أو بالأصح الاهتمام الواضح اللي شفته في تقفيل وإتقان البرسونا صحيحة؟ وتستاهل إني أتنازل عن الفرق البسيط في الاتساع وآخد البرسونا؟ ولا أستنى الواجا 2010 وأشوفها يمكن يكونوا حسنوا تصنيعها وتقفيلها زي ما عملوا في البرسونا؟ وهل حد يعرف هي نازلة إمتى؟ علشان في التوكيل قال لي مش عارفين والموجودة (2009) عليها تخفيض 3000.. ففهمت إنه مش عاوز يقول لي الجديدة نازلة إمتى..
ما رأيكم يا وحوش البروتون.. برسونا ولا واجا.. وإيه الفروق بالتفصيل بعد إذنكم وأشكركم مقدما..

[momopersona]

والله بوص انا ماعرفش الواجا اوى الصراحة بس معلوماتى ان هى فئة اعلى من البرسونا لكن
قطع غيار اغلى : لان البرسونا نفس قطع غيار الجين 2 بالظبط ولو حسبت العربيتين كعربية واحدة هاتلائيها منتشره اكتر بكتير
سعر اعادة البيع احسن : طبعا بسبب الانتشار وشهرة الجين2 وثقة الناس فيها فبالتالى وثقو فى البرسونا لانها جين2 سيدان
موضوع التقفيل : اعتقد خامات التابلوه بتاع الواجا احسن بس البرسونا حلو برده وبيعيش
الاداء : اداء البرسونا احسن عشان وزنها اقل مع نفس الموتور واكيد انت عارف الجين 2 مشكله
وسع البرسونا : هى مش ديقة بس الواجا اوسع فعلا
انا رأيى فى البرسونا ان هى عربية ممتازة بجد وسعرها جامد جداااا
وانتظر رأى الواجاوية

[hesham_soaida]

لو يا سامح أكتر شئ مقلقاق من الواجا التقفيل, فتأكد ان العربية تقفيلها ممتاز
بالنسبة للعفشة , فهي انجليزي ولو لفيت شوية في المنتدى حتلاقي كل تفاصيل
العربية
بالنسبة لصوت الموتور أعتقد ان موتور الكامبرو هو صوته كده, وصوته عاجبني انا شخصيا
بالنسبة لقطع الغيار, معنديش لسة خبرة في الموضوع دا, وبصراحة محاولتش اسأل
بالنسبة للموديلات انا شفت في المنتدى ان في ناس ابتدت تستلم الواجا م 2010 وحتى لاحظت ان فيها الشنطة بتفتح بالروموت, عكس موديل 2009
أما بالنسبة لموديل 2009 ,انا اشتريتها من 3 شهور من العجوزة بخصم 4000 , وسمعت ان الخصم وصل 5000 جنيه
في الاخر الواجا والبيرسونا ممتازين وانت الوحيد اللي ممكن تقرر انهي انسبلك

[islamnabil]

انا حقولك وجهة نظري و ليه انا اخترت الواجا
الواجا الصالون بتاعها من جوه فخم جدا و بيديك احساس عالي بالفخامة بعكس صالون الجين و البيرسونا اللي بيديك احساس رياضي
البيرسونا اجمل من الخلف لكن الواجا اجمل من الامام و من الداخل
طبعا الاتنين نفس الموتور لكن البيرسونا فيها الفلتر الجديد iafm وده بيزود السحب ومش موجود في الواجا لكن ده مش معناه ان الواجا سحبها ضعيف
بالعكس انا شايف سحبها كويس جدا
الواجا الفل اوبشن فيها ebs و مش موجود في البيرسونا
الواجا عائلية و كلاسيك و تديك احساس عالي بالفخامة
في ميزة في البيرسونا دلوقتي ان موجود الوان كتير لكن الواجا مافيش غير الاسود او الفضي
انا كان نفسي في لون تاني لكن اخترت الاسود و هوا جامد جدا عليها
في النهاية انا ارتحت للواجا و حبيتها اكتر لان نقطة الصالون فرقت معايا جامد
وطبعا لازم انت اللي تحدد بناءا على اولوياتك و تفضيلاتك
و ربنا يوفقك لما فيه الخير

[AbuHusam]

بالنسبة للعفشة , فهي انجليزي

هل معنى كدة إنها نفس عفشة البرسونا؟ طب إزاي وأبعاد العربية مختلفة؟ ولو مش زيها قطع غيارها موجودة ولا لأ؟

في ناس ابتدت تستلم الواجا م 2010 وحتى لاحظت ان فيها الشنطة بتفتح بالروموت, عكس موديل 2009

أول مرة أسمع إن 2010 موجودة.. آخر موضوع عن استلام الواجا بريميوم كان 2009.

أشكرك على اهتمامك

[AbuHusam]

الواجا الصالون بتاعها من جوه فخم جدا و بيديك احساس عالي بالفخامة بعكس صالون الجين و البيرسونا اللي بيديك احساس رياضي والبيرسونا اجمل من الخلف لكن الواجا اجمل من الامام ومن الداخل

معاك حق 100%100

الاتنين نفس الموتور لكن البيرسونا فيها الفلتر الجديد iafm وده بيزود السحب ومش موجود في الواجا

حضرتك متأكد؟؟؟؟؟؟؟

الواجا الفل اوبشن فيها ebs و مش موجود في البيرسونا

[justify][justify]دي معلومات جديدة ومهمة جدا.. أنا كنت فاكر إن كل حاجة متطابقة.. وإن الفرق بس في الشكل والتصميم مش في الأوبشنز خالص.. حضرتك متأكد من المعلومتين دول؟؟؟؟ الكلام ده لو صحيح تبقى الواجا المفروض تبقى أرخص من كدة.. ثم إن الموتور الجديد تم تطويره بشكل عام وما اعتقدش إنه موجه للبرسونا أو الجين فقط.. وكمان الواجا فيها باركينج سينسور يبقى إزاي ما فيهاش abs.. مش منطقي ولا إيه
أتمنى تقول لي رأيك أكتر في سحب العربية أنا باحس البرسونا أكتر انسيابية وقابلية للتحكم علشان أبعادها أقل.. فهل بتشعر بالفرق ده في الواجا؟
أشكرك كثيراً[/justify][/justify]

[Eng. Rafy Samy]

انا اخترت الواجا .. ليه ده موضوع طويل لاني كنتر بقارن بينها وبين البيرسونا و الاوبترا والصني والنوبيرا وطبعاُ من الموديلات دي كان اهم حاجة عندي اني ادفع فلوس واخد مقابها امكانيات واهم حاجة عندي كان الامان

انا حاسس من كلامك انك ميال اكتر للبيرسونا... على العموم العربيتين ممتازين عن تجربة الاثنين والمقارنة بينهم صعبة لقرب امكنياتهم من بعض تكاد تكون واحدة.
بس احب ااكد ان تقفيل الواجا افضل من البيرسونا بشهاده ملاكها وكل الخبراء في البروتون حتى التوكيل.

على العموم شوف واجا تانية غير اللي انت شفتها دي وقارن بينهم تاني وجرب قعد جوة العربيو وشوف احساسك بيهم هما الاتنين ايه.
بس بلاش تاخد موديل 2009 الموجود دلوقتي لان في اوبشن ناقصة وي مثلاً فتح الشنطة من الويموت موجود في 2008 ومش موجود في 2009 ده اللي انا اعرفة بس معرفش لو في حاجة تانية ناقصة ولا لاء

على العموم الاختار الاول والاخير ليك ولازم تكون مرتاح نفسيا للعربية اللي حتختارها لانها حتكون عشرة عمر
بالتوفيق ان شاء الله
تقبل تحياتي

[islamnabil]

حضرتك متأكد؟؟؟؟؟؟؟

انا متأكد ان الواجا مافيهاش الفلتر الجديد

[justify][justify]دي معلومات جديدة ومهمة جدا.. أنا كنت فاكر إن كل حاجة متطابقة.. وإن الفرق بس في الشكل والتصميم مش في الأوبشنز خالص.. حضرتك متأكد من المعلومتين دول؟؟؟؟ الكلام ده لو صحيح تبقى الواجا المفروض تبقى أرخص من كدة.. ثم إن الموتور الجديد تم تطويره بشكل عام وما اعتقدش إنه موجه للبرسونا أو الجين فقط.. وكمان الواجا فيها باركينج سينسور يبقى إزاي ما فيهاش abs.. مش منطقي ولا إيه
أتمنى تقول لي رأيك أكتر في سحب العربية أنا باحس البرسونا أكتر انسيابية وقابلية للتحكم علشان أبعادها أقل.. فهل بتشعر بالفرق ده في الواجا؟
أشكرك كثيراً[/justify][/justify] [/QUOTE]

انا عندي ABS لكن الصراحة مش متأكد موجود في البيرسونا ولا لأ
وبعدين الفلتر الجديد مش مؤثر خالص على السحب
زي ماقلت لحضرتك العربية سحبها جامد جدا
لدرجة انك لو على الاول او التاني او حتة التالت و عديت 4000 RPM بتحس ان العربية عايزة تنط من مكانها
انا الحمد لله مقتنع تماما بالعربية و كل يوم اعجابي بيها و ارتياحي ليها بيزيد و خصوصا لما سافرت و عرفت يعني ايه ثبات على السرعات العالية

تحياتي

[AbuHusam]

يا جماعة أنا اتصلت من دقايق بتوكيل الصحراوي علشان أسأله فيه واجا 2010؟ وزفوجئت بإن اللي بيرد عليا هو الأستاذ/ محسن صالح.. الحقيقة أول مرة أكلمه.. راجل في منتهى الذوق فعلاً..
المهم إنه قال لس واجا 2010 ما نزلتش.. ومش قبل شهر مارس أو أبريل اللي جاي..
المعلومة التانية المهمة إنها فيها abs وفيها كل حاجة زي البرسونا.. بس جاله موبايل وأنا باكلمه فما لحقتش أسأله عن العفشة أو قطع الغيار وهل هي هي ولا مختلفة..
أنا بس حبيت أوضح المعلومات دي اللي جت بالصدفة حالاً..
وفي انتظار آراء السادة أصحاب الواجا أو اللي جربه الاثنين علشان نستفيد..
هل فعلاً الفرق الوحيد بس في الاتساع.. ولا فيه فروق تانية وهل أنا صح في ملاحظتي امبارح في معرض العجوزة إن دقة وإتقان البرسونا أعلى من الواجا؟ ولا إيه؟

[AbuHusam]

أشكرك يا باشمهندس
يعني حضرتك تنصح بالانتظار 4 شهور لما تيجي الواجا الجديدة وبعدين أقرر؟
الحقيقة أنا مش ميال لدي أو لدي.. كل الحكاية إني شايف تقفيل واهتمام وتلافي لعيوب التشطيب في البرسونا زائد شياكة وانسيابية وحجم مش كبير.. مقابل فخامة خارجية وصالون أشيك وتابلوه مريح أكتر للعين (وجهة نظر شخصية) واتساع في الواجا.. يعني أنا أمام ميزات مختلفة عن بعضها..
وكمان فيه حاجات ما اقدرش أحكم عليها .. حاجات فنية شوية.. زي مسألة الذراع الحديد اللي ماسك العربية بالعرض فوق موتور البرسونا.. ويقابلها ارتفاع مقدمة الواجا عن الأرض مقارنة بالبرسونا..
وصوت الورررة اللي سمعتها في موتور الواجا.. للأسف مارضيوش يدورو البرسونا علشان أعرف موجودة برضه ولا لأ..
دي حاجات أنا مش متأكد منها بالطبع.. ومش عارف أنهي أفضل فيهم.. فاهمني يا جماعة؟؟
علشان كدة أنا محتار.. مش مسألة ارتياح شخصي وخلاص.. الاترياح أو عدمه يبقى في الشكل والمظهر .. لكن في النواحي الفنية أو الخامات أو توافر قطع الغيار أو صوت الموتور ..إلخ.. دي محتاجة آراؤكم يا خبراء البروتون..
طيب حضرتك بتقول جربت الاتنين.. ولقيتهم قريبين من بعض.. في الحالة دي هل تشوف إن فارق الاتساع والفخامة اللي في الواجا يوازي فارق الانتشار ووجود قطع الغيار وفرق الإتقان اللي لاحظته في البرسونا؟ لو ده صحيح تبقى الواجا طبعاً.. ولا إيه؟

[hesham_soaida]

يا جماعة أنا اتصلت من دقايق بتوكيل الصحراوي علشان أسأله فيه واجا 2010؟ وزفوجئت بإن اللي بيرد عليا هو الأستاذ/ محسن صالح.. الحقيقة أول مرة أكلمه.. راجل في منتهى الذوق فعلاً..

المهم إنه قال لس واجا 2010 ما نزلتش.. ومش قبل شهر مارس أو أبريل اللي جاي..
المعلومة التانية المهمة إنها فيها abs وفيها كل حاجة زي البرسونا.. بس جاله موبايل وأنا باكلمه فما لحقتش أسأله عن العفشة أو قطع الغيار وهل هي هي ولا مختلفة..
أنا بس حبيت أوضح المعلومات دي اللي جت بالصدفة حالاً..
وفي انتظار آراء السادة أصحاب الواجا أو اللي جربه الاثنين علشان نستفيد..

هل فعلاً الفرق الوحيد بس في الاتساع.. ولا فيه فروق تانية وهل أنا صح في ملاحظتي امبارح في معرض العجوزة إن دقة وإتقان البرسونا أعلى من الواجا؟ ولا إيه؟

انا بعتذر عن معلومة 2010 , اللي عمل لبس ان فيه حد هنا في المنتدى قال انه اشترى الواجا 2010 (من 3 اسابيع)
بالنسبة للعفشة فهي
ماكفرسون
أما التعليق الخلفي فهو متعدد الوصلات

[eslamkasem]

معيا الواجا 2009 عربيه ممتازه جدا وهيا اوتو وعلي فكره العربيه دا انا شديت بيها مع عربيات كتير لغاية اسكودا اوكتفيا والله في اول يوم العيد وبصراحه سبقته كمان وكمان النترا وحاجات كتير العربيه سحبها ممتاز ومع اول كيك دون انسي ان حد يجيبك .

اما من ناحية العفشه هيا اه مش ناعمه بس فيها ميزه ممتازه ان مفيش اي مطب وانا مركب ومحمل ناس اوزان تقيله حكيت فيه والله مشاء الله ,العفشه من تصميم لوتس الانجليزيه الي عمله الكامبرو.

منا ناحية التقفيل طبعا الواجا الخامات بتاعتها انضف بكتير من الجين والبرسونا مش عارف انتا بتقول انها مش عجباك ازاي دا محدش ركب الوجا الا وقالي ياريت خامات الجين والبرسونا كدا

الخلاصه الواجا عربيه فخمه بأداء رياضي
البرسونا عربيه شيك بأداء رياضي

[Eng. Rafy Samy]

في الحالة دي هل تشوف إن فارق الاتساع والفخامة اللي في الواجا يوازي فارق الانتشار ووجود قطع الغيار وفرق الإتقان اللي لاحظته في البرسونا؟ لو ده صحيح تبقى الواجا طبعاً.. ولا إيه؟

اخي العزيز اولاً احب اقرر تاني ان الراحة النفسية للعربية اهم واول نقطة لازم تفكر فيها وده للاسباب الاتية
1- اول لما حتستقر وتختار العربية وتروح تدفع فلوسها وتستلمها حتلاقي انك بتسأل نفسك مليون مرة هل الاختيار ده صح ولا لاء ..؟
2- حتلاقي نفسك ابتديت تراجع كل المقارنات اللي انتع عملتها تاني ولو في حاجة انت مش مقتنع بيها حتلاقي نفسك متردد في اخر لحظة.
3- اختيارك لبروتون بالاخص دليل على اختلاف طريقة تفكيرك عن المعتاد ( الكوري - الياباني ) بس احب ااكد انك بمجرد ما تستلم العربية حتلاقي مليون واحد بيشكك في العربية والتوكيل وقطع الغيار وطبعاً حتلاقي كم مش بطال من الفتيى والقصص الوهمية
4- بعد استلام العربية على خير ان شاء الله ممكن لا قدر الله تلاقي شوية حاجات محتاجة تظبيط ( وده طبيعي جداُ ) في اللحظة دي حترجع تشكك نفسك في الخطوة اللي اخدها وتقول هل اختياري لبروتون كان صح... كل اختياري للبيرسونا / الواجا كان مظبوط.
5- بمجرد امتلاكك للعربية حتبتدي تعمل بينها وبين كل العربيات التانية مقرنات وحتبتدي تلاحظ اختلاف عربيتك عن الباقي وسعتها حترجع تسأل نفسك تاني..

اخي الفاضل تخييل كل هذه المراحل انت تمر بيها وانت غير مقتنع 100% بالعربية اللي انت رشترتها ده حيكون رد فعله ايه عليك وعلى علاقتك بالعربية اللي بتتطلب العناية المستمرة..

بالنسبة لسؤال احب اقولك
1- اكرر تاني الخامات و التقفيل في الواجا افضل من البيرسونا بمراحل ودي حاجة لا يختلف عليها اثنين ((ممكن العربية اللي انت شفتها تكون استثناء )
2- انتشار البيرسونا افضل من الواجا ده حقيقي ولكن الواجا ايضاً موجودة وتنتشر وادي حضرتك بتفكر فيها وممكن تزود انتشرها زي كل اللي بيفكروا في ماركة بروتون وبيختاروا عربية سيدان .
3- الافضلية الوحيدة في الواجا هي "" لا يوجد عيوب تقفيل - ولا يوجد شكوى كبيرة من ملاكها "" (الاغلبية وليس الكل)

بالتوفيق ان شاء الله
تقبل تحياتي

[Eng. Rafy Samy]

في كمان حاجة بعتبرها افضل ( راي شخصي فقط )
1- عدد لمط الاضاءة داخل كبينة الواجا 5 ملط
2- مرايات الجناب اكبر وبتدي رؤية اوضح
3- الرؤية من خلال الزجاج الخلفي اوضح واكبر
4- مستوى علو الشنطة مع المرايات افضل في الروئة والمناورة
5- الكراسي والكنبة اريح في الواجا
6- بالنسبة لاداء او صوت الموتور فملاحظتش فرق في الاتنين نهائي

لو محتاج اي استفسار عن الواجا انا تحت امرك واكيد في حد من عمالقة البيرسونا يقدر يفيدك فيها اكتر مني

[AbuHusam]

من ناحية التقفيل طبعا الواجا الخامات بتاعتها انضف بكتير من الجين والبرسونا مش عارف انتا بتقول انها مش عجباك ازاي دا محدش ركب الوجا الا وقالي ياريت خامات الجين والبرسونا كدا... الخلاصه الواجا عربيه فخمه بأداء رياضي البرسونا عربيه شيك بأداء رياضي

[justify]مش عارف يمكن فعلاً العربية اللي شفتها هي اللي مش كويسة.. أنا فعلاً كنت نسيت أوقل إني لقيت عدادها عامل 84 كم يعني حد مشي بيها شوية..
لكن يفضل سؤال قطع الغيار.. هل لسة هي الميتسوبيشي ولا اتغيرت..[/justify]