بروتون ساجا ... تقرير من غير صور

[mahmoud_magdy]

السلام عليكم ورحمة الله وبركاته
اخواني الاعزاء
المهتمين بالسياره بروتون ساجا
حديثة العهد بالاسواق المصريه
اقدم لكم تقرير عن السياره السالف ذكرها
بناءا على تجربه للسياره لمسافه قصيره ولكن مجديه بشكل كبير
كتقييم مبدأي عن السياره ولكنه ليس التقييم الاخير ان شاء الله

في البدايه احب ان اوضح بعض المعلومات عن السياره


1- المواصفات :-

الابعــاد : 4257 * 1680 * 1502

الوزن : 1035 مانيوال , 1065 اوتوماتـك

حجم الشنطــه : 401 لتــر

قـوة الموتـور : 94 حصان - 6000 دوره

عـزم المحــرك : 120 نيـوتن متر - 4000 دوره

من 0 : 100 كم/ساعه (ثانيه) : 13ث -مانيوال- / 14.5ث -اوتو-

الازاحـه الإجمـــاليـه ـ cc ـ : 1332

اكيـاس الهــواء : 1 للســائـق

حجـم الكـاوتـش : 185/60R14


2- التجهيزات الخاصه بالسياره :-

- امبـلويزر , انـذار .

- تكييـف (بارد & ساخـن) .

- 1 كيس هـوائـى للسـائق .

- باور .

- فانوس فرامــل .

- دعمــات صلــب فى الجوانـب .

- مرايات كهـربائيــه جانبيــه .

- قفـل مركزى .

- ريموت كنتــرول .

- 2 زجاج كهـربائـى امامــى .

- كاسيت (راديو & CD) .

- 2 سماعات اماميــه , 2 سماعات خلفيــه .

- بارك سينـسور .

- جنط رياضى .

- 2 فوج لايت امـامــى (مصابيح شبوره) .

- حامل اكواب .

- مقابض الابواب , المرايات الجانبيه , المصدات -بنفس لون السيــاره .

3- السعر الرسمي للسياره :-
-المانيوال :- 63,900
-الاوتوماتيك :- 69,900


بعد ان استعرضنا مواصفات السياره والتجهيزات الخاصه بالسياره والسعر الرسمي لها
سأبدأ في تقييم السياره بناءا على تجربتها لمسافه قصيره
وكما ذكرت سالفا ان التجربه كانت مجديه بشكل كبير لتقييم السياره

*احب ان اوجه كل الشكر لللاستاذ عبد الرحمن وهو اول من اشترى الساجا واول من قطع مسافة 1200 كيلو متر بها
وتم عمل الصيانه الاولى لها بالتوكيل في الفرع الرئيسي (أبو رواش)

في البدايه توحي اليك الساجا انها سياره ذات تصميم عادي وانها سياره عاديه غير مميزه اطلاقا ولكن بعد ركوب هذه السياره ستشعر براحه مختلفة الشكل
حتى وان كنت تمتلك سياره اخرى من بروتون وبعد التركيز في الشكل العام للسياره من الخارج ستشعر انها سياره مختلفه عن بقية السيارات
فتصميمها بسيط جدا وغير معقد ولكنها في نفس الوقت توحي اليك بشراستها وتخفي عليك ما يختفي في باطنها من قوه وجمال وراحه
نعم انها حقيقه وانا لا ابالغ
فعندما رأيت السياره لاول مره لم تعجبني نهائيا بل انتقدتها داخل نفسي وقلت (ايه العربيه الوحشه دي)
ولكن بعدما رأيتها على الطريق في المرايات الجانبيه الخاصه بسيارتي رأيتها بشكل مختلف وأحببتها وربما هذا هو المعتاد من بروتون
تعشق جميع سياراتها من النظره الاولى او الثانيه ولن تزيد عن ذلك
وعندما قمت بتجربه السياره شعرت بشعور قوي جدا بالاختلاف لا اعلم لماذا

نأتي ل أهم النقاط في الموضوع

تجربة السياره وتقييمها

1- المحرك :-
اول ما نبدأ في تشغيل موتور العربيه لا حظت ان صوت الموتور مسموع ودي طبعا سمه عامه في محركات بروتون من نوعية كامبرو
لكن صوت الموتور اعلى شويه والسبب ان مفيش عازل على الكبوت من جوه
ويمكن عدم وجود العازل مع صوت الموتور بيديك احساس بالقوه

اول ما ابتديت اتحرك بالعربيه لقيت اان في سهوله وسلاسه في التعامل مع دواسة البنزين والفتيس وفي استجابه للموتور مع اول ضغطة بنزين وهنا تنطلق السياره بشكل هادئ ومتزن
اول ما نقلت للنقله التانيه دواسة الدبرياج بقت اكثر سلاسه
مش عارف يمكن اكون اتعودت على العربيه بسرعه ودي حاجه انا مش واخد عليها بس يمكن علشان انا معايا اختها الكبيره جينا

في النقله التالته لقيت ان اتعودت اكتر واكتر والرابعه والخامسه ايضا
واستجابه الموتور بعد كل نقله مع ضغطة البنزين (هايله)
ومحستش ان الموتور مستجبش معايا خالص بالعكس اسجابة الموتور سريعه
وان كان في بطئ في الاستجابه (محستهاش) فهي متوسطه (يعني لا فيراري ولا 128)
اما بخصوص التسارع فمش هقدر احكم بشكل كافي
لان كنا 3 اشخاص في العربيه
لكن في المجمل التسارع كان ممتاز وقتها وكويس جدا ومرضي (انا مش داخل سباق يعني)

2- عزل السياره والتكييف :-
عزل العربيه اقدر اقول عليه متوسط او اقل من المتوسط
قفلت الشبابيك كلها وكنت سامع صوت الموتور وده عادي علشان مفيش عازل
وبرده سمعت صوت الكلاكس ( النقطه دي نبهني عليها أحمد )
صوت الكاوتش مسموع برده ودا عادي ومش مدايق منه خالص ومظنش حد هيدايق من صوت كاوتش عربيه ( أكيد مش هتقدر تمشي من غيره ههههههههه )
يعني العزل مش حلو اوي ولا وحش اوي
مش هتسمع مثلا صوت (فووووووووووووو) طياره ماشيه جمبك
ولا هتسمع واحد بيزعق بصوت عالي اوي كأنه جوه ودنك
لا هتسمعه بصوت منخفض قليلا وكذلك صوت (فووووووو)

اما بخصوص التكييف فأقدر اقول انو كويس جداا
مأثرش بشكل كبير اوي على السحب ودي حاجه غريبه جداااااااااااااا
العربيه مكركرتش مني بعد المطب وانا مشغل التكيف ودي بردو ساعات بتكون غريبه
طبعا مش هقدر اقول التكيف بيسقع ولا لا لان اصلا الجو برد
بس استاذ عبد الرحمن كان اعد في الكنبه الخلفيه وكان حاسس بهواء بارد ودا شئ كويس مبدأيا
لان الجو برد ولا يمكن ان نحكم اطلاقا على التكييف في الوقت الحالي

3- العفشه والثبات والفرامل :-
اكتر حاجه تدايق اي شخص في العربيه عفشتها
بس متخافوش العفشه مش ناشفه اوي زي جينا لالالالالا خالص
ولا طريه اوي لدرجة انك متحسش بالمطب او عين القط او نقره لالالالا خالص
العفشه متوسطه واعلى من المتوسطه كمان
وفي نفس الوقت العفشه مش هتقطم ضهرك لما تاخد مطب جامد او نقره غبيه
ولا هتحس باهتزاز في العربيه وانت بتعدي من على عيون قطط كتير
العفشه متوسطه والاحساس بالبلاوي اللي في شوارعنا متوسط اوي

الثبات
ودي من النقاط المهمه اللي بتخلي الواحد يفكر في العربيه
ثبات العربيه كويس اوي
اخدت منحنى عادي على 80 وكان ثباتها كوييس ومرضي بالنسبالي
بس انا حسيت بالمنحنى وحسيت ان العربيه بتلف وبتتعامل مع المنحنى
بس كان ثباتها كويس
غير عربيات تانيه في مستواها لو ركبتها هتحس ان العربيه لا قدر الله هتتقلب بيك
او عربيه اعلى منها مش هتحس بيها بالمنحنى دا خالص
تقييمي للثبات متوسط

الفرامل
نقطه مهمه اوي برده
للاسف العربيه مفيهاش abs لكن دا ميمنعش ان فراملها قويه واستجابتها سريعه
وتقدر في موقف صعب تلحق نفسك ( ربنا يبعد عننا الشر)
الفرامل ممتازه جداااا

4-السياره من الداخل :-
العربيه من جوه عجبتني اوي
وللعلم دي تاني مره اركبها لكن بشكل مختلف عن المره الاولى
المره الاولى كانت بغرض الاستطلاع والفرجه على عربيه جديده
انما المره دي كان بغرض سواقتها وتجربتها
بصراحه انا حبيت اعدت العربيه من جوه اوي
عالي عن الارض , التابلوه تحس ان حاضنك او بمعنى اخر جاي عليك حاضنك دي احسن تعبير بصراحه اللي ركب مثلا السيراتو هيعرف الكلام ده ( وزي ما قال استاذ سامح الياريس كمان )
ودي حاجه مش وحشه خالص بالعكس انا بفضل الاعده دي اوي تحس انها اعده بمزاج كدا
وفي مقابل ده بقى مش هتشوف الكبوت نهائي نهائي نهائي
لكن بردو حاولت اشوف الكبوت ومعرفتش
وبردو الشنطه مش هتشوفها وهتكون مضطر انك تستعمل الباركنج سنسور وانت بتركن
ودا بالنسبالي شئ مفضل اوي عن اني اركن من غيره

عداد السياره يحتوي على
ار بي ام وعداد سرعات
(وعداد كيلو متر وعداد للرحلات ومؤشر للبنزين ومؤشر لمقياس حرارة السياره وساعه)
(ديجيتال)
العداد شكله حلو ومتناسق
لكن انا شايف ان فيه عيب صغير اوي
وهو اللون الفضي (او النيكل)اللي على العداد من بره ردئ
وحسيت انو مطفي كدا مش بيلمع
معجبنيش بصراحه

فتحات التكييف بقى عجبتني وشكلها حلو

طبعا لا يوجد ولاعه او طفايه في السياره
وده عيب برده المفروض انها عربية مدينه مش عربيه رياضيه
لكن واضح ان بروتون بخيله في الحته دي

مساحات التخزين كويسه ودرج التابلوه ديق شويه لكن طويل
وفي مكان في التابلوه( مكان الايرباج التاني ) مساحته كويس بردو وعميق

الدركسيون تقيل شويه بالنسبالي وينقصه المالتي فانكشن
ويعيب السياره انها مفيش مخدع في الوسط ودي حاجه مديقاني

طول الصالون كويس اوي اطول من الجين
والعرض اقل من الجين حاجه بسيطه
الكنبيه الخلفيه اوطى من الكراسي الاماميه (ياريت يا استاذ عبد الرحمن تصححلي النقطه دي لو غلط)
المرايات الجانبيه كبيره ومناسبه جداااا
والمرايه الوسطى كويسه اوي وفي خاصية التعتيم بس مش ذاتي طبعا

الكاسيت للاسف اوديو فقط ودي حاجه انا شايفها عيب في العربيه
لكن ممكن تغيره
وصت السماعات نضيف اوي وحلو جدا ومن غير زنه لما تعلي الصوت
شنطة السياره ما شاء الله كويسه اوي ومتناسقه مع حجم السياره
وهتكون مناسبه لعائله صغيره وأكيد ممكن تشيل حاجات كتير والله اعلم

5:- جسم السياره الخارجي :-
بعد سؤال استاذ عبد الرحمن في نقطه الصاج لانها فاتت عليا وانا بجرب العربيه
قالي ان صاج العربيه تقريبا زي اللانوس
وصاج اللانوس يمكن يكون مقارب للجين مثلا
وبكدا يبقى الصاج بتاع الساجا مقارب لصاج الجين (استنتاج طبيعي)
ودي حاجه كويسه جدااا لان صاج الجين حلو اوي
مع تحفظي على ضعف بعض اجزاء الكبوت

* عاوز اتكلم كمان في نقطة استهلاك البنزين
بعد سؤال استاذ عبد الرحمن في النقطه دي
كانت الاجابه :- حسبتها مره قبل ما اخلص الالف كيلو
وكان تقريبا 7.8 لكل 100 كم
وده انا بعتبرو معدل كويس للموتور بتاع العربيه
لان الموتور دا بتاع طرق سريعه وسفر وبيوفر في البنزين في السفر بالذات انما جوه البلد
استهلاكه بيزيد شويه

* نقطه كمان عاوز اتكلم فيها
مدى دركسيون العربيه كبير مش زي الجين قصير بما انها عربيه رياضيه
زده هيديك سهوله في الركن مش زي الجين الركنه بتكون صعبه شويه في الاول لكن بعد كدا بتكون سهله

*الخلاصه
العربيه دي من رأيي انها عربيه مدينه
برغم انها ممكن تسافر وهتثبت على الطريق جدارتها وقوتها
وهي عربيه متوسطه تنفع لعائله صغيره تتكون من 4 افراد
وطبعا مش لازم ننسى انها 1300 فاستهلاكها في البنزين كويس اوي

اتمنى انها تثبت نفسها في الفتره اللي جايه لانها تستحق بصراحه
وعجبتني جداااااا

اتمنى ان التقرير يكون محايد
وللعلم انا مش خبير
وخبرتي قليله جدا جدا في مجال السيارات
لكن حاولت واتمنى اني اكون نجحت

* تم الاستعانه بموضوع أ/أيمن
في النقاط الاتيه
1- المواصفات
2-تجهيزات السياره
3- السعر الرسمي
ولمشاهدة صور السياره يرجى الدخول على اللينك الخاص بموضوعه

http://www.nilemotors.net/Nile/107765-new-saga-begins.html

شكرا خاص لاستاذ عبد الرحمن على موافقته بتجربه السياره أشكره شكرا جزيلا
وشكر خاص لاحمد شقيق الاستاذ عبد الرحمن
اتشرفت بمعرفتكم والله

اتمنى ان التقرير يعجبكم
ولا تنسوني من دعائكم بالهدايه والنجاح في الامتحانات
شكرا

[Ayman_52]

تقــريــر رائـــع

واظن انك غطيت اغلب نقـــاط التقييم ... وبجد انا العربيه دى من اول ماشفتهــا حبيتها وحسيت انها ممتازه ...

وكنت مستغرب من الاراء المضاده للعربيه بدون تجربــه

.
.

تقرير مميز ... واحييك عليه بجد ... ونتمنى نشوف تقاريرك المميزه دائمـــا

ربنا يوفقك فى الامتحانات يامعلــم

شكـــــــــــــــرا يامعلـــم

تحيـــــــــــــــــاتـــــى

[Osama.shihata]

ماشاء الله يا محمود
تقرير جميل جدا ومحايد
برافو عليك نقل التجربة بهذا الترتيب المنظم الدقيق

[Raul_7]

أعتقد سعر الأوتو 68 مش 98 ولا ايه ؟

وشكرا عالتقرير الجميل.

[mahmoud_magdy]

تقــريــر رائـــع

واظن انك غطيت اغلب نقـــاط التقييم ... وبجد انا العربيه دى من اول ماشفتهــا حبيتها وحسيت انها ممتازه ...

وكنت مستغرب من الاراء المضاده للعربيه بدون تجربــه

.
.

تقرير مميز ... واحييك عليه بجد ... ونتمنى نشوف تقاريرك المميزه دائمـــا

ربنا يوفقك فى الامتحانات يامعلــم

شكـــــــــــــــرا يامعلـــم

تحيـــــــــــــــــاتـــــى

تمام يا معلم
قولي بقى على النقاط اللي انا مغطتهاش عشان اغطيها ( هي البطانيه بكام دلوقتي ولا اجيب لحاف فايبر )

ماشاء الله يا محمود
تقرير جميل جدا ومحايد
برافو عليك نقل التجربة بهذا الترتيب المنظم الدقيق

شكرا يا استاذ اسامه
الحمد لله ان التقرير عجبك
رأيك مهم بالنسبالي

أعتقد سعر الأوتو 68 مش 98 ولا ايه ؟ :ob_mak1[1]:

وشكرا عالتقرير الجميل.

يا سلام
طيب سعر الاوتو 98 بقى
عشان الاوتو بتاع عربيه فيراري اصلا
عارف ليه وشي مش باين عشان النضاره واكله نص وشي هههههههههههه:10d5c8~1107:
أكيد قريب المشرف هيغيرها ان شاء الله
وشكرا على مرورك يا جميل

[الفرعون]

مليون شكر وتحية تقدير لك أخى محمود أنت والأخ عبدالرحمن
أكثر ماأعجبنى فى التقرير الحيادية التامة والتدقيق فى كل مايشغل بالنا من جميع الجوانب
وعن نفسى أرى أن بعد هذا التقرير الوافى الكافى ان السيارة لاتصلح لى بالمرة
وهذه وجهة نظرى الشخصية لأنى أرى أنها متوسطة فى كل شيىء وأحيانا فى بعض النواحى أقل من متوسط وبالتالى أرى أن سعرها أغلى من كفائتها (والله أعلم)
ويتكرث هذا الأنطباع لو وضعنا فى ألإعتبار التقفيل السيىء الذى أجمع الكل عليه وكذلك التوكيل السيىء وأسعار قطع غياره المبالغ فيها دائما وخصوصا مع موديل فقير مثل هذا أتوقع له عدم الأنتشار (والله أعلم )
وأرجو ألا يغضب منى أخى عبدالرحمن أو أى شارى للسيارة فلولا أختلاف الأذواق لبارت السلع
أكرر شكرى لك أخى على حيادتك التى جعلتنى أحسم أمرى بدون تردد
تقبل تحياتى وتقديرى ودعواتى بالتوفيق دوما فى حياتك وفى أمتحاناتك

[ahmedbakr50]

تقرير رائع جدا بس ناقص شوية بس ياريت شوية صور كمان يبقى فل الفل

[mahmoud_magdy]

مليون شكر وتحية تقدير لك أخى محمود أنت والأخ عبدالرحمن
أكثر ماأعجبنى فى التقرير الحيادية التامة والتدقيق فى كل مايشغل بالنا من جميع الجوانب
وعن نفسى أرى أن بعد هذا التقرير الوافى الكافى ان السيارة لاتصلح لى بالمرة
وهذه وجهة نظرى الشخصية لأنى أرى أنها متوسطة فى كل شيىء وأحيانا فى بعض النواحى أقل من متوسط وبالتالى أرى أن سعرها أغلى من كفائتها (والله أعلم)
ويتكرث هذا الأنطباع لو وضعنا فى ألإعتبار التقفيل السيىء الذى أجمع الكل عليه وكذلك التوكيل السيىء وأسعار قطع غياره المبالغ فيها دائما وخصوصا مع موديل فقير مثل هذا أتوقع له عدم الأنتشار (والله أعلم )
وأرجو ألا يغضب منى أخى عبدالرحمن أو أى شارى للسيارة فلولا أختلاف الأذواق لبارت السلع
أكرر شكرى لك أخى على حيادتك التى جعلتنى أحسم أمرى بدون تردد
تقبل تحياتى وتقديرى ودعواتى بالتوفيق دوما فى حياتك وفى أمتحاناتك

ممكن تكون احتياجات حضرتك للعربيه مختلفه عن شخص اخر
لكن العربيه مش فقيره خالص بالعكس
العربيه فيها كماليات كتيره مش موجوده في عربيات تانيه
ممكن تكون اسأت الفهم في نقطة متوسطه
معنى متوسطه انها من السيارات المتوسطه بالنسبه للشارع المصري
لاهيا عربيه 1600 سي سي مثلا
او عربيه 800 او 1000 سي سي
وهي عربية مدينه
ولما اقول على التقييم متوسط معنى كدا اني مطلعتش بيها السما وقلت عليها احسن عربيه في فئتها
علشان اخلي الناس تفكر فيها وفي غيرها
وكمان متوسطه لان معايا عربيه اعلى منها ويمكن ده اثر عليا في التقييم
واي عربيه في الفئه دي لازم يكون تقييمها متوسط
لانها في الاساس سياره صغيره محرك صغير وجسم خارجي صغير واداء متوسط
في مقابل ذلك توفير في استهلاك البنزين
ودي النقطه اللي بتحاول كل الشركات انها تلعب عليها وتقلل من استهلاك السياره للبنزين
مينفعش اقول عليها عربيه من الاخر ومفيش غيرها
ياريت حضرتك تكون فهمت كلامي
وغريبه ان حضرتك قلت ان العربيه فيها عيوب تقفل
مع انها مع استاذ عبد الرحمن زي الفل ومواجهتوش غير مشكله واحده واتحلت وكانت طقه في العقشه بعد المطبات وتقريبا كانت عاوز حاجه كدا مش فاكرها ايه دا غير تربيط العفشه
والتوكيل مش سئ للدرجه الللي حضرتك متوقعها لا
دا في بعض الحالات
ومظنش انهم هيهملوا الساجا من اولها كدا
دول المفروض بيعملوا سمعه كويسه ليهم وللعربيه علشان المبيعات
وسعرها مش اغلى من كفائتها خالص
في عربيات اصغر منها في حجم المحرك وفي الاداء من كل النواحي وااغلى منها وفي سعرها
العربيه مناسبه جدااا لسعرها واقدر اقول عليها رخيصه بالمقارنه بمثيلاتها زي اللوجان مثلا
وفي الاخر الاختيار لحضرتك
وارجو اني اكون وضحت لحضرتك اي نقطه غايبه عنك
بس لو حضرتك نظرت نظره للعربيات اللي موجوده في السوق هتغير وجهة نظرك
انا ركبت العربيه وركبت مثيلاتها لم يتبقى لي الا اللوجان فقط عشان اقدر احكم كويس
ولولا اختلاف الاذواق لبارت السلعه

تقرير رائع جدا بس ناقص شوية بس ياريت شوية صور كمان يبقى فل الفل

شكرا ليك
واللينك اللي انا حاطه فيه صور عن الساجا
انا كان نفسي اصورها واحط الصور هنا علشان ييبقى الموضوع متكامل
لكن للاسف مكانش في وقت اني اصورها

[mahamedaraby]

تقرير رائع و شامل حاجات كتير كنت عايز اعرفها

وتحياتى ليك لذكر السلببيات والايجابيات ومبالغتش فى العربيه

راى افضل عربيه فى قيمتها السعريه وخصوصا الاتوماتيك اى حد عايز عريبه اتوماتيك تحت ال75 الف مفيش ادامه الا الساجا

توقعى انتشار جيد للعربيه

الفئه دى من العربيات بقت فى قمه منافستها بعد ظهور الموديلات الاخيره

[hesham_soaida]

[bor=#6d00a3]
تقرير ممتاز
والعربية فعلا حتنافس في السوق, وخاصة بالنسبة للاوتوماتيك
[/bor]

[Abo.Mayyam]

الله ينور عليك يا محمود باشا

تقرير زى الفل

[A.Saad]

تقرير جميل

[Beam28]

شكرا استاذ محمود على التقييم الرائع والمحايد على الرغم انه قلل اقتناعي بالعربية لاني لو هاختار العربية دي على اساس انها عربية مدينة يبقى هافضل حاجة تكون باور كهربائي ومحرك اصغر زي الآي تن او السيلاريو او السيريون وان (نفس الفئة السعرية للساجا) وهافضل توكيل تكون اسعاره حنينة عن عز العرب وعربية ذات تكاليف تشغيل اقتصادية (كلها مقارنات تصب في صالح الآي تن)، اما الكماليات فبالتأكيد الساجا تتفوق على الكل (فيما عدا اللوجان) ولكن في رأيي الشخصي الكماليات ليست عامل الحكم الوحيد على السيارة.
اشكرك مرة اخرى وربنا يوفقك في امتحاناتك وتيجي الاسئلة سهلة ومش من خارج المنهج

[eslam_wega]

بجد تقيم تحفة وافضل تقيم اتعمل للساجا
بس صراحة انا لما اقتنع بيها
شكرا يا استاذ محمود على وقتك ومجهودك الكبير

[XXXMEMOXXX]

تقييم ممتاز تشكر عليه أ/ محمود