أستلمت الجين 2

[monagamal]

انا الحمد لله استلمت الجين من ابو رواش و كان طبعان أ محسن صالح و اقف جنبى كتير اوي تقريبا لمدة 3 شهور من تغيير اجراءات من البنوك

و اكيد شكر خاص ل ايمن عادل , فعلا شخصيه صبوره و متعاونه


و العربيه ما شاء الله كويسه بس فى بعض الملاحظات
1 - العربيه بتحدف يمين
2- صوت غير مقبول عند رفع الزجاج
3- سخونه دائمه منبعثه من ناحية الفرامل و البنزيين
4- فرامل عاليه
5- زياده فى معدل استهلاك البنزيين


لو حد يفيدنى فى النقاط السابقه, العربيه عامله 600 كيلو حتى الان

[Osama.shihata]

1000 مبروك الجين الجميلة
ربنا يحفظهاليك ويباركليك فيها

و العربيه ما شاء الله كويسه بس فى بعض الملاحظات
1 - العربيه بتحدف يمين
لازم تجربى فى كزا شارع ممكن يكون ميل الشارع
2- صوت غير مقبول عند رفع الزجاج
تراجع فى صيانة 1000
3- سخونه دائمه منبعثه من ناحية الفرامل و البنزيين
تراجع فى صيانة 1000
4- فرامل عاليه
دى امر طبيعى فى الجين الدواسة بتاخد مشوار
5- زياده فى معدل استهلاك البنزيين
عادى جدا لغاية 5000 وبعد كدة الاستهلاك بيتحسن كثير

[eslam_wega]

انا الحمد لله استلمت الجين من ابو رواش و كان طبعان أ محسن صالح و اقف جنبى كتير اوي تقريبا لمدة 3 شهور من تغيير اجراءات من البنوك

و اكيد شكر خاص ل ايمن عادل , فعلا شخصيه صبوره و متعاونه


و العربيه ما شاء الله كويسه بس فى بعض الملاحظات
1 - العربيه بتحدف يمين
ظبط مقاس العجل 31 امامى 28 خلفى ولو لسة زى ما هى روح اعمل زوايا
2- صوت غير مقبول عند رفع الزجاج
المكنة بتاع الازاز عليها تراب عايزة بس تتنضف
3- سخونه دائمه منبعثه من ناحية الفرامل و البنزيين
بصراحة اول مرة اسمع المشكلة دى فى الجين قولهم عليها فى صيانة الالف
4- فرامل عاليه
يريت توضيح يعنى اية فرامل عالية يعنى بتفرمل من اول لمسة ؟
5- زياده فى معدل استهلاك البنزيين
طبيعى جدا والاستهلاك هيقل كتير بعد اول 5000 كم


لو حد يفيدنى فى النقاط السابقه, العربيه عامله 600 كيلو حتى الان

ربنا يباركلك فبها ويبعد عنك شرها

[BlackBerry]

الاخت الكريمه منى,

اولا الف مبروك على الجين 2, ربنا يديلك خيرها ويكفيك شرها ان شاء الله


انا كمان لسه مستلم يوم الاحد من يومين يعني والحمدلله مرتاح لحد الان ويارب يدوم الحال علينا جميعا ان شاء الله, وفعلا استاذ محسن هو اللي كان معايا في تخليص اجراءات العربيه وكان متابعني باستمرار وكان الاستقبال هناك حلو.

بالنسبه لاستفسارات:

1- اولا ملاحظ ان العربيه عامله 600 كيلو, انتي استلمتيها وهي عامله 600 كيلو؟؟ انا استلمت بتاعتي وكانت عامله 112 تقريبا وسالتهم ليه انا حسيت ال 112 كتير بصراحه بس الاعضاء هناك قالوا عادي وهناك ردوا عليه تجارب في الشركه الخ للتاكد من الجوده, بس 600 حاسسها كتير بصراحه والمفروض كنتي تساليهم ليه


2- العربيه تحدف يمين, المفروض كنتي تفحصيها وتجربيها وانتي هناك وكانوا هايظبطوهالك في الورشه ورا في 10 دقائق, لان مشوار ابو رواش دا عذاب. عموما حاولي تحافظي على التوازن لموعد الصيانه القادم اعمليها هناك افضل من اي مكان برا


3- صوت الزجاج, هل ال 4 فقط ولا زجاج السائق فقط؟؟؟ لان دي حصلت معايا وانا بجرب العربيه هناك فعلا زجاج السائق كان بيعمل صوت خرفشه قلت لهم عليها قالوا ممكن تراب على الموتور بتاع الزجاج واخدوها جوا الورشه 10 دقائق طلعت والمشكله محلوله الحمدلله المفروض مش كنتي تمشي من غير ما يظبطوا لك كل الحاجات دي لان انتي مستلمه حاجه زيرو ودا حقك, عموما قدر الله وماشاء فعل في الصيانه خليهم يظبطوا لك كل الحاجات دي

4- بالنسبه لسخونه البنزين والفرامل, مش فاهم سخونه من ناحية البنزين ازاي؟ التانك يعني؟ دي غريبه, الفرامل عادل من الاحتكاك والاستخدام وحاولي بالراحه عليها واضغطي عليها بشكل متقطع مش مره واحده يعني , وعموما لاحظت ان العربيه الكبوت يبقى نار, شكله من الجو حاليا كل سنه وانتي طيبه الصيف دخل

5- انا برده مش فاهم يعني ايه فرامل عاليه زي الاخوه بالاعلى؟ زي ما قلت لك مش تضغطي جامد ولا مره وحده عليها, بالراحه وبشكل متقطع عشان تعيش معاكي وعشان مش تصفر بعد فتره والضغط بالراحه بشكل متقطع على فكره بيوقف العربيه بشكل اسرع ومريح

6- استهلاك البنزين زي ما قال الاخ في البدايه اي عربيه تستهلك بنزين اكتر في الاول حتى يفتح الموتور معاكي, عموما بعد 3000 كيلو هايظبط الاستهلاك ان شاء الله وتقدر تشوفي في العداد فيه زرارين يمين وشمال اليمين لما تضغطي عليها هايطلع لك معلومات عن العربيه والبنزين المتبقي كم لتر والبنزين الموجود حاليا يمشيكي كم كيلو الخ انا جربت وكان فيها 48 لتر ومشغل مكيف كنت بجربه طلع لي 48 لتر والمكيف شغال تعمل 411 كيلو تقريبا, اكيد بعد التليين ومن غير مكيف هاتعلم اكتر او في الرينج المعقول وطبعا حسب الاستخدام وطريقة السواقه.

مش قلتي لنا لون عربيتك ايه؟ لان وانا بستلم عربيتي مش كان هناك غير ازرق زهري ونحاسي بس :)

والف مبروك مره اخرى

تحياتي ,

[monagamal]

شكرا Osama.shihata و eslam_wega

بالنسبه لموضوع الفرامل العاليه : باخد فتره لمل العربيه تقف مش انها من اول لمسه
بس اكتر حاجه قلقانى السخونه و كنت سالت فيها قالولى اعمل زرار تحكم مكان خروج هواء التكييف لليمين عكس اتجاه السائق و اشغل تانى زرار اللى معمول عليه درجات الحراره كل اما اركب العربيه

[monagamal]

شكرا BlackBerry و ربنا يبارك فيك

1- انا استلمتها عامله 32 كيلو بس باقى الرقم دا انا اللى عملتوا :)
2- بالنسبه للحدف يمين للاسف انا مكنتش اعرف انى لازم اسوق العربيه و اجربها عندهم
3- صوت الزجاج دا عند السائق و الراكب الامامى و فعلا انا سمعتو هناك بس انا دخلت 3 عربيات هناك و كانوا نفس الموضوعط
4- السخونه ناحيه السائق و يعنى هواء سخن خارج عليا من الموتور
و لون عربيتى فرانى فاتح و كان فى نفس عربيتى و واحده حمراء

[monagamal]

BlackBerry نسيت اقوللك مبروك عليك العربيه و ربنا يكفيك شرها

[BlackBerry]

شكرا blackberry و ربنا يبارك فيك

1- انا استلمتها عامله 32 كيلو بس باقى الرقم دا انا اللى عملتوا :)
2- بالنسبه للحدف يمين للاسف انا مكنتش اعرف انى لازم اسوق العربيه و اجربها عندهم
3- صوت الزجاج دا عند السائق و الراكب الامامى و فعلا انا سمعتو هناك بس انا دخلت 3 عربيات هناك و كانوا نفس الموضوعط
4- السخونه ناحيه السائق و يعنى هواء سخن خارج عليا من الموتور
و لون عربيتى فرانى فاتح و كان فى نفس عربيتى و واحده حمراء

تمام افتكرت استلمتيها وهي 600 كيلو, ماشاء الله شكلك استلمتيها وسافرتي بيها على طول ههه :)

بالنسبه لتجربتها والحدف, انا جربتها وانا مروح على الطرق قبل ما ادخل البنزينه وافول جربت الحدف اكيد عشان لو كان فيه حاجه كنت هالف وارجع لهم تاني, لان فكرة ارجع تاني في يوم مخصوص عشان حاجه معينه صعبه لان اكتر حاجه اكرهها في مصر هو اكتوبر والزحمه والتريلات , عموما خير ان شاء الله وانتبهي وانتي تسوقي حتى موعد الصيانه هانت اضربي بيها مشوار كمان وهاتجيبي ال 400 كيلو ههه :)

صوت الزجاج دا لاحظته وانا بجرب وافحص العربيه هناك, وقلت لمسؤول الصيانه هناك الفني اسمه محمد السويسي تقريبا قالي تراب على الموتور من سوء التخزين اكيد, فا قال هاظبطهالك حالا واخدها جوا الورشه و 10 دقائق وخرجت ولا احلى انتي شكلك كنتي مستعجله بس معلش خير ان شاء الله

بالنسبه للهواء السخن, اول زرار دا الكومبرسور, تاني واحد درجات الحراره بارد او سخن, ثالث واحد دا اتجاه الهواء, اقفلي المكيف, تاني واحد مش تشغليه لان دا المروحه(تخلي الاتجاه على 18 وهي درجة حرار البروده وتضغطي عليه اللمبه هاتنور كدا تعرفي ان المروحه اشتغلت) ومش يشتغل الا في حالة تشغيلك للمكيف او في حال رغبتك بتغيير الجو بداخل العربيه مش اكتر ومع المكيف في اتجاه الهواء, بس دي غريبه انا مش عندي يدخل هواء سخن, اول وتاني واحد مقفولين(المكيف مقفول يعني) وثالث واحد مخليه على الاختيار الشمال, يعني باتجاهي ومفيش هواء سخن, اساليهم في الصيانه برده للتاكد


ملاحظه صغيره, اتمنى انك مش تكوني نسيتي تجربي المكيف هناك كمان؟؟ المفروض تجربيه وتتاكدي انه يبرد حتى لو 10 دقائق بس وتقفليه تاني, لان لو مش مشحون المكيف هايدفعوكي 400 جنيه تمن شحنه فا جربي المكيف واتاكدي عشان لو مش مشحون تكلميهم وتعرفيهم عشان مش يدفعوكي على حاجه مش مسؤوليتك


انا كمان لون عربيتي رمادي, اغمق من لون عربيتك شويه

والف مبروك مره اخرى , والله يبارك فيكي

تحياتي

[monagamal]

BlackBerry : انا كلمت الصيانه و المهندس قالى انا كان لازم حد يشرحللى زراير التكييف لان هيا اللى بتتحكم فى الهوا , قلتلوا دا محصلش
بس انا مستغربه الموضوع انى لازم افتح اخر زراريين لطرد الهواء السخن !

[BlackBerry]

انا كمان مستغرب بصراحه, لان المفروض مش يطلع هوا سخن عليكي اصلا, انتي متاكده ان الهوا السخن دا مش من الشباك والجو الحر عموما؟؟

جربي تشغلي المكيف زي ما قلت لك طيب وشوفي لو مشحون ولا لا وتجربيه بالمره

لكن موضوع ان فيه هوا سخن وتشغلي زراير بشكل مستمر عشان تطرديه دي غريبه ولازم تخليهم يشوفوها

[BlackBerry]

هممم الاخت منى,

انا قعدت افكر للمشكله دي وكنت نازل اجيب علبة السجاير نسيتها في العربيه ههه, فا قلت اجرب

عندك اول زرار بتاع المكيف خليهoff بس اضغطي عليه من النص اللمبه هاتنور, دا هايقفل لك مخارج التهويه, وبكدا تتحل مشكلتك ان شاء الله وعادي لو سيبتيه منور على طول لانه هايشتغل والعربيه شغاله بس وهايطفي لما تطفيها ومش هاياثر على المكيف لانه مقفوله جربي وردي عليا وان شاء الله خير :)

تحياتي

[khpopo]

هممم الاخت منى,

انا قعدت افكر للمشكله دي وكنت نازل اجيب علبة السجاير نسيتها في العربيه ههه, فا قلت اجرب

عندك اول زرار بتاع المكيف خليهoff بس اضغطي عليه من النص اللمبه هاتنور, دا هايقفل لك مخارج التهويه, وبكدا تتحل مشكلتك ان شاء الله وعادي لو سيبتيه منور على طول لانه هايشتغل والعربيه شغاله بس وهايطفي لما تطفيها ومش هاياثر على المكيف لانه مقفوله جربي وردي عليا وان شاء الله خير :)

تحياتي

+111
مبروووك الف مبروووك جين2 الجميله ربنا يديكى خيرها ويكفيك شرها ...اهلا بيكى فى العائله
ربنا يوفق

[Nistelrooy]

مبروك العربية

بس 3 شهور كتير اوي .. الي اعرف الحساب في البنك مش بياخد اكتر من اسبوع ؟!

لية المدة دي كلها ؟!

[mr_sameh]

الف مبروك علي العربيه

[amrmahamad]

نفس المشاكل يا مني هيه اللي عندي انا برضه لسه مستلم