اخيـــــــــــــــــرا استلمت جيجي اخيــــــــــــــــــــرا

[mido_soliman]

[CENTER]السلام عليكم ورحمة الله وبركاتة
مبدأيا انا احب اشكر كل عضو هنا فى المنتدى دة لان كل واحد هنا كان لية الفضل بعد ربنا سبحانة وتعالى فى انى اتخذ قرار شراء بروتون جين2 وان ليا الشرف انى اكون واحد من عمالقة المنتدى دة بجد
الحمد لله استلمت الجين2 النهاردة الضهر (فى عز الضهر من عز العرب ):) اللون ازرق زهرى وكنت عايز الاسود وبصراحة اللون عاجبنى جدا اول ما العربية دخلت قدامى وانا اعد مع استاذ محسن صالح وبيقولى عربيتك اهة مكنتش مصدق والله وقلبى اعد يدق جامد جدا كانى شفت بنت الجيران معدية من تحت بلكونة بيتنا :)))
مش قادر اوصفلكوا احساسى النهاردة اول ما دخلت اعدت فيها وسميت الله واتحركت بصراحة حسيت انى فى دنيا تانية خالص
انا بس حتكلم على شوية حجات بسيطة اوى اوى لان العربية لسة معملتش بيها حاجة تقريبا كلة على بعضة 61 كيلوا (انا مستلمها عاملة 35 )
1-العربية ملهاش صوت واللى بيقول موتورها صوتة عالى دة انا مش عارف ازاى هوة اكيد اى موتور بيعلى لما بتعدى ال 120 لكن غير كدة والسواقة هادية العربية هسسسسس
2-العربية بتجيب ال 90 وبحس انى مش ماشى وبجيبها من غير قصد ومن غير قرص ومن غير ما امشى بجد كل شوية ايص على العداد الاقية 90 والعربية ملهاش صوت ومش حاسس انى بمشى اساسا (بسم الله ما شاء الله بس دة مش ثبات دة حاجة تانية فعلا احساس السرعة مش موجود على الاقل دلوقتى )
3-اللون مخليها ملفتة جدا وخصوصا فى الشمس كل الناس بتبص (وانا ماشى اقرا المعوذتين وسورة الكرسى طول الطريق )اقروهملى انتوا كمان مستنين اية ؟؟؟؟ :)
4-الفرامل بيتهيالى عايزة تطيع لان مشوارها طويل بس مش دة المشكلة المشكلة انة مبتمسكش بالمعنى (تكلبش) بيتهيالى محتاج يطبع
5-مكنش معايا سى دى اجرب بس شغلت الراديو اذاعة القرأن الكريم والمالتى فانكشن هابلنى :) كل شوية اعلى وواطى هههههه
6-العفشة حلوة جدا ومش ناشفة خالص(او بالمعنى اللى كنت متخيلة )طبيعى بهدى عل المطبات مبحسش بحاجة خالص ولا رزعة وحتى احساسى بعين القطة مش موجود بسمع صوتها بس
7- الخامات الداخلية مقبولة الى حد كبير جدا بصراحة كنت فاكرة ضايعة من كلام بعض الاخوة هنا واحساس الجلد اللى فى العصاية الاوتو جميل اوى بس عايز اكسية بحاجة (بيتهيالى ممكن الاقى فى كارفور حجات كدة ولا لا؟؟؟)
8-البارك سينسور بيشتغل ازاى ؟؟؟ ولا بحس بية ازاى ولا مبحسش بية لانى معنديش اى خلفية
9-انا فى اكتوبر ومش هاين عليا اسيبها النهاردة من غير غطا ربنا رازقنى بشوية عيال(والله ماشفتهم غير النهاردة اول ما جبت العربية وعمالين يحوموا حواليها وانا واقفلهم فى البلكونة وشكلى حنزل ابات فيها بليل :) فلو فى اى حد فى اكتوبر عارف محل اكسسوار اجيب منة غطا ان شاء الله اى كلام بس اغطيها بليل ينوبة ثواب يقولى فين علشان انزل جرى
10-ان شاء الله حرخصها على التلات او الاربع بالكتير ويبقى فى كلام تانى لانى مش حقدر اللف بيها حاليها غير فى الضلمة كدة فى الخباثة حوالين البيت كل يوم شوية :)
وطبعا انا منستش الصور واتمنى انى مكونش رغيت كتير بس الله وحدة يعلم انى اكاد اكون مش مصدق انى جبتها وربنا يعلم انا مبسوط قد اية
[/CENTER]

وعايز اشكر طبعا ايمن اول واحد عرف انى جبتها لانى كلمتة اول ما استلمتها وعايز اتمنى التوفيق لمحمود باشا حبيبى (RAUL_7) لانة شجعنى على اللون دة واتمنى انة ينضملنا قريب جدا علشان كان فى واحدة نفس اللون النهاردة مانوال كانت بتتسلم معايا وتمنيت انة يكون هوة والله :)
طبعا مش حنسى استاذ توت ومهاب واحمد على واحمد فتحى ورامى (RAMYAR)
واسامة شحاتة وكل واحد هنا كان لية بصمة فى انة فادنى بمعلومة شجعتنى اكتر على اقتناء العربية والانضمام لعائلة بروتون وربنا يديم علينا الخير والمحبة لبعضنا ولعربياتنا
الصور


Uploaded with ImageShack.us



Uploaded with ImageShack.us



Uploaded with ImageShack.us



Uploaded with ImageShack.us



Uploaded with ImageShack.us



Uploaded with ImageShack.us



Uploaded with ImageShack.us

[elmadawy]

الف مبروك ياباشا وربنا يديك خيرها ويكفيك شرها وشر الطريق

[ahmed_h_g]

مبروووووووووووك
لون جميل ما شاء الله
ربنا يباركلك فيها .

[midosalah]

الف الف مبروك ربنا يديك خيرها ويكفيك شرها ويباركلك فيها على فكرة استاذ محمود raul_7 استلم النهارده نفس اللون

[midosalah]

ما شاء الله ما شاء الله ربنا يباركلكو فى عربياتكو

[mido_soliman]

الف الف مبروك ربنا يديك خيرها ويكفيك شرها ويباركلك فيها على فكرة استاذ محمود raul_7 استلم النهارده نفس اللون

الله يبارك فيك يباشا متشكر جدا ماهوة كان هناك بيستلم فى نفس الوقت معايا بس انا خلصت قبلة ومكنتش اعرف انة هوة طب ما يزمر ولا حاجة بس اول ما أ/محسن قالى ان فى واحدة مانوال نفس لونى بتتسلم دلوقتى وان الاتنين بيتغسلوا والله جة فى بالى بس لو كنت اعرف انة هوة على الاقل كنا شيكنا على عربياتنا سوا :))) بس الحمد لله وربنا يباركلة ويباركلنا كلنا فى عربياتنا والاهم فى روحنا الحلوة دى مع بعض يارب ما تقطعها عادة

[ramyar]

100000000000000000000 مبروك علي جينا وعقبال تقارير الصيانه
انا جليب الغطاء الواتر برووف من التوفيقيه عامل حوالي 110 لاكن ميزته انه ناعم علي العربيه
الف مبروك مره تانيه ومستنينك في المقابله

[د_محمد مدبولي]

ألف مليون مبروك
ربنا يديك خيرها و يكفيك شرها

[ehabsharaf]

الف مبروك ربنا يديك خيرها ويكيفيك شرها حكاية الغطاء دية بلاش منها لانها بتسهل عملية السرقة ربنا يحفظهالك

[BlackBerry]

السلام عليكم

الف مبروك يا ميدو وربنا يبارك لك فيها ويكفيك شرها.

8-البارك سينسور بيشتغل ازاى ؟؟؟ ولا بحس بية ازاى ولا مبحسش بية لانى معنديش اى خلفية

بيشتغل اوتوماتك لوحده وانت بترجع للخلف فقط, هاتسمع صوت صفاره, ولها 3 درجات, اذا كانت صفاره مستمره معناها ان المسافه بين السياره واي جسم بالخلف اقل من 40 سم تقريبا...موجود في الكتالوج الابعاد وشرح لها.


بالتوفيق ان شاء الله

[TAMERHASSAN]

ربنا يديك خيرها ويكفيك شرها

[Raul_7]

الف مبرووووووووووووووووك يا أحمد باشا, و الله سألت عليك استاذ محسن لما رحت قالي ده لسة مستلم من 10 دقايق. :)

علي فكرة انا كنت بقول المعوذتين طول مانا ماشي برضو, و كفاية لمل دخلت البنزينة, يختييي...كله بيبص و واحد يسأل العربية دي تقفيلها ايه و العربية دي موتورها كام...ههههه.

علي فكرة علامة ال CamPro مش عندي في المانيوال, يهيألي نزلت في الأوتو بس و الله أعلم.

يلا خير..الف مبروك تاني يا معلم و ربنا يحفظهالك ان شاء الله.

[x512]

بسم الله ما شاء الله ربنا يباركلك فيها انتم السابقون و نحن اللاحقوون ان شاء الله

[Eng. Rafy Samy]

الف الف مبروك ربنا يديك خيرها ويكفيك شرها

[mo7hamedemad]

مبرووووووووووووك يا معلم ويارب يباركلك فيها ويبعد عنك شرها ويخليلك جى جى