أخيراً حجزت البرسونا....شوية استفسارات

[Moi]

السلام عليكم

أولاً أحب أشكر كل الناس اللى بتشارك هنا على مجهودتها ووقتها ومساعدتها للناس
وفى مقدمتهم أيمن طبعاً

وأحب أبشركم انى وبعد حيرة شديدة وطول تفكير استخرت ربنا وحجزت البرسونا المانيول فول اوبشن
ومستنى توصل بالسلامة ان شاء الله

والفضل طبعاً لكلامكم عن العربية وشكركم الكتير فيها

بس ربنا بستر بقى ومايطلعش فيها مشاكل عشان حاسس انى مش حاعرف اتصرف...ربنا يستر

وكنت عايز اسالكم بالمناسبة ايه اللى المفروض اعمله لغاية مالعربية توصل؟

يعنى مثلاً المفروض اشترى غطا للعربية، ده اللى انا عارفه، ايه تانى بقى؟

وبالمناسبة برضه، اجيب غطا منين، واحسن نوع ايه؟ وياترى فيه امكانية لتفعيل العرض بتاع ايمن بتاع ال10 غطيان اللى عليهم خصم؟ اتمنى انه يكون ممكن

وبالنسبة لتخليص ورق العربية، انا مش عايز اروح المشوار بتاع الصحراوى ده مرتين، فايه اللى ممكن اعمله عشان اخلص الورق من غير ماروح تانى؟

وايه اللى مفروض اعمله اول ماستلم العربية ان شاء الله؟ (مش قصدى فى التوكيل، قصدى بعد ماروح بيها بالسلامة يارب)

معلش الاسئلة كتير بس اخوكم اول مرة بشترى عربية جديدة وحاسس انى تايه وقلقان

شكراً مقدماً يا شباب

[Tarek Gen 2]

السلام عليكم

أولاً أحب أشكر كل الناس اللى بتشارك هنا على مجهودتها ووقتها ومساعدتها للناس
وفى مقدمتهم أيمن طبعاً
ايمن مين و الناس نايمين ده عميل و جاسوس و عدو (( بس حبيبى ))

وأحب أبشركم انى وبعد حيرة شديدة وطول تفكير استخرت ربنا وحجزت البرسونا المانيول فول اوبشن
ومستنى توصل بالسلامة ان شاء الله
ان شاء الله يا جميل و يكفيك شرها و يديك خيرها و اختيار موفق مليون فلمية ان شاء الله

والفضل طبعاً لكلامكم عن العربية وشكركم الكتير فيها

بس ربنا بستر بقى ومايطلعش فيها مشاكل عشان حاسس انى مش حاعرف اتصرف...ربنا يستر
متخافش اكيد هيطلع حاجة تروح فى صيانة الالف بمنتهى السهولة و ده الطبيعى فى كل العربيات

وكنت عايز اسالكم بالمناسبة ايه اللى المفروض اعمله لغاية مالعربية توصل؟
ولا حاجة تدعى بس
يعنى مثلاً المفروض اشترى غطا للعربية، ده اللى انا عارفه، ايه تانى بقى؟
بس كدة و الباقى حسب احتياجك و الطفاية و الكريك التمساح و الحاجت دى عموما
وبالمناسبة برضه، اجيب غطا منين، واحسن نوع ايه؟ وياترى فيه امكانية لتفعيل العرض بتاع ايمن بتاع ال10 غطيان اللى عليهم خصم؟ اتمنى انه يكون ممكن
الخصم معرفش
اما الغطا اسمه ووتر بروف و تجيب اتقل خاحة عشان فى درجات و التقيلة هنلاقيها فى حدود 150 او 170 كدة
و تجيبه من محلات الكماليات او التوفيقية او فى مناطق جنب العجوزة كدة

وبالنسبة لتخليص ورق العربية، انا مش عايز اروح المشوار بتاع الصحراوى ده مرتين، فايه اللى ممكن اعمله عشان اخلص الورق من غير ماروح تانى؟
الورق كله اما تيجى العربية ان شاء الله و مفيهاش مشاوير ولا حاجة هتستلم العربية بورقها تطلع على التراخيص

وايه اللى مفروض اعمله اول ماستلم العربية ان شاء الله؟ (مش قصدى فى التوكيل، قصدى بعد ماروح بيها بالسلامة يارب)
تركنها و تغطيها و تحمد ربنا و تقتل اى عيل صغير على مدى 2 كيلو حولين المنطقة اللى بتركن فيها و يفضل يكون قتل غير رحيم عشان يكونوا عبرة لمن لا يعتبر

معلش الاسئلة كتير بس اخوكم اول مرة بشترى عربية جديدة وحاسس انى تايه وقلقان

شكراً مقدماً يا شباب

[overline]
ولا يهمك كلنا كنا كدة و الحمد لله و ربنا يكرمك و انا تحت امرك[/overline]

[x512]

عقبااااااالنا يااااااا رب انا مستني الامتحانات تخلص عشان افوق لحوار العربيه دا و انجزو انا كمان ناوي احجز برسونا فل ابشن مانيوال الصحراوي ان شاء الله..و ربنا يباركلك في بيسرسونتك مقدما........و زي ما الاخ طارق قالك .....اقتل اي عيل علي بعد 2 كيلو مالعربيه و اي حد تشتبه فيه ان معاه اله حاده قد يسبب خدوش او تجريح مع سبق الاصرار و الترصد

[mo7hamedemad]

مبرووووووك من الاعماق والى الامام وبالتوفيق يارب

[tamermagdi]

ألف مبروك يا باشا
أول حاجه لازم تعملها هى إنك تحمد ربك على نعمته وتصليله صلاة شكر على إنه رزقك بعربية كويسة إن شاء الله ربنا يباركلك فيها ويحفظط من شرورها

ثانى حاجه هو إنك تشوف مكان كويس تركن فيه و دى اصعب حاجه فى مصر. لأن الجراجات بتكون ضيقه و العربيات بتتخبط من السياس و الستات اللى بتركن. بالإضافة طبعاً إن السايس بيحب ينام فى العربيات الجديدة ويشغل التكييف. أما عن الشوارع فحدث ولا حرج.

مبروك يا باشا و متنساش زى ما قلتلك تحمد ربنا على نعمه