تقرير صيانة الالف وانطباعات

[mido_soliman]

اخوكم احمد نبيل يحدثكم من داخل استراحة عز العرب الدور التاني بمفردي في انتظار جيجي لما تخرج بالسلامة
بداية احب اقولكم علي شعوري اول ما دخلت التوكيل مكنتش اعرف مكان الصيانة وبعد وصفة توجهت انا وجيجي هناك وهية كانت خايفة وانا عمال اطمنها واحايل فيها المهم
دخلت ركنت اتاكدةا من الحجز وقالولي انت مع المهندس محمد عبد الهادي انتظرت حتي اتي وكان في زحمة جامدة المهم عرفتوا بنفسي وقلتلة حنستلم امتي قالي معادك امتي قلتلة 11،50 قالي انا معايا عربيتين اخلصهم وابقي معاك بصراحة الراجل بشوش جدا ولطيف ومهذب وترتاح انك تتكلم معاه
اعدت اتفرج علي بيرو وجيجيات تانية واقفة لحد ما سمعت المهندس محمد بيقول لمهندس تاني استلم العربية دي صيانة الف علشان انا لسة بستلم هنا
حضر لي مهندس تاني اقل بشاشة واقل راحة في التعامل معاه وتحس انة شايف نفسة شويتين المهم دخلت اعدت معاه قالي حنعمل تغيير لزيت الفبريكة بزيت تاني قاطعتة ( معايا الزيت) قالي اية قلتلوا فيسكو 3000 قالي بيعد 3000 بس وملامح الذهول والاستغراب علي جبينة وقميصة البيج وبنطلونة البني ؛:) قلتلة حضرتك دة رقمة وبيعد لحد 15000 بس انا حغيرة في صيانة ال 5000 بالفيسكو 5000 المهم قالي حنشيل تمن الزيت وحنغير فلتر ونشيك علي الكهربا ونراجع علي السوائل قالتلة تمام
قالي في مشاكل عندك
قلتلة مشكلة واحدة بسيطة الفرامل وابتدت ملامح الذهول مرة اخري ولم انتظر ان تظهر علي بنطلونة ولحقتة قائلا الفرامل لازم ادوس لاخر البدال علشان تمسك وبحس ان الفرد اللي ورا مبتمسكش في نفس الوقت مع اللي قدام وبحس بزحفة في العربية بسيطة وهنا استطرد قائلا في نوع من السخرية المقنعه ( معلش بتحس ازاي اصلي مش فاهم) وهنا ادركت ان ما بدات اقولة من بداية كلامي معه عن الفرامل بمثابة الخيال العلمي الخصب بالنسبة لة واشعرني وكاني اتي بسيارتي من المريخ رددت قائلا ( حضرتك مينفعش اقولك بحس ازاي دي خبرات قيادة علي مدار 12 سنة ودي مش اول عربية اسوقها ( سكت وفي مكنوناتة شعور بالحرج) وقالي تمام ممكن فعلا تكون قارنتها بسيارة اخري ( قلتلة انا قارنت نظام الفرامل حتي اقطع عنة اسطوانة التوكيل المشروخة بان عربيات بروتون متتقارنش والكلام اللي بقراة في التوبيكات دة ( كنت مزاكر كويس ومستعد لمثل هذي المهاترات )
وبالفعل لم يذكر هذة الجملة وقال لي الفرامل اول الف مستحيل يكون فيها حاجة مش فاهم بردة ( وبما ان الموضوع بسيط جدا اني اقولة تعالي نجرب ومش عارف اية قلتلة بسيطة جدا حضرتك بس تقدر تعليلي البدال شوية قالي اة سهلة جدا قلتلة تمام جدا بس كدة عليهولي علي قد متقدر قالي يعني حضرتك عايز نعلي البدال بس كدة ( ونفس الذهول ونفس البنطلون ) قلتلة بس كدة قالي اوك يالا نبص علي العربية
شيك علي العربية من برة وجوة ومضيت علي امر الشغل وان معنديش مشاكل تانية واستفسرت عن ميعاد الاستلام قالي الساعه 4 :( قلتلة دة حجات بسيطة جدا صالي كنت تجيلي بدري قلتلة انا واخد معاد من المهندسة داليا انا لو اعرف كنت جيت من النجمة قالي حتي لو واخد معاد كل ما تيجي بدري احسن وهنا نستفيد اية ؟( لما تحجز صيانة وتاخد معاد لو المغرب رةح اول واحد الساعه 9 انا للاسف نسيت اني في مصر وان مفيش حاجة اسمها مواعيد ( اللي ضحكني اوي انها قالتلي 11،50 شوفوا الدقة هههههه طب كانت قالت 12 مدام عادي )
المهم استلم العربية واعتذرلي باسلوب معذب وراقي ووصفلي اكثر من مكان استراحة انا فضلت اعد في بي ام ( اقرب مستوي سيارات لجيجي معدش في اقل من كدة :) وانا حاليا بكلمكوا من موقعي هذا وربنا يسهل )
نيجي للمهم عيوب السيارة
1- زاوية الكسر صغيرة نوعا ما ( مش مشكلة كبيرة ابدا عادي جدا
2- نظام الفرامل البدال مشوارة طويل شوية ولكن سهل التاقلم والتعود علية
3- صوت العربية عالي علي الاول بس وبعد كدة بيهدي واعتقد حيهدي اكتر بعد التليين وتغيير الزيت
4- الباور تقيل شوية ( مع ان الكلمة دي عيب لان احنا رجالة ولازم نبقي ناشفين شوية عموما انا شايفة ميزة جامدة جدا مش عيب بس حطيتوا ضمن العيوب بردة
5- مش لاقي حاجة تانية اقولها
المميزات بيتهيالي كلنا عارفينها ومش محتاج اقولها لان باقي العربية بسم الله ما شاء الله مميزات ومش عليها كلام وبصراحة وتحيز مش تحيز العربية سواقتها ممتعة اكتر من كل الكوري اللي موجود بلا استثناء ولو اي حد بيفكر يشتري عربية وذاكرها كويس حيلاقي انها افضل سيارة في مصر تجمع ما بين قوة الاداء والثبات العالي والكماليات الرهيبة والشكل الجميل والسعر الاكثر من رائع طولت عليكوا وموبيلي نزل شحنة النص اراكم بعد الاستلام ان شاء الرحمن
تحياتي
عمل اتشيك لجسم السيارة من الخدوش ( مفيش الحمد لله

[ramyar]

الف مليون مبروك علي الصيانه يا احمد اتمني تكون راضي عن جيجي وعن التوكيل وعقبال ما نشوف تقرير صيانه ال 100000

[memo_p910]

الف شكر على تقريرك الرائع لان التقارير دي بالتأكيد اضافه مهمه لمنتدى بروتون وربنا يخرجلك جيجي بالسلامه

[Mustafa_Farouk]

السلام عليكم،

١٠٠٠ مبروك ويا ريت تبقأ تقول لنا عملت إيه بعد الاستلام وفي تغيير فعلاً وإستجابة للطلبات ولا لأ + زيت الفيسكو تأثيروا كويس على العربية خلاها أنعم أو صوتها أهدى؟؟

[x512]

مبروك علي صيانه الالف ..... و فعلا الواحد لازم يكون مستعد للمهندس او الفني بتاع اي توكيل لان في جمل محفوطه كدا (دا عادي يا باشا في كل العربيات) و ( متقلقش دي حاجه بسيطه) و كلام تاني كتير...وواضح ان الفني دا صلا محتاج انتا اللي توجهو وتشرحلو يعمل ايه يعني لولا انك قولتلو يعليلك البدال مكنش علاه و كت فضلت مشكلتك زي ما هي+ انو بيهرب من مشكلتك عشان مش فاهم شغلو فبيقولك "حاسس ازاي؟؟"....هو احنا عند دكتور امراض صدر...دا لو فني ناصح يكشف عالفرامل علي طول و من غير كلام كتير و يشوف ايه المشكله بس دول قليلين للاسف...كلو بيعتمد علي تشتيت الزبون بأي كلام فارغ الا لو الزبون مذاكر زي حضرتك كدا...و اتمني يوم ماجي اعمل صيانه اكون مذاكر زيك

[mido_soliman]

الحمد لله خرجت جيجى من التوكيل سالمة غانمة وبفضل من الله سبحانة وتعالى تم عمل صيانة الالف بتغيير الزيت ولو انى محستش انة هدى الموتور (يمكن علشان انا كنت قارص شوية عليها اول مرة ابقى عايز اجرى خلصت تليين باة وكنت مبسوط)
ملاحظات سريعة جدا
1-البدال على والحمد لله الفرامل اتظبطت وبتعمل حاليا بكفاءة وحتى مشوارها الطويل بقى طبيعى (يعنى كان فى عيب فعلا بس هوة كان عايز يهرب زى مانتوا عارفين ولكن من تفاهة العيب صلحوة :) الحمد لله )
2-كان قايلى استلم الساعة 4 ولقيتوا بيكلمنى الساعة 2 قالى العربية خلصت ورحت استلمتها وشكرت كل المهندسين وتوكلت على الله جربت العربية وكلة تمام
3-اول مرة اشغل التكييف وكنت مبسوط جدا وفى نفس الوقت قرصت عليها شوية عديت ال 4.5 ار بى ام وبصراحة السحب جميل اوى مع التكييف العربية متكتفة فى الاول والتانى واول ما تجيب التالت انت مش مشغل حاجة خالص
4-احلى مشوار النهاردة اخدتة من ابو رواش لاكتوبر الساعة 2.30 تقريبا طلعت على بنزينة شل اللى فى ابو رواش فولت التانك وشغلت تكييفى وسوند سيستمى وقلتلها ممكن نجرى شوية صغيرة احس انى خلصت الالف والتكتيفة وبصراحة فرحت جدا وفرحتنى معاها خصوصا ان الفرامل فعلا مكنتش مساعدانى انى اجرى وافرمل فى زمن قصير كان لازم احضر قبل المطب او النقرة او اى حاجة قبلها بفترة
5- انا مبجريش عادة بس دة كان تيست مش اكتر ومنصحش حد يجرى السواقة ملهاش كبير بس انا كنت عايز احس بسرعتها مش اكتر
6-مازلت مصر ان صوت الموتور عالى فى الاول والتانى فقط مع التكييف والسحب فية تقصير (تحسها تقيلة ) وبمجرد ما تجيب التالت العربية بتوصل ل 140 على التالت (مزودتش عن كدة ومش حزود )
7-الاوتوماتك محتاج نفهم بعض شوية يمكن انا اغبى منة بس هوة حاليا انا لاحظت انة مبينقلش الا على ار بى ام عالى بعكس الاول لما كنت بمشى بيها تاتا تاتا كان الرابع بيجى وانا على 60 مثلا دلوقتى بحس انة فاهم انى عايز اجرى طول الوقت (اسلوب قيادة اعتقد انة متبرمج علية) فبينقل على ار بى ام عالى 3.5 فما فوق بس مش مشكلة
8-الحمد لله مفيش عيوب عندى بحمد الله وبفضلة وربنا يديمها نعمة ويحفظها من الزوال
9- صورت النهاردة فيديو لايف لمركز صيانة التوكيل وكم العربيات الهائلة اللى موجودة فى البارك من كل نوع وان شاء الله احاول ارفعة ان لم يكن فى مانع من رفعة على المنتدى (بس مساحتة كبيرة مش عارف اصغرة ازاى)
10-لو فى اى استفسار انا تحت امركوا فى اى حاجة وطول الوقت انا اعد متابع اى استفسار لانى مش فاكر انا نسيت حاجة ولا لاء
11- دفعت 61.70 جنية تغيير فلتر وضريبة مفيش مصنعية وانا اللى جايب الزيت
تحياتى لكل واحد دخل باركلى وان شاء الله يكون التقرير عند حسن ظنكم

[mo7hamedemad]

الف مبوك يا احمد واعقبال ال 10000000000000000000

بس احنا عايزينك تقلنا بعد ما جربت الفيسكو فى تغير للاحسن ولا

[mido_soliman]

الف مبوك يا احمد واعقبال ال 10000000000000000000

بس احنا عايزينك تقلنا بعد ما جربت الفيسكو فى تغير للاحسن ولا

الله يبارك فيك يا محمد
بص بصراحة انا مش حاسس بتغيير ويمكن السبب انى مكنتش بحس بحاجة قبل اول الف لان الموتور كان صوتة عادى وغالبا مش ححس بتغير الا بعد كذا نزولة ومتنساش انى كنت بجرى بيها النهاردة وكنت مشغل التكييف يعنى لسة شوية بيتهيالى الصورة حتضح اكتر على الف كمان اذا كان يستاهل ولا لاء
تحياتى

[m.3abdel3al]

الف مبروك على الصيانة و يارب يدوم الانطباع دا عن التوكيل على طووووووول

[د.محمود صلاح]

مبروك صيانة الألف وعقبال المليون وكفاية الجملة دي : -

5- مش لاقي حاجة تانية اقولها

[mido_soliman]

الف مبروك على الصيانة و يارب يدوم الانطباع دا عن التوكيل على طووووووول

متشكر جدا يا محمد وان شاء الله الانطباع دة يدوم باذن الله

مبروك صيانة الألف وعقبال المليون وكفاية الجملة دي : -

متشكر جدا يا دكتور والله يبارك فى حضرتك

[Raul_7]

ألف مبرووك يا أبو حميد, ويا رب دايما جينا في الحفظ والصون إن شاء الله.

إن شاء الله المفروض الأحد الجاي اعمل صيانة ال 1000, ربنا يسهل.

بس أنا بعد تجربة الزيت بتاعتك ده بفكر اغير زيت توتال أول مرة من عندهم, بعدين أبقى أجيب زيت تاني في صيانة ال 5000 وساعتها المفروض الواحد يعرف فيه فرق ولا لأ.

و عيش بقى يا معلم, أنا لحد دلوقتي لسة باحسس, ههههههههههه.

[like_sea]

الف مبروك ياباشا
استفسار بس عشان انا رايح صيانة الاف قريب
انت كنت جايب الزيت بكام ؟
و لو انا مجبتش هادفع عندهم اد اية ؟
و انا كان عندى كام خربوش فى الباب فكنت عايز ارشة فهل ينفع فالتوكيل ؟
وهايتكلف حوالى اد اية ؟
معلش هاتعبك

[x512]

ممكن اعرف ايه اللي بيحصل في صيانه الالف بالظبط؟؟؟؟........انا كل اللي اعرفو تغير فلاتر زيت و زيت المكنه ...و هل انا لازم اجيب الزيت قبل مروح ولا هما عندهم؟؟ و ايه هو افضل نوع زيت.......ارجو الافاده

[midosalah]

مبرووك على الصيانة ربنا يباركلك فى العربية
بالنسبة للفتيس الاتو انا كنت قريت قبل كده ان لو انت جريت جرية حلوة بالعربية الفتيس بيفضل فاهم ان انت عايز تجرى حتى لو انت هديت بيقعد كده شوية وبعد كده بيرجع ينقل على ار بى ام أقل الكلام ده مجرد قرأة فى المنتدى وليست عن تجربة انا بس حبيت اشاركك اللى اعرفه
انت مقولتش هما ربطولك العفشة ولا لا اللى اعرفه ان فيه تربيط عافشة فى صيانة الالف ؟؟؟
مبرووك كمان مره
وياريت تحاول ترفع الفيديو