أشتريت و أستلمت و لسه الورق

[Tayer]

يا جماعه أنا أشتريت جين 2 مانيوال 2010
و أستلمت يوم الأربعاء الفات بعد موعاناه أستمرت 24 ساعه
أنا كنت مقبل على شراء سياره بقالى سنه بدور و بسأل و محتار و مش عارف و متردد و تعبان و جعان و خايف لأن انا بطبعتى متردد جدا جدا و قلوق جدا و بحب أفلى الحاجه كويس قبل مشترى حتى أسؤلو أيمن أد أيه أتخنق منى و مكنش طايقنى

لحد ماليومين الحر الفاتو كرهونى فى عربيتى القديمه أوى لأنها عربيه شتويه أصيله جدا و ياما شلتنى و لسه شيلانى لحد مرخص بس
فقررت أشترى فى أسرع وقت
تخيلو سنه بدور و مكنتش لسه رسيت هشترى أيه
الميزانيه كانت 100,000
فكرت فى (سيات كردوبا من سنه أتوقفت /فكرت فى فيات لنيا أتوقفت /فكرت فى أبيزا 1400 سى سى قله أدب فى سعرها و كمليتها /فكرت فى بولو الجديده مسخره 130000 حرام /فكرت فى جراند بونتو معرفش ليه مرتحتلهاش و شكله من ورا مش عاطفى قولت يا واد مالها الجين 2
أموره أوى و شبه المازدا 3 و أنا بعشق المزدا و أستبلتى و أنا بحب الجرى أوى و مشاكل التقفيل أتحلت بنسبه كبيره السنتين الفاتو)
المهم كلمت محسن صالح فى عز العرب و سألته على العربيه قالى موجوده و قولتله نايل موتورز من طرف أيمن قالى ليكو خصم بتاع أيمن و نايل موتورز 2900 جنيه
تانى يوم روحت عربنتو كان يوم الأثنين الفات
الثلاثاء روحت أكيش و أستلم
كيشت بس مستلمتش قولولى ليه عشان أحكلكو ليه
بصو كانت حولى الساعه واحده الظهر بعد غسيل العربيه قولت أما أفليها بقى أول ما دخلت العربه كان لونها رمادى فاتح جيت أجرب زجاج الأربع أبواب و كانت المفاجأه
صوت زنه غريبه فى الزجاج الأمامى قولتله أيه ده قالى مكنه الزجاج عيزه تتغير و ده ليه مش تقفيل يا جماعه عشان مظلمش مالزيا ده سوء تخزين قولت لما أكمل فرجه لقيت الأكصدام الورا فى طقه بصيطه قولتله دا أيه قالى ده كلبس
النتيجه مش هستلم العربيه دى
أ/محسن قالى مفيش غير عربيتين بس اللون ده و دى واحده فيهم هجهزلك التانيه و تعالى الساعه أربعه و نص أستلم
كلمت أيمن الله يباركلو كان بالصدفه هناك
رحت الساعه أربعه و نص حسب الأتفاق و قابلت أيمن و شفنا العربيه مع بعض و الصدمه نفس الشىء ماكينه زجاج الباب عيزه تتغير و كمان العتبه اليمين مش ميه واحده مع الرفرف الورانى
أبتديت أتخنق و حسيت أنى ممكن أصرف نظر عن العربيه دى
محسن قالى مفيش اللون ده تانى و أعد يقنعنى بيها و أن كل ده هيتعمل فى صيانه الأف و أنا أستحالا أستلم أه اليخلينى أستلم عربيه فيها ماكينه أزاز هتتغير و هتتعمل فى صيانه الألف و العتبه بيقولى ده دابل فاس و سهله
النتيجه مستلمتش و قفشت و أدايقت و زعلت و لازم أختار لون تانى عشان مفيش اللون ده تانى لأما أستلم و أظبط الكلام ده فى صيانه الألف
المهم أنا كان نفسى فى الأحمر قولتله خلاص هاخد الأحمر قالى تعالا بكره أتلم لأن الساعه كانت خمسه و نص و هما بيقفلو خلاص
تانى يوم روحت و أنا ناوى على حاجه من الأتنين لهستلم العربيه لهستلم فلوسى
روحت تانى يوم أيمن كلمنى كتر خيره و كان فى التوكيل (حظى حلو)المهم شوفت العربه و بعد الفحص و المحص و اللف و الدوران و جربت تقريبا كل حاجه فى العربيه سليييييييييييييييييييييييمه و الحمد له
أستلمت و وجعتلكم دمغكم معلش و قولت الحمد لله أنى أستلمت اللون الأحمر أحلى بكتير من رأيى الشخصى
و أخيرا شكر خاص لأيمن برنس الجيناويه
و محسن صالح كينج السالس فى عز العرب
يشرفنى أكون بروتوناوى عشان تكونو أصدقائى و أتشرف بمعرفتكم يا أقوى قسم فى المنتدى

[mido_soliman]

الف مبرووووووووووووووووك وربنا يديك خيرها ويكفيك شرها يارب العالمين

[ramyar]

الف مليون مبرووووووووووووووووووك منور الجمهوريه البروتونيه تحت قياده رئيسنا الملك ايمن

[hossamkoshy]

الف مليون مبرووووووووووووووووك وربنا يديك خيرها ويكفيك شرها امين

[Raul_7]

ألف مبرووووووووووووك يا معلم, وخلينا نتقابل بقى, ده أنت خطوتين جنبي.

[jisso82]

مبروك و ربنا يحفظهالك إن شاء الله.

[be7ee]

الف مبروك ياباشا ربنا يرزققك خيرها ويكفيك شرها وشر الطريق (مشاء الله)

وخلي بالك ومن اي نوع من انواع المعطرات الي بتتحط علي التبلوة

[m.3abdel3al]

الف مبروك و ربنا يباركلك فيها

[x512]

الف مبروك يا باشا..... بس انت خدت بالك غيرك كان ممكن يلبس العيوب دي و الليي حصل معاك دا دليل عدم امانه في التوكيل ...يعني ايه يحاول يقنعك بعربيه فيها عيوب و حتي ولو بسيطه و يقولك هتتظبط في ال 1000 ...امال انت دافع دم قبلك في عربيه زيرو ليه...ربنا يستر عليا اما اجي اشتري و استلم

[تامر.محمد]

مبروك يا باشا
:)

و فعلا فيه حتة عدم امانة كده مش مظبوطة في الكلام

[ahmed_h_g]

مبرووووووووووووووووووووووووووووووووووووووووووووووو وووووووووووووووووووووووووووووووووووووووووووووووووو وووووووووووك

[midosalah]

mabrouuuuuuk

[Tayer]

والله يا جماعه أنتو بجد أسرتى الجديده أنا مستهلش كل ده بجد أخجلتم تواضعنا
ربنا يبارك فيكم جميعا و مستنى الموقابله الجايه على فارغ الصبر
و طول منتو منورين المنتدى عمرى مهقلق من أى حاجه فى العربيه أبدا يا أحلى و أجمد جروب فى المنتدى
أنا أستلمت الورق النهرده
و رايح بكره أرخص أن شاء الله أدعولى
محدش يعرف سكه فى مرور الشيخ زايد تسبت الفاميه على الرخصه و ياخد الهوه عيزه
أنا مستعد أدفع لغايت 1000 جنيه بس أسبت الفاميه على الرخصه

[Raul_7]

والله يا جماعه أنتو بجد أسرتى الجديده أنا مستهلش كل ده بجد أخجلتم تواضعنا
ربنا يبارك فيكم جميعا و مستنى الموقابله الجايه على فارغ الصبر
و طول منتو منورين المنتدى عمرى مهقلق من أى حاجه فى العربيه أبدا يا أحلى و أجمد جروب فى المنتدى
أنا أستلمت الورق النهرده
و رايح بكره أرخص أن شاء الله أدعولى
محدش يعرف سكه فى مرور الشيخ زايد تسبت الفاميه على الرخصه و ياخد الهوه عيزه
أنا مستعد أدفع لغايت 1000 جنيه بس أسبت الفاميه على الرخصه

بلاش أحسن, كان فيه واحد عامل نفس الموضوع وفي الآخر الناس قالوا له لأ برده لإن بيبقى فيه محضر تزوير ولا مش فاكر ايه بالضبط كده.

خليك في السليم.

[be7ee]

فعلا حوار تثبيت الفامبة لو مش فبريكة لو حد حب يرخم عليك هيعمل محضر تزور

انا مرخص قوات مسلحة ولو كنت عاوز اكتب فامية وستاير كنت هكتب بس حوار محضر التزوير دة مبيرحمش

لو حد ظبطك خليها ستاير وهية هية