حماية المستهلك

[eng.m7md.ali]

السلام عليكم يا جماعة
ندخل في الموضوع علشان مطولش عليكو
للاسف انا هتوجه لجهاز حماية المستهلك بسبب عيوب فنية زي علبة الدركسيون والاصوات اللي مش عارف ابتيجي منين وايه سببها وحلها ايه واللي التوكيل رافض يحلها بعد ما قضيت يوم كامل في الصيانة بلا اي جدوى بجانب مشاكل تانية
فا اللي عندو اي مشكلة مضيقاه ومخنوق زي ما انا مخنوق ياريت نعمل شكوة جماعية لاني خلاص زهقت بجد وان شاء الله هبيع العربية واخلص منها وحسبي الله ونعم الوكيل

[powerofhelll]

طيب كلم ايمن ممكن يظبطلك الموضوع ده

[eng.m7md.ali]

طيب كلم ايمن ممكن يظبطلك الموضوع ده

الاستاذ ايمن مشكور على اهتمامه بحل المشاكل بس خلاص انا زهقت من الشكاوي والله
يعني بزمتك ينفع اقول لواحد ظريف هناك (مش معقول يكون الاصوات دي في عربية زيرو)
تعرف قال ايه؟؟
ماكنت تشتري شاهين احسن
تخيل كدة مدى الاستخفاف بعقول العملاء وبعد ده كله يقول دي تهيؤات

[أبومعاذ]

ربنا يعينك بس هي الاصوات دي عاملالك مشاكل في الاداء ولا حضرتك متضايق من الصوت بس؟

[RedBull_30]

يا سيدي الفاضل بيقولك عربية جديدة .. يعني مش من المفروض يسمع منها اي صوت غير طبيعي.. فعلا توكيل على ما تفرج

[eng.m7md.ali]

هيا مش فارقة معاية في الاداء بس مينفعش الاصوات تكون موجودة في عربية من اول 1000 كيلو وانا عمال اشتكي ومفيش فايدة
وبعدين انا زهقت من كتر اللي بيركب معاية ويقعد يتريق على العربية بسبب الاصوات دي

[أبومعاذ]

هو من حقك مادمت مش مبسوط من العربية لأي سبب إنك تشتكي لأن التوكيل المفروض مسئول عن إرضاء العميل بس في فرق بين إن عربيتك يبقى فيها شوية أصوات مقابل سيارة رائعة بكل المقاييس مقابل عربيات تانية مفيهاش أصوات بس العيب اللي بيطلع بيبقى عيب بجد وممكن يكون عيب مميت واسعار العربيات دي ضعف سعر عربيتك مرة ونص او مرتين ومفيهاش نص عوامل الأمان اللي في عربيات بروتون والي يتريق على عربيتك عشان الأصوات قله يجيبلك عربية بالسعر دا مع الجودة دي في الاساسيات من ميكانيكا وعفشة وكهربا ومع نفس عوامل الأمان ومع جودة تقفيل مقبولة ومش هيلاقي غير في عربية تفرق 20 الف مثلا
عموما ربنا يوفقك للي فيه الخير

[amr1973]

اخى العزيز حضرتك ممكن تتصل بايمن و هو هايقولك تقابلة فين فى التوكيل و ان شاء الله كل مشاكلك تتحل انما موضوع انك تبيع العربية عشان شوية كلام مالوش معنى اعتقد انك كده عمرك ما هترضى عن عربية المفروض ان كل واحد فينا يبقى عندة قناعه بشى الا و هيا ان السعر مقابل الاداء بمعنى ادق حضرتك ما ينفعش تقارن مثلا بتويوتا لان دى سعر و دى سعر و اخى العزيز مش كل واحد هايقولك كلمة تكرة العربية عشان الكلام طيب خاية مثلا بعربيتة واركب معاه و عربية مثلا زى الانوس او الفيرنا او اللوجان مثلا و يجيب 150 كم و شوف ثبات العربية و بعد كده ركبة عربيتك و هات 175 كم و شوف الفرق و اكيد هاتحمد ربنا ده ان مانزلش صاحبك عايز يبيع عربيتة و يشترى زيك
اخى العزيز اعشق سيارتك تعشقك دى نصيحة ليك بجد

[mwaheed]

توكل على الله وربنا يوفقك.

شوف حقك فين واسعى له وماتخليش حد يعطلك.

[alarabiya11]

طيب مايغيروا له علبة الدريكسيون وده حقه لانه لسه فى الضمان

[eng.m7md.ali]

للاسف التوكيل بيتمادى في تغيرها وانا خلاص صبري نفذ ده غير اتهامهم لية بالجنون والاوهام

[alarabiya11]

العطل الاول: وجود بوش فى الدريكسيون
-------------
1-السبب: عدم الدقة فى ربط اذرع مجموعة التوجيه
الغلاج :يضبط ربط الاذرع

2-تاكل الوصت الكروية (بيضات ادريكسيون)
العلاج :تضبط او تغير

3-تلف كراسى العجلتين الاماميتين
العلاج :تغير الكراسى

4-عم ضبط تروس الدركسيون
العلاج: يتم ضبط التروس

ثانيا العطل صعوبة تحريك الدركسيون
---------------------------------------
1-السبب: نقص الشحم فى الوصلات الكروية العلاج يتم التشحيم

2-نقص الزيت فى علبة الدريكسيون العلاج يكمل الزيت

3-اختلاط ضبط الزوايا العجلتين الاماميتين العلاج ضبط زوايا

4-الاطارات غير ممتلئة كما هو موصى العلاج يتم ملء الاطارات

5- تروس الدركسيون غير مضبوطه العلاج يتم ضبط التروس

6- عدم استواء الجنوط الامامية للعجل العلاج يتم استعدال الجنوط

7- وجود ترخيم فى الدنجل الامامى العلاح يتم استعدال الدنجل

8-تلف رولمانات البلى العجل الامام العلاج يغير الرولمان بلى

9- الخلوص بين الجلب غير كاف او غير موجود العلاج يعدل وضع الجلب او تغير

[alarabiya11]

طيب شوف التوبيك ده
http://www.nilemotors.net/Nile/162559-a.html

[A. Ibrahim]

استاذي العزيز
انا معاك ان حقك لازم تخدو و انا واحد من الناس معاك في ده بس انا ليه نقتطين احب اوضحهم

اولا العربيه جديده و لان حضرتك زي اي واحد منا سمعت كلام كتير عن العربيه و وجع القلب و التوكيل فهتلاقي الواحد متحفز و ودنه مع كل حاجه و اي عربيه جديده اول 1000 الي 5000 بيكون العفشه و الاجزاء الميكانيكيه لسه مطبعتش و مع الاستعمال و الصيانه الدنيا هاتظبط ان شاء الله, ممكن تعمل تجربه بسيطه ركب العربيه لحد معرفه و اسئلوه او حد من الاعضاء

التوكيل اليومين دول مشغول و مكركب علي الاخر و كمان اسبوع 10 ايام بالكتير الدنيا هتظبط, بس بلاش حمايت المستهلك الان عشان موضوع الاصوات و التخبيط مش هيكون قوي معاهم , هماناس محترمه و الكل بيشكر فيهم بس هما عندهم بلاوي متلتله

و ان شاء الله خير

[callsherif]

السلام عليكم يا جماعة
ندخل في الموضوع علشان مطولش عليكو
للاسف انا هتوجه لجهاز حماية المستهلك بسبب عيوب فنية زي علبة الدركسيون والاصوات اللي مش عارف ابتيجي منين وايه سببها وحلها ايه واللي التوكيل رافض يحلها بعد ما قضيت يوم كامل في الصيانة بلا اي جدوى بجانب مشاكل تانية
فا اللي عندو اي مشكلة مضيقاه ومخنوق زي ما انا مخنوق ياريت نعمل شكوة جماعية لاني خلاص زهقت بجد وان شاء الله هبيع العربية واخلص منها وحسبي الله ونعم الوكيل

باشا بالنسبة لعلبة الدركسيون الموضوع سهل ان شاء الله بس خليهم يعملولك التعديل وشوف الموضوع ده هيفيدك ان شاءالله

http://www.nilemotors.net/Nile/162559-a.html

اما بقيت الأصوات انا مش عارف منين بالظبط بس كان فى صوت بيطلع من الشنطة وده برده بيظبطوه ... لو فى حاجة تانية حاول تحددلهم منين وتقولهم بالظبط وهم ان شاء الله هيعملوها ..