أخترت الچين 2 ولكن مانيوال ولا أوتو ( أقوي في الفرامل )

[fadynabil]

في البدايه بحب أشكر الأعضاء اللي موجودين معانا في المنتدي الجميل .. اللي فعلا يعتبر مرجع ممتاز لأي حد بيتعامل مع عربيه أو بيفكر يشتري عربيه. وبالأخص بشكر أيمن علي مجهوده الرائع وتعبه معايا اليومين اللي فاتو

... بقالي فتره في مرحلة البحث عن سياره جديدة ،، وكانت الأختيارات الللي قدامي تنحصر في عربيتين مفيش غيرهم يدخلوا دماغي بصراحه


.. وكانت الجراند بونتو وبعدها الچين 2 .. وبعدين البونتو إيفو نزلت تحفه فنيه بمعني الكلمه ،، ولكن

عدم إنتشار البونتو مش مطمن ،، يعني بعد فتره قطع غياره هتبقي قليله جداً والتجار بعدين هيبيعوا ويشتروا في الواحد ( نظره مستقبليه )

مقارنه بالچين 2 .. العربيه تقريباً مبيعديش يوم غير لما بشوف 8 أو 9 عربيات في طريقي وأنا رايح وراجع من الشغل

وبقت منتشره إلي حد ما وقطع غيارها إبتدت تنتشر بره الوكيل

.. المهم كنت خلاص إبتديت أجهز نفسي عشان أروح أخلص وأشتري الچين 2 ومن أسبوع كده جريت العربيه وأنطباعي عنها
كالتالي

,,,,,,
......

.... أولا القعده بصراحه تحفه والخامات ليست بالسؤ اللي الناس بتهاجم العربيه بيه .. يعني مرضيه جداً .. والتصميم كشكل كويس جداً ورياضي

أما عن الأداء .. العربيه أوتوماتيك .. بصراحه أنا حسيت إن الأداء متواضع يعني مش اللي الناس بتتكلم عليه هنا بصراحه

لأني كانت في ناس بتقول إها بتعلم ع الچيتا والـ نيسان صني والأوكتافيا و حاجات تانيه كتييير .. و بصراحة شديده معتقدش أبداً إنها ممكن تتقارن سحبها مع الچيتا لأني ركبتها كتيير وعارف ..

ولكن الأداء معقول بس كانت العربيه وبتوصل لسرعه 90 100 والسحب بيضعف أوي أوي .. مش عارف كان ممكن يكون في مشكله في الفلاتر أو حاجه مش مظبوطه في العربيه اللي سقتها ,,عشان أنا مسقتش كذا عربيه عشان أحكم .. أصحاب العربيه هما اللي يقدروا يحكموا
السحب .. مقارنه بـ

الچيتا : الچيتا أفضل بشويه حلوين أوي ..

وبالـ نيسان صني متقارب بس برده النيسان أفضل ..

طبعاً كل اللي بتكلم عليه أوتو
كل الكلام ده مش مشكله بالنسبالي .. المشكله اللي قلقتني فعلا و إبتديت أخاف منها

.... الفرامل ...


لدرجه إني بقيت كل ما أشوف حد أعرفوا معاه عربيه جديده أخدها وأجرب فراملها وأقارن بالچين 2
مع إني كنت شبه مقتنع وقتها لما كنت بسوقها إنها كده كويسه بس لما قارنت مع حاجات تاني كتيير ( سيراتو / إمبريزا / جيتا / صني / إلنترا ) وعربيتي الإبيزا .. وللأسف الجين كانت أسؤهم


أداء الفرامل غريب بقي ليه ؟؟؟؟ الدواسه عباره عن جزء طري جداً في الأول يا دووب بيهدي العربيه .. وبعد ما تدوس شويه بيبقي فعال ويوقف العربيه :b4_592: .. طيب تيجي إزاي دي زي ماتكون الفرامل مهربه

بصراحة أنا مش مقتنع بفكره إن الناس بتقول زي اللي بيقولوه في التوكيل ( هيه فرامل الچين 2 كده ولازم تتعود عليها )

طيب إزاي ده يحصل والمفروض إن العربيه دي رياضيه والمفروض إن فراملها تكون أوقوي بكتيير من أي عربيه تانيه

ويزيد علي كده إن نظام الفرامل في الچين 2 مصنع من قبل شركة بوش الألمانيه الغنيه عن التعريف .. ولا هوه كلام وخلاص

المهم في مقوله بتقول بقي إن فرامل المانيوال أفضل من الأوتو وبالذات في الچين 2 ... فهل الكلام ده صحيح ؟؟؟

وياريت لو حد من الأعضاء اللي معاه الچين 2 عنده تجربه مع الأوتو والمانيوال يقدر يقولنا المفيد في الوضوع ده

لأني قلقان جداً من الفرامل وهحدد عليها قرار شرائي سواء أوتو ولا مانيوال .

وكمان يارين لو حد معاه أوتو يقولنا أخبار العربيه إيه بعد الــ 100

( علي فكره تجربتي إنحصرت في حدود نصف ساعه قياده وسرعه لم تتعدي الـ 100 110 ) عشان كده حكمي ع العربيه مش نهائي]

[Nistelrooy]

متابع ...........

[تامر.محمد]

هممممممممم , متابع انا كمان

[mahmoudsk]

بسم الله

انا معايا اوتو بس بقالها اسبوعين تقريبا معايا

الفرامل: مش عجباني خالص
اولا بعيده اوي وثانيا مش بتوقف العربية على طول
(انا كان معايا فليشيا 1998 فراملها اقوى بكتير)
وناوي اشوفلها حل مع صيانة ال1000

السرعة: بصراحة انا لسة في مرحلة التليين
بس العربية بالنسبة للسواقة العادية اليومية في شوارع القاهرة كالاتي:
السحبة الاولنيه (من 0 ل 20 ) معقولة
بعد كده (من 20 ل 100) هايلة جدا
للاسف مجربتش بعد الميه
استناني اسبوع كمان اروح اعمل صيانة ال1000 وبعد كده حقولك المفيد

[Tarek Gen 2]

بص انا معايا اوتو 2010 و صاحبى معاه مانوال 2010 برضه
انا شايف الاتنين زى بعض و الفرامل ممتازة و شغلت الاى بى اس مرتين لظروف طارقة و الحمد لله فيهم مرة انقذنى من موت محقق بعد ارادة ربنا سبحانه و تعالى طبعا
و طول عمرى بستخدم الفرامل زى الفل قبل المطبات الفجائية و الناس اللى بتقف مرة واحدة و كل مرة بتقف العربية فى وقت مناسب
انا عن نفسى مش شايف منها مشكلة الله هو اعلم بالناس التانية انا بعبر عن رأيى بس
بس برضه للحق هى غير اى فرامل تانية فى عربية تانية بس عايزة تعود لانك بتحس ان تلت الدوسة كدة مش بتأثر على العربية عكس الباقى من اول ما بدوس بتحس بتأثير الفرامل بس كله بالتعود والمانوال نفس الكلام

[m.3abdel3al]

انا معاية اوتو 2 2008 يا جماعة فعلا الفرامل حلوة و لو سوقتها هتتعود و احنا اول ما جبنا العربية كان راينا زيكوا بالظبط اتعود على العربية و بعد كده احكم عليها

[Raul_7]

على فكرة أنا مش متضايق من الفرامل خالص لإن اللانوس عندي كانت نفس النظام في مشوار بدالها, بفرق إن الجين فراملها أقوى بكتيييير.

[fadynabil]

بص انا معايا اوتو 2010 و صاحبى معاه مانوال 2010 برضه
انا شايف الاتنين زى بعض و الفرامل ممتازة و شغلت الاى بى اس مرتين لظروف طارقة و الحمد لله فيهم مرة انقذنى من موت محقق بعد ارادة ربنا سبحانه و تعالى طبعا
و طول عمرى بستخدم الفرامل زى الفل قبل المطبات الفجائية و الناس اللى بتقف مرة واحدة و كل مرة بتقف العربية فى وقت مناسب
انا عن نفسى مش شايف منها مشكلة الله هو اعلم بالناس التانية انا بعبر عن رأيى بس
بس برضه للحق هى غير اى فرامل تانية فى عربية تانية بس عايزة تعود لانك بتحس ان تلت الدوسة كدة مش بتأثر على العربية عكس الباقى من اول ما بدوس بتحس بتأثير الفرامل بس كله بالتعود والمانوال نفس الكلام

ما هوه ده اللي قصدي عليه .. موضوع التلت الأول ده ... مع إختلافه عن معظم العربيات

بمعني علي سرعه عاليه 140 160 كده الدوسه بتبقي برده فاضيه كده و يادوب تأثر في أخر الدوسه .. لأن صعب جداً علي سرعه زي كده يبقي تأثيرها ضعيف .. من الأخر تبقي غير مقبوله .. فهل هوه ده اللي بيحصل ولا لأ

أمال رياضيه إزاي ،،، وموضوع بوش ده إيه مدي صحته ؟؟؟؟؟؟؟؟؟؟؟؟؟

[khpopo]

انا معاية اوتو 2 2008 يا جماعة فعلا الفرامل حلوة و لو سوقتها هتتعود و احنا اول ما جبنا العربية كان راينا زيكوا بالظبط اتعود على العربية و بعد كده احكم عليها

+111
ربنا يوفق

[أبومعاذ]

لو بتحب السواقة ومش بتزهق من المانيوال في الزحمة هات مانيوال عشان تستمتع بالعربية دي

[Tarek Gen 2]

ما هوه ده اللي قصدي عليه .. موضوع التلت الأول ده ... مع إختلافه عن معظم العربيات

بمعني علي سرعه عاليه 140 160 كده الدوسه بتبقي برده فاضيه كده و يادوب تأثر في أخر الدوسه .. لأن صعب جداً علي سرعه زي كده يبقي تأثيرها ضعيف .. من الأخر تبقي :n_no[1]: غير مقبوله .. فهل هوه ده اللي بيحصل ولا لأ

أمال رياضيه إزاي ،،، وموضوع بوش ده إيه مدي صحته ؟؟؟؟؟؟؟؟؟؟؟؟؟

يا باشا انا كنت مسافر و على 160 و عربية اتقلبت قدامى و انا فرملت بكل قوتى و الاى بى اس اشتغل و العربية وقفت قبل ما اوصله و كان جمبى نيو اكسنت لفت منه العربية و اتبهدل والله بس الحمد لله مخبطتش
يا باشا هتتعود بكل سهولة و من تانى يوم سواقة مثلا
الفرامل مش بتلقط من الاخر و بس
بص الخلاصة
لو قلنا العربيات العادية مثلا الفرامل بتاخد فيها مشوار 10 سنتي مثلا و من اول سنتى لاخر سنتى ليها تاثير بالتدريج مثلا
فى الجين بقى هى هى بالظبط بس فى زيادة 3 سنتى فى الاول ملهمش تأثير بس العشرة سنتى موجودين و بقوة و يوقفوا العربية مهما كان الموقف و الحمد لله
و ربنا يخليلنا اللى اخترعلنا الاى بى اس بسببه بعد ربنا فى ناس عايشة مع اسرها دلوقتى بدل ما تكون ماتت

لو بتحب العربية دى هاتها و متدوش دماغك بتفكيرات كتير
لو مش بتحبها و عايز تجيب عربية بس مش عايز تجيب جين تو يبقى هات حاجة تانية عشان صدقنى لازم تكون بتحبها عشان هتتعب اوى منها لو مش بتحبها مهما كانت حالتها
ربنا يوفقك

[K3A]

تيل الفرامل

بص ياباشا بخصوص موضوع الفرامل ده وطول المشوار المشكلة الشائعة عند الغالبية

بكل صراحة انا عربيتي بيرسونا اوتو 2009 اول لما اشتريها كنت بلمس الفرامل العربية تقف

بعد كام الف كيلو 1000 او 2000 بدأ مشوار الفرامل يزيد تدريجي لحد 5000 زاد بشكل ملحوظ ثم في 10 الاف كيلو او 15 الف كيلو (مش فاكر) غيريت تيل امامي ....

ولو الشباب لاحظو حيلاقوا الاتي ان العربية دي تيلها بيتأكل بسرعة عن العادي وكمان بيهبب الجنط بهباب اسود نتيجة سرعة تأكل التيل وده بينتج عنه طول مشوار الفرامل ودى نتيجة طبيعية جدا جدا و اعتقد ان اي عربية تيل الفرامل بتاعها محتاج يتغير حتلاقي مشوار الفرامل طويل

طب اللى ممكن يكون مش طبيعي هو سرعة تأكل التيل .... اما الفرامل كأداء فهي ممتازة ... كمشوار دواسة فهو منطقي جدا ... ولو انت خايف اوي كده ممكن تغير التيل بسرعة ومتستناش عليه للآخر... و ممكن تشد التيل شوية (في موضوع في المنتدى بيتكلم عن كده) وان كنت مش من انصار ذلك

عموما سوق اي عرية من اللى قلت عليهم دول بس تكون عاملة كيلوات كتير و شوف كده مشوار دواسة الفرامل حتلاقية طويل برده بس يمكن بعد 30 الف كيلو او 50 الف كيلو في العربيات التانية وهو ده الفرق

اما السحب فللأسف لاتعول عليه كثيرا ... تقدر تقول سحب عادي ... وده لأن وزن العربية تقيل و الكاوتش عريض غير ان الموتور مهواش cps

تحياتي ...

[tutankhamoun]

السلام عليكم يا أستاذ فادي .

أولا أحب أهنيك على أختيارك الجين 2 لأنك هاتشتريها يعني هاتشتريها أدام دخلت قسم البروتون ......

مفيش مخرج من الموضوع ....... لازم تخطب عروسة من عندنا من القسم ..... دخول الحمام مش زي خروجه

.................................................. ........

بُص يا أستاذ فادي ....أنا هاعلق على نقطتين مهمين أنت أتكلمت فيهم
النقطة الأولى و هي سحب الأوتوماتيك .......... و النقطة التانية و هي فرامل العربية عموما .

بالنسبة لسحب الأوتوماتيك في الموتور القديم اللي أنت جربته .... هو فعلا أقل من العربيات التانية لو أنت سوقت العربية بشويش و على سرعات أقل منه 3000 لفة للموتور ..... لأن الموتور القديم قوته بتبان أكتر فوق 3500 لفة .
و بالتالي فيه فرق ملحوظ في الأوتوماتيك بتاعها في الموتور القديم و بين كل العربيات اللي أنت أشرت إليها .

تعالى بقى نتكلم على الموتور الجديد اللي فيه اي أف ام iafm ...... ده حاجة تانية و كأن العربية تحولت .
خصوصا في الأوتوماتيك ......... لو أنت فاكر موضوع العزم اللي كان بيثبت ما بين 2500 و 3500 لفة للموتور في المحرك القديم .
الموضوع ده أنتهى دلوقتى مع تكنولوجيا iafm و حسب العربية الأوتوماتيك أتحسن بنسبة كبيرة جدا خصوصا على سرعات قليلة .....

و بعد تجربة العربية الأوتوماتيك لفترة طويلة أحب أقولك
أن المانوال طبعا أحسن في السحب لأنك بتتحكم في الغيار بطريقة عالية قوي ( بتغير بمزاجك )
و لكن ا لأوتوماتيك الجديد ............. سحبه حلو قوي قوي ............ و مريح جدا ..............


نيجي بقى لبيت القصيد ..................... و هي الفرامل .
قبل ما هاقول أي كلمة ............... هاقولك فرامل الجين 2 ............... ممتازة .

و هاشرحلك ازاي .

مشوار البدال طويل نسبيا ( و هي فعلا كل الجين 2 و البروتون عموما كدا )
الفرامل ممتازة ....... و بتوقف العربية كويس جدا ....... و كمان موضوع abs ممتازة و بيثبت العربية في الأرض و في اتجاه واحد عند الفرملة مما يساعد على زيادة كفاءة العربية في التوقف ....... مش بيساعد على تقليل الوقت اللي هاتقف فيه .

أيه هي الكفاءة اللي أنا بتكلم فيها ؟
عدم دوران العربية أو زحفها على الأرض عند الفرملة المفاجئة .

أنا جربت عربيات كتيرة قوي من غير abs
هيونداي و فيات جديد .. الخ

فعلا العربية بتقف بلمسة فرامل ............ و لكن لو دوست فرامل فجأة على سرعة ......... العربية ممكن تقلب أو تلف بك حسب ظروف الطريق و التوقف المفاجئ .


نيجي بقى و نرجع لموضوع مشوار البدال ........... هاتاخد عليها لما تركب العربية فترة .

موضوع فرامل المانوال و الأوتوماتيك
فعلا فرامل المانوال أفضل قليلا ,,,,,,,, لأن الأوتوماتيك متبرمج أنه يمشي لوحده بعكس المانوال اللي أنت لازم تدوس بنزين علشان العربية تمشي
في الأوتوماتيك لازم برضه تدوس بنزين و لكن العربية توقفها بيكون أقل من المانوال مش عارف سبب علمي لكدا بس احساس قوي بعد تجربة طويلة للأثنين .

طيب هل ده معناه أن الأوتوماتيك فراملها وحشة ؟

لاءة .............. فراملها كويسة جدا و لو دوست فرامل العربية بتقف و زي الفل إن شاء الله .


أستريح و أطمن إن شاء الله الفرامل ممتازة .............. و السحب في الأوتوماتيك الجديد أصبح ممتاز
و كمان هاضيف أن أستهلاك البنزين ممتاز .

على فكرة ................. تيل الجين 2 المانوال قاعد لحد دلوقتي 45 ألف كم و لسة فيه و شغال ...... و هاقولكم أمتى هايتغير .


أحب أضيف حاجة تانية برضه أن التيل ده حاجة أستهلاكية ............. حسب الأستخدام يعني مش لازم عمره يتساوى بين كل العربية ..... لأن كل واحد له طريقة في السواقة مختلفة عن ا لأخر .

[memo_p910]

انا بحكم خبرتي مع البيرسونا فراملها ممتازه والتحكم فيها عالي بخلاف الصني اول ما تلمس الفرامل تحس انك بتفقض التحكم بقوة الفرامل والعربيه بتكلبش على طول وممكن تزحف منك خاصة لو فرامل مفاجئه هاتحس الموضوع ده بعد استعمالك الجين وهاتعرف هما ليه صمموها بالشكل ده

[fadynabil]

بجد شكراً يا شباب علي أهتمامكم بالموضوع ... وأنا فعلا زي ماقولت إني مش هقدر أحكم علي العربيه من خلال نص ساعه تجربه

بس المشكله معايا إني مش بقتنع بأي عربيه ومش بثق في أي براند وبخاف إني أتورط في عربيه لس ملهاش ثقه كبيره للمستهلك وبالذات حاجه زي بروتون لسه جديده

.. يعني اليومين اللي فاتو لما vw كانت في مفاوضات عشان تشتري بروتون كنت متشجع جداً علي إني أنضم لبروتون لأنها كانتممكن تنضم لبراند عريق زي VW Group .. وده معناه إنهم ناس مجتهده وبيحاولو يعملوا شغل جامد

وربنا يسهل ويختار اللي فيه الخير