كنت عايز اخد رايكم

[shady_love]

السلام عليكم و رحمة الله و بركاته
استفسارى هوة على استهلاك الجين 2 للبنزين انا من بعض الاخوة الاعضاء قلقت و سمعت انها بلاعة بنزين بعد مافعلن اقتنعت بيها و قولت ابيع الى معايا واجيبها , و خايف احس بالفرق فى الاستهلاك خاصة ان الى معايا هيونداى 1500 يعنى الفرق بينها وبين الجين ال100 سى سى يعنى المفروض حتى لو فرقت هيبقى تقريبا فرق غير محسوس فانتو ايه رايكم هل الفرق هيبقى غير محسوس و لا فعلن الجين 2 بلاعة بنزين لان على الاساس دا لوحدو ممكن ما اجبش العربية و كنت عايز اعرف هى بتتفول تقريبا بكام و اسف على التطويل

[shady_love]

ايه يا جماعة فين الردود

[fahd_628]

استهلاك البنزين فى الاوتوماتيك عالى لكن فى المانيوال زى اى عرببة 1600 سى سى و طبعا برضة حسب نوع قيادتك لو رياضية حتلاقيها عالية و لو داخل المدينة حتبقى اعلى من الطرق السريعة و استنى رد احد مالكى السيارة

[shady_love]

فين الردود

[abo3bdolrahman]

أستاذ شادى ممكن من فضلك تجمع كل أسئلتك فى موضوع واحد.
و كمان ممكن تروح تشوف العربية عند الوكيل و تسأل ملاكها على الطبيعة و تشوف كل اللى بتسأل عنه.
و جرب الموضوع ده مع كذا عربية و شوف إيه النتيجة قبل ما تقرر تشترى.

[tutankhamoun]

السلام عليكم
الأخ السائل على موضوع استهلاك البنزين للجين 2
أي عربية 1600 و 1500 بتستهلك بنزين كتير و خصوصا داخل المدينة
أما السيارات 1600 و تكون أوتوماتيك بيزيد أستهلاك البنزين بتاعها عن السيارات المانيول نفس الفئة
و إن كان استهلاك البنزين تقريبا يتساوى بين كل السيارات ال 1600 من نفس الفئة
يعني مانيول أو أوتوماتيك
نيجي بقى لاستهلاك البنزين في الجين 2
خارج المدينة و على طريق سريع و يكون الغيار على الخامس و السرعة تقريبا ما بين 90 إلى 100 كم س
الاستهلاك يكون حوالي 120 كم لكل 10 لتر و ساعات يعمل 150 لكل 10 و ده كان تقريبا أقصى توفير فيها
أما داخل المدينة --- أي سيارة 1600 فهي بلاعة بما فيهم الجين 2
يبقى لو معظم قيادتك داخل المدينة لا تشتري حاجة أعلى من 1300
أما لو معظم قيادتك على طرق سريعة يبقى ممكن تشتري 1500 زي اللي مع حضرتك أو 1600 زي الجين 2
و ده من واقع تجارب عملية لشخصي الفقير إلى الله
و أبعد عن الأوتوماتيك في اي عربية مش الجين 2 بس
أنا لا أحب الأوتوماتيك نهائيا ( رأي شخصي بحت )

[meramor81]

السلام عليكم استاذ توت عنخ امون
يعنى راى حضرتك المانيوال افضل من الاوتوماتيك من ناحيه استهلاك البنزين
فى الجين تو اللى فهمته من كلام حضرتك انها حريق بنزين واحنا سواقتنا هاتكون داخل المدينه يعنى مشواير قريبه بس احنا اختارنا الاوتوماتيك لان زوجى لم يسبق له السواقه من قبل ولسه متعلم جديد وهاتكون الجين تو اول عربيه نركبها إن شاء الله
فقولنا سواقه الاوتوماتيك اسهل ولا ايه راى حضرتك ؟؟؟

[shady_love]

بصراحة انا ميش عارف اقول ليكو ايه بس بصراحة الف الف شكر على ردودكم السريعة

[tutankhamoun]

السلام عليكم استاذ توت عنخ امون
يعنى راى حضرتك المانيوال افضل من الاوتوماتيك من ناحيه استهلاك البنزين
فى الجين تو اللى فهمته من كلام حضرتك انها حريق بنزين واحنا سواقتنا هاتكون داخل المدينه يعنى مشواير قريبه بس احنا اختارنا الاوتوماتيك لان زوجى لم يسبق له السواقه من قبل ولسه متعلم جديد وهاتكون الجين تو اول عربيه نركبها إن شاء الله

فقولنا سواقه الاوتوماتيك اسهل ولا ايه راى حضرتك ؟؟؟

أخت ميرامور
طبعا المانيول بيوفر في البنزين عن الأوتوماتيك
و بيسحب أحسن كمان و لكن لما إن القيادة معظمها داخل المدينة يبقى أعتقد إن الأوتوماتيك ستفي بالغرض
و الجين 2 مش حريقة بنزين و لا حاجة .... هي بلاعة بنزين جوه البلد و ده ينطبق على أي عربية 1600 زي اللانسر و زي الماذدا و زي الأوكتافيا كلهم بياكلوا بنزين جوه البلد و لكن على الطرق السريعة ........ لا تشعرين غير بقوة السيارة و سحبها العالي
و ممكن حضرتك تقوليلي المنطقة التي سيتم قيادة السيارة فيها زحكمة أد أيه ؟
و أيضا المسافة ؟؟
و في النهاية البنزين بيغلى .... و السيارات ال 1600 الأفضل لها الطرق السريعة و ليس داخل المدينة لأنكي لا تحتاجي لقوة السيارة داخل المدينة
يبقى لا داعي لأستهلاك بنزين زيادة عن الذي نحتاجه فعليا
و لو العربية عاجباك قوي قوي و مش عايزة تغيريها علشان تشتري واحدة أضعف شوية يبقى أتكلي على الله و هاتوا الأوتوماتيك بما أنكم غير ذي خبرة في قيادة السيارات .... بس أحب أقول حاجة .... العربية الأوتوماتيك هاتخليكوا على طول ذو خبرة ضعيفة حيث ان المانيول لها رونقها في القيادة و لكنها متعبة داخل البلد
هي معادلة مش متساوية خالص
و لكن أنا تحت أمر حضرتك في أستفسارات

لو حضرتك غيرتي رأيك عندك الهوندا سيتي في نفس السعر و أكثر من ممتازة و 1300 و هاتوفر في البنزين لو كل سواقتك داخل البلد
و بالتوفيق

[شريف شعبان السيد]

السلام عليكم ورحمة الله وبركاته
كيف حالك مستر توت :

والله رودود حضرتك انت والاستاذ فهد الواحد بيستفيد منها كتير جدا فالله يعطيكم العافية ويبارك فيكم

انا كنت عايز استفسر عن الفتيس الاتوماتيك للجين تو والكوالتيى بتعته بالنسبة لليابانى والكورى
ايه راى حضرتكم مقارنة خصوصا بالسيتى والياريس والماتريكس ايهم افضل فى الاربعة وشكرا ليكم

[ahmedsiyam]

اخى الفاضل شادى
تحية طيبة و بعد

احب اقولك ان معايا نفس العربية الاكسنت الـ 1500
و عايز طبعا اغير بالبروتون و كنت واقع فى نفس المشكلة بتاعتك و قعدت حسبتها

وبحسبة بسيطة كده لو انت معدل الكيلو متر السنوى بتاعك 25000 كـم ود ه المعدل الطبيعى
الهيونداى ( المانيوال ) بتعمل فى الصفيحة حوالى 250 كم
البروتون ( الاوتوماتيك ) بتعمـل فى الصفيحة حوالى 200 كـم

وده طبعا لو انت بتسوق سواقة معقولة من غير حرق غيارات و لا تكييف

يبقى فرق الاستهلاك الشهرى تقريبا( 60 جـم )

و لو فى حد من السادة الاعضاء شايف ان حسبتى فيها شئ من الخطأ ياريت يوضح لنا السبب

[shady_love]

الف شكر ليك يا استاذ احمد على ردك

[tutankhamoun]

السلام عليكم ورحمة الله وبركاته
كيف حالك مستر توت :

والله رودود حضرتك انت والاستاذ فهد الواحد بيستفيد منها كتير جدا فالله يعطيكم العافية ويبارك فيكم

انا كنت عايز استفسر عن الفتيس الاتوماتيك للجين تو والكوالتيى بتعته بالنسبة لليابانى والكورى
ايه راى حضرتكم مقارنة خصوصا بالسيتى والياريس والماتريكس ايهم افضل فى الاربعة وشكرا ليكم

أستاذ شريف
انا أسف على التأخير في الرد لأني لم أرى سؤال حضرتك
أولا أنا مش معايا أوتوماتيك
ثانيا ... أعتقد و الله أعلم أن صندوق التروس الأوتوماتيك للجين 2 يجيبك عن مدى جودته أصحاب البروتون الأوتوماتيك موديلات التسعينيات زي الويرا
عن السيارات موضع السؤال أعتقد أن أفضلهم هو الهوندا السيتي
عربية ممتازة كتصميم و شكل ( طبعا الشكل ده أذواق )
و لا أستطيع أن أعطيك معلومات فنية دقيقة بهذا الخصوص
و إن شاء الله سأسال لك ملاك الجين 2 الأوتوماتيك لأن هذا الأستفسار تكرر كثيرا على صفحات المنتدى و أرى أننا يجب أن نجد حل شافع لمن يسعون لأمتلاك جين 2 أوتوماتيك
و شكرا

[شريف شعبان السيد]

متشكر جدا على اهتمامك استاذ توت