ايه رايكم فى قطع غيار الجين

[shady_love]

السلام عليكم و رحمة الله و بركاته
هل انتو موافقنى ان قطع الغيار عاليا حبتين يعنى ميش كتير على الفانوس الف و ميا , خاصة انى ناوى اشتريها و فعلن اقتنعت بيها من خلال هذا المنتدى الرائع , بس بصراحة انا ملاحظ ان العربية بيتصرف عليها كتير دا حتى الى جايب العربية مابقلوش سنة ونصف بغير ملوين حاجة و بتدخل فى كام الف و انا خايف احس بالفرق الجامد دا خاصة ان معايا هيونداى اكسنت 1500 و الكشاف الخلفى بتاعها ب65 جنيه متيلين الفرق و ميش عايز اقول ان مافيش مكانيكى حط ايده فيها من 1999 الا فى السنتين الاخيرة و كان الى اتغير حجات هبلة زى السيور و دا طبعا غير البطارية لان دا حسب الاستخدام , فانتو ايه رايكم فى الموضوع دا خاصة انى بحب لما اجيب عربية اول حاجة بابصلها راحت البال و شكل دى ميش هتخلى راحت بال خالص لان واضح ان الاعضاء الى معاهم العربية كل شوية بيغيرو حاجة فى التوكيل و اسف على التطويل بس اذن انو موضوع مهم بالنسبة لوقتنا هذا و مع غلو الاسعار فالواحد ميش ناقص

[fahd_628]

باشا كل العربيات الجديدة كدة الفوانيس غالية يعنى الألتو الى بأقل من 45 الف فانوسها ب 500 تقريبا يعنى مش رخيصة فا عربية بضعف تمنها لازم يكون الفانوس ب 1100 + ان ليها محلات بتبيع قطع الغيار برة يعنى انا قريت مثلا نا فانوس الواجا برة ب 350 و فى التوكيل ب 1600 و الخلفى ب 300 و فى التوكيل ب 850 تقريبا يعنى برضة ممكن تجيب الحاجة من برة لأن فية محلات بقت متخصصة فى قطع غيار البروتون

و بص على الموضوعين دول

http://www.nilemotors.net/Nile/showthread.php?t=4831

http://www.nilemotors.net/Nile/showthread.php?t=10677

[SEATLOVER]

انا بحييك يا شادى على السؤال دة ..بصراحة دى اول مشاركة الاقيها منطقية فى العربية دى ..انا اعرف اسعار قطع غيارها و مدى استمراريتها ..ورأى احد اصحابها كان جايبها من الزيرو اول ما نزلت . ...

بس انا هاسيب المشاركات من اصحاب العربية نفسها هما اكيد ادرى بيها مننا .

[shady_love]

شكرا ليك يا استاذ فهد و يا استاذ حبيب السيت , بس يا استاذ فهد ايه رايك فى موضوع الحجات الكتير الى بتتغير الى انا بسمعها من الاعضاء مالكى العربية اصل التفسير الوحيد لكدا انها من الاول فتحه بقها و هى ليسة جديدة و لا هوة شغل توكيل قصدى ان المعروف عن التوكيل ان لو العربية مافيهاش حاجة لازم يطلعلك انها معيوبة عشان تدفع و لا انتو ايه رايكم

[shady_love]

كمان كنت عايز افهم حاجة هوة ليه الفرن بتاع المتور فى وش العربية , حاول تلاحظ فى الصور الى على المتور هتلاقى حتى البوجيهات فى مكان غير الى احنا متعودين عليه و كمان فى حاجة معنى ان الفرن فى مقدمة السيارة ممكن يكون عشان سرعة تبريدة لانو هوة الى بيقابل الهوا بس ليه ضرره الى اكيد هيتحس مع الوقت ان الحرارة بتاعت الفرن اكيد ليها تاثير على الاسلاك و الحجات الى ورا لان تخيل لما تيجى تنفخ فى نار ايه الى بيحصل و لا انتو ايه رايكم فى الموضوع دا لان لو مافيش تفسير للموضوع دا يبقى طبعا العربية معيبوة لان دا بيقلل من عمرها الافتراضى

[fahd_628]

باشا ممكن اعرف اية الحاجات الى بتتغير كتيير لأنى مسمعتش عن حاجة بتتغير كتيير + ان متخفش من التصميم لأن التصميم دة تصميم لوتس الشركة العريقة و اكيد مش حيعملو غلطة زى دية و اكيد كل حاجة معمول حسابها هوة بس المحرك تصنيع ماليزى و لكن تصميم لوتس

[shady_love]

مثلا الحجات الكتير الى تقريبا سمعتها من معظم الاعضاء تيل الفرامل سواء خلفى او امامى و بعض الزراير الى فى التابلوه سعات بتعلق و الريموت بردو سعات بيعلق

[crazylambada]

معتقدش المشاكل دي موجودة في موديل 2007 مش كده برضه

[tutankhamoun]

مثلا الحجات الكتير الى تقريبا سمعتها من معظم الاعضاء تيل الفرامل سواء خلفى او امامى و بعض الزراير الى فى التابلوه سعات بتعلق و الريموت بردو سعات بيعلق

أي عربية يتم قيادتها بطريقة عنيفة .... تجد أن أجزائها الميكانيكية بالذات تبلى سريعا
المهم الحاجات اللي حضرتك ذكرتها سنفنطها قطعة قطعة
بالنسبة لتيل الفرامل
بص يا سيدي ..... العربية أغلب مالكيها شباب .... و العربية جامدة و محركها ما شاء الله عليه .
و طبعا الشباب أو أغلبهم بيحب الجري و الغرز و الحاجات قليلة الأدب دي
فطبعا لازم يغير تيل فرامل بسرعة و مش مع الجين 2 بس و لكن مع أي سيارة أخرى
يعني أنا واحد صاحبي معاه بونتو ..... بيغيرلها سوست و عفشة تقريبا كل 15 إلى 17 شهر بالإضافة لتيل الفرامل اللي بيغيره كل سنة تقريبا
و صاحبي ده ..... أخر جنان ..... جري و غرز و حاجات استعباط من دي
مع أني أنا كان معايا نفس العربية البونتو ....... لت بيها 25 ألف كيلو متر و لم أغير أي تيل فرامل ....... أو عفشة أو أي حاجة
يبقى الرك هنا على كيفية الأستخدام .
نرجع بقى للجين 2
العربية معايا بقالها أكثر من 5 أشهر ...... و الحمد لله لم يظهر فيها أي عيب على الاطلاق و الفرامل زي الفل .... و استلاك البنزين كويس على الطرق السريعة
...........
بالنسبة لقطع الغيار ...
التوكيل في بداية نزول السيارة إلى السوق المصري كان محتكر قطع الغيار نظرا لأن السيارة لم تكن منتشرة بالدرجة التي تجعل تجار عادييت يغامروا و يستوردا قطع غيار لها لأنه كانت ذات غير جدوى اقتصادية
و لكن الآن و مع انتشار السيارة زاد عدد التجار الذين يستوردون قطع غيار لها مما نزل بأسعار قطع الغيار نزول كبير و طبعا حضرتك عارف الفرق بين أسعار التوكيل و أسعار محلات قطع الغيار خارج التوكيل
يعني متخفش من موضوع قطع الغيار اطلاقا
نيجي بقى للقطعتين التانيين اللي حضرتك قلت أنهم بيعلقوا
زراير التابلوه .... و الريموت
أنا الحمد لله كما قلت سابقا أنه لم تظهر أي عيوب على الاطلاق في سيارتي و هي موديل 2007
و حتى لو ظهر عيب من العيوب اللي حضرتك أشرت إليهم ....... فهي ليست عيوب قاتلة و حلها سهل جدا في التوكيل و مجانا
العربية كأداء ....... 10 على 10
تقفيل ...... 7 من عشرة
جمال ...... 10 على 10
راحة ..... 9 من عشرة
توفير بنزين ..... 7 من 10 مقارنة مع السيارات 1300
...................
يبقى نصيحة بأنصح بيها كل واحد هايشتري عربية جديدة
لو معظم سواقتك داخل البلد
بلاش أي عربية 1600
لا جين 2 و لا غيرها و تخليك في حاجة 1300 و عندك الهوندا سيتي ممتازة
أما لو معظم سواقتك و مشاويرك على طرق سريعة و نفسك في عربية جميلة زي الجين 2 و قوية يبقى بدون مبالغة هي أفضل سيارة 1600 ممكن تقتنيها
--------------------------------------------
و في النهاية أرجوا أن أكون أفدتك إن شاء الله

[SEATLOVER]

الله ينور عليك يا توت

[mino]

السلام عليكم و رحمة الله و بركاته
هل انتو موافقنى ان قطع الغيار عاليا حبتين يعنى ميش كتير على الفانوس الف و ميا

معاك حق بس كل العربيات الجديدة اسعار قطع الغيار بتاعتها عليا و لو قارنت بينها و بين الياريس مثلا مش هتلاقي فرق كبير

بس بصراحة انا ملاحظ ان العربية بيتصرف عليها كتير دا حتى الى جايب العربية مابقلوش سنة ونصف بغير مليون حاجة و بتدخل فى كام الف

دي انا مش معاك فيها لان العربية لها ضمان على المحرك وناقل الحركة لخمس سنوات أو 100000 كم أيهما أقرب
3 سنوات أو 60000 كم لباقي السيارة عدا البطارية فضمانها سنة واحده أو 20000 كم أيهما أقرب
انا فرامل اليد عندي ماكانتش بتترفع للأخر غيروها لي من غير ما ادفع ولا مليم و بردو الرك علي استعمالك انت زي ما الاخ توت بيقول

و انا خايف احس بالفرق الجامد دا خاصة ان معايا هيونداى اكسنت 1500 و الكشاف الخلفى بتاعها ب65 جنيه متيلين الفرق و ميش عايز اقول ان مافيش مكانيكى حط ايده فيها من 1999 الا فى السنتين الاخيرة و كان الى اتغير حجات هبلة زى السيور و دا طبعا غير البطارية لان دا حسب الاستخدام

حضرتك ما ينفعش تقارن اسعار قطع غيار عربية موديل 1999 بعربية موديل 2008 لأن انتشار العربية هو اللي بيحدد سعر قطع الغيار
العربية ال 128 الفانوس بتعها ب 20 جنية ما ينفعش اقارنها مع الأكسنت
نفس الحكاية ما ينفعش اقارن الاكسنت مع ال جين2

اخيراً الجين2 عربية جميلة و توكيلها معقول بنسبة 75%
و ربنا يوفقك

[Dent_Khaled]

elsalam 3alakom
ana 3ayez as2al haga ..ana ma3aya gen 2 msh sport and 3ayez ageb el body kits bta3et el sport edition agebha mnan and haykon s3raha kam msh lazem el spoiler awy..bas howa fe had byb3ha aslan

[fahd_628]

elsalam 3alakom
ana 3ayez as2al haga ..ana ma3aya gen 2 msh sport and 3ayez ageb el body kits bta3et el sport edition agebha mnan and haykon s3raha kam msh lazem el spoiler awy..bas howa fe had byb3ha aslan

ممكن تركبهم فى التوكيل

كلمهم و اسأل على السعر تقريبا 2700 جنية

[Dent_Khaled]

ana sa2alt fel tawkel they say mafesh haga esmaha trakeb el kits heya btenzel 3ady wsport w aslan ehna ma3andnash el kits...