فرامل الجين 2 والمرارة اللى خلااااااااص

[tamer_aj]

أنا معايا الجين تو المانوال 2009, و من إسبوعين كدة كنت رايح شغلي في مصر الجديدة و كنت طالع كوبري الطاهرة في الحدائق, و فيه في أخر الكوبري ملف و كنت ماش تقريبا 50-60 وفجأة في الملف لقيت زيت واقع الأسفلت و أتنين شباب راكبين موتوسيكل و اقعين علي الآرض قدامي فراشين الكوبري,
و الحمد لله دوست طبعا فرامل جامد جدا لآني كان ببساطة بيني و بينهم 2-3 متر بالكتير و كان في زيت في الآرض و الحمد لله الabs أشتغل و العربية وقفت من غير حتي ما تزحف و لا تحدف لآنها لو كانت حدفت كنت هاطير من علي الكوبري,

ودي كانت تجربتي الشخصية مع الفرامل و ما شاء الله كانت ممتازة رغم الظروف الصعبة اللي حاكيتها دي (ملف مع مطلع- زيت في الآرض- أشخاص علي بعد 2-3 متر - و كل ده فوق كوبري ضيق) الحمد لله.

[ashouhdy]

الله ينور عليك !!!! وبعدين متقلقش محدش معاه جينا وممكن يجيلة قلب ويديها لحد يسوقها دي جينا يا عمنا لما تنضملنا باذن الله حتعرف العربيات دي بتتعامل ازاي (:
تحياتي

انا والله بتكلم بجد انا كنت بفكر فى البيرسونا كدة انا حقلق لان ممكن ادى العربية لحد من اخواتى او صحابى مشوار مثلا كدة حبقى قاعد مرعوب

[mido_soliman]

انا والله بتكلم بجد انا كنت بفكر فى البيرسونا كدة انا حقلق لان ممكن ادى العربية لحد من اخواتى او صحابى مشوار مثلا كدة حبقى قاعد مرعوب

يباشا متقلقش خالص انا بهرج معاك ولو قريت ردود الملاك المفروض ميبقاش في اي قلق بالعكس الموضوع دة معمول علشان يقتل الاشاعه السخيفة عن ضعف فرامل الجين والبروتون عموما وبالعكس الفرامل قوية جدا لكن علشان تعمل معك بكفاءة مطلقة طبيعي بتحتاج تعود وطبعا مع احترامي لحضرتك ان كنت مالك للفيرنا متقلقش نهائي فرامل الجين والبرسونا اقوي كتير وتفكيرك في البرسونا في محلة

[K3A]

يا جماعة انا عندي تعقيب هام ...انا مش مش ححكي على المواقف و الغرز اللى بخدها بين النقل على الطريق الزراعي و كفاءة الفرامل في ذلك ...
انا حتكلم هنا عن صاحبنا اللى لبس في الميكروباص .. في نقطة مهمة جدا ان ABS ميشتغلش قبل سرعة معينة اعتقد انها 40 او 60 -مش فاكر الصراحة- ولو كنت ماشي على اعلى من كده ليكن مثلا 90 ودوست فرامل بشكل تدريجي العربية حتنزل عن 60 ولو كملت مشوار الفرامل بشكل مفاجئ حتنزل اكتر و بالتالى abs مش حيشتغل -ده طبعا بخلاف الدوس المفاجئ من سرعة 90 اللى حيشغل ال ABS على مباشرة- نرجع لصاحبنا بتاع الميكروباص هو بيقول ان abs اشتغل وحس بيه و السرعة كانت 40 وده سبب منطقي ان العربية لا تتوقف مباشرة لان ال ABS في طريقة عمله مش بيكلبش مرة واحدة وده افضل على السرعات العالية ومانع للانزلاق ... اعتقد ان المشكلة هنا مشكلة حساس ال ABS عايز يتظبط مع السرعة مش مشكلة فرامل على الاطلاق وفي ظني هي مشكلة فردية و الله اعلم

[x512]

انا هقول تجربتى الفرامل كانت تعتبر مش حلوة عندى الاول
بس بعد ما عملت الرجلاش وركبت التيل الريمسا الاسبانى دلوقتى الحمدلله من 160 الى صفر فى مسافة ممتازة ما شاء الله
وطبعا جربت فى طريق فاضى عشان اقدر اوصل للسرعة دى وكمان افرمل من غير ما حد يكون ورايا

يا ريت حضرتك تديني لينك موضوع الرجلاش دا و يا ريت برضو تقولنا جبت التيل دا منين و بكام و بيقعد حوالي كام كيلو ...لان موضوع التيل و مشوار الفرامل دا قالقني حبتين..بس ان رايح احجز بكرا ان شاء الله ....و ادعولي

[ahmedfathy77]

السلام عليكم ورحمة الله وبركاته

اولا احب اشكرك على الموضوع ده لان مواضيع الفرامل بتاعة الجين 2 كترت اوى فى الفترة اللى فاتت بشكل خلى اى حد ياخد فكرة سيئة عنها .

انا احب بس انقل خبرتى الصغيرة فى التعامل مع فرامل العربية فى الفترة اللى اشتريت فيها العربية لانى من يوم ما جبتها وهى مطحونة معايا داخل مدن وخارج مدن وطرق غير ادمية وطرق شبه ادمية .

انا موضوع التعود على الفرامل الحمد لله مخدش منى يوم سواقة وبرضه انا كنت عارف ان فراملها عاوزة تعود بعد ما سقت عربية ايمن و الحمد لله الفرامل لم تخذلنى فى اى موقف خاصة على الطرق السريعة المظلمة تماما والمليئة بالمفاجات وعلى سبيل المثال :

1- فيه طريق تحت الانشاء اضطريت انى امشى فيه مسافة 25 كم بالليل بدون عامود نور واحد والطريق احيانا بيبقى اتجاه واحد وفجاة يبقى اتجاهين وفجاة تلاقى مطب وطبعا لا انت شايفه ولا فيه يافطة وانا اصلا مش حافظ الهبل اللى على الطريق ده بس الحمد لله كذا مطب الاقيه فى وشى وبينى وبينه مسافه لا تذكر وافرمل ومخدهوش بس برضه بالتعود بقيت عارف القوة اللى تخلينى انقذ نفسى من موقف زى ده .

2- موقف تانى على نفس الطريق بالليل برضه فجاة لقيت ادامى كلب بيعدى على مسافة لا تزيد عن 3 او 4 متر دوست باقصى قوة لانى كنت ماشى بسرعة شوية والحمد لله فديته مش عارف ليه ساعتها افتكرت الفيديو بتاع المانيوال اللى العربية الجين بتقف فيه قبل السلحفاة اللى على الطريق .

3- غباء وغتاتة السواقين على الطرق السريعة حدث ولا حرج اللى مش بيكتفى انه يعديك من اليمين فجاة لا وكمان يكسر عليك عشان ياخد حارتك فجاة برضه وهو بيعديك مرة واحدة وخاصة على طريق اسكندرية الزراعى , الحمد لله الفرامل بقدر الم بيها العربية فى المواقف الصعبة دى .

الموضوع عاوز تعود وتقدير من اللى سايق للمسافة اللى هيفرمل فيها وقوة الضغطة على الدواسة وتوقيت الضغطة واعتقد ده بييجى من كتر المواقف اثناء السواقة .

الفرامل الحمد لله تمام واعتقد ان ده راى معظم الناس.

يارب اكون افدتكم

[mido_soliman]

السلام عليكم ورحمة الله وبركاته

اولا احب اشكرك على الموضوع ده لان مواضيع الفرامل بتاعة الجين 2 كترت اوى فى الفترة اللى فاتت بشكل خلى اى حد ياخد فكرة سيئة عنها .



الفرامل الحمد لله تمام واعتقد ان ده راى معظم الناس.

يارب اكون افدتكم

لا شكر على واجب وبجد نورت الموضوع ودة الهدف ان كل مالك هوة اللى يحسم الامر علشان الكلام اللى يتعب دة

تمااااااااااااااااااااااااام .. الله ينور عليك يا ميدو

وعليك يا خالووود باشا نورت موضوعى يا كبير والله

متابع ٫٫٫٫

وأعتقد إن الموضوع ده هوه هيبقي الفيصل النهائي للموضوع بتاع الفرامل لأن الملاك فقط هما اللي يقدروا يفيدونا في الموضوع ده

وشكراً لصاحب الموضوع

يباشا لا شكر على واجب وفعلا هوة دة المطلوب من الموضوع فى الاساس انة يبقى فيصل لموضوع الفرامل علشان ينتهى الكلام للابد

الله يفتح عليك يا ميدو كلام منطقي و سليم

انا شخصيا الabs انقذني من مواقف كتير كان ممكن توصل لحوادث كبيره غير انه بيقلل خطاء السائق لو داس فرامل جامد او علي ارضيه مزحلقه

نورت يا احمد بية ومتشكر جدا لمشاركتك الجميلة

الله ينور عليك انت جيبت من الاخر مش متخيل الناس ازاى مش عارفه تفرق بين abs و فرامل عاديه المسأله مسأله تعود و عربيه صاحبى بسوقها عادى خالص
اصلا اخويا معاه كرولا و فراملها غير عربيتى خالص كل مصنع و له طريقه تصنيع الفمره بالتعود لان من ناحيه فيه فرامل اكيد فى فرامل امال هما بيصنعو العربيات علشان يموتو الناس

من الاخر مشوار كل دواسه فرامل يختلف من سياره لاخرى و شكرااااا

وعليك يباشا متشكر جدا على زوقك وفعلا كل دواسة مختلفة عن التانية والدوسة تختلف من عربية للتانية نورتنا

ما عنديش حاجة أقولها على الموضوع ده غير ( يسلم الكيبورد اللي طلع الموضوع ده )

هههههههه يا عبدو والله موتنى من الضحك بجد اجمل كومنت يباشا متشكر جدا والكيبورد فى الخدمة دايما يا معلم

ايه يا عم ميدو ... خضتني.... دا انا افتكرتك في الأول بتعبي في الفرامل مش بتدافع عنها....

بصراحة موضوع الفرامل ده عجيب لأني مش حاسس بالمشوار الطويل ده ولا كل الكلام اللي بيتقال ده...

وتحليلي للموضوع والله أعلم ان الناس اللي بتشتكي من فرامل الجين تو -زي ما لاحظت- بيقارنوها بسيارات أخرى...
مع ان التعامل مع الفرامل حسب فهمي يجب أن يكون تفاعلي بين السائق و السيارة و الموقف و ليس ضغطة محفوظة أو متعود عليها.. يعني لو شعر السائق أن الضغطة غير كافية فهو يزيدها تدريجياً و بالنسبة الى أن يصل للتوقف المناسب للموقف.
مع ملاحظة أن فرامل الجين بتؤثر من أول سنتيمتر يعني بتعطيك امكانية التهدئة أو "التشعير" أو التوقف المفاجيء حسب الحاجة..

ما لاحظته أيضاً أن من لا يشكون من فرامل الجين2 -بل ويحبونها- هم من نوعية السائقين العتادين على قيادة أنواع متنوعة من السيارات (قديم و حديث وموديلات مختلفة) أو من كانت اول تجربة قيادة لهم على الجين2
هؤلاء لم يشكوا من الفرامل في الجين2 بل بالعكس أعجبوا بأدائها والتفسير الوحيد أنهم غير مقيدين بالمقارنة بسيارات أخرى ليست بالضرورة أفضل أو أسوأ لكنها بالتاكيد مختلفة.

حعمل اية بس يا استاذ محمد مرارتى نقحت عليا من كتر الكلام على فرامل العربية وكانى مش سايقها يوميا فقولت اخلى اصحابها يتكلموا باة علشان الاشاعات العجيبة دى تنتهى ومقدرش اخضك يا معلم ونورتنى

[XXXMEMOXXX]

اولا الف شكر يا ميدو باشا على الموضوع الممتاز ده ,, وفعلا هيكون حاسم ليه ,,

حضرتك شرحت شرح مظبوط جدا ومش هنقدر نزود كلمه عليك ,,
بس عايز اوضح اني شايف موضوع الـمهندس رامي عن الفرامل مش حل لمشكله (لاني مش شايف مشكله اصلا ),, لكنه اختيار لو حد حابب ان فارمله تكون زي باقي العربيات,, يعمله ,, لكني انا حابب جدا دواسة الفرامل وهيا فيها الحته الاولانيه دي عشان بهدي بيها من غير ماتحس بشعور الفرامل ,,

تحياتي

[eng_mh1980]

السلام عليكم ورحمة الله,
شكرا يا ميدو على الموضوع و اعتقد لو الفرامل كانت مشكلة كان المفروض نلاقي كذا واحد بيشتم فيهت من ملاك العربية
انا عن نفسي الفرامل انقذتني من كذا مصيبة
اخرها من اسبوعين كنت ماشي في شارع المنيب قبل سقية مكي في الحتة الواسعة اللي هناك على سرعة 100 تقريبا و معايا زوجتي . و مرة واحدة واحد عدى قدامي بعجلة فدست فرامل مرة وحدة والله العربية كلبشت لولا كده كان زمان الراجل الله يرحمة حتي زجتي اللي متعرفش في العربيات استعجبت.
بجد يا جماعة حرام نتحامل على الفرامل ده بالنسبالي من افضل ميزات العربية

[ahmad alshaaer]

الله ينور عليك !!!! وبعدين متقلقش محدش معاه جينا وممكن يجيلة قلب ويديها لحد يسوقها دي جينا يا عمنا لما تنضملنا باذن الله حتعرف العربيات دي بتتعامل ازاي (:
تحياتي

]


hahahahahaah

جاااااااااااااااامد اوي الرد ده

فعلا انا مش بسمح لحد يركب عربيتي لوحده ولو هيموت ويركبها ويجرب سواقتها
ببقى جمبه

وللحظات فقط

تحياتي

[M.almaghraby]

موضوع تجربه العربية عادي انا بخلي صحابي يسوقوها كتير....


و شكرا يا ميدو علي طرح الموضوع الهام جدا و الي انا شايف انه برده خد اكتر من حقه شوية

لانه ببساطة الفرامل كويسة جدا جدا لحد سرعة 160 170

و علي فكرة انا فرامل عادية مش abs و العربية فعلا قليل اوي لما تزحف عندي !!! مش عارف ليه

[ahmad alshaaer]

اولا انا بشكر صاحب الموضوع ده ومع اني مع احترامي لأي حد مش عاجباه الفرامل بتاع الجن 2 يبقى هو اصلا اللي مش سواق صح وماساقش عربيات كتير وفهم كلمة فرامل ايه بالنسبه لكل عربيه

ثانيا فرامل الجن 2 في الاوتوماتيك بيتفاعل معاها الفتيس
بمعنى لو الفتيس لقاك بتحرق على الغيارات وبتدوس فرامل جامده كل شويه هو نفيه بيسقطلك الغيار العكسي عشان يوقف مع الفرامل العربيه او يهبط من سرعتها بدون حمل على الفرامل
طبعا في المانيوال لأ ولكن ده دورك انت ودي يفهمها الناس اللعيبه بتوع الشد والغرز


كمان كل عربيه وليها نظامها
اه يمكن الا اي بي اس في الجن 2 طبعا مش زي العربيات الالماني ولكن دي بكام والالماني بكام

خدوا بأه الموقف ده كده على الماشي

طبعا في البدايه افكركم ان عربيتي بقالها معايا سنتين لحد دلوقتي و 87000 كم واقسم بالله مازهقت من العربيه دي
وهفضل معاها ان شاء الله لو ليا عمر طبعا او لحد ماتستهبل عليا او انا اسافر بره مصر

غير الحالات دي مش هغير ولو غيرت هيبقى اول اعتباري البروتون

الموقف بأه

كنت راجع من اسكندريه بعد يوم رايح من بني سويف صد رد وكانت الساعه 5.30 صباحا وعاوز انام فعلا ولسه قدامي 200 كم على بيتنا

المهم طول الطريق كان ماشي معايا كرولا 2005 اللي هي الجمل دي 180 مع بعض ولا هو بيعرف يعديني ولا انا بعديه ولو زادت كانت بتبقى 185 السرعه

ووصلت بوبابات القاهره وقدام التوكيل بتاع عز العرب وعربيه نقل بمقطوره وماشي وراه نص نقل محمل اعتقد كراتين تلاجات كتير اوي
اعتقد كنوا اشيين بالكتير 50 كم السرعه
وانا جاي من شمالهم عادي 150
وقبله بحوالي 25 متر بالكتير وراح النص نقل اللي ورا المقطوره بدون اي مؤشرات او اشارات او انتباه كسر عليا

انا دست فرامل موووووووووت لأني فعلا كانت نهاية حياتي ولكن لسه ليا عمر

المهم العربيه تيجي تتزحلق شمال على التراب ولكن ستر الله طبعا ثم الاي بي اس والاي بي دي يلموها تاني خلاص وهلبس وحدفت الدريكسيون على اليمين عشان الاقي حته فاضيه والاقي المقطوره اللي سيادته بتاع النص نقل بيعدي منها ويتكرر السيناريو ولكن في اليمين وتقف العربيه على سرعة 50 كم وراهم
وعديت النص نق واجارك الله على الدعاء اللي دعيته عليه واللي خده من النصيب
والله والله والله انا ركبت عربيات انواع كتير جدا ولكن دي لو اي عربيه كوري مع احترامي او ياباني فئة السيارات الرخيصه لكانت اتقلبت مرتااااااااااااااح

مع احترامي للسيارات اللي ذكرتها طبعا

هو ده ياجماعه الاي بي اس والاي بي دي

بيلم العربيه وبيحاااااااااول يساعدك انك ماتفقدش السيطره على العربيه وانت كمل بأه

وزي ماقالوا الاخوه التعود وطريقة الدوسه وقدر الدوسه اللي انت بتدوسها

وكتير مواقف من دي والله ولكن ده كان موووووووت فعلا

تحياتي للجميع

اخوكم احمد الشاعر