ياجماعه الكاوتش عندى اتخرم

[Raul_7]

الموضوع باختصار وانا رايح الشغل وقدام مدخل القريه الذكيه لقيت صوت غريب جدا بيطلع من العربيه كانى ماشى بجرار , مابقيتش فاهم فية ايه , راكنت على جنب لقيت حاجه كده فى الكاوتش اللى ورا ماشاء الله لا تعليق

حاولت ا ... ها بس لقيت صوت تنفيس هوا جامد اوى فقمت حاشرها تانى زى ماكانت وعملت بتاع 500 متر كده للشغل

السؤال دلوقتى وانا مروح اغيرها اقبل ما امشى ولا امشى بيها كده لحد بتاع الكاوتش ولا المشى عليها كده يعوجها ولا ايه

محمود

---------------
ممنوع كتابه الحروف العربيه بحروف اجنبيه .. تم ترجمة الكلام
برجاء قراءه قواعد المنتدى

مشرف القســم ب8
01:30pm 02/02/2010

[betza]

اولا الحمد لله بس انا مستغرب انا شغلي برضه في القريه والمكان عاده نضيف معتقدش فيه مسامير او غيره دي اكيد وقعت من عربيه نقل او ميكروباص الحمد لله
بص يا سيدي نصيحتي
متمشيش طبعا عليا عشان الكاوتش ميتفرتكش مكن تركب الاستبن او فك العجله وخد واحد حبيبك وروح البنزينه هناك اعمل الكاوتش وارجع ركبها تاني لو الاستبن بعافيه ولا حاجه

[Tarek Gen 2]

ولا يهمك يا معلم
بص لو منامتش على ما تخلص شغل يبقى ممكن تمش بيها عادى انا كنت بمشى بالمسمار عادى لحد ما اروح اعمله بص طبعا علطول فى نفس اليوم
بس لو نامت او حسيت انتا انها قلت اوى غيرها بالاستبن و روح اعملها عند اى حد
فى كذا بنزينة جمبك عند القرية الزكية و طول ما في هوا فى الكاوتش الجنط عمره ما هيتأثر متخافش اللى هيتأثر الاتزان و الحدفة وانت ماشى بس
بس كدة كدة لازم تعملها اما تخلص شغل ان شاء الله و اكيد هتتلحم متقلقش منهاااا و لو حيرت الراجل الول و لاقاها كبيرة خليه يحطلك فيها لحام من جوة و يحطلك بالونة و حولها ورا لو هيا اللى قدام

واستنى اراء الناس التانية
و ان شاء الله خير

[midosalah]

متمشيش عليه يا حوده انا مش عارف هوا ايه اللى فى الكوتش بس انت انزل ركب الكوتش الاستبن وروح صلح ده انا معرفش لو مشيت عليه ممكن يضر بالجنط ولا لا بس انت خليك فى المضمون

[Raul_7]

شكرا على الردود يا رجاله , هى الفكره انى خايف على الكاوتش مش الجنط , لان المسمار كبير اوى و هوا داخل بطريقه غريبه ويعتبر جزء كبير وعريض تحسه راكب فوق الكاوتش كده فبيبان اوى كل ما امشى عليه


---------------
ممنوع كتابه الحروف العربيه بحروف اجنبيه .. تم ترجمة الكلام
برجاء قراءه قواعد المنتدى

مشرف القســم ب8
01:30pm 02/02/2010

[Tarek Gen 2]

خلاص حط الاستبن و روح اعمله بعد الفطار كدة او بعد شغلك لو فى وقت و خليك فى الاسلم و ابقى طمنا عليك ان شاء الله حاجة سهلة

[KHALED AYMAN]

مشيك عليها ممكن يكبر حجم الخرم ..
ركب الاستبن و خلاص او روح مع حد حبيبك املها و ارجع ركبها تانى

[Raul_7]

ألف شكر يا رجالة لردودكم, اللي حصل إن أنا و 2 صحابي نزلنا حولنا نغير العجلة في جراج الشركة, ومحدش فينا عرف يفك العجلة من مكانها!!

والله كانت مكلبشة ايه, تخبيط وترزيع عالكوتش مفيش فايدة...مش عايزة حتى تلخلخ.

المهم ركبنا الصواميل تاني وقلت امري لله أمشي بالراحة لغاية بتاع الكاوتش اللي في الشيخ زايد, و طبعا طول الطريق ماشي بالراحة ومقلق, لكن من حسن حظي إن المسمار اللي كان فالكويتش اتقطم, وبقى حتة منه بس جوه الكاوتش, فـ الحمد لله وصلت للراجل والكوتشة كانت حالتها كويسة.

طبعا لحمتها ورحت غسلت العربية بعدها عشان كانت مطينة شوية.

وده منظر المسمار اللي دخَل فالكاوتش.

[Tarek Gen 2]

ايه ده اعوذ بالله هههههههه ده مش مسمار ده اجنة

طب الحمد لله و كويس انك جايب ازرق زهرى لون حلو بس ربنا يحمهالك من الخرابيش

[midosalah]

بتاع الكاوتش فك الفردة الزاى ؟؟؟؟

[Tayer]

سلامتك و سلامه جينا يا محمود
لحمت الخرم أزاى ؟

[Raul_7]

ايه ده اعوذ بالله هههههههه ده مش مسمار ده اجنة

طب الحمد لله و كويس انك جايب ازرق زهرى لون حلو بس ربنا يحمهالك من الخرابيش

آه شفت بقى...ههههههه

هي ابتديت تاخد خرابيش بس على بسيط لسة, ربنا يستر.

بتاع الكاوتش فك الفردة الزاى ؟؟؟؟

قعد يهز فيها بغباوة معرفش قام جايب شاكوش وقعد يخبط عالكاوتش من ورا لحد مقام فاكك العجلة.

سلامتك و سلامه جينا يا محمود
لحمت الخرم أزاى ؟

طارق باشا الله يسلمك, عادي يعني الراجل قعد يسنفر بحاجة كده, وقام حطت قطعة مطاط كده وقام حاطت الكوتشة تحت مكوة كده لمدة ربع ساعة تقريبا وبعدين قام مبردها في مية وخلاص كده.

[Nistelrooy]

طب كويس .. جت سليمة ..

بس ماعرفتش تفك الكاوتش .. يا خبر الواحد بقي ينزل الجراج يدرب يشوف الكاوتش بيتفك ازاي علشان لو حد اتحط في الموقف ده ومثلا في الصحرا يعمل اية !

[د_محمد مدبولي]

حمدا لله على سلامتك
و رغم اللي حصل احمد ربنا انها كانت متسهلة و ماحصلتش في حتة مقطوعة او غيره... ربنا يديك خيرها