انطباعى عن الجين 2 بعد تجربة القيادة

[ahmedsiyam]

النهاردة واحد من المعارف الرجالة تطوع و ادانى عربيته اعمل بيها اختبار قيادة و هاحاول اقولكم على انطباعى المبدئى مع العلم انى عملت اختبار قيادة للانسر 1300 اوتوماتيك و اليارس 1300 مانيوال

* العربية مانيوال عاملة 40000
*الصالون مريح الى حد ما و ليس فى راحة اليابانى بس اريح من عربيتى ( اكسنت 1500 )
*مساحة الشنطة معقولة جدا بالنسبة لعربية هاتشباك
* العزل بتاع العربية جيد جدا اكاد اسمع اصوات خفيفة جدابالنسبة للبيئة المحيطة
* نظرا لان العفشة رياضية فعادى ان الواحد من الحين للاخر يحس بالمطبات و ان كنت حاسس ان العربية قوية و مستحملة موش بتدب او بتخبط و الكلام ده بعد 40000 كم
* صوت الموتور حلو بعد 3 rpm بيبقى عالى شوية بس جميل موش مزعج بيحسسك بقوة العربية و التجميع بتاعه هايل وان كنت حاسس انه فى مستوى الاوبترا و اللانسر الـ 1600
* التكييف جميل جدا و تأثيره غير ملحوظ على سحب العربية
* الاوديو ممتاز
* ثبات العربية جيد جدا وان كنت متوقع حاجة تانية من كلام الناس عليها بس برضه انا شايف ان الثبات بتاعها ممتاز على الطريق
* الفرامل كانت خفيفة جدا و هى كده معاه من ساعة ما اشترى العربية و بيقولى ان التوكيل بيقوله العربية دى علشان الـ abs كده ( ياريت حد يوضح هل ده عيب عام و لا لأ )
مع انى موش مقتنع لانى سوقت عربيات كتير فيها مانع الانزلاق و مختلفة جذريا عن العربية دى
* العربية صاجها محمل اوى و تحس انه اتصرف عليها كتير و كمان تبقى حاسس انك فى امان جوه العربية موش زيى العربيات الجديدة اللى لقدر الله و عملت حادثة تلاقى حد دخل قعد معاك فى العربية جوه

للأسف الشديد جدا انا كنت متوقع انى اول ماركب العربية و اتحرك بيها هانبهر تماما بالامكانيات و لكن مع الاسف انا ماتشدتش ليها خالص مع العلم انى حضرت نفسى خلاص للشراء و اخترت اللون كمان و كنت رايح ادفع مقدم الحجز بس موش عارف ليه ترددت

انا لما ركبت الميتسوبيشى حسيت بفخامة غير عادية فى الصالون ونعومة اليابانى
اليارس صالونها تعبان جدا و فقير للغاية بس نعومة العربية موش طبيعية ابدا

انما الجين 2 عربية ممتازة بس من كلام الناس انا كنت متخيل انها عربية تانية ولما ركبتها حسيتها عادية موش وهم زيى ماكنت فاكر

انا باعيد حساباتى و ربنا يسهل و ادعولى انى استقر على حاجة اكون مقتنع بيها

[tutankhamoun]

أستاذ أحمد صيام

أنت توقعت شئ في العربية و في الأخر لم تجده
يمكن علشان الناس بتشكر فيها فأنت شعرت أنك هتلاقي حاجة فوق العادة
لا.... يجب أن تحسب الموضوع بطريقة أخرى

يعني لما نتكلم عن العربية و قوتها و جمالها بيكون بالمقارنة بعربيات في نفس فئتها و ليس نفس سعرها
لأنك ستجد أداءها أفضل من سيارات كثيرة بالمقارنة مع سيارات أغلى منها بكثير في السعر
و حضرتك شعرت بفرق بين صالون اللانسر و صالون الجين 2 و ده شئ طبيعي جدا لأن صالون الجين 2 صالون رياضي و لم ينتبهوا إلى هذه النقطة إلا في الموديلات الحديثة من الجين 2 مثل موديل 2008 اللي هاينزل خارج مصر

و تبقى الجين 2 هي أفضل أختيار في هذه الفئة السعرية و حتى في فئة أعلى
هل تعلم أن الجين 2 بتتباع خارج مصر بسعر سيارات ياباني و أخرى أوروبي !!!!!!!!!!!
و هي السيارة الوحيدة في مصر على ما أعتقد التي يتم بيعها في مصر أرخص من الخارج
على عكس التويوتا مثلا التي تباع بسعر عالي جدا و مبالغ فيه بمصر مع أنها أرخص من ذلك بكثير خارجها

و برضه علشان تقدر تحكم على عربية حكم صحيح 100 % لا يصلح أن تركبها مرة واحدة و بعدين تصدر حكمك
الحكم على السيارة يحتاج إلى بعض الوقت
بالنسبة لموضوع الفرامل .... الفرامل مش خفيفة و لا حاجة و بتقف كويس قوي و الحمد لله
و لكن إذا حضرتك هاتجيب 1600 .... صدقني الجين 2 أختيار ممتاز
و أيضا حضرتك عندك من العربيات الحلوة
النيســـــــان صنــــــي .... ممتازة

و ربنا يوفقك في أختيار عربية كويسة

[fahd_628]

طيب يا باشا من خلال تقييمك انت مقولتش حاجة وحشة عن العربية ياريت تقولى اية الى حسسك انها وحشة و خلاك تترد

و طبعا فى الأول و فى الأخر طبعا دة قرارك الخاص :) بس علشان اعرف برضة و حسبت انهى اكثر ثباتا الانسر ولا الجين 2 ؟ لأن كل الناس بتقول الجين 2 اكثر ثباتا من الانسر و المحرك اقوى طبعا بس زى ما بيقولو Need To Be Revved Hard يعنى لازم تقرص علية جامد تجيب 5000 و 6000 Rpm علشان تحس بالقوة

[ahmedsiyam]

يا جماعة انا شايف ان خامات العربية من جوه رخيصة اوى انما اداء العربية ممتاز
يعنى انا كنت فاكر نفسى هاركب مازدا 3 بسعر الـ 90000
عموما ده انطباعى الاول
واحتمال النهاردة اجرب الاوتوماتيك و ان هاشوف ايه الاخبار و ارجع اقولكم
بس انا مازلت عند رايى ان خامات العربية موش قد كده انما هى ماشاء الله فل و ربنا يبارك لاصحابها

[شريف شعبان السيد]

النطباع الاول يدوم بس فى حاجات لازم نتقبلها على حساب حاجات تانية فقر الخامات مقابل الايرباج والفرامل المانعة للانزلاق انا كنت زى حضرتك كده دخلت وركبت الجين تو وخرجت وانا عندى نفس انطباعك ودخلت معرض لهيونداى ملقتش عربية بنفس الفئة السعرية وبيها كل الكماليات الا وانت طالع للسونتا وهيونداى أزيرا وفى الاول ولاخر هى راحة نفسية للسيارة

[ahmedsiyam]

انا شوفت العربية فى اكتر من صاله عرض و كانت عجبانى الى حد ما
انما لما ركبتها مستعملة بقالها سنة و 8 شهور حسيت انه الواحد لازم يفكر فى العربية دى هاتبقى عاملة ايه بعد 6 سنوات استعمال
و لو جبت عربية زيى الهوندا السيتى او الانسر هاتبقى عاملة ازاى برضه
انا متوقع ان البروتون بعد 5 سنوات استعمال هايبقى صالونها متبهدل على الاخر
على خلاف عربيات تانية هاتفضل محتفظة برونقها و ان كانت هاتبقى مستعملة برضه
و ساعتها موش عارف بقى الامكانيات بتاعة العربية هاتغطى على الكلام ده و لأ
انما طبعا لا خلاف على ان العربية واضح عليها انها بتاعة استحمال بالنسبة للاجزاء الميكانيكية و العفشة بالنسبة راى الاخ توت

( و تبقى الجين 2 هي أفضل أختيار في هذه الفئة السعرية و حتى في فئة أعلى
هل تعلم أن الجين 2 بتتباع خارج مصر بسعر سيارات ياباني و أخرى أوروبي !!!!!!!!!!!
و هي السيارة الوحيدة في مصر على ما أعتقد التي يتم بيعها في مصر أرخص من الخارج
على عكس التويوتا مثلا التي تباع بسعر عالي جدا و مبالغ فيه بمصر مع أنها أرخص من ذلك بكثير خارجها )

انا معاك ان العربية دى فى انجلترا بتتباع بـ 9000 استرلينى
و ده سعر اغلى من هنا بكتيير ده اذا ماحسبناش كمان الجمارك و طبعا انا قولت ده العربية دى كده لقطة
عموما انا لسه مقتنع بيها بس هاشوف الاوتوماتيك عاملة ازاى و يا مسهل و فعلا موش عربية واحدة اللى هاتخلينى احكم عليها

[shady_love]

انا معاك وميش معاك يا استاذ احمد اولا انا معاك انهم ماهتموش اوى بموضوع الخامات بس لما نيجى للصراحة اولا موضوع العمر و ان الصالون هيدبهدل دا حسب الاستخدام و ايه العربيات الى خامتها حلوة و تستحمل 6 سنوات غير العربيات الغاليه زى البى ام اظن انتا معاك اكسنت و انا بردو معايا اكسنت و انا اول يد و هى موديل اخر 99 و محدش حط ايده فى الصالون بتاعها كتغير الكاسيت مثلا انا مغيرتش اى حاجة و مع ذلك الصالون بتسمع فيه اصوات غريبة و الاطار الى حولين الكاسيت و ضبط التكيف و الطفاية كل شوية يتفك فانتا ايه رايك و اهى هيونداى و بقلها سنوات فى مصر و محدش بيقول ان خامتها وحشة و ادى النتيجة فبصراحة ممكن يكون ميش دى الخامات الى كنا ناملها لكن ميش معنا كدا انها فى الضياع و كمان ماتنساش حاجة انها عملية نسبة و تناسب , عشان هما لما يجو يصرفو فى العافشة و الماتور و كل الحجات الاساسية و كمان زودو امكانيات و يحولو مايعلوش فى السعر دى ميش عمليه سهلة لازم يبقى فى حاجة هيملوها و ميش هيصرفو عليها عشان السعر واظن ان اخيارهم فى ايه الى يبقى غالى و ايه الى يقللو من خاماته كان افضل اختيار لان تخيل لو اهتمو بشكل الصالون و الخامات و كل دا و جم عند الماتور و مصنعهوش كويس او وفرو فى خاماته اظن وقتها العربية دى لا تصلح

[ahmedsiyam]

اخ شادى
انا معاك فى موضوع ان العربية اتصرف عليها و اتصرف عليها صح
انا باتكلم ان 90000 جنيه هايجيبوا عربية صالونها حلو برضه و احلى من البروتون بكتير مع العلم طبعا بانها موش هاتكون فى امكانيات البروتون
و على فكرة انا من الناس المقتنعة ان صالون الاكسنت سيئ الاكسيل برقبتها فى الصالون انما تعال كده فكر فى البروتون بعد كام سنة صالونها هايبقى عامل زيى الاكسنت و لا لأ انا متاكد انه هايبقى عامل زيى الاكسنت طبعا مع الاخذ فى الاعتبار الاكسنت بتاعتنا جديدة بكام و البروتون بكام ( الفرق موش قليل )
وعلى فكرة كمان انا ركبت الواجا خامات الصالون احلى بكتير من الجين 2
تعال بقى اتفرج على موديلات 2000 فى البروتون ماتفهمش بقى العربيات ماشاء الله لسه زيى الفل و الصالون بتاعها عامل زيى اى صالون عربية يابانى نازلة فى نفس السنة
عموما انا من اكتر الناس اللى مقتنعة باداء العربية البروتون عموما و انها ان شاء الله ممكن يكون لها مستقبل زاهر فى بلدنا بس هى محتاجة شوية وقت الناس تقتنع بيها
و انا برضه لسه ماحسمتش رايى و هاجرب عربية تانية بامر الله و دعواتكم

[shady_love]

طب ايه العربيات الى تقريبا قريبه من الجين 2 فى السعر و بردو فى الامكانيات و على فكرة فى حاجة عايزك تاخد بالك منها احنا حاكمين ان خامات الصالون ميش اد كدا و ان فى عربيات تانية تقريبا فى نفس السعر و خامات الصالون احسن بكتير بس الى احنا ميش وخدين بالنا منه ان غالبا معظم الانواع الى فى نفس الفئة السعرية ممكن بردو تبقى الخامات بتعتها ميش اد كدا بس الفرق بينها وبين الجين 2 ان الخامة ظهرة بس فى الصالون لكن كعربية و كاساس جامدة ولكن ايه يخلينا نضمن ان الانواع التانية يكونو مقليلين فى الخامات بس فى الماتور وصرفين فى الاكسسورات يعنى بمعنى اصح احنا سعات كتير بنبص على الظاهر و كمان الجين 2 ليسة ماوصلتش لل90 الف

[Khalid_Mostafa]

انا بس بعد إذنكم مش فاهم يعني ايه "خامات الصالون مش حلوه" ..قصدكم نوع البلاستيك او تنجيد الكراسي مثلاً ؟؟؟ والا ايه بالضبط

[ahmedsiyam]

خامات الصالون اللى هى البلاستيك اللى فى الصالون و تقفيله
يعنى الناس اللى معاها مانيوال على سبيل المثال عصاية الفتيس بتقشر و الجلد بتاعه بيتقطع و ده دلالة على ان الخامات المستخدمة رخيصة شوية
الكراسى عادية موش وحشة

[shady_love]

نعم هوة دا القصد و كمان بيدخل فيها فى بعض الاوقات التقفيل اما تنجيد الكرسى او اى حاجة متعلقة بالكراسى عموما هى ميش مشكلة فى اى عربية حتى لو وحشة ولكن بالتسبة للجين 2 كراسيها طبعا جامدة

[tutankhamoun]

يا جماعة أنا شايف أن الكلام مبالغ فيه جدا جدا
خامات الصالون في الآتي
البلاستيك الذي تم تغليف الأبواب به ........... ممكن يأخذ 5 / 10
أما التابلوه ............ لا يقل عن 8 / 10
عصا الفتيس ......... لاتقل عن 6 / 10

بس و خلص الكلام عن رخص الخامات
-------------------------------------
راكب فيها كراسي مريحة جدا و محترمة
عفشة ما شاء الله و لا حول و لا قوة إلا بالله
محرك يحسسك أنه عمره طويل بإذن الله
صاج مصروف عليه بضمير
مشغل اسطوانات صوت ماركة بلاوبونكت
نظام فرامل مانع للإنزلاق
تكييف ممتاز
عدد 2 وسادة هوائية
كاوتش مقاس 15 و راكب على جنوط سبور
كشافات ضباب

و كل ده بيتباع في مصر ب 83000 جنيه فقط
و ضمان 5 سنوات أو 100 ألف كيلو متر على المحرك و صندوق التروس
و ضمان 3 سنوات أو 60 ألف على السيارة بالكامل
و هات أي عربية تانية في نفس السعر و أبدأ المقارنة و قولي مين اللي يكسب
و كل ده بالإضافة للشكل الجميل الخرافي الحديث جدا
و إن شاء الله يمكن النهارده أو بكره سأقوم بوضع التقييم رقم 2 لسيارتي بعد 3000 كم

و إليكم جميعا تحياتي

[shady_love]

انتا كدا جبت النهاية والله ينور عليك يا استاذ توت عنخ امون و انا اضم صوتى اليك فى موضوع ايه العربية الى بنفس الامكانيات و السعر و فى مصر

[fiatmomo]

يا جماعة أنا شايف أن الكلام مبالغ فيه جدا جدا
خامات الصالون في الآتي
البلاستيك الذي تم تغليف الأبواب به ........... ممكن يأخذ 5 / 10
أما التابلوه ............ لا يقل عن 8 / 10
عصا الفتيس ......... لاتقل عن 6 / 10

بس و خلص الكلام عن رخص الخامات
-------------------------------------
راكب فيها كراسي مريحة جدا و محترمة
عفشة ما شاء الله و لا حول و لا قوة إلا بالله
محرك يحسسك أنه عمره طويل بإذن الله
صاج مصروف عليه بضمير
مشغل اسطوانات صوت ماركة بلاوبونكت
نظام فرامل مانع للإنزلاق
تكييف ممتاز
عدد 2 وسادة هوائية
كاوتش مقاس 15 و راكب على جنوط سبور
كشافات ضباب

و كل ده بيتباع في مصر ب 83000 جنيه فقط
و ضمان 5 سنوات أو 100 ألف كيلو متر على المحرك و صندوق التروس
و ضمان 3 سنوات أو 60 ألف على السيارة بالكامل
و هات أي عربية تانية في نفس السعر و أبدأ المقارنة و قولي مين اللي يكسب
و كل ده بالإضافة للشكل الجميل الخرافي الحديث جدا
و إن شاء الله يمكن النهارده أو بكره سأقوم بوضع التقييم رقم 2 لسيارتي بعد 3000 كم

و إليكم جميعا تحياتي

منتظر تقريرك يا استاذ توت .. ... مش عارف ليه انا حبيت العربية دية اكتر بعد ما حضرتك اشترتها ...:D .

-----------------------------------------

بالنسبة للجين 2 يا جماعة ... العربية دلوقتى بتتباع ب 81 الف جنية ... وممكن 80 الف بس .... يعنى تتحط فى مقارنه مع النيو اكسنت من حيث السعر .... انا بحب النيو اكسنت جدا جدا جدا جدا ... بس كفاية انك تحس ان التوكيل مستغلك .. وحاططلك انزار وكاست هنا فى مصر .. لتوفير فلوس فى جيبه . ( وحكاية انها مفهاش عداد حراره ) .. مش عارف انا راكب عربية ماشية بالكهرباء ولا اية ؟؟؟ يخليك تفكر مرتين فيها بالرغم من جودتها وكفاية الغبورزم حاجة تانية لوحديها

الخلاصة ... كل منتج فيه ميزة وفيه عيب .. الجين 2 ينطبق عليها الكلام دة .. وفيها مميزات كتييييييير جدا ...عيوبها ( من وجهة نظرى ) تنحصر فى حاجتين ( خامات الابواب ) ودية ( اعتقد والله اعلم ) ان ممكن تتغير لما ينزل الشكل الجديد من الجين تو . وانها ضيقة شوية من ورا .

غير كدة العربيه بسم الله مشاء الله تحفه فنية .. وجميله جدا . وكأداء وميكانيكا .. ممتازه .. من اراء كل الناس الى راكبينها .

بالنسبة لموضوع الصالون والتقفيل ... شوفو تابلوه الفيرنا عامل ازاى بجد جودة سيه جداجدا جدا وغير مقبوله نهائى .. وحتى النيسان صنى اقل بكتير من الانسر من حيث جودة الصالون وجودة البلاستك المستخدم فى الصالون . , وبصو بردة على الجيتز (خامات الابواب ) لو خبط على البلاستك بتاع الابواب الى فى الجيتز .. تحس انه بلاستك بتاع لعب اطفال .!!!!!!!!

ارخص عربية عائلية فيها صالون محترم وكماليات كثيرة وخامات اكثر من رائعه ( الفورد فوكاس ) 120 الف جنية .
وارخص عربية هاتش باك فيها صالون محترم وكماليات كثيرة وخامات اكثر اكــــــثر من ممتازه ( الجراند بونتو ) ب 87 الف جنية .