مين قال ان السرعه القصوى للساجا 175 ؟؟؟ ادخل وشوف

[vsaga]

للاسف على ما اللى جمبى صحى وصور زى مانتوا شايفين فى الصورة كنت هديت شوية فجت على ال 180 لكن انا كنت على طريق العالمين يارجالة بالساجا مانيوال مقفل العداد 200
كنت الفجر والشمس لسة بتشقشق والطريق لوز لوز مفيش ردار وراجع من مرسى مطروح خدت من مرسى مطروح لمارينا طريق 185 كيلو فى ساعه ده كنت على 160 عشان كنت لسة مقلق من الضلمة شوية لكن اول ما وصلت على طريق العاملين كانت الشمس شقشقت خدت من العالمين من ادام مارينا لحد الصحراوى فى ساعه الا عشر دقايق
موتور الساجا بيزعق اوى لحد اما بيوصل ل 175 لكن بعد اما بتعدى السرعة دى بتلاقى صوت الموتور اختفى تمام لحد ال 200 ومفيش غير صوت هوا
طبعا انا كنت ساعتها قافل الازاز ومن غير تكيف اكيد لان الجو كان حلو
العربية على ال 200 ثابته يعنى لا بتجى منك يمين ولا شمال ولا بتعوم بس طبعا خفيفة بس كنت ايدى ثابته على الدريكسون وهى ثابته فى الحارة اللى ماشى فيها
فى النهاية احب اقول تحيا الاخوة الماليزين على الابداع اللى وصلوا ليه وقدموا لينا عربيات بالشكل ده وتحية خاصة للساجا وتحيا لكل الناس على المنتدى

[Tayer]

أمال الجين تعمل أيه لما الساجا عملت كده
نفسى أجيب التوب سبيد بس مش لاقى طريق يساعدنى

[vsaga]

اسف نسيت احط الصورة

[YoussefMostafa]

بسم الله ماشاء الله اداء هايل علي 1300 سي سي

بس ملاحظتي علي الفتيس المانيوال

انه بيجيب 90 علي 3000 لفة وده كتير اوي

عموما هي عربية حلوة وربنا يباركلك فيها

[vsaga]

ياريس عندك طريق العالمين جيب عليه لحد 300 لو عايز طريق زى المسطرة

[vsaga]

ربنا يبارك فيك بس اسف انا مش فاهم يعنى ايه بيجيب 90 على 3000 لفة؟

[MoMohsen]

بس انا ملاحظ ان الار بى ام على 6 ودة و سرعتك 180 كم يعنى لو انت كنت ماشى على 200 هتلاقيه وصل لـ7 ودة مش كويس على موتور عربيتك انك تمشى مسافه طويله على ار بى ام عالى كدة.
وعلى فكرة طالما عربيتك مانيول انت ممكن تقفل العداد لكن لو اتوماتيك اعتقد اخرها 175-180 كم

[sayed911]

والله عداداتها شكلها حكاية جدا ولكن سؤال بقى مستفز شوية ههه اخبار البنزين ايه بعد السرعة اللي كنت ماشي عليها دي يعني اخدت كام لتر وكفوك قد ايه يا اخي وآسف جدا على الإزعاج :d

[vsaga]

يعنى على 200 برضه مكنش وصل اوى لسبعه بس انا طبعا مش ماشى طول الطريق على السرعه دى دى كانت بتجى معايا كده ثوانى وبعد كده بنزل امشى عادى مابين 140 و 160 وربنا يسترها علينا

[Dr.Islam]

ما شاء الله, ربنا يستر طريقك.
هو قصدو العربية بتجيب السرعة 90 و الrpm على 3

[Hondawy_2008]

على فكرة طريق العلمين مفهوش رادار خالص 24 ساعة بس خلي بالكو في رادار في طريق مطروح-مارينا و طبعا في مصر-اسكندرية الصحراوي من 8 الصبح ل 8 باليل

أنا جبت في طريق العلمين 190 بالسيفيك بس خفت أزود عن كدة بصراحة و الساجا طبعا أستاذة ان هي تشد كدة ما شاء الله

بس خلي بالكو نصيحة محدش يشد في أول 15 كيلو و آخر 15 كيلوفي طريق العلمين (هو 130 كيلو كله) خلي آخرك 100 عن تجربة علشان في ناس بتقطع الطريق بالعرض و يوترنات و غباء فلو سرعتك عالية مش هتلحق تسيطر
لكن ال 100 كيلو اللي في النص شد براحتك

[vsaga]

بالنسبة للبنزين انا راجع من مرسى مطروح لحد العبور ب تلات تفويلات بس انا برضه لسة شايف ان استهلاك الساجا للبنزين زيادة على كونها 1300 سى سى وبعدين والله بحس ان فى بنزينة تفاول منها تلاقى البنزين يقعد معاك كتير وبنزينة تلاقى البنزين طار

لما كنت من شوية بعمل صيانة الخمس الاف فى التوكيل قولتلهم على حكاية البنزين قالوا لو عايز نفحصها هاتدفع 100 جنيه زيادة عشان هايغيروا فلتر بنزين وهايطلعوا بعد كده يجربوها على الطريق وقالى المفروض انها تعمل 7 ونص لتر لكل ميت كيلو

[vsaga]

تمام زى ما قال Hondawy_2008 فعلا وانا رايح مرسى مطروح مكنتش اعرف ان من مارينا لمرسى مطروح مش عليه ردار عشان كده اتلقط ردار وخلصتها بتلاتين جنيه مع الامين ( تحيا مصر ) وفعلا برضه خلى السرعه فى النص الطريق ده اللى ببيقى خالى تماما

[sayed911]

ايوا بس بالمعدل ده احسبها حضرتك كده ها تلاقيها بتسحب معدل اعلى شوية من 7.5 لأنو حسب الكاتالوج اللي انا شفتوا هيا سعة 48 لتر وصححلي اذا كنت مخطأ و ثلاث تفولات يعني على اعتبار انو التنك مش بيبقى خلصان خالص وفاضي قوي بيبقى فيه شوية برضوا ولكن انا مش فاهم همة طلبوا 100 جنيه بس عشان يكشفوا على العربية طيب ما هية في صيانة ومن المفترض انو تكلفة الصيانة ثابتة مع كل الطلبات والملاحظات اللي انتا بتقول عليها !!! وصححلي برضوا اذا كنت انا مخطأ !! ومتنساش انو انت حضرتك بتقول انك معظم الطريق ماشي >120 كم/ساعة وطبعا حضرتك عارف النسبة الطردية في العلاقة مبين السعة ومعدل الإستهلاك وتحياتي لك اخي وربنا يسترها معاك ...

[vsaga]

والله ياريس انا قولت نفس كلامك كده بظبط وقولتلهم ازاى ادفع مدام دى شكوى والعربية فى الضمان قالوا عشان هانغيرلها فلتر بنزين وايه كمان هما الاول هايخدوا العربية يختبروا على طريق بمعرفتهم لو لاقوا ان الاستهالاك عالى من نظرهم ساعتها هاتدفع ال 100 جنيه ويغيروا الفلتر انما بقى لو جربوا ولاقوا استهلاكها كويس يبقى ساعتها هاتدفع 150 جنيه انا اتشليت ساعتها قولتلهم خلاص مش عايز
لما تروح تعمل صيانة هايقوللك نفس الكلام