شوفتو اخر اخبار الحادثة بتاعتي اقرا واضحك

[totosaga]

يوم الاتنين اللي فات عملت حادثة وكتبيت موضوع عنها في المنتدى والحادثة ببساطة اني كنت بفادي واحد في ملف فدخلت في رصيف بالعجلة اللي قدام شمال المهم استعدلت المقص عند ميكانيكي وقاللي احتمال يحتاج تغيير فرحت التوكيل في ابو رواش النهاردة الخميس وقلتلهم عاوز اغير مقص واضبط زوايا واكشف على العفشة بالمرة المهم بعد انتظار 3 ساعات ونص تقريبا جاللي المهندس احمد شاب لذيذ ومحترم الصراحة قاللي العربية عتحتاج تغير قنطرة و المقص اليمين والمساعد اليمين واحتمال الشمعدان قلتله كل ده ده من خبطة في رصيف دي حتى العربية مافيهاش خدوش تقريبا واضح جدا انها في عجلة واحدة معقولة سمعت قدام وورا كده ليه عربية لعبة طبعا شر البلية ما يضحك وقعدنا نضحك شوية وبعدين اداني الصدمة الجامدة جدا لما قلتله عيتكلف كام الحوار ده قاللي القنطرة ب 3500 والمقص ب 650 والمساعد مش فاكر الصراحة دلوقتي لاني سمعت الرقمين وتقريبا ماسمعتش حاجة بعدها فيا ليت لو حد يعرف المساعد بكام يقوللي وكمان الشمعدان اللي معرفش هو ايه اصلا المهم سوقت من التوكيل لحد الحي التاسع في مدينة نصر لاني ساكن هناك وكنت حاطط ايدي علي قلبي الصراحة لاني اول ما بوصل لتسعين الاقي دواسة البنزين بترعش وطبعا الفرامل بترعش على ستين كمان الحمد لله وصلت بمعاناة لان عربيات النقل والميكروباسات على الدائري فلة حسسوني اني فتلة على الطريق وكانهم مش شايفيني ولا سامعيت الكلاكسات اساسا المهم ربنا ستر وانا طولت عليكم انا بس كنت عاوز افضفض مع حد بروتوناوي زي حالاتي

[viper911s]

يبقى اكيد الصدمة فى الرصيف كان قوية شوية وبالتالى سمعت جامد فى العفشة
ححاول اجيبلك الاسعار للمقص والشمعدان
وربنا ييسرلك الحال
وطبعا اسباب ارعشات دى كدة تبقا واضحة اظن بسبب الحاجة دة القنطرة لوحدها تعمل مشاكل كتير

[Nistelrooy]

الف حمدلله علي سلامتك .. نصيحة مني اسمع كلام التوكيل وغير الحاجات كلها بالحاجات الاصلية .. وادفع المبلغ ده احسن ما تدفع اضعافة لو قطعة مش كويس ركبت ..

وربنا يستر طريقك والعربية ترجع احسن من الاول ..

[spiderloking]

معلش قدر الله ما شاء فعل انت مش مأمن علي العربيه ؟

[totosaga]

يبقى اكيد الصدمة فى الرصيف كان قوية شوية وبالتالى سمعت جامد فى العفشة
ححاول اجيبلك الاسعار للمقص والشمعدان
وربنا ييسرلك الحال
وطبعا اسباب ارعشات دى كدة تبقا واضحة اظن بسبب الحاجة دة القنطرة لوحدها تعمل مشاكل كتير

الف شكر يا زعيم على اهتمامك انا قريت في البرفايل بتاعك انك من اسكندرية انا من اسكندرية بردو من صفر زيزينيا يعني بس شغلي في التجمع الخامس وعلى فكرة انا كنت المفروض واخد اجازة اربع وخميس وجمعة كان نفسي فيها جامد بس النصيب لما يصيب تقول ايه غير الحمد لله

[harizy]

أنا شايف إنك تتأكد من الكلام ده عند سمكرى بره، وتقارن اللى هيقوله ليك مع الكلام اللى سمعته فى التوكيل، وعلى هذا الأساس يمكن أن تحدد موقفك، بالنسبة للقنطرة يمكن أن تشتريها قديمة من الحرفيين وأكيد سعرها يقل عن كده كثير إنما بالنسبة للمقص هو ممكن برضه بس ما انصحكش بيه ومتهيألى كمان أن القنطرة أغلى يعنى كده تبقى وفرت مبلغ برضه مش وحش، وربنا يستر طريقنا جميعاً، تقبل تحياتى

[totosaga]

معلش قدر الله ما شاء فعل انت مش مأمن علي العربيه ؟

انا مأمن التامين الاجباري بتاع رخصة العربية وطبعا ده مالوش اي لزمة او غالبا كده مفكرتش فيه لاني عارف انه اكيد نصب وفلوس بتدفع زي فلوس كتير بتدفع او بتتخصم مثلا من مرتبنا بحجة اي مسمى لكن تعددت الاسماء والنصب واحد حسبي الله ونعم الوكيل في الناس اللي معدومين الضمير واللي للاسف كتروا جدا في بلدنا اللي هي خسارة فيهم ومش عارفين قيمتها معلش كلام غريب بس الواحد اتخنق من كمية النصب اللي بيشوفوا كل يوم

[totosaga]

أنا شايف إنك تتأكد من الكلام ده عند سمكرى بره، وتقارن اللى هيقوله ليك مع الكلام اللى سمعته فى التوكيل، وعلى هذا الأساس يمكن أن تحدد موقفك، بالنسبة للقنطرة يمكن أن تشتريها قديمة من الحرفيين وأكيد سعرها يقل عن كده كثير إنما بالنسبة للمقص هو ممكن برضه بس ما انصحكش بيه ومتهيألى كمان أن القنطرة أغلى يعنى كده تبقى وفرت مبلغ برضه مش وحش، وربنا يستر طريقنا جميعاً، تقبل تحياتى

باشا شكرا لاهتمامك اول حاجة بس للاسف الساجا لسه مانزلهاش قطع غيار بره انا فكرت اني مروحش التوكيل اصلا اولا لانه اسعاره مبالغ فيها ثانيا لانه بعيد جدا عني بحس اني مسافر مش مشوار عادي بص مثلا في ضبط الزوايا ب 100 جنيه و الكشف على العفشة برده 100 ليه يا جدعان اومال ايه خدمة ما بعد البيع وايه الضمان انا مابقتش فاهم حاجة خالص

[harizy]

يا باشا متيأسش ممكن تكون قنطرة الجن 2 أو أى موديل آخر تركب على الساجا؛ إسئل سمكرى كويس وشاطر وشوف، أعتقد أن بروتون مبتغيرش كتير فى العفشة اللى بره بدليل أنك ممكن تلاقى بعض الملاحظات (أنا ما قولتش عيوب عشان الناس متزعلش) المهم أن بعض الملاحظات على العربية جايز تلاقيها متكررة فى موديلات مختلفة، فأنا شايف ـ بعد إذنك ـ إنك تحاول تسأل ومتستسلمش لحكاية التوكيل دى، القنطرة دى عبارة عن حاجة زى مسطرة بتوزن العربية فممكن تلاقيها متكررة فى عربيات آخرى شوف وجرب وطمنا.

[totosaga]

يا باشا متيأسش ممكن تكون قنطرة الجن 2 أو أى موديل آخر تركب على الساجا؛ إسئل سمكرى كويس وشاطر وشوف، أعتقد أن بروتون مبتغيرش كتير فى العفشة اللى بره بدليل أنك ممكن تلاقى بعض الملاحظات (أنا ما قولتش عيوب عشان الناس متزعلش) المهم أن بعض الملاحظات على العربية جايز تلاقيها متكررة فى موديلات مختلفة، فأنا شايف ـ بعد إذنك ـ إنك تحاول تسأل ومتستسلمش لحكاية التوكيل دى، القنطرة دى عبارة عن حاجة زى مسطرة بتوزن العربية فممكن تلاقيها متكررة فى عربيات آخرى شوف وجرب وطمنا.

باشا لو تعرف سمكري محترم وكويس يا ليت تديني نمرته او وسيلة للاتصال بيه لان كل اللي سالتهم اما عاوزين يجربوا يعني اشتري ويجرب وممكن ينفع او لا او اللي يقولي مالهاش الا في التوكيل

[Tarek Gen 2]

ربنا يعوض عليك و يسهلك يا باشا بس واضح انها حادثة قوية

طب شوف سمكرى مشهور جنبك حتى لو غالى بس يعملهالك كويس او يوفر عليك جزء حتى
انا اعرف واحد ممتاز بتعامل معاه من سنين و محترف بس مش عارف هيقدر يفيدك ولا لا لانى مشفتش الخبطة عندك

[khpopo]

راجع العربيه بره وليكن فى ورشة فيصل قبل ماتعمل حاجه فى التوكيل وبعدين قرر
ربنا يجيرك فى مصيبتك ويعوضك
ربنا يسترها

[totosaga]

هو السؤال اللي بيدور في دماغي هو التوكيل وخصوصا بتاع الصحراوي ومع تجربة الناس ليه ممكن يشتغل الناس ولا عندهم ضمير وبيقولوا فعلا الحقيقة .

[densfog]

باشا .... هبعتلك دلوقتى على الخاص باذن الله تليفون واحد ميكانيكى شغال فى توكيل عز العرب الأسكندريه .... وورشته فى الساعه فيكتوريا .... يمكن ربنا يجعل عنده الحل

[jisso82]

أهم حاجة سلامتك و بعدين معلش أسعار الغيار غالية شوية بس كل التوكيلات تقريبا كده و لو حابب تعلمها بره يمكن يكون أرخص بس أكيد هتطلع جزء من العربية بره الضمان