حاجه غريبه عند دخول بركه مياه .... محتاج ارائكم بشده

[densfog]

السلام عليكم معشر آل بروتون خاصه وباقى العشائر عامه

فى ايام المطر الشديد فى الأسكندريه .... طبعا برك المياه مش هأوصفهالكم ..... كنت لما ادخل بركه بعجله من العجلات على سرعه 80 تقريبا يحصل صوت غريب فى العجله وأحس ان العربيه هتعوم لولا انى مكلبش على الدركسيون وكمان العجله اللى فى الميه بتقفش (بالمناسبه بركه الميه اللى بتكلم عليها مش عميقه ) والاقى العربيات اللى حولايا ماشيه عادى وبنفس سرعتى...... وحاجه تانيه ودى بجد مش هزار فى بعض الأحيان الاقى ان الميه اللى بيزيحها عجل العربيه جه كله على الأزاز بتاعى وفى بعض الاحيان لأ ...
معلش ياجماعه دى اول عربيه ليا وكمان اول مره اسوق فى ظروف المطر ده فمحتاج ارائكم هل الموضوع ده عادى ولا فى حاجه فى العربيه

[kamalsalem]

نقشة الكاوتش مش بتاعة مطر... ف فرق معامل الانزلاق بين الاسفلت الناشف والمبلول بيأثر... خصوصاً لو تعليق العربية مش تمام

انا بتكلم عامة احسن الناس تشاور عليا وتقول بص بيعيب في الجين 2... بس من ساعة ما المطر بدأ وبدأت الناس تشتكي من الاسفلت المبلول والزليطة.. و"تصادف" انه 2 منهم معاهم نفس العربية ف شكيت ف نوع الكاوتش اللي بينزل معاهم

[mahmoud_magdy]

طبيعي ان العربيه تعوم في الميه وخصوصا اذا دخلت بسرعه عاليه (80 سرعه عاليه في الاجواء دي)
الاهم انك لما تلاقي ميه كتيره متعملش حركه مفاجأه وسوق بحرص شديييييييييييييييييد
متدوسش فرامل بعنف ومتكسرش الدركسيون بعنف
واحده واحده

[alarabiya11]

مفيش حد يسوق فى مياه على سرعة 80 ولا حتى 40

[sayed911]

ده حضرتك اصلا لو درست موضوع السرعة في المياه ها تكتشف حاجة غريبة جدا انتا لما بتدخل على سرعة 80 والعربية اصلا الساجا وزونها الا حد ما خفيف ها تجد انه السيارة اصلا من ماشية في المياه ولكن لأول جزء من الثانية والذي يليه بتكون العربية مفيش تلامس بينها وبين اي سطح موجود يعني بتبقى طايرة في الهواء عشان معامل الإحتكاك بتاع المياه صغير جدا فإلى حد كبير جدا فتكون العربية عايمة مش ماشية وها تحس بالفكرة دي جدا جدا لما تكون ماشي في طريق ( رملي ) وتنتقل على طريق اسفلتي بسرعة ها تحس بمعامل الإحتكاك اختلف تماما .. واعتقد سبب كبير جدا يرجع الى اختلاف فرزات ( النقشة ) اللي على الكاوتش بسبب انه المفروض لكل مجلس حديث يعني لكل جو في الكاوتش بتاعوا وده المفروض ... الجور الثلجي له كاوتش والزلق له كاوتش والمطر له كاوتش والحر له كاوتش ... ولكن الله المستعان واعتقد يا اخي انه الدخول في بركة ماء حتى وان لم تكن كبيرة وغويطة على سرعة 80 كم/ ساعة مخاطرة كبيرة جدا واعتقد انه يجب ان تؤخذ بالإعتبار رد فعل السيارات التي امامك ..... خليك في الهادئ اكتر بكتير يعني كبيرك 30- 40 كم /ساعة حتى عشان مترميش مياة كتير على العربيات اللي حواليك وتسببلهم انعدام في الرؤوية ...... وتحياتي لك اخي وربما يعينك ..

[eslamkasem]

فعلا العيب من نقشة الكاوتش وحتي لحظتها امبارح مكنتش بركه كبيره اوي يعني بس بردو حاسس ان العربيه مكنتش فوق الاسفلت مية في المية يعني وكنت ماشي علي 60 ولما قللت السرعه لقيت ان العربيه اتظبت تاني يا جماعه بلاش سرعة خالص الايام دي في ندي ومطر ورياح خلينا في المعقول ومش هتفرق لو اتأخرنا 10 دقايق بس نرجع لاهلينا كويسين وربنا يستر

[shaddadfalcon1]

انا اساسا لو ماشي وجنب فيه ميه والجنب التاني ناشف بحس ان العربيه هتلف مني ولو داخل بالعربيه كلها في المياه بلاقي العربيه بتفرمل
وانا حاسس ان ده طبيعي جدا

[Raul_7]

80 كم!!

أنا لما بشوف بقعة مية (مش بركة) بهدي عالآخر. إزاي جالك قلب تخش في بركة مية على 80 كم؟

[mido_soliman]

80 كم!!

أنا لما بشوف بقعة مية (مش بركة) بهدي عالآخر. إزاي جالك قلب تخش في بركة مية على 80 كم؟

+11111111111

[shaddadfalcon1]

دايما الواحد بيقلل من اي حته فيها ميه ومش برضي اعدي منها الا لما الاقي عربيه مشيه قدامي
حتي لو هضطر اركن لحد ماحد يعدي قدامي منها الا اذا كنت انا حافظ الحته دي كويس قوي وعارف انها مفيهاش حفر او بلاعات

[waleedrahmy]

ده ممكن بركة المية ديه يكون فيها حفرة ولا نقرة ولا بلاعة.............وحضرتك تخش علي 80كم؟؟؟؟؟؟؟؟؟؟؟؟ المفروض ما تخشش عليها اصلا ولو مضطر يبقي علي مهلك وببطء شديد

[ahmad alshaaer]

وكمان دخول المياه وبالسرغه دي بيخلي المياه تدخل على الطنابير وهي سخنه جدا وبيحصلها تبريد مفاجيء والله يرحم الطنابير


المفروض ماتخليش المياه تدخل فجاه كده على الطنابير

تحياتي

[RedBull_30]

انا بقى حصل معايا موقف تاني وهو انه كان لازم اخرج وبيتي كان محاط ببركة مياه عميقة وعديت منها باعجوبة وكنت محافظ على سرعة تكاد لا تزكر وفي نفس الوقت ضاغط بنزين بسبب ان مش عاوز ميا تدخل في فتحت الشكمان لاني بسمع انه لو حصل انها دخلت العربية هتبطل .. المهم خرجت بسلام منها وبعد ما خرجت بجيب الغيار الثاني ولقيت العربية بتترج وكاني بتعلم السواقة .. ركنتها شوية وهي لسة شغالة طبيعي والموتور مفهوش اي صوت غير طبيعي .. اللي كان مش طبيعي هو ان بعد اي غيار بلاقي رعشة او رجرجة جامدة كاني سايق عربية قديمة وجايب غيار عالي وبدوس بنزين جامد .. تقريبا بعد 2 او 3 كيلو كل حاجة رجعت طبيعي .. يا ريت حد يكون عنده خلفية عن اللي حصل معايا . شكرا

[densfog]

الف شكر لكل اراء الساده الأعضاء الأفاضل ... فعلا استفدت من اراء حضراتكم جدا .. وربنا يبعد عنا وعنكم كل شر
انا ساعتها كنت ماشى عل الصحراوى وكنت بجرى فى الأماكن الفاضيه بس بعد نصائحكم وبعد اللى حسيته بيتهيألى السلامه اولا ...

[alarabiya11]

الغريب ان الجو فى ماليزيا استوائى يعنى مطره غزيره طوال السنه ازاى موضوع الكاوتش الغير مناسب للمطر ده يحصل او ازى تكون السيارة غير مناسبه لجو به امطار غزيره

سؤال محتاج اجابه من الماليزيين