بشوات جين 2 2008

[ayman_83]

يارجاله قدامي جين 2 2008 رشه بره والكيلو 37500 الف وصاحبها معاه ورقه معرفش ايه كده تثبت ان الرش ده عشان الخرابيش مش اي حوادث
فكنت عايز اعرف 2008 ليها عيوب او اي مشاكل والشنطه بتاعتها لازم تفتح من جوه ولا ممكن من الريموت والسي دي بتاعها بيشغل ام بي ثري ولا اوديو وبس هي العربيه هاي لين وصاحبها طالب 70000 الف نهائي ومش عارف اعمل ايه واكشف عليها فين برجاء سرعه الرد لاني خلاص علي وشك التخليص فيها باذن الله تعالي اللي عنده معلومه ياريت يقولهالي في اسرع وقت وشكر

[ayman_83]

أيه مفيش اي حد يرد علي يارجاله

[ayman_83]

ايه ياشباب فين الردود ده انا قايلكم اني مستعجل والله
يعني اروح اسالهم في قسم تويوتا مثلا ايه يارجاله فينكم

[fat7elbab]

بالنسبة لموديل 2008 لازم تفتح شنطة العربية من جوه مش من الريموت

وبالنسبة للسى دى هو أديو بس وليس أم بى ثرى

[alarabiya11]

أيه مفيش اي حد يرد علي يارجاله

يعنى حضرتك لما تكون مشركتك الساعة 3:50 صباحا

ومستعجل الرد الساعة 4:20 صباحا

ومحدش يرد على المشاركة يبقى ده طبيعى ياباشا

[K3A]

اظن ان موديل 2008 فيه مثبت سرعة .... وده مش موجود في الموديلات اللى بعده

كمان الموديلات اللى بعده موتورها camppro-IAFM هو احسن شوية على السرعات المنخفضة ... بس الشباب بيقولو لو ركبت فلتر رياضي بتحصل على نفس الاداء

[spiderloking]

موديل 2008 كويس و فيه مثبت سرعه الشنطه مش بتفتح ايلا من جوه بس مينفعش من الريموت و الكاسيت اوديو بس مش ام بي 3 اكشف عليها في التوكيل احسن حاجه لو مش هتعرف تروح ممكن تروح ورشة فيصل او اي مركز صيانه معتمد زي اوتوماجد او المركز اللي فتح جديد في النزهه الجديده بالنسبه للسعر لو تعرف تخلص علي 65 الف يبقي كويس بس زي ما بتقول راشه نضافه بس انما مش مخبوطه العداد بتاع الكيلو متر كويس ممشيتش كتير يعتبر

[ayman_83]

شكرا لكل اللي ردو علي بس هي رشه عشان خرابيش انا شوفت الفاتوره والاثبات بنفسي ثانيا انا من الاسكندريه والتوكيل قالي الفحص ب 300 جنيه وطبعا لو طلع فيها حاجه انا اللي هدفع ومستفدش حاجه ولو طلعت 100100 انا برضه اللي هدفع وهستفيد
وفي نفس الوقت واحد صاحبي عنده ورشه حديثه قالي هاتها انا ارفعها واكشف عليها بالكومبيوتر زي التوكيل بالظبط وممكن اراضي العمال ب 100 جنيه ولا حاجه غير كده صاحبي يعني مش هيضرني فهروح بكره ان شاء الله بس ممكن معرفش انزل من سعرها حاجه وكذا واحد صحابي متابعين العربيه دي بيقولولي انها بيتي بيتي ولقطه فلو السعر ده يبقئ كويس ولا كتير
ولو حد عنده نصيحه يقولهالي او حاجه ابص عليها في العربيه ياريت ميبخلش وربنا يجازيه خير باذن الله

[spiderloking]

بص انت اهم حاجات هتبص عليها ارفع العربيه و بص علي الشاسيه و شوف المكنه اكشف عليها بالكمبيوتر لو الحاجاتين دول تمام كدا يبقي انت في السليم كل اللي جاي بعد كدا حاجات بسيطه بص علي كهربة العربيه و شوف في غربله في العربيه و هيه ماشيه و هيه واقفه و كدا بص علي العادم اللي خارج من الشكمان لما تكبس بنزين جامد لو لونوا ابيض يبقي المكنه خفيفه و مش حلوه لو مطلعش عادم خالص او حاجات بسيطه اوي لاتذكر يبقي المكنه تمام و بص علي القوايم كويس بتاعت العربيه لو فيها اي لحامات و بص علي الشنطه من جوا و صدر العربيه شوفوا سليم ولا لأ و الحوض بتاع العربيه عند البطاحات و الكبالن في شقوق ام لا و ان شاء الله خير و لو كويسه توكل علي الله و اشتري الجين 2 عربيه جميله و موديل 2008 منها كويس و في امكانيات كويسه

[ayman_83]

ربنا يبارك لك ياسبيدر وانا الحمد لله قريت الفاتحه الناهرده وبكره هنبدا في الاجرات ان شاء الله وشكرا لباقي الاعضاء

[spiderloking]

ربنا يوفقك و يكرمك يا رب و تكون العربيه حلوه و تكون من نصيبك