حراره جين 2 وصلت لاكتر من 120 درجه .... محتاج نصائحكم

[densfog]

السلام عليكم :

امبارح وانا مسافر فى نص طريق مصر الأسكندريه حصلت معايا حاجه غريبه ..... لقيت امبير الحراره وصل لاقصى درجه ليه 120 درجه ولمبه الموتور نورت ..... وقفت العربيه وشيكت على مياه الرادياتير لقيتها تمام .... دورت العربيه تانى لقيت الحراره اقل من اقل درجه فى العداد 60 درجه .... المهم ان العربيه لما تهدى او تقف والموتور شغال الحراره بتعلى جامد جدا وبسرعه .... ولما تمشى بسرعه الحراره بتقل جدا وخاصه ان الجو كان برد شويه مع العلم بالاتى :

1- انا كنت غاسل الوتور بجاز فى البنزينه قبلها بكام يوم وحصل بعد كده صوت فى بليه الشداد او بليه السير مش عارف بالظبط وروحت للتوكيل وزيتها وجربت العربيه جوه البلد ومكنش فيه اى مشاكل

2- انا كنت عامل حادث من وقت طويل وكنت مغير رادياتير وتقريبا غير الثيرموستات ومن ساعتها والحراره فى العربيه اقل من معدلها (كانت قبل الحادثه تقريبا ثابته قبل الـ 90 درجه بشويه وبعد الحادثه بقت حول الـ 70 درجه وتزيد وتنقص )

ارجوكم ياجماعه محتاج مساعدتكم علشان انا هاخد اجازه باذن الله يوم الثلاثاء علشان اشوف المشكله دى سواء انزل القاهره (الحرفيين) او افك الثيرموستات خالص عند اى حد فى السويس (بناءا على نصيحه بعض الزملاء )

سؤال كمان معلش .... هو الثيرموستات ده هو اللى بيشغل مروحه الرادياتير ولا لأ .... وكمان هو اللى بيبين الحراره فى التابلوه ولا لأ ؟؟؟؟؟!!!!!!

وجزاكم الله خيرا

[Osama.shihata]

طبعا حضرتك توجه للتوكيل افضل لان الواضح كدة ان فى مشكلة فى احدى السرموستات الى راكبين او دورةالتبريد واخدة هواء نتيجة تنظيف الريداتير
وعموما لو لقدر الله ده حصل معاك وانتا فى الطريق شغل التكييف لانه هيشغل المروحة الثانية مباشرة
وهيهدى الحرارة الى فى الردادتير بسرعة
ياريت تسرع فى الذهاب للفحص علشان الحرارة متبوظش جوان وش السلندر
وربنا يحفظهالك من كل سوء

[mido_soliman]

زى ما استاذ اسامة قال بالحرف الواحد على التوكيــــــــــــــــــــــــــــــــــــــــــــ ـــــــــــــــل لان دة عيب ثرموستات من اللى موجودين
متصبرش وياريت متحركش العربية قبل ما تحل المشكلة دى

[K3A]

أه من الحرارة

شوف يا برنس

اولا متسبش حرارة العربية توصل فوق 100 ابدا لان دي درجة غليان المياة و بالتالي مية الراديتير حتنقص كلها ...لازم عينك تبقى على طول على عداد الحرارة تمام زي عداد السرعة

ثانيا من كلامك اللى صلحلك العربية ركبلك ثرموستات بشتغل على حرارة 70 بدل 90 وده بيخلي المروحة تشتغل على 70 بدل 90

واللي حصل غالبا ان حساسية الثرموستات باظت لما العربية وصلت 120 و يمكن ده خلاه ميشغلش المروحة

عموما انت غالبا محتاج ترموستات تاني جديد بس مهم اوي يكون 90 مش 70 لان دي درجة الحرارة المثلى للموتور للحصول على اعلى اداء وعزم منه في مقابل استهلاك البنزين...

ولو عربيتك اوتوماتك وركبت ثرموستات 70 غالبا حتلاقي ال rpm عالى على p او N لان العربية حتحاول تسخن نفسها لحد 90

ايضا العربية كانت بتبرد لما تجري و ده طبيعي جدا حتى لو المروحة مش شغالة لان الحرارة المتولدة من المتور اعلى في حالة السرعات المنخفضة

طب تعمل ايه لو العربية سخنت تاني... و المروحة مش راضية تشتغل ؟ سؤال مهم جدا

لو الحرارة اعلى من 100 بحاجة بسيطة توقف العربية فورا وتفتح الكبوت على الاخر وتسبها تبرد واوعى تفتح غطا اربة الميه و العربية سخنة لانك مؤكد حتتلسع من بخار المياة وغليانها لاقد الله و اوعى تكب مية على العربية لان الموتور حيأفش

طب لو الحرارة اعلى من كده يعني وصلت للمؤشر الاحمر في عداد الحرارة ... خد بالك لان التعامل الخاطئ في هذا الموقف قد يدمر موتور العربية او يسبب ان المتور يأفش او يفوت ... بصراحة لازم حد متخصص يجاوب على السؤال ده

[spiderloking]

حاول تروح التوكيل في اسرع وقت و تكشف علي العيب هناك احسن من ميت ميكانيكي لأن بصراحه ناس قليله اوي اللي برا التوكيل بيفهموا في بوتون

[eslam_wega]

انت اتكلمت عن الحرارة يبقا جابت فى سيرتى انا فضلت فى الحور دة اسبوع بحالة
وهتجنن ومش عارف العربية بتسخن لية بس فى الاخر وصلت للحل الحمدلله
الموضوع مش سهل او بسيط انى اكتبلك فى مشاركة
دة رقمى
0111929094

[densfog]

متشكر ليكم جدا بجد .... جزاكم الله كل ... خير وابعد عنكم كل مكروه

انا سألت فى امير وجوزيف على الثيرموستات قالى موجود بـ 150 جنيه .... ومن كلام حضراتكم ان ممكن يكون فى العربيه اكتر من ثيرموستات .... ممكن الأيضاح ؟؟
وهل المشكله هتكون متركزه فقط فى الثيرموستات اللى فى الكوع الخاص بالرادياتير انه قافش مثلا ولا ممكن يكون فى الجزء اللى بيشغل المروحه او المروحه نفسها فيها مشكله ؟؟؟؟

اسف على كتر الأسئله بس بجد انا مزنوق لأنى فى السويس ومفيش جنبى اى توكيل ومش لاقى وقت اروح للتوكيل اللى فى القاهره ... ومقلق اصبر لحد ما ارجع اسكندريه وهيا كده ..... وشكرا مقدما

[densfog]

انت اتكلمت عن الحرارة يبقا جابت فى سيرتى انا فضلت فى الحور دة اسبوع بحالة
وهتجنن ومش عارف العربية بتسخن لية بس فى الاخر وصلت للحل الحمدلله
الموضوع مش سهل او بسيط انى اكتبلك فى مشاركة
دة رقمى
0111929094

اسلام باشا .... مش محتاج تدينى رقمك ده منور عندى على الموبايل فى الكونتاكتس من ساعه ما اتصلت بيك علشان الحادثه اللى حصلتلى (ربنا يبعد عنا وعنك وعن كل البروتوناويه كل مكروه ) .... بالمناسبه انا اتصلت بيك على الساعه 11 الظهر وجرس ومحدش بيرد ..... وقت ماتفضى استأذنك ترن عليا .... والف شكر

[yaseenmohamed]

بلاش تشيل الثرموستات
وبلاش تروح لحد في السويس ...اطلع علي التوكيل ....ولو اضطريت تروح لحد في السويس كلمني وأدلك علي حد كويس
0129619716

[yaseenmohamed]

الاخ العزيز
انا سألتلك جاري معاه جين تو وكان حصل معاه نفس المشكله
واللي فهمته منه ان كان في مشكله في احد الحساسات وهو ده المتحكم في الثرموستات
حضرتك تروح في السويس لواحد في المدينه الصناعيه اسمه (حماده السداوي ) عنده كشف بالكمبيوتر ..وان شاء الله خير

[ahmad alshaaer]

ممكن المشكله ثيرموستات او من الريداتير او مراوح الريداتير لو ضعيفه تعمل كده او من نوع المياه مثلا في الردياتير

استخدم مياه موبيل

تحياتي

[tamer_aj]

كانت عندي نفس المشكلة دي في الصيف و طلعت المشكلة في الثرموستات كانت مابفتحش عشان تخرج الميه السخنة من الموتور فكانت بتغلي جوة الموتور و هو ده اللي بيظهر عندك, روح التوكيل يغيرهولك في نصف ساعة.

[densfog]

الف شكر ياجماعه ..... وانا جربت العربيه على الواقف والمروحه اشتغلت على 90 درجه وكوعه الرادياتير لاقيتها سخنت فتقريبا المياه عدت فيها لما سخنت ... والحراره معليتش بعد كده تانى بيتهيألى بتظهر مع تحميل الموتور .... انا باذن الله هفك الكوعه دى وأشغل الموتور واخلى الثيؤرموستات يرمى المياه بره على الأرض بدل مايروح للرادياتير ده فى حاله انه شغال كويس وطبعا هأكون بعوض مياه فى القربه وده علشان اطمن على الثيرموستات .. وهأروح زى ما استاذ ياسين قال للسداوى واشوف ايه المشكله والف شكر مره تانيه لكل الاعضاء الأفاضل

[mido_soliman]

الف شكر ياجماعه ..... وانا جربت العربيه على الواقف والمروحه اشتغلت على 90 درجه وكوعه الرادياتير لاقيتها سخنت فتقريبا المياه عدت فيها لما سخنت ... والحراره معليتش بعد كده تانى بيتهيألى بتظهر مع تحميل الموتور .... انا باذن الله هفك الكوعه دى وأشغل الموتور واخلى الثيؤرموستات يرمى المياه بره على الأرض بدل مايروح للرادياتير ده فى حاله انه شغال كويس وطبعا هأكون بعوض مياه فى القربه وده علشان اطمن على الثيرموستات .. وهأروح زى ما استاذ ياسين قال للسداوى واشوف ايه المشكله والف شكر مره تانيه لكل الاعضاء الأفاضل

هوة حضرتك مش عايز تروح التوكيل لية ؟؟؟

[densfog]

وتم معرفه السبب بحمد الله :

انا روحت للسداوى فى المنطقه الصناعيه فى السويس وصل جهاز كمبيوتر الأعطال على العربيه وطلع ان العيب من حساس الحراره )temperature sensor) شكله كان مهزوز ولا حاجه علشان العيب دلوقتى مش موجود بعد تجربه فى ظروف متعدده والراجل طمنى وقالى مش هيحصل حاجه تانيه باذن الله ..... ودفعت 10 جنيه

شكرا لكل الساده الأعضاء الافاضل اللى تفضلوا بمساعدتى واللى استفدت من ارائهم جدا واخص بالشكر

islam wega اللى دوشته بالتليفون وافادنى جدا بتجاربه مع مشاكل الحراره وربنا يباركله فى التيل البوش الجديد :)

yaseenmohamed اللى دلنى على المركز اللى عنده كشف الكمبيوتر واللى انبهرت بيه لأنى اول مره اشوفه

وبالنسبه انى مش عاوز اروح التوكيل اولا ظروف الشغل مش سامحه والمسافه كبيره ولازم اروح من الصبح واحجز قبلها وغير كده عاوز اعود نفسى على بدايل كويسه بره التوكيل وخاصه انى قربت على الستين ........... (الف كيلو)