أفضل لون للساجا -- من فضلك شاركنى وأفيدنى برأيك

[khaled_Saga]

السلام عليكم ورحمة الله وبركاته

اخوانى الاعزاء

ان شاء الرحمن انا مقدم على شراء ساجا 2011 فى غضون اواخر الشهر القادم ولكن محتار فى اللون خاصة بعد لما عرفت انها 4 الوان بس وهى:

1. الأسود
2. الأحمر
3. الفضى
4. الأبيض

صراحة انا مش ميال بالمرة للون الأبيض وبصراحة أكثر ميال للأسود أولا بس مش اى اسود لكن فيه لون اسود ميتالك مش قافل بيكون شيك جدا لو كنتم شوفتوه على اللوجان لونها الاسود رائع ثم الأحمر ثم الفضى, فأرجو من الاخوة الاعضاء انهم يشاركوا بأرائهم للوصول الى اللون الأكثر رواجا وشعبية وبالطبع ساحترم جميع الآراء لان كل رأى يعبر عن رغبة صاحبه ليس أكثر.

ولكم منى خالص اشكر جميعا وأرجو الدعاء لى بالتوفيق فى الاختيار واتمام الشراء على خير.

[abdoumahros]

كله حلو

بصراحه كل الوانها حلوه ودي مساله اذواق

[khaled_Saga]

شكرا ليك يا أخ عبده على المشاركة

بس كنت حط رأيك اكيد مسألة اذواق مفيش شك

[SALAHHAKIM]

السلام عليكم
الاحمر
الفضى
الابيض
الاسود

الاشيك طبعا الاسود لكن الاكثر اتساخ وحراره الشمس
الابيض الاسهل فى معالجه الخدوش وطبعا ممتاز فى الشمس عاكس
الفضى لون ممتاز وضد الاتساخ
الاحمر لون الملوك والشبابى

[khaled_Saga]

الف شكر يا استاذ صلاح بس انت لخبطنى ههههههههههههه

[cavalier822]

أخي العزيز الموضوع بتاع اللون ده نسبي جدا لانها كما تفضل الاخوة مسألة أذواق و لكن اديك رايي لان ان شاء الله ناوي اجيبها ( العربية ) فأنا حختار الفضي لاني شايف من وجهة نظري هو الانسب لحجمها و وفي نفس الوقت الأحمر شبابي يعني انا شايف ان لو العربية للاسرة فالفضي أو الاسود هما الانسب انما لو استخدام شبابي يبقى أحمر و الابيض انا مبحبوش في اي سيارة وده طبعا رايي الشخصي جدا و ممكن الناس تختلف معايا كتير بس الموضوع زي ما قولت نسبي جدا و يختلف من شخص لشخص. و الف مليون مبروك مقدما

[sayed911]

انا ها الخصهم في كلمتين صغيرين جدا يا استاذ خالد ..
انا جايب الإسود وبقول لحضرتك هات الفضي لأنو تحفة وانا كنت ها اموت عليه لكن مكنتش لاقيه خالــــــــــــــــــــــــــــــــــــــــص لكن الإسود مينفعش خالص في بلدنا نهائيا ..

[khaled_Saga]

الاخ cavalier822

الله يبارك فيك ومليون مبروك ليك مقدما على العربية
لا شك انه موضوع نسبى انما انا حبيت اجمع اكبر نسبة اراء تتفق على لون معين عشان لما اجيبه محسش انى ندمان ومستاء منه

انا فعلا ميال للاسود لكن منكرش خايف منه عشان النضافة طبعا الدنيا مليانة تراب والجو وحش فى مصر
بدأت اميل للفضى شوية بعد ماشوفت الاراء مبدأيا وطبعا هو لون معروف وجميل فى معظم العربيات والعربية اسرية فعلا هتبقى ليا وللمدام
انا 26 سنة صحيح لكن مش مهتم اوى بحكاية الاحمر عشان شبابى خاصة ان العربية اللى معايا دلوقتى حمرا واكيد الانسان بيحب التغيير

اخيرا اشكرك بشدة لرأيك ولمرورك الكريم

[khaled_Saga]

شكرا ليك اخ سيد انا فعلا بدأت اميل للفضى بشكل كبير لانه من الواضح انه جامع بين الشياكة والنضافة ودول اهم عاملين فى اختيار اللون

المشكلة عندى فى المدام انت عارف زن الستات لما يمسكوا فى حاجة معينة ويزعلوا اوى لما تعمل عكسها هى ميالة جدا للاسود وانا كمان لكن فعلا صعب اوى فى نضافته بس ان شاء الله ربنا ينصرنى واجيب الفضى :)

[sayed911]

صدقني انا معايا السوداء ولكن يوميا البواب تقريبا ناقص اركبه معايا مفيش مشوار انزله الا لازم تلميعه قبل وتلميعه بعد .... بس بصراحة عشان اكون صريح لما ببتنضف بتبقى تحفة بصراحة .. ولكن ها تبقى عايزة متابعة بالنضافة مستمرة على طول اول بأول .... والف مبروك مقدما ياباشا ...

[salama_ahmad]

السلام عليكم

الاخ خالد ربنا يسهلك وتستلم العربية قريبا

بالنسبة للالوان انا معايا الون الفضى وانا عن نفسى اشتريتة علشان اريح فى موضوع النظافة وكمان فى احصائية ان حوالى 26% من السيارات لونها فضى

[khaled_Saga]

الاخ سلامة

اشكرك كثيرا لمرورك واهتمامك والنصيحة

انا بدأت اميل فعلا للون الفضى وان شاء الله يقع الاختيار عليه بس يكون موجود وقت الشراء

[mememsaid]

مفيش شك ان الاسود اشيك لون بس لو فكرت بطريقه عمليه هتلاقي اللون الفضي
ولعلمك
انا لما روحت احجز العربيه كنت مصلي استخاره قبل ماروح علي طول وكنت انا ميال للفضي ومراتي مياله للاسود فا لما روحت مالاقتش غير الفضي فاقلت يبقي ده اختيار ربنا
الاسود بعد خمس دقايق من غسلها هتلاقيها اتوسخت تاني لاكن الفضي بفوطه تلمع

[jisso82]

أنا رأيى إن بصرف النظر عن الأذواق ففى عربيات بيليق عليها ألوان أكتر من عربيات تانية و ده بيرجع بشكل كبير لشكل و حجم العربية و بناءا عليه فأحلى لون من وجهة نظرى الشخصية شفته على الساجا كان الفضى و لكن نظرا لانتشاره غير الطبيعى و عدم ميل ناس كتير لأنها تجيبه عشان الرطرطة فالأحمر هو اختيارى الأول

[eymofouad]

انا معايا الساجا مكنتش مقتنع ولا بحب الابيض بس المدام صممت اجبها بيضاء وفعلا ربنا وفقنى اللون الابيض اشد واحلى لون فى الساجا وبصراحه هتعرفو ان كلامى صح الابيض اشد واخطر لون فى الساجا بيحسسك انها عربية فخمة وكبيرة وكل الاكسسوارات عليها جنان