الاسعار زادت كده ليه

[madoim]

السلام عليكم ورحمة الله وبركاته

انا كان عندى كام استفسار واتمنى انى الاقى الجواب عندكوا

هوا صحيح ان سعر بروتون بيرسونا زاد 9000 جنيه زى ما انا شوفت على كونتكت وهل دى هى (اليجانس اللى احنا مستنينها)

هل جين 2 2011 تختلف عن 2010 فى حاجة ولا هي هي بس السعر زاد وخلاص

انا كنت عايز اعرف كمان هو فى تقسيط مباشر مع عز العرب ولو فيه المقدم بيبتدى من كام والفائدة كام
عشان انا مش عايز اتعامل مع البنوك خالص وعايز اشترى قريب ان شاء الله وانضم الى البروتوناوية

تحياتي لكم جميعا وجزاكم الله خيرا

[madoim]

السلام عليكم ورحمة الله وبركاته
هوا ليه مفيش حد رد عليا خالص طب اسئل مين يا جماعة

[mazen234]

Gen 2 1.6 F/O M/T 2011 87900
Gen 2 1.6 F/O A/T 2011 92900
برسونا 1.6 F/O M/T 2011 88900
برسونا 1.6 A/T 2011 94900
Saga 1.3 F/O M/T 2011 67900
Saga 1.3 F/O A/T 2011 72900

الاسعار منقوله من موقع كونتكاكت
ومفيش فرق بين موديل 2010 و 2011 الاتنين واحد
ومفتكرتش انه ديه بيرسونا هما حاطين بس صورة بيرسونا اليجانس بس ده سعر بيرسونا العادي
ومش هقدر افيدك بالنسبة للموضوع التقسيط ده عشان معرفش بس ممكن تتصل بعز عرب نفسه وتساله بكل اللي حضرتك محتاج تعرفه

[zemanovaxxx]

بص الأسعار زادت في معظم التوكيلات
أنا متأكد إن توكيل الكيا والهيونداي رفعوا أسعار كل العربيات من 2000 إلي 3000 جنيه
وتوكيل الرينو كمان, والبافارية بيشاور نفسه علي الدفعة الجديدة

[madoim]

السلام عليكم ورحمة الله وبركاته

انا اتصلت اليوم باستاذ محسن مدير مبيعات بروتون وقاللي
1- بروتون بيرسونا اليجانس هي اللي هتنزل ان شاء الله علي 25-3 وممكن تحجز من دلوقتي ب5000 وهتبقي هاي لاين

2- الجين 2 موجودة حاليا وممكن تشتريها بكرة لو عايز والكلام ده في عز العرب فرع الصحراوي

ودي نمرته لو حد عايز يساله عن اي حاجة ويضيف معلومات جديدة للموضوع 0105119209

[dr-mohamed]

زيادة ايه هما شايفين السوق شغال مثلا والناس واقفة طوابير تحجز عربيات
بعد 25 يناير كلهم ينسوا ويضربوا راسهم في اقرب حيط يعجبهم
مفيش فلوس
الشركات الاجنبية والمصرية اللى كانت بتجيب عربيات للمديرين خلاص بح
المصريين اللى بيشتغلوا في الشركات دي وبياخدوا مرتبات تساعدهم يشتروا كاش او قسط بردو بح
اللى معاه قرشين محافظ عليهم مش عارف الظروف هاتبقي ايه يبقي بردو بح

اي شركة ترفع اسعارها دلوقت تأجر مخازن كبيرة بالمرة علشان عربياتها فعلا المرة دي هاتصدي

[RedBull_30]

رأيي من رأيك يا دكتور محمد

[zemanovaxxx]

زيادة ايه هما شايفين السوق شغال مثلا والناس واقفة طوابير تحجز عربيات

فعلا والله حاجة غريبة
بس متنساش إنخفاض سعر الجنيه أمام الدولار واللي اتكلمنا عنه قبل كده وده أكيد المستهلك هو اللي هيتحمله
التوكيل دايما مش عايز يقلل من هامش الربح اللي هو كان حاسبه لنفسه, وده معناه إن الأسعار بالبلدي كده مش هتنزل
بس المفروض طبقا لسياسة العرض والطلب إن التوكيل المحترم يثبت السعر.

[romioramy]

كيا رفعت الكارنز الهاي لاين مرتين في شهرين - في يناير رفعوها من 127000 الي 130000 و بعدين بعد الثورة خلوها ب 134000 تقريبا ده تحيه للثورة ؟؟؟!!!!

حسبي الله و نعم الوكيل في التوكيلات اللي مصر

[abo3bdolrahman]

لا تعليق سوى الحمار هايفضل طول عمره حمار بكرة لما الجمارك تتغيير يبقى يشربوا العربيات اللى هايخزنوها

[romioramy]

هما فعلا هـــ يخللوهم ... معرض سمير ريان الوحيد المستغل الفرصة و بيبيع بأسعار زمان و علي فكرة عامل عرض كمان علي العربيات اللي بقالها مدة في المخزن ...!!! هو ده التفكير الصح مكسب قليل في عدد كبير هو ده الكلام .

[Boory]

شباب ... يعني المصريين عملوا ثورة خلعوا فيها حسني مبارك بجلالة قدره ... أظن أسهل منها 100 مرة إننا نربي التوكيلات و نخليهم يحترمونا و يبطلوا سرقة رسمي... محدش يشتري عربيات خليها تصدي و موديلها يعدي

[tamermagdi]

شباب ... يعني المصريين عملوا ثورة خلعوا فيها حسني مبارك بجلالة قدره ... أظن أسهل منها 100 مرة إننا نربي التوكيلات و نخليهم يحترمونا و يبطلوا سرقة رسمي... محدش يشتري عربيات خليها تصدي و موديلها يعدي

معاك يا باشا
وكمان الجمارك اللى كانت معموله عشان رجال الأعمال تكسب من الوهم دى لازم تبقى صفر فى المائه

[RedBull_30]

معاك يا باشا
وكمان الجمارك اللى كانت معموله عشان رجال الأعمال تكسب من الوهم دى لازم تبقى صفر فى المائه

معقول يجي اليوم اللي ميبقاش فيه جمارك
معقول يجي اليوم اللي اركب فيه عربية المانية
سبحان الله