أشترى الجين 2 دلوقتى ولا بعد ما الأيام السودة دى تعدى ؟

[Ra2ouf]

أنا خلاص هتجنن يا وحوش
مش عارف أية الحظ دة ؟
كل ما أنوى أغير عربيتى تحصل فى البلد مصيبة فأضطر أنى أستنى شوية
يعنى السنة اللى فاتت كان فى أنفلونزا الخنازير
وبعدين السنة دى حصلت الثورة
وحال البلد ما أنتو شايفين نايم خااااااااااالص
وكل شوية ألاقى اللى بيقول أن الأيام اللى جاية هتبقى أزفت من كدة
وأن البلد داخلة على مجاعة و أزمات كتييييير ملهاش أول من أخر
أية رأيكم يا جماعة ؟ أشترى الجين 2 دلوقتى ولا بعد ما الأيام السودة دى تعدى ؟

[mikology]

طيب ايه علاقه الانفلونزا بالعربيه ؟؟
ده انت لو كنت جبتها ساعتها كانت فرقت معاك فى 5 تلاف على الاقل هههههههههه

انا من رأيى لو هتعرف تشيل الفلوس لحد شهر 10 - يبقى تصبر
ولو هاتعرف تشيل العربيه فى مكان امين لحد شهر 10 يبقى اشترى ههههههههههه
الواحد بقى يخاف على العربيه وهى فى الشارع بجد

انا فى نفس مكانك بس انا هاستنى شويه

[Nistelrooy]

لاء استني احسن .. وشيل فلوسك دلوقتي ... ماحدش ضامن الظروف الحالية ..
انتظر لحد ما يتعين الرئيس الجديد ويمسك زمام امور البلد ..

[sayed911]

انا شايف انها الفلوس اللي مش بتمتع صاحبها يبقى تغور في داهية !!! مدام نفسك في حاجة توكل على الله ومتخليش في نفسك حاجة !!! اصل ها تسنتى 6 شهور مثلا على التغير وترجع يحصل حاجة جديدة يبقى عمرك ما ها تتخذ الخطوة انا شايف توكل على الله هوة خير متوكل عليه !!!

[Amr_tika88]

انا شايف انك تستني علشان حال البلد ولاقدر الله العربيات اللي بتتسرق وممكن جدا يجي رئيس ينزل الجمارك شوية تبقي تدخل في فئة اعلي

[medododo]

قال الله تعالي في الحديث القدسي ( لا تسبو الدهر فأنا الدهر )

يعني بلاش ايام سودة وسنة منيلة والكلام ده
وربنا يصلحلك الحال بأحسن عربية



يرجى مراعاة الدقه في كتابة الحديث ...

قل الدهر وليس الضهر

مشرف 1 ب

[د.اشرف هنداوى]

انا ذيك بالضبط كنت ناوى اجيب زيرو بس خايف من موضوع السرقة

لو عندك جراج اتكل علي الله

اما موضوع البلد و احوالها - ده حيغير ايه ؟ العربيات حترخص او سعر اعاده البيع حيقل ؟ طيب و ايه يعني

[Ra2ouf]

انا ذيك بالضبط كنت ناوى اجيب زيرو بس خايف من موضوع السرقة

لو عندك جراج اتكل علي الله

اما موضوع البلد و احوالها - ده حيغير ايه ؟ العربيات حترخص او سعر اعاده البيع حيقل ؟ طيب و ايه يعني

شوف يا دكتور .... البرامج اللى أحنا بنشوفها كل يوم و خصوصآ برامج التوك شو و الأخبار اللى بنقراها جابتلى أكتئااااااااااب فظييييييييع لأنها للأسف بتؤكد حدوث أزمة أقتصادية هتحصل فى البلد الأيام اللى جاية وكلة عمال يفتى ...... اللى يقولك البنزين هيرفعوا عنة الدعم و العيش مش هنلاقية و البلد على وشك الأفلاس و كلام كتيييييييير يسد النفس والناس مش عايزة لا تسمع ولا تفهم و كل اللى شاغل بالهم الأضرابات و الأعتصامات
أنا مش خايف من السرقة لا قدر الله أد مانا خايف من الأزمات دى .... أحوال البلد ماطمنش وربنا يستر .

[tamerosman]

الى كل زميل عايز يشترى عربية و متردد ده تحليلى الشخصى المتواضع :

سعر الدولار هيطلع يعنى هيطلع و ياثر بالزيادة على اسعار كل السلع بما فيها السيارات و خاصة المستوردة منها زى البروتون

و بالتالى لو استنيت سعر العربية هيزيد

طيب ليه الدولا ر هيطلع:

1- توقف موارد الدولار من السياحة و هى من اهم مصاردر العملة الاجنبية لمصر
2- توقف تحويلات العاملين بدولة لبيا
3- احتياطى الدولار لدى البنك المركزى فى انخفاض مستمر و قد خسرنا منه على مدار اخر 3 شهور اكتر من 5 مليار دولار
4- من المتوقع لجوء بعض المستثمرين الى التحكيم الدولى و الحصول على تعويضات ضخمة مقابل فسخ بعض التعاقدات مع الدولة و الذى سيترتب عليه تعويضات دولارية ضخمة تستنفذ جزء من احتياطيات الدولار لدى الدولة
5- استرداد الاموال المنهوبة عملية تحتاج لسنوات و غير مضمونة 100%

موضوع الغاء و او خفض الجمارك متوقع على المدى البعيد لا يعقل ان الحكومة تكون لديها ازمة فى الموارد و تلغى الجمارك بكره الصبح طيب حتجيب منين


انا مش بخوفكم بس الاقتصاد عبارة عن دورات فوق و تحت و انشاء الله بلدنا تعدى الازمة و يرجع الجنيه يشد تانى بس على ما يشد هتكون اسعار العربيات غليت

ده تحليلى المتواضع
نصيحة اشترى و اتوكل على الله و بعدين كده كده الجين سعر اعادة بيعها لا يعتبر ميزة فى صالحها لو بتفكر فى سعر اعادة البيع اشترى لانسر بومة او صنى او النترا

بس طبعا جينا افضل من وجهى نظرى و كمان جينا سعرها رخيص نسبيا و حتى لو عند اعادة اليبع بعد 5 سنوات جابت 50 % من تمنها حتكون الخسارة 45 الف و هىما ممكن تخسرهم فى السيراتو ( ملكة السوق) فى نفس المدة او اقل ( تشتريها مثلا ب 120 لو بنفس كماليات جينا و بعد خمس سنين تجيب 75 يعنى خسارة 37% اى 7% سنويا)

[Ra2ouf]

الى كل زميل عايز يشترى عربية و متردد ده تحليلى الشخصى المتواضع :

سعر الدولار هيطلع يعنى هيطلع و ياثر بالزيادة على اسعار كل السلع بما فيها السيارات و خاصة المستوردة منها زى البروتون

و بالتالى لو استنيت سعر العربية هيزيد

طيب ليه الدولا ر هيطلع:

1- توقف موارد الدولار من السياحة و هى من اهم مصاردر العملة الاجنبية لمصر
2- توقف تحويلات العاملين بدولة لبيا
3- احتياطى الدولار لدى البنك المركزى فى انخفاض مستمر و قد خسرنا منه على مدار اخر 3 شهور اكتر من 5 مليار دولار
4- من المتوقع لجوء بعض المستثمرين الى التحكيم الدولى و الحصول على تعويضات ضخمة مقابل فسخ بعض التعاقدات مع الدولة و الذى سيترتب عليه تعويضات دولارية ضخمة تستنفذ جزء من احتياطيات الدولار لدى الدولة
5- استرداد الاموال المنهوبة عملية تحتاج لسنوات و غير مضمونة 100%

موضوع الغاء و او خفض الجمارك متوقع على المدى البعيد لا يعقل ان الحكومة تكون لديها ازمة فى الموارد و تلغى الجمارك بكره الصبح طيب حتجيب منين


انا مش بخوفكم بس الاقتصاد عبارة عن دورات فوق و تحت و ان شاء الله بلدنا تعدى الازمة و يرجع الجنيه يشد تانى بس على ما يشد هتكون اسعار العربيات غليت

ده تحليلى المتواضع
نصيحة اشترى و اتوكل على الله و بعدين كده كده الجين سعر اعادة بيعها لا يعتبر ميزة فى صالحها لو بتفكر فى سعر اعادة البيع اشترى لانسر بومة او صنى او النترا

بس طبعا جينا افضل من وجهى نظرى و كمان جينا سعرها رخيص نسبيا و حتى لو عند اعادة اليبع بعد 5 سنوات جابت 50 % من تمنها حتكون الخسارة 45 الف و هىما ممكن تخسرهم فى السيراتو ( ملكة السوق) فى نفس المدة او اقل ( تشتريها مثلا ب 120 لو بنفس كماليات جينا و بعد خمس سنين تجيب 75 يعنى خسارة 37% اى 7% سنويا)

بقى دة بردو تحليل متواضع ؟ أمال لو مكنش متواضع .... كان هيبقى عامل أزاى ؟
أحيك على المشاركة الرائعة دى

[hashad14]

يا باشا حال البلد وحش وفى ازمه بس البلد حتكون كويسه من عوامل خارجيه وداخليه والكيان المصرى الاقتصادى قوى بس كان مسكها شويه جهله وحرميه بس بالنسبه لشراء السياره انت كده كده حتجيب عربيه زيرو حتخليها معاك فى حدود 5 سنوات على الاقل فى الحاله دى انا شايف انك تشترى احسن وحاو ل وانت راكن العربيه تكون فى حته امان وتشترى كل وسائل اللى ضد السرقه عشان تبقى عامل اللى عليك وخليها على الله وتوكل انت فى خلال الخمس سنين حتكون الدنيا غير الدنيا تماما للاوحش او للاحسن الله اعلم فتوكل على الله واشترى انت لو قلت استنى كل شويه عشان حاجه حصلت فى البلد يبقى عمرك محتشترى عربيه فى حياتك
وفى حد ياجل شراء عربيه عشان انفاونزا الخنزير ؟

[graffittiii]

ومين له نفس يشتري عربيات ؟؟؟ صدقني يباشا مش هتبقي مبسوط طول م البلد مش مضبوطة والحياة مش زقططة ...
ربنا يعدي الأيام ويطلعنا منها علي خير ..

قال الله تعالي في الحديث القدسي لا تسبو الضهر فأنا الضهر
يعني بلاش ايام سودة وسنة منيلة والكلام ده
وربنا يصلحلك الحال بأحسن عربية

الدهر ياسيدي الفاضل وليس الضهر ..

[Ra2ouf]

يا باشا حال البلد وحش وفى ازمه بس البلد حتكون كويسه من عوامل خارجيه وداخليه والكيان المصرى الاقتصادى قوى بس كان مسكها شويه جهله وحرميه بس بالنسبه لشراء السياره انت كده كده حتجيب عربيه زيرو حتخليها معاك فى حدود 5 سنوات على الاقل فى الحاله دى انا شايف انك تشترى احسن وحاو ل وانت راكن العربيه تكون فى حته امان وتشترى كل وسائل اللى ضد السرقه عشان تبقى عامل اللى عليك وخليها على الله وتوكل انت فى خلال الخمس سنين حتكون الدنيا غير الدنيا تماما للاوحش او للاحسن الله اعلم فتوكل على الله واشترى انت لو قلت استنى كل شويه عشان حاجه حصلت فى البلد يبقى عمرك محتشترى عربيه فى حياتك
وفى حد ياجل شراء عربيه عشان انفاونزا الخنزير ؟

أنفلونزا الخنازير لو حضرتك تفتكر عملت رعب لكل المصريين لأن وسائل الأعلام ضخمتة أوى أوى و أديتة حجم أكبر من حجمة الحقيقى .....
كنا متخيلين أن دة وباء و هيقضى علينا و الموضوع دة أثر على شغل ناس كتير للأسف أنا كنت منهم فأجلت فكرة شرا العربية .

[waeljimmy]

هاتها وخلص نفسك بجد والله وديتها 250 أو 300 جنيه في الشهر جراش ممكن يكون كتير بس على الأقل هتتطمن شويه عليها ولو حتى الأيام دي
أنا من رأيي الفلوس معاك هتخلص فحطها في عربيه إنت مقتنع بيها وخلاص وهو فعلا إحنا مش عارفين آخرتها مع الدولار إيه شويه ينزل وشويه يطلع وأمريكا الله يحرقها عماله تضخ مليارات الدولارات لحد ماحنا نفسنا مبقاش لينا قيمه

توكل على الله

[ayman_83]

اتكل علي الله وهاتها دلوقتي احسن من بعدين علي الاقل وانت فيها اماااان عن المواصلات وهتريحك وان شاء الله البلد مش هيحصل فيها اكتر من اللي حصل وبعدين هتقول ياريتني اشتريتها من زمان