إعـــــــلان

Collapse

.

,
See more
See less

حكايتي مع الساجا (تقرير بعد 1000 كيلو)

Collapse
X
 
  • Filter
  • الوقت
  • Show
Clear All
new posts

  • حكايتي مع الساجا (تقرير بعد 1000 كيلو)

    السلام عليكم
    أخيرا كملت الف كيلو و عملت الصيانة وجربت الكيك داون و حاجات كتير عاوز أحكيلكم عليها....
    لكن نرجع للوراء من أول الحكاية....

    كان يا ما كان، أخوكم كان مهندس كهربا غلبان، و كان عنده دايو ماتيز جابها مستعملة من زمان، و كتر خيرها شالته لحد ما فتحت بقها و جابتله جنان، و رجله وجعته من السواقة المانيوال في زحمة الميدان، فقرر يبيعها و يستلف من فلان، و يكمل عليها و يجيب عربية أوتوماتيك يا مان.


    فضلت سنة أذاكر كل أنواع العربيات اللي في السوق و كان اختياري الأول متسوبيشي لانسر لكنها كانت غالية أوي عليا (حوالي 120000) فاضطريت أنزل و أفكر في الإلنترا لكنها مفرقتش كتير، و بعد كده كنت مقتنع أوي أوي بالنيسان صني خصوصا إمكانياتها و أنها ياباني مع سعرها (حوالي 92000) لكن بعد الثورة الشغل نام و الفلوس مبقتش مضمونة فمكانش عندي غير اختيارين لا ثالث لهما: إما هيونداي فيرنا أو بروتون ساجا. من غير رغي كتير - قول ارغي - الفيرنا منتشرة و قطع غيارها عند كل بتوع الخضار و البقالين بيعرفوا يشتغلوا فيها لكن كلام الناس عنها و خصوصا أصدقائي ممن لهم تجربة قفلني منها تماما فقلت أتوكل على الله و أشتري الساجا. و دي القصة كاملة للي عاوز يستزيد من التاريخ http://www.nilemotors.net/Nile/217441-a.html

    و ده تقرير مبدأي بعد ما استلمتها علطول http://www.nilemotors.net/Nile/218806-a.html

    أما الآن مع التقرير بعد ألف كيلو:

    الشكل الخارجي
    سيارة غير متكلفة. أنيقة بدون بهرجة. خطوطها بسيطة. نظرة الفوانيس ترى فيها التحدي. الشبكة الرياضية و الجنوط الألومنيوم تضفي طابع رياضي عليها لكنها حقيقة سيارة عائلية أكثر منها رياضية. لكنها برضه تنفع رياضية شوية.

    الصالون و الشنطة
    العربية واسعة من جوه. الجلوس على الكرسي الأمامي مريح و عند إرجاع الكرسي للآخر يجلس 3 أشخاص على الكنبة مستريحين جدا بالنسبة للطول لكن العرض ضيق شوية. كرسي السائق بيعلى و يوطى. نور الصالون قوي. مساحات التخزين متوسطة. ارتفاع عجلة القيادة قابل للتغيير. فتحة الكهرباء مكانها ممكن يضايق لو حاطط فيها حاجة و كمان حاطط كانز. التابلوه خاماته جيدة بالنسبة لسعر العربية. العدادات شكلها جميل جدا جدا خصوصا بالليل. فيه عداد سرعة و آر بي إم و عداد رحلات ديجيتال و عداد حرارة ديجيتال و عداد بنزين ديجيتال و عداد حرارة ديجيتال. الكاسيت صوته حلو أوي و أربع سماعات عاملين شغل جامد لكنه بعيد شوية عن يد السائق. فرامل اليد في المتناول و كذلك الفتيس. الشنطة واسعة بس مش أوي لكنها مرضية بالنسبة لي. الأبواب بتفتح حوالي 80 درجة و ده ميزته في سهولة الدخول و الخروج و عيبه لو حد جاي مش واخد باله ممكن يشيلك الباب.

    الرؤية و التحكم
    أبعاد العربية ملمومة و الرؤية ممتازة للأمام و الوراء من خلال المرايات الجانبية التي يمكن التحكم فيها كهربائيا. أما مرآة الصالون مش عاجباني أوي لأن البعد البؤري بتاعها مش مريحني و مش عريضة فمش بتجيب كل حاجة لكن دي حلها سهل. السائق يجلس على كرسي القيادة متحكم تماما بمنتهى السهولة. الhandling من تصميم شركة لوتس و الصراحة ممتاز. الباور تقيل شوية مش أوي و ده مش حلو أوي داخل المدينة و في الركن لكن على سرعة 160كم/س أوعى الثبات الرهيب المهيب العجيب. العربية راسية و تقبلة على الأرض في السرعات متخوفش.

    العفشة و العزل
    أول ما تركب العربية و تمشي بيها تحس أن العفشة ناشفة و أنك حاسس بكل المطبات، لكن العربية ماسكة نفسها جدا. العفشة صحيح ناشفة شوية لكن مع التعود و كمان مع الاستعمال لما العفشة تلين هتحس بتحسن كبير. ده برضه حلو أوي في السرعات لأنها عفشة رياضية و ده بيعمل ثبات عالي. لكن في المدينة و المطبات العفشة اللينة أريح. لكن في النهاية أنا مش تعبان منها بالعكس حاسس أنها عربية مريحة. العزل بتاعها أقل من جيد إلى جيد. الأصوات الخارجية معظمها بيروح لما تقفل الشبابيك و تحس بهدوء مش بطال. لكن العزل من تحت مش عاجبني لأني لما أمشي على تراب بسمع كل ذرة من التراب و هو بيخبط في العربية من تحت.

    التكييف
    التكييف ممتاز و بيسقع بسرعة أوي و هادي. لكن أنا كنت متعود في عربيات تانية على أن الكمبريسور يفضل شغال كتير لحد ما يفصل. لكن ده بيشتغل و يفصل كتير و دي حاجة مضايقاني شوية.

    الموتور و آلات الجر و الفرامل
    الموتور 1300 سي سي 94 حصان كام برو و الفتيس بتاع لانسر كريستالة 99. الموتور لما تشغله هادي جدا و ناعم. لما تسوق سواقة هادية يفضل هادي و حنين و السحب ممتاز. لكن لما تزود عليه شوية زي ما يكون النمر اللي على علامة بروتون صحي و فاق. العربية تحس أنها بقت عربية تانية خالص. بتشد حلو بس أنا مجربتش أشد مع حد. لما كنت ماشي على 30 قلت أجرب الكيك داون، لقيت الآر بي إم على 6.5 و فجأة بقيت ماشي على 80 و طالع بسرعة و صوت الموتور جامد طحن. أنا خفت من سرعة التطور فشلت رجلي علطول و كمان خفت على العربية علشان لسة جديدة. كمان كنت على طريق السخنة قلت أجرب السرعة، جبت 160 بمنتهى السهولة و لسة العربية عاوزة تجري أكتر لكن برضه خفت على العربية و محبيتش أزود. الفتيس نقلاته تحس بيها شوية لكن استخدامه سهل و سلس. الأوتوماتيك لو عرفت تتحكم فيه صح هتعرف تتحكم في النقلات و الانطلاق من الثبات. التكييف بيأثر شوية صغيرة على السحب وده طبيعي لكن ما يضايقش خالص. حوض الموتور واسع و تحسه منظم. الفرامل عادية جدا (ناقصها بس الإيه بي إس) مختبرتهاش جامد لكنها كويسة.

    البنزين
    استهلاك البنزين عالي عن الموجود في الإعلانات. العربية بتعمل 9.5 كيلو في اللتر داخل المدينة و 13 كيلو في اللتر على الطريق و يعتمد على طريقة القيادة و تشغيل التكييف. لكن ده زي استهلاك شاهين 2002 1400 سي سي مانيوال. تنك البنزين 40 لتر و هو صغير شوية و كان أحسن لو بقى 50 لتر. ده هيخليك تدخل البنزينة مرات أكتر. عربيتي الماتيز كانت بتعمل 16 كيلو في اللتر داخل المدينة و 20 كيلو على الطريق علشان كده أنا حاسس بالفرق. لكن القوة اللي بتحس بيها في المحرك بتخليني مش متضايق من حكاية البنزين.

    الكماليات
    أهمهم البارك سنسور بيخليني أركن و أنا مطمن جدا. الجنوط الومنيوم شيك. راديو سي دي أوديو بس. 2 زجاج كهرباء أمامي. فوجات أمامية و خلفية جميلة جدا و دايما بشغلهم علشان النور ميجيش في وش اللي قدامي. فتح الشنطة و التنك من الداخل. تعديل ارتفاع عجلة القيادة. تعديل ارتفاع كرسي السائق. إيرباج للسائق. عدادات رياضية و ديجيتال و ساعة. شبكة أمامية رياضية. مرايات كهربا. نور للصالون و الشنطة. اموبليزر و ده حاجة تطمن الواحد خصوصا في الأيام دي. فانوس فرامل فوق الكنبة. باور. سنتر لوك. ريموت و إنذار. أربع سماعات.

    صيانة الألف
    رحت مركز عصام و صفا و قابلت المهندس عصام (معندوش بروتون، عنده مرسيدس.. ياللا على قده) و هو راجل محترم و طلع جرب العربية بنفسه و كان مستمع جيد. غيروا الزيت و فلتر الزيت و ربطوا العربية و حتى كان عندي ورق لازق على الإزاز من أيام الاستلام شالوه كتر خيرهم و كان عندي صوت صفارة خفيف في المشي عالجوه. و اتكلفت 165 جنيه (أرخص من التوكيل) و العملية كلها أخدت 40 دقيقة و رحت من غير حجز يوم السبت 8:45 الصبح قبل ما يفتح.


    خلاصة الكلام
    العربية سعرها 72500 و إمكانياتها تنافس عربيات ب90000. مريحة في الركوب و آمنة و التحكم عالي أثناء القيادة. سحبها ممتاز و 94 حصان عربي أصيل أبيض. هادية مع الهدوء و شرسة مع العنف. استهلاك بنزين فوق المتوسط. كماليات كثيرة. شكل جذاب. أوتوماتيك مريح. تكييف ممتاز. عالية عن الأرض. تحس أنها بتاعتك من زمان أول ما تركبها. ماندمتش أبدا على أني اخترتها. أنصح بيها اللي عاوز يشتري عربية في الفئة السعرية من 70000 إلى 80000

    و توتة توتة خلصت الحدوتة... حلوة ولا ملتوتة؟؟؟؟
    https://t.me/pump_upp

  • #2
    انا اخاف اتكلم لحسن ابوظ التقرير كل اللي ها اقوله اني قدمت طلب تثبيت للموضوع عشان يفيد الإخوة اللي بيفكروا يشتروا يكون موضوع زي ده هادي وجايب لهم من الآخر كل حاجة من العربية ..
    طيب لو سألتك العربية دي من وجهة نظرك ناقصها ايه !! كنت بسأل السؤا لده لكل شخص حايب العربية دي ورسنا في الآخر لحد اهم حاجتين !!
    مسند للقدم اليسرى عشان هيا اوتو محتاجة مسند !!! + مسند ايد بين السواق والراكب الأيمن وكان يفضل لو كان زي بتاع الفيرنا ملتصق بالكرسي .. غير كده اعتقد العربية بسم الله ما شاء الله مش ناقصها حاجات والحاجات اللي انا قلتها دي نسبية من وجهة نظري :d
    الف مبروكي يا فندم على صيانة الأف وعقبال الـ 100 الف ان شاء الله يا فندم
    [CENTER][rmade]http://i94.photobucket.com/albums/l108/sayed911/alex-1.jpg[/rmade]
    [SIZE=3][B]To Follow me on Twitter "Sayed_K_H[/B][/SIZE]
    [/CENTER]

    Comment


    • #3
      ربنا يباركلك فى عربيتك اسلوبك جميل فى العرض
      [COLOR="Indigo"][CENTER]مكنة ماليزى.......[/CENTER][/COLOR]

      [CENTER][img2]http://1.bp.blogspot.com/_SNkWnLsVgus/R6v-l0vcQHI/AAAAAAAAAcY/Q23HsQ9nFEM/s320/Waja_CPS_Preview_1.JPG[/img2][/CENTER]

      Comment


      • #4
        المشاركة الأصلية كتبت بواسطة sayed911 مشاهدة المشاركة
        انا اخاف اتكلم لحسن ابوظ التقرير كل اللي ها اقوله اني قدمت طلب تثبيت للموضوع عشان يفيد الإخوة اللي بيفكروا يشتروا يكون موضوع زي ده هادي وجايب لهم من الآخر كل حاجة من العربية ..
        طيب لو سألتك العربية دي من وجهة نظرك ناقصها ايه !! كنت بسأل السؤا لده لكل شخص حايب العربية دي ورسنا في الآخر لحد اهم حاجتين !!
        مسند للقدم اليسرى عشان هيا اوتو محتاجة مسند !!! + مسند ايد بين السواق والراكب الأيمن وكان يفضل لو كان زي بتاع الفيرنا ملتصق بالكرسي .. غير كده اعتقد العربية بسم الله ما شاء الله مش ناقصها حاجات والحاجات اللي انا قلتها دي نسبية من وجهة نظري :d
        الف مبروكي يا فندم على صيانة الأف وعقبال الـ 100 الف ان شاء الله يا فندم
        متشكر على الكلام الجميل ده يا سيد باشا. أنا كتبت التقرير علشان أفيد الناس اللي عاوزة تعرف رأي مجرب. أنا استفدت كتير من رأي الناس قبل ما أشتري العربية و جه الوقت علشان أكون إيجابي و أفيد الناس أنا كمان. أنا من رأيي أنها بسعرها ده مش ممكن يضاف لها قشة، لكن أنا شايف اللي ناقص فرامل إيه بي إس و أنا معاك في مسند القدم و مسند اليد.
        الله يبارك فيك و عقبالك.


        المشاركة الأصلية كتبت بواسطة midosalah مشاهدة المشاركة
        ربنا يباركلك فى عربيتك اسلوبك جميل فى العرض
        متشكر على ذوقك يا فندم و ربنا يرزقك بالعربية اللي نفسك فيها
        https://t.me/pump_upp

        Comment


        • #5
          احمد
          انت عملت مرجع للعربيه كل الناس اللي بتفكر تشتري العربيه ديه لازم يرجعله
          عشان مش هيبقي فيه سؤال عن العربيه ديه ومش هيلاقي اجابته
          المرجع بتاعك حقيقي لازم يترجم عشان الناس كلها تستفاد بيه جوه مصر وبره المحروسه
          بس عايز اضيف حاجه
          سيد كان بيسال نفسه نفس السوال اللي بساله لنفسي
          العربيه ديه ناقصها ايه
          اقوله ناقصها كمان الزجاج الخلفي يبقي كهربا
          بس انتو عارفين
          لو رجع بي الزمن تاني ماكنتش هلاقي عربيه في حدود المبلغ ده لغايه 90000 كمان احسن من الساجا وكنت بردو هاخترها
          ربنا يباركلك في عربيتك
          [FONT="Arial Black"][CENTER]محمد سعيد[/CENTER][/FONT]

          Comment


          • #6
            المشاركة الأصلية كتبت بواسطة mememsaid مشاهدة المشاركة
            احمد
            انت عملت مرجع للعربيه كل الناس اللي بتفكر تشتري العربيه ديه لازم يرجعله
            عشان مش هيبقي فيه سؤال عن العربيه ديه ومش هيلاقي اجابته
            المرجع بتاعك حقيقي لازم يترجم عشان الناس كلها تستفاد بيه جوه مصر وبره المحروسه
            بس عايز اضيف حاجه
            سيد كان بيسال نفسه نفس السوال اللي بساله لنفسي
            العربيه ديه ناقصها ايه
            اقوله ناقصها كمان الزجاج الخلفي يبقي كهربا
            بس انتو عارفين
            لو رجع بي الزمن تاني ماكنتش هلاقي عربيه في حدود المبلغ ده لغايه 90000 كمان احسن من الساجا وكنت بردو هاخترها
            ربنا يباركلك في عربيتك
            الله يكرمك يا محمد. و الله بتحرجني بذوقك.
            أنت نبهتني لحاجة كمان ممكن تكون ناقصة و هي قفل الزجاج اوتوماتيك مع قفل السنتر لأني كل مره أبطل العربية و الزجاج مفتوح أضطر أدور الكونتاكت تاني علشان أقفل الزجاج.
            فعلا هي عربية محترمة و سعرها معقول. ربنا يحفظلك عربيك من كل شر.
            https://t.me/pump_upp

            Comment


            • #7
              تسلم ايدك على التقرير و الله انت شجعتنى أغير العربية و ربنا يباركلك فيها و يكفيك شر الطريق
              [B][FONT=Times New Roman][SIZE=3][COLOR=blue]السلام عليكم و رحمة الله و بركاتة[/COLOR][/SIZE][/FONT][/B]
              [B][FONT=Times New Roman][SIZE=3][COLOR=blue][/COLOR][/SIZE][/FONT][/B]
              [B][FONT=Times New Roman][SIZE=3][COLOR=blue] علاء سعيد[/COLOR][/SIZE][/FONT][/B]

              Comment


              • #8
                ما شاء الله تقرير اكثر من رائع

                ربنا يبارك لك فيها

                [justify][CENTER][IMG]http://a4.sphotos.ak.fbcdn.net/hphotos-ak-ash4/218070_1900970253805_1528143011_32044969_2322091_n.jpg[/IMG]
                [/CENTER]
                [/justify]

                [CENTER]
                [/CENTER]

                Comment


                • #9
                  المشاركة الأصلية كتبت بواسطة amazingahmed مشاهدة المشاركة
                  الله يكرمك يا محمد. و الله بتحرجني بذوقك.
                  أنت نبهتني لحاجة كمان ممكن تكون ناقصة و هي قفل الزجاج اوتوماتيك مع قفل السنتر لأني كل مره أبطل العربية و الزجاج مفتوح أضطر أدور الكونتاكت تاني علشان أقفل الزجاج.
                  فعلا هي عربية محترمة و سعرها معقول. ربنا يحفظلك عربيك من كل شر.
                  والله عندك حق
                  هي عايزه شويه حاجات كدا عشان تبقي زي ال bmw بالظبط
                  وبردو الحاجات اللي عايزاها ديه في الاول وفي الاخر كماليات
                  [FONT="Arial Black"][CENTER]محمد سعيد[/CENTER][/FONT]

                  Comment


                  • #10
                    الف مبروك ع الصيانة والف شكر ع التقرير الرائع
                    [CENTER][shr71=http://img230.imageshack.us/img230/7454/gen2mainext02.jpg]Gen Lovely 2[/shr71][/CENTER]

                    [CENTER][SIZE=3][COLOR=purple][COLOR=black][COLOR=black][COLOR=blue][COLOR=black][COLOR=slategray]♥[/COLOR] [/COLOR]G[/COLOR][COLOR=darkred]e[/COLOR]n [COLOR=darkred]2[/COLOR] [COLOR=blue]A[/COLOR]st[COLOR=darkred]o[/COLOR]ni[COLOR=darkred]s[/COLOR]hin[COLOR=blue]g[/COLOR]ly St[COLOR=darkred]y[/COLOR]lis[/COLOR][COLOR=blue]h [/COLOR] [/COLOR][/COLOR][/SIZE][/CENTER]

                    Comment


                    • #11
                      المشاركة الأصلية كتبت بواسطة alaasaid مشاهدة المشاركة
                      تسلم ايدك على التقرير و الله انت شجعتنى أغير العربية و ربنا يباركلك فيها و يكفيك شر الطريق
                      متشكر و ربنا يرزقك بعربية تفرحك

                      المشاركة الأصلية كتبت بواسطة amatoallah مشاهدة المشاركة
                      ما شاء الله تقرير اكثر من رائع

                      ربنا يبارك لك فيها

                      متشكر و ربنا يباركلك يا أستاذة

                      المشاركة الأصلية كتبت بواسطة nistelrooy مشاهدة المشاركة
                      الف مبروك ع الصيانة والف شكر ع التقرير الرائع
                      الله يبارك فيك. أي خدمة.
                      https://t.me/pump_upp

                      Comment


                      • #12
                        مبروك يا هندسة اول الف كيلو و عقبال لما توصل بيها لاكتر من 300 الف

                        و احييك علي اسلوبك اللي كل لما اقرا موضوع ليك يخليني اقتنع اكتر بالساجا علي وجه الاخص و البروتون عموما كماركة يعتمد عليها

                        و احب اقولك اننا زمايل حضرتك مهندس كهربا و العبد لله برده بس دفعة 2007 اتمني تصير بيننا صداقة و لو احتجت اي حاجة راسلني علي الخاص وقت ما تحب

                        اخوك احمد

                        Comment


                        • #13
                          موضوع جميل و عرض أجمل .... هوه ده شغل المهندسين ..... الله ينور ........
                          كنت بفكر جديا أجيبها لأختي .... بس في آخر لحظة غيرت رأيي و أخدنا لانوس عشان لما تحصل معاها مشاكل نلاقي اللي يعرف يحلها في المنيا .....
                          لكن العربية جميلة و كانت اختاري لو كنت هجيب لنفسي .....
                          بس ليه الغلاسة بتاعة البابين اللي ورا دي !!!!! ليه مش كهربا .... هتفرق كام مع الشركة يعني ؟ بيعملوا زي منصور ليه بس ..
                          [mshosh2]http://www.4shared.com/photo/lCkSz74F/morsee.html[/mshosh2]

                          Comment


                          • #14
                            موضوع متميز جدااااااااااا بارك الله فيك اخى الكريم
                            [rmade]http://www3.0zz0.com/2011/08/06/16/245952301.jpg[/rmade] [frame="1 80"]((اللهم لك الحمد ولك الشكر كما ينبغى لجلال وجهك وعظيم سلطانك ))[/frame]

                            Comment


                            • #15
                              الف مبروك و ربنا يباركلك فيها ان شاء الله......و فعلا موضوع رائع و اسلوب متميز جدا جدا.
                              بس كان عندى استفسارات هامة.....انا مهندسة برده واستلمت سيارتى الساجا الاتوماتيك بعد حضرتك باسبوع تقريبا و متفقة مع حضرتك فى جميع المميزات و العيوب البسيطة و خصوصا موضوع عزل الصوت السفلى ده.
                              السيارة عاملة 800 كيلو و مقبلة على صيانة الالف كيلوان شاء الله....فهل تنصحنى بمركز عصام و صفا لأنه قريب منى ولا لازم توكيل الصحراوى لختم الضمان؟ لأنهم فى عز العرب قالو لى لازم الألف تبقى فى الصحراوى؟ وهل ممكن اشترى الزيت و اخده معايا فى الصيانة؟ و ما نوع الزيت الافضل بغض النظر عن السعر؟ كانت هناك ملاحظة عندى ان السيارة على السرعات الأولى سحبها بطىء شوية اما فى السرعات الأعلى سحبها جيد....فهل هما متعمدين تاخير كهرباء السيارة قليلا فى السرعات الأولى و سوف تضبط فى صيانة الألف كيلو؟
                              ما الفرق الذى شعرت به فى السيارة بعد صيانة الألف كيلو؟ هل هناك فرق فى السحب؟ هل تنصحنى عدم تشغيل التكييف اطلاقا الا بعد صيانة الألف و اذا شغلته فهل يوجد حد اقصى فى الوقت؟
                              واخيرا هل يوجد خطورة على cd الساجا اذا نسخت سى ديهات audio بنفسى لأن مرة هنج معايا شوية فقلقت و لا العيب فى جودة الcd نفسه؟
                              اتمنى الافادة و شكرا جزيلا

                              Comment

                              Working...
                              X