استفسار ضرورى

[zego]

لو سمحتم يا جماعة عايز اعرف ازاى احسب استهلاك البنزين فى العربية وهى البيرسونا اليجانس 2011 وحاسس ان دي مش عربية دا عاملة زى الكولدير بتاع المياه بتشرب البنزين شرب والعربية عاملة 3700 وطبعا لضيق الوقت مش عارف اعمل تقرير او اكتب حتى بس ان شاء الله هاعمل كل حاجة

[sayed911]

بعد صيانة الـ 5 الاف ها يتحسن يا فندم صدقني حتى كان عندي في الساجا عالي جدا وبعد كده اتزبط جدا ولله الحمد ... والطريقة اعتقد ها انتظر الأستاذ محمد عبد المجيد محترف في الموضوع ده افضل مني بصراحة ..

[spiderloking]

ان شاء الله هيتحسن كل فتره بعد الصيانات و ده بشهادة ناس كتير

[eng.m7md.ali]

هقولك حاجة
العربية مظبوطة على 95 علشان كدة بتشرب كتير
لما تروح التوكيل قولهم تتظبط على 92 لاني كان عندي المشكلة دي من اول ماجبت الواجا لحاد من حوالي اسبوعين كدة واتظبطت في عصام الصفا

[tornado_5m]

متقلقش خالص انا معايا جين 2010 واول ماجبتها لقيتها سفاحه بس بعد ال15 كيلو بزبط هتلقيها زبطة

[zego]

بشكركم يا جماعة بس انا حطيت مرة 95 لاقيتها برده بتشد لدرجة ان انا قربت اكره العربية كل ما امشى مشوار الا قى المؤشر بينزل تحركاتى متوسطة يعنى التانك موجود فى العداد اربع شرط يعنى اربع ارباع يادوب كل يوم برع وشوية ولاما باشغل التكييف ما بتستهلكش قد ياما باكون طافيه
انا مع واحد قريبي السيراتو بقالها سنة اهو بنزينها مالهش حل استهلاكها فى البزين ما يجيش حاجة خالص جمب دي ومع العلم انى بركبها من اول ما جات

[prohossam]

بالنسبة لاستهلاك البنزين فهو المفروض بيتضبط بعد صيانة الـ 1000 كيلو او الـ 5 الاف
ياريت تقولي من فضلك متوسط الاستهلاك كام لتر من العداد بيبقى ظاهر قدامك
بالمناسبة لما بتحط 95 استهلاك البنزين بيبقى اسرع .. من انك تحط 92

[eng.m7md.ali]

اقصد ان الكونترول مزبوط على ال 95
او اقولك حاجة احسن
لو رحت مركز عصام الصفا قولهم وطيلي ال rpm وصدقني هتفرق معاك لاني كنت بعاني من المشكلة دي كتير اوي في الواجا بتاعتي

[mazen234]

نفس المشكله عندي بالظبط سفااااااحه فعلا ورايح يوم الاحد عشان اشوف الحكايه دي ان شاء الله عشان روحت مركز عصام وصفا فعلا حولها علي بنزين 92 بس مفيش اي فرق غير ان سحب العربيه قل بس وملحوظه انا عامل 7000 كيلو دلوقتي الناس كانت برضه بتقولي بعد ال 5000 الاف كيلو هيتظبط بس مفيش امل واضح كده
وحسبت استهلاك البنزين كانت بتستهلك ل 50 كيلو 9 لتر وبعد ما اتحولت بقت 7 لتر يعني وبالنسبه للموشر بتاع الاستهلاك بيظهرلي ان الاستهلاك 11 وساعات 10.8 وبالتكييف 14 او 15
بس اللي لاحظته بقي لو انا واقف مثلا ومش بتحرك بالعربيه ومشغل التكييف الاستهلاك بيعلي لحد مايوصل ل 20 !!!!!!!
التفويله عندي كامله بتمشيني في الاول كانت 220 ودلوقتي بقت 240 ل 250

[tutankhamoun]

طريقة حساب الأستهلاك سهلة جدا بس محتاجة تركيز و دقة .
أولا لازم تعدي فترة التليين الأول .......... و بعدين الأستهلاك هايظبط بعدها أو عند 5000 كم .

=======
طريقة الحساب :
أولا تمون أربع مرات متتالية من بنزينة واحدة و ياريت من مكنة واحدة في هذه البنزينة .
ثانيا عند علامة الربع ............ فول ..... و لغاية من البنزين تشوفه بعينك على زور التانك .
أحسب أنت مونت كام لتر بالظبط .
و بعدين تمشي لغاية الربع (ربع التانك يعني )
ترجع نفس البنزينة و يا حبذا لو كان نفس المكنة .... و تمون تاني بنفس الطريقة .
و بعدين تشوف العربية مشيت كام كم ........... و تقسم عدد الكيومترات اللي قطعتها على عدد اللترات اللي وضعته في المرة التانية ....... هايطلعلك تقريبا معدل الأستهلاك .
و تكرر العملية أربع مرات للتأكد من معدل الأستهلاك .


مثال :
المرة الأولى ....... العداد كان مثلا 2500 كم ........ و مستوى البنزين وصل الربع .
ووضعت مثلا 30 لتر بنزين .
و المرة التانية للتموين بعد ما التانك وصل الربع و العداد عامل مثلا 3000 كم .
ووضعت في المرة التانية مثلا 30 لتر أيضا

يبقى 3000 - 2500 = 500 كم مقطوع بين التفويلة الأولى و التانية
و تقسم 500 كم ÷ 30 لتر = 16 كم - لتر .

طبعا أنت صعب توصل للرقم ده في بداية التليين و له شروط ممكن فعلا توصله في الحقيقة بس بعد التليين و عند تطبيق الشروط .

================
شروط هامة جدا لتوفير الأستهلاك في مواتير الكامبرو في سيارات بروتون :
رجلك تكون خفيفة على البنزين .... ما تبقاش مستعجل ....... و تقوم بالعربية واحدة واحدة .
عداد سرعة الموتور يجب ألا يزيد عن 2500 لفة - دقيقة طوال الوقت .
مفيش داعي و أنت داخل على مطب أنك تضغط بنزين و تعمل تعجيل و بعدين تفرمل و تقف (حرقت بنزين على الفاضي)
لما يكون الهوا معاكس ......... ما تحاولش تضغط على الموتور للوصول لسرعات عالية (بتضاعف الأستهلاك )
لما تكون طالع مطلع ........ نفس مبدأ الهوا المعاكس .

السرعة المثالية 80 إلى 90 كم - س .
و الأستهلاك المثالي ......... حوالي 13 كم لكل لتر ... يعني 10 لتر = 130 كم و ممكن أكتر و حسب سواقتك و ظروف السواقة نفسها و ممكن طبعا توصل لأرقام أكبر من كدا لو أنت هادي في السواقة (تجربة عملية )

و ما تقلقلش من الأستهلاك دلوقتي .......... أحكم عليه بعد 5000 كم و بعد التليين

[zego]

والله انا ما حطيتش ال 95 الا مرة واحدة وبيتهيأ لى مافيش فرق
والرقم اللى مكتوب فى العداد هو 8 وحاجة بيتهيأ لى ده الاستهلاك مثلا طب 8 ده 8 لتر لكل كام كيلو
ولاما باكون مشغل التكييف عشان العربية تسحب من سرعة 40 كدا لغاية 100 لازم ادوس بنزين شوية عشان تسحب طب ده ليه
والسرعة من 100 لغاية 120 وال 120 مش على طول
وشكرا جدا لطريقة الاستخدام وهحاول اعملها
واستفسار هل ياما اجى امون افول للأخر والا احط مثلا بمبلغ وبعدين لاما يخس احط بملغ برده

[tutankhamoun]

والله انا ما حطيتش ال 95 الا مرة واحدة وبيتهيأ لى مافيش فرق
والرقم اللى مكتوب فى العداد هو 8 وحاجة بيتهيأ لى ده الاستهلاك مثلا طب 8 ده 8 لتر لكل كام كيلو

8 لكل 100 كم و ده رقم تقريبي لا يعتمد عليه علشان ده بيعطي معدل الأستهلاك حسب دوسة رجلك على البنزين مش معدل الأستهلاك العام .

ولاما باكون مشغل التكييف عشان العربية تسحب من سرعة 40 كدا لغاية 100 لازم ادوس بنزين شوية عشان تسحب طب ده ليه

لأن التكييف متوصل بالموتور ... على سير بيدور دائرة الكباس ..... فده بيعمل سحب من الأحصنة اللي خارجة من الموتور حوالي 3 إلى 5 حصان لتدوير الكباس .
والسرعة من 100 لغاية 120 وال 120 مش على طول

حضرتك برضه لسة في التليين .......في الطبيعي
العربية من 80 لغاية 170 ....... بمنتهى السهولة ..
وشكرا جدا لطريقة الاستخدام وهحاول اعملها
واستفسار هل ياما اجى امون افول للأخر والا احط مثلا بمبلغ وبعدين لاما يخس احط بملغ برده

لما تفول ....... فول للأخر ....... و بعدين أوصل للربع .......... و تفول تاني للآخر علشان تعرف الأستهلاك كان كام .

بس مينفعش تعمل الطريقة دلوقتي علشان التليين .......
في التليين الأستهلاك بيكون أعلى شوية من الطبيعي

[zego]

الف شكر يا باشا بس العربية عدت ال 4000 كيلو هل استنى لغاية 5000 وبعدها هيتظبط
طب ايه الحكمة فكدا والعربية للأسف ما بتنجزنيش الا لاما ادوس جامد وال rpm يعلى

[tutankhamoun]

الف شكر يا باشا بس العربية عدت ال 4000 كيلو هل استنى لغاية 5000 وبعدها هيتظبط

لا ممكن تبدأ تحسب من دلوقتي ... لا مؤخذة ما أخدتش باللي من الرقم

طب ايه الحكمة فكدا والعربية للأسف ما بتنجزنيش الا لاما ادوس جامد وال rpm يعلى

طيب أنت بتكون ماشي بسرعة كام و الأر بي أم على كام ؟ و لما بتدوس الأرب بي أم بيوصل كام علشان توصل لسرعة أيه ؟

و أنت مانوال و لا أتو ؟

[zego]

العربية ياما بادوس من غير ما اقرص بتوصل ال100 وشوية لغاية rpm 3 انما مع التكييف بحس ان من عند سرعة 40 العربية مش راضيىة تنطق فبدوس فبيوصل ال 3 وشوية على السرعة البطيئة و
العربية اتوماتيك
وانا مش عايز اعمل حاجة فى توكيل الغد اللى فى المنصورة لان بصراحة طلعوا ناس مش محترمين بالمرة وان شاء الله هحكى القصة بتاعة الشراء والقصة النصب اللى عملوها عليا بس شوية وقت بس وان شاء الله هحكى كل حاجة بالتفصيل ونصيحتى لاى حد لو عايز العربية اتعب وحاتها من عز العرب او لو هتجيب من عند الغد صحصح لهم كويس وفى الصيانات لازم تكون مفتح عينيك 360 درجة
طب هو انا لو روحت عز العرب اروح الفرع اللى فين وهل هما بيظبطوا حاجة عشان استهلاك البنزين والا بيعملوا ايه
وكان حصل مشكلة فكلمتهم ولاقيت مهندس محترم اسمه احمد عبدالحميد ومهندس أمر فهل اكلم دول عشان ياما ابقى اروح والا احجز على رقم خاص بالحجز وهل لو هاروح يظبطوا استهلاك البنزين وضبط وزوايا وتشييك لها رسوم والا ايه اللى بالرسوم واللى مجانا
ياريت كل واحد يفيدنى لان ممكن كل واحد طريقته تكون مختلفة عن حد تانى
واخيرا اصبح بيروتونى ان شاء الله للأبد بس اذا الواحد نفسيته ارتاحت من ناحية العربية ومشاكلها