مساعدة في قطع غيار الجين 2

[eletr]

ان شاء الله هشتري عربية في حدود 65
و انا بحب الجين 2 اوي بس فيه نلس خوفوني من قطع غيارها علشان عز العرب هو الوكيل
ياريت اللي معاه جين 2 يقولي قطع الغيار عاملة ايه معاه و العربية بصفة عامة ايه نظامها
و اسعار الفوانيس مثلا لو حد يعرف

[tamerosman]

لو العربية بره الضمان مفيش اى مشكلة و مش هتتحوج لعز العرب نهائى و قطع الغيار و بدائلها موجودة خارج التوكيل باسعار مش رخيصة بس معقولة

لو العربية فى الضمان ممكن تروح لعز العرب متلاقيش قطع الغيار متوفرة خصوصا لو هتغيير على حساب الضمان و تحجزها و تستنى اكتر من شهر لغاية ما عز العرب يوفرها او تروح تشتريها من بره و تدفع من جيبك

الفوانيس مش غالية فى التوكيل الخلفى :حوالى 380 - الامامى حوالى 980
Proton Fast Moving Spare Parts Prices - updated March, 2011 | Facebook

الاجزاء الغالية تيل الفرامل الاصلى : 880 جنيه فى التوكيل و وله بدائل بره متجربه و تمام من اول 150 جنيه
لغاية 400 و بلية الشداد برضه غالية معدية الالف فى التوكيل يعنى فى حاجات مبالغ فيها و فى حاجات اسعارها زى الكورى

فلتر زيت اللانسر بيركب على الجين 2 وكذلك المساعدين و الردياتير بتوع اللانسر و طلمبة بنزين النوبيرا و تيل فرامل الفيات بترا


بره التوكيل فى فوانيس معدلة ليدات و عدسات تحفة و اسعارها برضه معقولة عند محل مكة فى شارع دمشق و روح هناك و خد فكرة عن اسعار قطع الغيار و سيبك خالص من التوكيل

[eletr]

متشكر جدا لردك الوافي انا استفدت منك كتير

[eletr]

كنت عايز اعرف حاجة تانية
تسارع الجين 2 حلو ولا لا و السرعة اللي ممكن تجيبها و راي الشباب فيها
و هي احسن ولا اللانسر ولا الماتريكس

[tutankhamoun]

قطع الغيار فيه منها الغالي و فيه منها الرخيص و لكن خارج التوكيل
الأصلي متوفر خصوصا القطع الأستهلاكية اللي مش متوفر مش هاتحتاجه إلا كل فترات كبيرة و ممكن تلاقيه في الحرفيين .

فوانيس أصلي ... حوالي 1000 للفانوس بموتوره
فانوس تايواني .... 250 جنيه من غير موتور .
تيل فرامل من التوكيل 250 جنيه أمامي و خلفي تقريبا 200 جنيه
تيل فرامل من خارج التوكيل من 100 إلى 300 جنيه حسب النوع و الماركة .

أكصدام خارج التوكيل تقريبا 300 جنيه و داخل التوكيل 900 جنيه (طبعا فيه فرق في الخامة
و فيه حاجات تانية ممكنما تلاقيهاش و تنتظر لما تيجي من برة و لكن أغلبها حاجات غير أستهلاكية (يعني حاجة ما توقفش العربية عن العمل

[eletr]

الفتيس الاوتوماتيك فيه مشاكل ولا لا ؟
و فيه فرق في الموديلات ؟ من 2006 لـ 2010
و ايه افضل موديل ؟

[tutankhamoun]

الفتيس الاوتوماتيك فيه مشاكل ولا لا ؟
و فيه فرق في الموديلات ؟ من 2006 لـ 2010
و ايه افضل موديل ؟

الحمد لله العربية كلها مفيهاش مشاكل و لا موتور و لا فتيس .
بالنسبة للفروق بين الموديلات :
من 2006 لغاية 2008 بالنسبة للأوتوماتيك الفروق كالتالي
فيهم مثبت سرعة و أتشال على 2009 و تم أستبداله بسبويلر و أصبح الأسبويلر أساسي في العربية .

من 2009 لغاية 2011
الموتور أنعم .... أستجابته أفضل على السرعات القليلة و الموتور أهدى .

الموتور القديم فيه زئير لذيذ ...... و أستجابته على السرعاات العالية رائعة .

فيه فروق تانية في الشكل .... الشكل الأمامي في الشبكة فيه تغيير طفيف .

التابلوه من 2006 و لغاية 2008 مفيهومش درج تابلوه و لكن فيهم رف تضع عليه أشياءك

من 2009 و لغاية 2011 تم أستبدال الرف بدرج

الرف طبعا كان شكله أحلى بكتير و لكنه لم يكن عملي
و الناس أشتكت لبروتون ......... فبروتون غيرت الرف بدرج يقفل و يفتح (شكل عادي ) بس عملي .


طبعا لما تيجي تشتري ........... أكشف في التوكيل أو عصام صفا

[eletr]

متشكر ليك
بس التوكيل فين و هيخد كام و مين عصام صفا و مكانوا فين ؟

[Mustafa_Farouk]

متشكر ليك
بس التوكيل فين و هيخد كام و مين عصام صفا و مكانوا فين ؟

السلام عليكم ،
عصام صفا دة مركز معتمد من عز العرب ومكان في مصر الجديدة في النزهة الجديدة عند السندباد وأرقامو: 0100460111/0100460222/0100460333. وبيفتح كل يوم ماعدة يوم الجمعة.

توكيل بروتون موجود عند أبو رواش قبل بوابة الصحرواي وعند سمارت.