مركز عصام وصفا ناس محترمه و بتفهم ربنا يبارك فيهم

[ahmed_h_g]

السلام عليكم ورحمة الله وبركاته
الحكايه وبأختصار حصل حاجه غريبه معايا فى الويرا بعد تنضيف البوابه
بس المشكله من عندى وأنا معترف بكده
بعد ما نضفت بوابة الهواء روحت عامل ناصح وشايل فيشة البوابه وركبتها تانى علشان الكنترول يتعرف عليها من جديد والعربيه دايره
عملت معايا دربكه
الrpm بقى ثابت على 1200
العربيه بتبرجل لما تسخن والrpm بيفضل يطلع وينزل على 400 و 500 والعربيه عالسلانسيه كأنها هتبطل
المهم أنا عارف أن أى واحد عنده جهاز أعطال تكلفة الكشف بيه عالعربيه 75ج
روحت النهرده لمركز عصام وصفا وركب الجهاز فى العربيه لقيت موضوع الفيشه اللى أتشالت من البوابه مديه error للكنترول وكذا error بالشكل ده من حساس الهواء وكام حاجه تانيين
المهم حل المشكله ومسح كل الأخطاء وقاللى جرب العربيه
جربت العربيه لقيت الموضوع أتعدل والعربيه بقت تمام
قلتله التكلفه كام قاللى هحسبهالك مصنعيه نصف ساعه يعنى 55ج
قلت تمام التمام
بعد ما دفعت وأنا ماشى راح منادى عليه المهندس عصام على ما أعتقد قاللى هات الفاتوره
راح واخد الفاتوره وراح مدينى ال55 بتوعى وقاللى تمام كده أحنا معملناش حاجه تستاهل
أخدت بعضى ومشيت
الموضوع مش موضوع فلوس ... لا المعامله المحترمه من ناس محترمه أهم حاجه
شكرا" مركز عصام وصفا .

[ormangy]

ايه يا جماعة ده .. هو في كده في مصر :) :) :) ???

[Nistelrooy]

فعــلاً, ناس محترمة جداً ,, وخصوصا المهندس عصام .. ربنا يبارك لهم :)

[eng.m7md.ali]

راح واخد الفاتوره وراح مدينى ال55 بتوعى وقاللى تمام كده أحنا معملناش حاجه تستاهل

الراجل ده مش هيتغير ابدا

دايما يعمل الحركة دي

بجد ربنا يباركله راجل محترم جدا

[kondor]

لازم كلنا ندعم الناس ده علشان تستمر سواء بشكل مادى(نعمل صيانه عندهم) او معنوى

[Osama.shihata]

ماشاء الله
الناس دول بصراحة كل يوم بيزيده احتراما لشغلهم وادابهم

[dr-mohamed]

اديني رايح لهم اعمل صيانة الاربعين الف للبرسونا لما نشوف هايعملوا معانا ايه

[waleedfesal]

المهندس عصام دا راجل فى قمة الاحترام
انا بسافر من دمياط مخصوص عشان اعمل الصيانه فى مركز الصفا

[Ahmed.Ali]

مش غريب علي المهندس عصام انا بروحله من 6 اكتوبر بعربيتي و بعربيه بابا البرسونا مخصوص مع ان التوكيل جنبي لاكن المعامله الروعه تهون اي مشوار

[أبومعاذ]

أنا أخر مرة غصبت عليه عشان أدفع فلوس :)

[Nistelrooy]

انا اخر مرة عملي خصم 30% علي صيانة 20000 .. بجد ناس محترمة وهاروح لهم علشان اركب التيل هناك رغم اني معظم الايام في توكيل العجوزة بيني وبينهم لما اكون هناك دقيقة مشي بس برضوا .. الي عصام صفا :)

[ABDULLAH AHMED]

هوا مش ممكن يعمل الصيانة لعربيات هيونداي :p
انا بعدي من قدامه كل يوم تقريبا وانا راجع في النزهة
وانا بفكر جديا اني اقنع اخويا بشراء بروتون عشان نتعامل مع الناس الطيبة دي
--- يا ريت لو حد يعرف شكل الجين 2 حيتغير ولا لسه ؟

[Nistelrooy]

هوا مش ممكن يعمل الصيانة لعربيات هيونداي :p
انا بعدي من قدامه كل يوم تقريبا وانا راجع في النزهة
وانا بفكر جديا اني اقنع اخويا بشراء بروتون عشان نتعامل مع الناس الطيبة دي
--- يا ريت لو حد يعرف شكل الجين 2 حيتغير ولا لسه ؟

لية لاء :)
علي فكرة انا دايما الاقي ناس عندة غالبا اصدقاء بيعملوا عندة عربيات بتاعتهم هههه مش شرط بروتون :)
بس بيعملوا حاجات بسيطة مثلا يركب تيل حاجات كدا مش صيانات يعني .

[mohamed289]

اسف بس سؤال هوا مركز عصام و صفا عنوانه ايه؟

[Nistelrooy]

----------------
: العنـوان :

قطعه 25 شـارع د. طـه حسين -النزهه الجديده- القاهـره


: للحجز والأستعــلام :

0100 460 111 ,- 0100 460 222 , - 0100 460 333






منقول من ايمن