كارتيره زيت الموتور

[abdoumahros]

السلام عليكم
الحمد لله علي كل شئ . النهارده لقيت بقعه زيت تحت عربيتي الساجا روحت للميكانيكي قالي في شرخ رفيع في كارتيره زيت الموتور ونصحني اني الحم الشرخ ده وفعلا لحمته فهل عمليه اللحام دي صح ولا ده حل مؤقت واللحام ممكن يفك؟
وياتري سعر كارتيره الزيت الجديده في التوكيل بكام وموجوده بره التوكيل ولالا؟
واسف للاطاله وشكرا

[Abdelrahman.H]

كرتيرة الزيت ب 1800 في التوكيل ... و من 1000 : 1400 إستيراد

من تجربة سابقة لأحد ملاك العربية ... إتشرخت عنده الكارتيرة وراح لحمها ... وبعدين كان مسافر على الصحراوي و نتيجة لسخونة الزيت داخل الموتور أثناء التشغيل و لإختلاف معامل تمدد المعدن الأصلي للكارتيرة و المعدن المستخدم في اللحام ... حدث تمدد و إنكماش و الشرخ فتح تاني وهو سايق و الزيت نزل كله و ماأخدش باله غير بعد ما الموتور قفش ....

نصيحة لوجه الله ... هاتها جديدة و ريح دماغك

[emadmostafa77]

نفس المشكلة دية كانت عندى سببها ان عامل الصيانة فى التوكيل ركب طبة الزيت غلط وربط عليها بقوة و الطبة حديد و الكرتيرة من الالمونيوم و حصل فيها شرخ و طبعا التوكيل قال دية مش مشكلتهم و سعرها حوالى 1800 فى الاستيراد1400 لكن انا بمساعدة الميكانيكى حليت المشكلة بحوالى 250 جنية و رجعت زى الاصلى و لاى معلومات رقمى 01223496290

[mido_soliman]

نفس المشكلة دية كانت عندى سببها ان عامل الصيانة فى التوكيل ركب طبة الزيت غلط وربط عليها بقوة و الطبة حديد و الكرتيرة من الالمونيوم و حصل فيها شرخ و طبعا التوكيل قال دية مش مشكلتهم و سعرها حوالى 1800 فى الاستيراد1400 لكن انا بمساعدة الميكانيكى حليت المشكلة بحوالى 250 جنية و رجعت زى الاصلى و لاى معلومات رقمى 01223496290

طب ما تقول عملت اية على العام مش لازم كل واحد عايز يعرف يكلمك على فكرة
المنتدى لتبادل المعلومات والافادة

[abdoumahros]

الحمد لله

اولا اشكر جميع الزملاء علي الرد
عموما انا عملت الاتي:
روحت للميكانيكي فك الكرتيره ولقي شرخ رفيع وكمان السن بتاع الطبه بايظ وطبعا ده حصل اثناء تغيير الزيت وبعدين الميكانيكي راح بيها لواحد لحم الشرخ وعمل توسيع لفتحه الطبه وركب طبه جديده اكبر شويه بسيطه ووضع تحتها وردتين نحاس
اللحام كلف 55 جنيه والميكانيكي 70 جنيه ( طبعا فرق التكلفه عن الزميل عماد ان الشرخ عنده كان اكبر من اللي عندي حسب وصفه ليا في التليفون ) وطبعا تم تغيير الزيت والفلتر
ملحوظه : انا غيرت الفلتر لان الزيت اللي كان فيها اصلا توتال 10000 ولما غيرت الزيت استخدمت توتال 3000 لحد مااتاكد ان اللحام نجح
ارجو اني اكون وضحت كل حاجه
شكرا