اجابه السؤال اللى ملوش اجابه "استخدم زيت ايه للموتور؟"

[Europian]

انا عارف ان موضوع اختيار زيت الموتور ده دوخ ناس كتير وانا كنت اولهم لحد ما قررت انى اختار الزيت بناءا على اساس علمى يمكن اوصل لحاجه.
عشان كده بعد لف و تنطيط بين مواقع واماكن بيع زيوت المواتير عملت بحث صغير كده على قدى عشان اقدر اوصل للاختيار الاص لزيت الموتور وحبيت انقل لحضراتكو شويه المعلومات والاراء البسيطه ده يمكن تساعد حد منكو وده عرفانا بجميل كل اعضاء منتدى نايل موتورز عليا
اولا فى شويه مفاهيم كده لازم نعرفها ونفهمها علشان نقدر نختار صح
كل الزيوت دلوقتى بقت قويه جدا ومستخدم فيها تكنولوجيا عاليه جدا علشان تقدر تغطى متطلبات الموتور من تنظيف وتشحيم تحت ظروف التشغيل المختلفه اللى اهمها درجات الحراره والفروق بين الزيوت ما بقتش كبيره قوى بس بقت فروق صغيره لكن جوهريه من حيث الجوده
هخش على طول فى الموضوع لحسن الناس تنام منى
الزيوت يااما زيت معدنى او نصف تخليقى او تخليقى بلكامل والفرق بينهم هو ال base-oil type او بالبلدى كده نوع الزيت اللى بستخدمه وبحط عليه الاضافات الكيميائيه علشان يطلع المنتج النهائى
تصنيف الزيوت على اساس ال base-oil type :
1- الزيوت المعدنيه : ده بيبقى ال base-oil type طبيعى من مشتقات البترول وده بيستخدم غالبا لكيلومترات اقل من الانواع اللى جايه (راى شخصى مش برشح استخدامه فى المواتير الجديده)
2- الزيوت النصف تخليقيه : وده بيبقى ال base-oil type ميكس بين الطبيعى والمخلق (راى شخصى مش برشح استخدامه فى المواتير الجديده)
3- الزيوت التخليقيه بالكامل : وده هو اللى يهمنا (راى شخصى) وده مخلق بالكامل فمراعى فيه كل احتياجات الموتور
تصنيف الزيوت على اساس viscosity Grades :
الزيت يا اما ليه درجه لزوجه واحده وده معناه ان لزوجه الزيت تختلف باختلاف درجه الحراره وغير ملائم للتقلب فلى درجات الحراره لذلك سوف نستخدم زيت لفصل الشتاء واخر لفصل الصيف وانا مش هتكلم فيه بالتفصيل لان استخدامه اصبح غير شائع او غير مستخدم على الاطلاق

اما الزيوت الاكثر تعقيدا والاكثر تكنولوجيا والاكثر شيوعا حاليا هى الزيوت مزدوجه معامل اللزوجه )يعنى ليها معاملين لزوجه واحد لفصل الصيف او لدرجات الحراره المنخفضه وواحد لفصل الصيف او لدرجات الحراره المرتفعه) يعنى اكن الزيت عباره عن خليط من زيتين كل واحد فيهم ليه لزوجه مختلفه وده بيتم عن طريقه اضافه البوليمرز للزيت وده اللى بيتحكم فى لزوجه الزيت ويغيرها حسب درجه الحراره

مش عارف ايه الرغى الكتير ده بس نيجى للمهم بقى .............نختار زيت ايه للموتور؟
اجابه السؤال ده انك تفهم نقطتين صغيرين اوى وهما
1- ايه هو ال SAE ؟ 2- ايه هو ال API ؟
SAE(Socity of Automotive Engineers):
ده بقى مقياس معامل لزوجه الزيت وليس له اى علاقه بجوده الزيت او اى خواص تانيه ليه غير اللزوجه
عشان نفهمه من غير رغى كتير هندى مثال
اى علبه زيت هتلاقى مكتوب عليها الكود ده على سبيل المثال SAE 10W-40
ده معناه ايه بقى؟
SAE عرفنا ايه هو (مقياس تحديد اللزوجه)
10W ده معناه درجه لزوجه الزيت فى فصل الشتاء (درجات الحراره المنخفضه) (W تعنى winter شتاء) وكل ما الرقم ده يزيدمعنا ان لزوجه الزيت زياده وان الزيت بيحافظ على لزوجته فى درجات حراره منخفضه والعكس صحيح
40 ده معناه درجه لزوجه الزيت فى فصل الصيف (درجات حراره عاليه) وكل ما يزيد الرقم ده ترتفع لزوجه الزيت وان الزيت بيحافظ على لزوجته لدرجات حراره عاليه والعكس صحيح
ملحوظه مهمه جدا: كل ما زادت لزوجه الزيت كل ما يطول عمر الموتور لانه بيقلل احتكاك اجزاء الموتور ببعضها وفى نفس الوقت بيكتف حركه الموتور لان لزوجته عاليه فابتقاوم حركه الموتور وفى نفس الوقت بيزود استهلاك الوقود ( كل ده بدرجه نسبيه طبعا تكاد تكون مش ملحوظه)

يبقى علشان نختار الزيت المناسب للموتور بتاعنا لازم نختار اولا SAE اللى قايل عليه كتالوج عربيتك

API (American Petroleum Institute):
وده اللى بيحدد درجه جوده الزيت ونوع المواتير اللى يصلح معاها اذا كانت بنزين ولا ديزل
هنفهم بردو بمثال
هتلاقى مكتوب على علبه الزيت مثلا API SL/CF
API عرفنا ايه هو
SL ال S (service) يعنى العربيات اللى بتستخدم بنزين و ال L ده اللى بيوضح مدى جوده الزيت وكل ما الحرف ده بيبقى متقدم فى الحروف الهجائيه الانجليزيه كل كا كانت جوده الزيت اعلى
يعنى مثلا SM اكثر جوده من SL (SM معناها ان الزيت ده بيستخدم للعربيات اللى بتشتغل بالبنزين ودرجه الجوده بتاعته M)
CF ال C معناها (Commercial) العربيات التجاريه اللى بتستخدم الديزل وال F ده تدل على جوده الزيت بلنسبه لمواتير الديزل زى ما قلناها قبل كد
بعد ما اخترنا ال SAE بناءا على متطلبات مصنع السياره من الكتالوج يبقى مش فاضل غير انى اختار الزيت الاكثر جوده من حيث ال API
ال API لمعظم الزيوت المستخدمه حاليا تتراوح بين API SL/CF الى API SN/CF وطبعا الاكثر جوده هو SN/CF
ونا جمعت شويه بيانات عن بعض الزيوت (مش كل الزيوت طبعا بس شويه كده من الزيوت اللى انا بثق فيهم وده راى شخصى طبعا ممكن ناس كتير تختلف معايا بس) وده عباره عن البياتات الرسميه للزيوت من شركتها يمكن تسهل عليكم الاختيار شويه

بس طبعا المرجع الوحيد عشان اختار صح هو ال SAE اللى قايل عليه كتالوج العربيه وبعدين الحد الادنى لل API اللى مسموح نستخدمه للموتور من كتالوج العربيه

1- ....L:
· Helix HX6: (SAE 10W-40)(API SM/CF)
· Helix HX7: (SAE 10W-40)(API SN/CF)
· Helix HX8: (SAE 5W-40)(API SM/CF)
· Helix Ultra: (SAE 5W-30) (API SN/CF), (SAE 5W-40) (API SN/CF)
· Helix Ultra Racing: (SAE 10W-60) (API SN/CF)

2- Castrol:
· Castrol Edge: (SAE 5W-40) (API SL/CF)
· Castro Edge Sport: (SAE 10W-60) (API SM/CF)

3- Valvoline:
· Synpower: (SAE 5W-40) (API SM/CF)
· Maxlife: (SAE 10W-40) (API SL/CF)
· VR1 Racing: (SAE 10W-60) (API SL/CF)

4- Mobil 1:
· Mobil 1 New Life: (SAE 0W-40) (API SM/CF)
· Mobil 1 ESP Formula: (SAE 5W-30) (API SM/CF)
· Mobil 1 Peak life: (SAE 5W-50) (API SN/CF)

5- Liqui Moly:
· SuperLeichtlauf: (SAE 10W-40) (API SL/CF)
· Synpower High Tech: (SAE 5W-40) (API SM/CF)
· Synpower Race Tech GT1: (SAE 10W-60) (API SL/CF)

ارجو انى اكون قدرت اساعد اى حد من حضراتكو وانا اسف جدا لو طولت عليكم وتحت امركم فى اى استفسار اقدر اجاوب عليه على قد معرفتى المحدوده واللى مش هعرف اجاوب عليه يبقى ادينا فتحنا باب للمعرفه قدام بعض علشان ندور ونعرف

[m_marmoush]

مشكووور جدا و ربنا يجعلة فى ميزانك

[ahmed_h_g]

الله ينور عليك

[Europian]

الله ينور عليك

وعليك يا باشا

[Europian]

مشكووور جدا و ربنا يجعلة فى ميزانك

لا شكر على واجب واحنا دايما فى خدمه بعض

[MoHamdy]

موضوع رائع وشامل..... مشكور على المجهود

[Europian]

موضوع رائع وشامل..... مشكور على المجهود

متشكر جدا وده اقل حاجه اقدمها للمنتدى الجميل ده

[ahmedsrs]

شكرا على الموضوع

[Europian]

Leichtlauf High Tech
: (SAE 5W-40) (API SN/CF)

[Raul_7]

ألف شكر على مجهودك.

[momo_h]

شكرا على الموضوع الرائع ده بس انا عايز اعرف حاجة طبقا للكلام ده ايه هو احسن زيت في اللزوجة بصفة عامة بغض النظر عن نوع العربية او كتالوجها بيقول ايه؟
في الانواع المكتوبة هيبقى Helix Ultra Racing: (SAE 10W-60) (API SN/CF)
صح كده ولا ايه ؟

[Europian]

شكرا على الموضوع الرائع ده بس انا عايز اعرف حاجة طبقا للكلام ده ايه هو احسن زيت في اللزوجة بصفة عامة بغض النظر عن نوع العربية او كتالوجها بيقول ايه؟
في الانواع المكتوبة هيبقى Helix Ultra Racing: (SAE 10W-60) (API SN/CF)
صح كده ولا ايه ؟

Helix Ultra racing هو من اعلى الزيوت جوده فى مصر لانه API SN وهو من اعلى الزيوت لزوجه SAE 10W-60 وده رينج لزوجه عالى اوى ممكن يكون مش متوافق مع موتور حضرتك ولو متوافق مع متطلبات موتورك يببقى فعلا الزيت ده من اقوى الزيوت فى مصر
يعنى اقصد ممكن يكون زيت قوى جدا لمواتير بس ممكن يبقى سىء جدا لمواتير اخرى

[mesaharaty]

مشكووووووووووور على المجهود الرائع

[hany63]

معلش سؤال فيه ناس حطت ليكوي مولي ولاحظت زياده في سحب العربيه عن الاول معنى كده انهم حطوا زيت لزوجته اقل و ممكن الموتور يتأثر بعد شويه؟
وانهي زيت يحتفظ بدرجه لزوجته اكتر في الصباح الباكر شتاء 5w ولا 10w؟
وكنت حطيت موبيل 1 في صيانة ال20000 في التوكيل وبعدها العربيه اتكتفت ياترى السحب هايرجع تاني بعد ما امشي شويه بالزيت؟
وشكرا لحضرتك

[Europian]

معلش سؤال فيه ناس حطت ليكوي مولي ولاحظت زياده في سحب العربيه عن الاول معنى كده انهم حطوا زيت لزوجته اقل و ممكن الموتور يتأثر بعد شويه؟
وانهي زيت يحتفظ بدرجه لزوجته اكتر في الصباح الباكر شتاء 5w ولا 10w؟
وكنت حطيت موبيل 1 في صيانة ال20000 في التوكيل وبعدها العربيه اتكتفت ياترى السحب هايرجع تاني بعد ما امشي شويه بالزيت؟
وشكرا لحضرتك

اولا زيوت ليكوىمولى من الزيوت اللى الناس بتشكر فيها ومعظم اللى بيستخدمه بيستخدم 5w40 وممكن فعلا يحس بفرق بسيط فى السحب لو كان بيستخدم مثلا 20w50 ده بلاضافه ان زيوت ليكوى مولى مشهودلها بلتكنولوجيا الالمانيه العاليه فى اضافات الزيت
بلنسبه لسؤال حضرتك التانى المفروض ان 5w يحتفظ بلزوجته اكتر فى درجات الحراره المنخفضه بس ده طبعا مش هتحس بيه غير فى المناطق القطبيه لان الفروق بينهم مش هتبان غير عند درجات حراره اقل من -18
بلنسبه لزيت موبيل مش هقدر اعرف العربيه اتكتفت ليه من غير ما اعرف الزيت القديم والجديد بس عموما العربيه هتفك انشاء الله شويه مع الاستخدام
تقبل تحياتى