دردشه بخصوص أرتفاع أو أنخفاض درجة حرارة محرك الويرا أو أى سياره

[ahmed_h_g]

السلام عليكم ورحمة الله وبركاته
دردشه بخصوص أرتفاع أو أنخفاض درجة حرارة محرك الويرا أو أى سياره
الأول لازم تعرف تشخص العيب

لازم تجاوب على الأسئله لنفسك وتترجمها فى عقلك هتلاقى العيب قصاد عينيك

1- العربيه بتاخد معاك وقت صغير ولا كبير على ما تسخن معاك الصبح
2- لو بتاخد معاك وقت طويل أنت شايل ترموستات الكوعه ؟ وشايله ليه ؟
3- لو بتسخن معاك فى وقت قصير هل المروحه بتشتغل بعد وقت قصير جدا" بعد تسخين المحرك صباحا" ؟
4- هل تم تفريغ مياه الردياتير وتغييرها بدون سحب الهواء من دائرة التبريد ؟
5- هل تم تغيير الردياتير وبعدها ظهرت المشكله ؟
6- هل وش السلندر حصل فيه شغل قبل كده وهل راكب 2 جوان فوق بعض ؟
7- هل المشكله ظهرت بعد عمل شغل فى الموتور( عمره أو نصف عمره) أو بعد معالجة أو تغيير وش السلندر ؟
8- هل المشكله ظهرت بعد لحام معين فى الشكمان تسبب فى كتم الشكمان ؟
9- هل المشكله ظهرت بعد تغيير ترموستات الكوعه أو ترموستات المروحه ؟
10- أخر مره غسلت فيها الردياتير كان فيه صدأ ؟
11- مياه التبريد بتنقص معاك بسبب تسرب فى الدايره ؟
12- هل المشكله ظهرت بعد أستعمال نوع زيت موتور معين ؟

لو محصلش عندك مشكله فى الموتور قبل كده أو محصلش شغل فى العربيه قبل كده وشايف أن المشكله من دائرة التبريد يبقى برضه لازم تسأل نفسك كام سؤال

أولا" لو العربيه بتبرد زياده عن اللزوم
أت شايل ترموستات الكوعه ؟ وشايله ليه ؟
أنت عارف أن ترموستات الكوعه مهم جدا" للموتور
والموتور من غير ترموستات كوعه عمره بيقل بدرى لأسباب كتيره
ده غير أستهلاك البنزين هيزيد وصوت الموتور هيعلى وهيظهر معاك فى الأر بى أم و هيقل سحب العربيه والصبح هتاخد وقت كبير معاك على ما تسخن وطبعا" كل ده على حساب البنزين وأسباب تانيه هتلاقيها فى منتدى بروتون ماليزيا أو هنا فى القسم التعليمى

ثانيا" لو العربيه بتسخن معاك زياده عن اللزوم
لو مروحة الردياتير شغاله تمام وأتأكدت منها ومن ترموستاتها
أول حاجه تعملها تغسل الردياتير من الخارج بضغط مياه شديد وتتأكد من لزوجه زيت الموتور وكفأته
لو مفيش تغيير أغسل دورة التبريد من الداخل بمزيل صدأ ومتنساش تسحب الهواء من الدايره بعد تغيير المياه
لو برضه مفيش تغيير والمروحه بتشتغل كتير يبقى تشيل ترموستات الكوعه وتسحب الهواء وتجرب
لو الحراره بقت تمام والمروحه بتشتغل فى توقيتها المظبوط يبقى مشكلتك كانت فى ترموستات الكوعه غيره بترموستات أصلى
لو برضه مفيش تغيير يبقى تكشف على طلمبة المياه ثم الكشف على الردياتير (أنسداد بسبب الصدأ)
لو عملت كل ده وبرضه شاكك فى دورة المياه ومفيش تغيير يبقى تغير الردياتير

لو غيرت الردياتير وبرضه الموتور بيسخن تبقى شخصت العيب غلط يا معلم والعيب عندك مش من دايرة التبريد
العيب عندك فى مشكله فى الموتور
علشان كده لازم تقرأ الأسئله اللى فوق وتترجمها فى دماغك صح علشان متفضلش تصرف فلوس من غير ما تعرف العيب فين
لازم تعرف التاكيهات مظبوطه ولا لأ – الشكمان مكتوم ولا لأ – حصل مشكله فى وش السلندر قبل كده وبعدها ظهر العيب ولا من قبل والعيب موجود وهكذا

بالنسبه لملاك الويرا الكرام
صوره بتوضح رنج الحراره المسموح للموتور
بالنسبه لموديل 99 و 2000 الرنج المسموح من الشرطه التانيه و المروحه بتشتغل بعد الشرطه التانيه ب 1مم وبعد ما المروحه بتبرد وتفصل يرجع المؤشر على الشرطه التانيه بالظبط

بالنسبه للموديلات الأحدث لغاية موديل 2006
الحراره الطبيعيه للموتور فى النصف بين الشرطه التانيه والتالته
المروحه بتشتغل لما المؤشر يوصل للشرطه التالته
ولما تبرد يرجع المؤشر لللنصف بين الشرطه التانيه والتالته
وطبعا" شرطة الصفر اللى واقف عليها المؤشر مش محسوبه

ده المكان الى تسحب منه الهواء لملاك الويرا


الصوره بحجمها الطبيعى

أفضل طريقه تسحب بيها الهواء
يبقى الموتور بارد جدا" والعربيه تبقى مركونه على أرض مستويه
تفك غطاء الردياتير
وتفك مسمار سحب الهواء
وأنت بتفك المسمار تبقى ماسك المسمار بايدك الشمال وماسك زجاجه المياه بايدك اليمين
علشان لما تفك المسمار للأخر وأنت بتفكه فى نفس الوقت بتعوض الهواء الخارج من مكان المسمار بالمياه اللى بتعبيها من فتحة الردياتير

ولو حد عنه سؤال أنا موجود
ويارب يكون شرحى واضح وعلى الأقل تكون طلعت بمعلومه تفيدك والله المستعان .

[tutankhamoun]

أستاذ ............. يا أستاذ أحمد
الموضوع أكثر من رائع و شامل نقاط كثيرة مهمة
ربنا يباركلك يا شيخ و يجعله في ميزان حساناتك

[ahmed_h_g]

أستاذ ............. يا أستاذ أحمد
الموضوع أكثر من رائع و شامل نقاط كثيرة مهمة
ربنا يباركلك يا شيخ و يجعله في ميزان حساناتك

أستاذ توت صاحى بدرى ليه
ههههههه
ربنا يبارك فيك وشكرا" على مرورك

[yousefsemsem]

بعد اذنك استاذ احمد عاوز صورة كامله لحوض السياره بالموتور اذا سمحت

[ahmed_h_g]

بعد اذنك استاذ احمد عاوز صورة كامله لحوض السياره بالموتور اذا سمحت

[mahmoodallam]

عاجزين عن الشكر يا أ.احمد
انت بصراحة ما بتدنيش فرصة اني اسال حتى عن الحل
انت بتديني حل المشكلة اللي عندي
عربيتي يا استاذي بتبرد جدا وتقريبا كدا ترموستات الكوع متشال
اجيبه منين ؟ وبكام ؟

[yousefsemsem]

شكرا ياابو حميد ياجامد

[ahmed_h_g]

عاجزين عن الشكر يا أ.احمد
انت بصراحة ما بتدنيش فرصة اني اسال حتى عن الحل
انت بتديني حل المشكلة اللي عندي
عربيتي يا استاذي بتبرد جدا وتقريبا كدا ترموستات الكوع متشال
اجيبه منين ؟ وبكام ؟

هتلاقى اليابانى الأصلى عند محمد جابر فى شارع دمشق
قوله ترموستات كوعه لانسر البطه (القصير)
صوره لشكل الترموستات الطويل

صوره للترموستات القصير

تمنه حوالى 175ج علشان أصلى
خد بالك درجة حرارته 82 درجه سيلزيوس
متشتريش ال88

متنساش الترموستات القصير مش الطويل القصير مش الطويل
قولها 10 مرات علشان متنساش
علشان مالهوش مرتجع وهتلبس 175ج

[ahmed_h_g]

شكرا ياابو حميد ياجامد

شكرا" لمرورك وأهلا" بيك

[mahmoodallam]

شكرا يا أ.احمد

[abdohod]

موضوع جميل ولكن أضيف تجربتي مع الواجا ...كانت بتسخن مع تشغيل أي أنوار ثم ترجع الحرارة عادية بعد إطفاء الأنوار فورا .... وكان التشخيص الطبيعي لأي حد بيفهم هو أنه في أرضي ملمس إما في حوض العربية أو بداخل الصالون ... وبعضهم قال ريداتير ... وبعضهم قال شاشة عدادات .... وطبعا كتير قالوا ثرموستلت الكوعة .... والبعض قال جوان وش سلندر .... ولأني متأكد من سيارتي وبعد عذاب حوالي شهرين أقنعت الميكانيكي أنه يحل طلمبة المياه وكان رافض لأنها مابتسربش مياه إذن سليمة ولكن بعدما طلبت منه فكها كانت المفاجأة الكبرى ..... الطرمبة المفروض إن فيها عمود (أكس) ومثبت عليه ريش (بالضبط مثل ريش المروحة العادية) فوجدنا الأكس ولم نجد أي ريشة (المياه العادية أكلتها) وبالتالي أصبح العمود بيلف لوحده أي أنه لا يوجد تقليب في مياه السيارة أصلا فكانت الحرارة ............!!!!!!!!!!!!!

[yousefsemsem]

عاوز ابدل ياجماعه العدادات بعدادات اربي ام

[a_samy]

معلومات قيمه جداااااا
بارك الله فيك

[tamerosman]

موضوع جميل ولكن أضيف تجربتي مع الواجا ...كانت بتسخن مع تشغيل أي أنوار ثم ترجع الحرارة عادية بعد إطفاء الأنوار فورا .... وكان التشخيص الطبيعي لأي حد بيفهم هو أنه في أرضي ملمس إما في حوض العربية أو بداخل الصالون ... وبعضهم قال ريداتير ... وبعضهم قال شاشة عدادات .... وطبعا كتير قالوا ثرموستلت الكوعة .... والبعض قال جوان وش سلندر .... ولأني متأكد من سيارتي وبعد عذاب حوالي شهرين أقنعت الميكانيكي أنه يحل طلمبة المياه وكان رافض لأنها مابتسربش مياه إذن سليمة ولكن بعدما طلبت منه فكها كانت المفاجأة الكبرى ..... الطرمبة المفروض إن فيها عمود (أكس) ومثبت عليه ريش (بالضبط مثل ريش المروحة العادية) فوجدنا الأكس ولم نجد أي ريشة (المياه العادية أكلتها) وبالتالي أصبح العمود بيلف لوحده أي أنه لا يوجد تقليب في مياه السيارة أصلا فكانت الحرارة ............!!!!!!!!!!!!!

تشخيص مشكلة طلمبة المياه سهل جدا ، تفتح غطاء الردياتير ( طبعا و العربية باردة ) و لو لقيت الميه مش بتتحرك جوه الردياتير تبقى الطلمبة مش شغالة.

بس ايه علاقة مروحة طلمبة المياه بالانوار ؟ لو ريش المروحة مكسورة مش هتتأثر بالكهرباء ؟؟

[abdohod]

ما هو ده اللي كان هيجنني ولم أجد إلا تفسيرا واحدا لذلك وهو:
بما أن المياه لا تتحرك في دورتها العادية تجد المروحة تعمل بشكل شبه مستمر وبسرعتها القصوى ولكنك عندما تستخدم الأنوار ... يسحب هذا من سرعة دوران المروحة قليلا فتقل عملية التبريد والتي هي أصلا غير كافية لعدم دوران المياه الطبيعي وبالتالي يزداد درجة الحرارة ويرتفع المؤشر