حسبي الله ونعم الوكيل في إللي عمل في عربيتي كدة

[Eng.Osama.Afifi]

العربية نزلت لقيت واحد ربنا ياخده ويحرقه مسك مسمار وبهدلي الكبوت وجنب العربية ... مش مثلا حكة أو خربوش ... لاء ده كحت العربية كحت ... حسبي الله ونعم الوكيل فيه

بالله عليكم ياجماعة إللي يعرف حد يشيل الخرابيش ديه يقولي ... العربية جديدة لسة معملتش 2000 كيلو

ده أنا لسة مشلتش الأكياس بتاعة الكنبة !

ياريت حد يقولي على عنوان ورقم تلفون

حسبي الله ونعم الوكيل ... والله مش مسامحه ... ولو شوفته حموته والله !

[tamerosman]

جرب بوليش Sonax او Simonaz بيجى بلون العربية ، هتلاقى ازرق و اسود و احمر ، هيدارى الخرابيش على الاقل بنسبة 50%

النوع الاولانى معاه قلم ( عامل زى الالوان الشمع) بيغطى الخرابيش و بعدين تعمل بالبوليش عليه

موجودين فى بنزينة امارت و كارفور بحوالى 50 الى 80 جنيه

[mohdamin18]

شعب متخلف

[yousefsemsem]

ربنا يعوضك خيرواحسن حل عليك وعلي التوكيل

[Osama.shihata]

فى بولش فعلا فى بنزينة وطنية بالون العربية ان شاء الله يسعدك بنسبة كبيرة وب 40 جنيه

[rompo10]

ربنا يعوض عليك جرب البوليش بس لو كحت هاتبقي صعبه شويه

[hoko]

ربنا يعوض عليك بالخير
وان كنت افضل انك تروح التوكيل
ولا تبتئس من الهمج لأنهم حصاد المدعو حسنى الامبارك

[elshaeer2012]

حصلت معايا تاني يوم جبت العربية و كانت لسه معلقتش نمر و كنت حاسس اني هانفجر من الغيظ
ربنا يعينك و زي ما الشباب قالوا البوليش اللي بنزينة وطنية ان شاء الله يفيدك
واحد صاحبي رسموله ملعب كورة بالكامل على سقف العربية بقى قاعد يبص علي العربية لما شافها و يضحك و يعيط

[tamerosman]

كان فى عرض فى ورشة نايل موتورز على التلميع و ازالة الخرابيش( السطحية ) جرب روحلهم لو البوليش معملش شغل ، نصيحة ابعد عن التوكيل فى شغل السمكرة و الدوكو .

[FunnyMickey]

مش ممكن والله العظيم
الواحد لو يطول ياخد عربيته من التوكيل ويخربشها بايده عشان ميجيش حمار ويعملها
ده كيف
لازم اي عربيه زيرو يحصلها كده
ليه مش عارف
ايه المزاج يعني

[elmkaneeki]

توكيل هيعمله ايه يعنى ؟!!!!!!!!
استعوض ربنا واهى تاخد العين
سيبها كدة نصيحة

[abdohod]

بص يا باشا ..... أولا قدر الله وما شاء فعل .... غيرك بياخد العين في حاجات أكبر من كده وتأذي العربية ....
أما بخصوص الخرابيش فانا هاجيبلك من الأخر ...
أولا لو الخرابيش دي شالت طبقة البوية من على الصاج .... يبقي ولا أي بوليش يرجعها تاني عن تجارب بالهبل ...فتأكد بنظرك إن طبقة البوية اتشالت ولا لأ.ثانيا لو فعلا طبقة البوية اتشالت ورأيت هذا بعينك .... يبقى مفيش غير حل واحد فقط وطبعا نتيجته مش هترضيك بنسبة 100 في ال 100 وهي أن تشترى قلم دوكو بنفس لون العربية وده موجود في أي مكتبة بحوالي 3 جنيه فقط بس تأكد من درجة لون القلم لأن ألوانه محدودة جدا ثم بيد فنان تمشي بالقلم بعد رجه جيدا على الخرابيش (ماتنساش بيد فنان حساسه جدا) بكده هتداري الشكل اللي ظهر تحت الخرابيش ومش هاتبان إلا من قريب وبالنهار كمان ... أما من بعيد محدش هيأخد بالله وباليل مش هاتبان أصلا ... وعلى فكرة كان في موضوع هنا من سنة تقريبا على موضوع القلم ده وبالصور كمان ...جرب البحث.... عبالرحيم من السويس

[Eng.Osama.Afifi]

ربنا يكرمكم ويجازيكم ألف خير

أنا يوميها طبعا قاعد مفروس من الغيظ ... لأن إللي عمل كدة ملوش أي مصلحة غير إنه يأذي الخلق ... يعني أنا ممكن مزعلش لو العربية إتخبطت ... بس إن العربية تبقى واقفة في أمان الله وواحد يعمل كدة ... ليه !!!!

كنت بكلم واحد صاحبي فبيقولي العلامة إتسرقت ... قلتله والله أهون ... على الأقل إللي سرقها ممكن يبيعها ... حيطلع بأي مصلحة ... إنما إيه الفايدة إللي حتعود عليه لما يعمل كدة في العربية ... ومش خربوش واحد ... ده بهدلها

المهم

أنا روحت جيبت COMPOUND POLISH أمريكي ... ب35 جنيه تقريبا .... وجيبت كيس قطن ... وقعدت أدعك بحركة دائرية منتظمة بصبر وإحتساب أجر ... والحمد لله النتيجة كانت أحسن من الأول بمراحل ... يعني تقريبا 60% أو 70% راحت ... وروحت مدي بقى الكبوت WAX ماركة Armour ... والحمد لله الدنيا ظبطت شوية

النتيجة : إن الخدوش مش باينة بليل بنسبة 99% ... ومش باينة في النهار في الظل بنسبة 80% .... وفي الشمس بنسبة 70% .... الحمد لله أحسن كتير ...

وحسبي الله ونعم الوكيل في إللي عمل في العربية كدة .... والله قاعد بقالي بتاع 3 سنين عشان أجيب العربية وبعد لما أجيبها يكدر فرحتي ... ربنا يعامله بما يستحق بقى

وربنا يكرمكم ياجماعة شكرا على ذوقكم وإهتمامكم

[tutankhamoun]

مفيش غير أنك تحتسب ........ و الشعب للآسف معقد نفسيا (كله - المتعلم و الجاهل و الغني و الفقير - فيه حاجة مش مظبوطة في دماغنا !!! )
و كويس أن الملمع جاب نتيجة معاك .

[shaddadfalcon1]

حسبي الله ونعم الوكيل في البهيم اللي عمل كده وربنا يعوض عليك ويكفيك شر عيون الناس