مشكلة مع توكيل عز العرب

[eng.m7md.ali]

................................................*
منصحش حد يشتري العربية دي لو ناوي يتعامل مع التوكيل في حاجة
حسبي الله ونعم الوكيل فيهم
مفيش حاجة تمشي ولا تتم غير بالزعيق + الكلام مع المهندس امر
هحكلكم حكايتي وانتوا احكموا
مرة ازاز السواق وقع في الباب .. جريت على مركز عصام الصفا
وعلشان يصلحوا المشكلة لازم سيليكون في مجرى الكاوتش اللي ماسك الازاز من تحت
الكلام ده من حوالي شهرين
روحت التوكيل من 3 اسابيع علشان مشكلة في نفس الازاز .. ومهندس محمد عبد الهادي بيحاول يقنعني ان الشغل معمول برة التوكيل .. طبعا جبتله اثبات انه معمول في مركز عصام وهو مقتنع انه صح
سلمت امري لله وقولت ادفع وخلاص علشان كنت مسافر .. كام ياعم ؟؟ 130 جنيه قولت مفيش مشاكل
النهاردة روحت على مشكلة في نفس الازاز بردو
نفس المشكلة اللي دفعت عليها فلوس مع اني مش ملزم بكدة
المهندس بيقنعني ان الشغل معمول برة .. طبعا حلفت بأيمانات الله انه في مركز عصام صفا وهو مش مصدق قولتله خلاص انا جايلك على نفس العيب اللي كان من 3 اسابيع
طبعا بيقولي العربية هتتكلف كذا كذ كذا
قولتله انا دفعت قبل كدة ومش هدفع تاني ووريته الورق اللي يثبت اني دفعت علشان الازاز
رده على كلامي كان اللي انا دفعته ده مجرد تنضيف للكاوتش اللي بين الازاز
طبعا كان نفسي اقول كلمة قبيحة .. يعني ايه ادفع 130 جنيه علشان تنضيف كاوتش بس؟؟ طب والمشكلة الاساسية اللي باجيلها مخصوص من الاسماعيلية دي لاني دلوقتي قاعد في اسماعيلية .. يعني بقطع اكتر من 160 كيلو علشان اروح التوكيل وزيها وانا راجع ده غير الاكل والبنزين اللي بيدخل في 150 جنيه لوحده ويمكن اكتر في اليوم
على فكرة دي رابع مرة اروح علشان نفس المشكلة سواء في ازاز السواق او الراكب الامامي
يعني 4 × 150 جنيه = 600 جنيه في اربع مشاوير للتوكيل
طبعا سمعت الكلام ده وكنت انفعلت عليه لقيت المهندس امر جيه واتكلم معايا وحكتله على اللي حصل .. دخل لمهندس الورشة قاله اعمل العربية دي وظبط فيها كل حاجة علشان الراجل بيجي من اسماعيلية مخصوص وكدة
طبعا شكرت المهندس امر على مجهوده ودعيت ان ربنا يعينه على الصنايعية اللي معندهمش ضمير

فعلا حاجة تقرف وحسبي الله ونعم الوكيل
الخلاصة ان مكن الازاز اليمين والشمال قدام هيتغير ضمان مع تنضيف السيليكون تاني وكاوتش الازاز هيتغير برضو


برجاء إنتقاء الكلمات ....
تم تغيير إسم الموضوع و حذف الكلمات الغير لائقة
8ب
13:05
09-02-2012

[Nistelrooy]

معلش يا فيلكس باشا .. بس هو الازاز وقع الاول من اية .. ومركز عصام صفا ماعرفوش يعملوها كويس ولا اية !!

[saint2011]

انا أسف حضرتك غلطان تروح من الأسماعيلية لأبورواش عشان أزاز الباب ده لو حضرتك روحت لأى ورشة زجاج سيارات هييظبطلك كل حاجة ويأخد 50 جنية بلاش نقول 100جنية ولا تروح التوكيل 4 مرات ده حرام ومعلشى يا أســـتاذنا

[eng.m7md.ali]

معلش يا فيلكس باشا .. بس هو الازاز وقع الاول من اية .. ومركز عصام صفا ماعرفوش يعملوها كويس ولا اية !!

ازيك يا سامح باشا وحمد الله على سلامتك
الجيش للرجالة :))
وقع لوحده وانا بقفل الازاز بدون سبب مش عارف ليه
اما روحت مركز عصام قالي روحلهم التوكيل احسن علشان يغيرو الكاوتش اللي تحت الازاز بالمرة ولو في مشكلة تانية يعملوها

انا أسف حضرتك غلطان تروح من الأسماعيلية لأبورواش عشان أزاز الباب ده لو حضرتك روحت لأى ورشة زجاج سيارات هييظبطلك كل حاجة ويأخد 50 جنية بلاش نقول 100جنية ولا تروح التوكيل 4 مرات ده حرام ومعلشى يا أســـتاذنا

مش غلطان اوي
انا لسة في الضمان
والمشكلة كانت ممكن تبقى اكبر من كدة
علشان كدة فضلت اروح التوكيل احسن
بس اللي دفعته ده ميجيش حاجة جنب تمن مكن الازاز اللي ب 1400 جنيه للواحدة
وكمان انا دافع فلوس علشان يتصلح ومعرفوش يصلحووه .. امال انا دافع فلوس ليه؟

[saint2011]

انا قصدى كنت روحت لورشة زجاج سيارات يبص بصة لو لقى المشكلة واصلة لمكنة الزجاج هيقولك وبناءا علية تروح التوكيل لو حاجة بسيطة هيعملهالك ويا دار مادخلك شر وعموما هدى نفسك وكله يتحل انشاء الله على فكرة انا حاجز برسونا أتوماتيك 2012 ومستنى أستلم أدعيلى

[abdohod]

توكيل منيل بنيله ... ادعوا انه يتسحب منهم ويروح لحد تاني .....يا رب

[eng.m7md.ali]

انا قصدى كنت روحت لورشة زجاج سيارات يبص بصة لو لقى المشكلة واصلة لمكنة الزجاج هيقولك وبناءا علية تروح التوكيل لو حاجة بسيطة هيعملهالك ويا دار مادخلك شر وعموما هدى نفسك وكله يتحل إن شاء الله على فكرة انا حاجز برسونا أتوماتيك 2012 ومستنى أستلم أدعيلى

الحمد لله على كل حاجة .. هيا جات كدة

ان شاء الله تستلم على خير وعربيتك ميبقاش فيها المشاكل دي

بس خلي بالك وانت بتستلم ياباشا وشيك على كل حاجة وامشي بالعربية قبل الاستلام علشان كان فيه خناقة النهاردة بسبب جين2 موديل 2012 وفيها مشكلة

[saint2011]

الحمد لله على كل حاجة .. هيا جات كدة

ان شاء الله تستلم على خير وعربيتك ميبقاش فيها المشاكل دي

بس خلي بالك وانت بتستلم ياباشا وشيك على كل حاجة وامشي بالعربية قبل الاستلام علشان كان فيه خناقة النهاردة بسبب جين2 موديل 2012 وفيها مشكلة

ممكن أعرف أيه هى المشكلة؟؟؟؟

[eng.m7md.ali]

سمعت طراطيش كلام كدة ان المشكلة كانت في الكنبة الخلفية
هيا مشكلة بسيطة بس الفكرة كلها ان سبب الخناقة ان المهندس بيقول ده عيب استخدام واصلا العربية مكملتش 1000 كيلو

[walids]

ازيييييك يا محمد اخبارك ايه ؟؟؟ فينك يا راجل

انت بتتكلم ع الواجا اللي معاك ولا انت غيرت ؟

[eng.m7md.ali]

ابو حميد ازيك .. انا تمام يا ريس الحمد لله
ايوة هيا الواجا بمشاكلها و بفوانسها اللي ورا :))

[tutankhamoun]

أيه يا عم فيليكس ....... كان الله في عونك
ده أنت يا راجل كل لما تروحلهم لازم مشكلة ........... بجد ربنا يكون في عونك .
مش عارف أقولك أيه غير أني أدعيلك ربنا يسترها عليك و يهدي بتوع التوكيل
بجد المهندس آمر راجل ربنا يباركله

بس أنا لو مكانك كنت كشفت على الزجاج في الأسماعيلية الأول و لو طلعت حاجة بسيطة كنت عملتها هناك ووفرت الوقت و المجهود و الفلوس و لو كان الصنايعي قالي حاجة تانية على ماكينة الزجاج .... طبعا كنت هاجي التوكيل علشان الضمان .
الأستاذ ساينت كلامه مظبوط

عموما ربنا يستر

[ahmad alshaaer]

حمد الله على السلامه وفعلا البشمهندس أامر ساعد ناس كتير بس مش هو ده الطبيعي ان الواحد كل حاجه يلجا للراجل

المفروض ان الحاجه المظبوطه تكون هي الاساس

ربنا يعين الجميع ويصلح الحال

تحياتي

[amrelsha3er]

حتى انت يافليكس والله زعلت يااخى مش لاقيين الا انت ويعملو كده معاك :(:( يلا الحمد لله ان المهندس امر طلع بقى وخلصلك الموضوع ربنا يعينك ياكبير كفايه انك بتسوء ليهم السمعه توكيل غبى نفسى نشتكى كلنا وبروتون تسحب منهم التوكيل اللى تاعب الدنيا كلها ده والله ياجدعان

[ahmed gamil]

ياجماعه انا عضو جديد فى الموقع ولسه شارى عربية بروتون جين تو 2013 والتوكيل بيشترط إنه يحط زيت توتال فى صيانة الألف وانا مش عارف الزيت ده حلو ولا وحش انا كل تجربتى مع الزيت كان موبيل xh5 وشيل xh7 وكاسترول ماجينيتك وبصراحة الشل والكاسترول ممتازين أعمل إيه ياريت تفيدونى بسرعه وشكراً لجميع الأعضاء وكلمت المهندس آمر وقالى نفس الكلام مش عارف اعمل ايه انا مش مرتاح لزيت توتال ده وفى نفس الوقت هما مقيدين حرية العميل فى إختيار الزيت اللى ه عاوزه وحتى المانيوال بتاع السياره والضمان مش مكتوب فيه أى نوع زيت كاتبين بس ينصح بإستعمال زيون من نوع 20w50