طريقة ريجلاش الرفامل الخلفيه

[shakshak2011]

شباب .. الحمد لله ربنا وفقنى و عرفت سبب صوت الخبطه الى بيظهر مع الفرمله فى السرعات البسيطه بعد رحلة بحث شاقه مع التوكيل لمرتين متتابعتين و بلا حل مع الأسف .. و الحمد لله ميكانيكى عرف الموضوع و حلهولى .. الموضوع ببساطه إن التيل بيخبط فى الطنبوره ... و المشكله ديه حلها رجلاش الفرامل الخلفيه .. و الرجلاش ده ممكن إنك تعمله بإيدك و توفر 30 جنيه من عند الميكانيكى ..

هتيجى عند فرامل اليد .. و تفك الجلده المحوطه بالهاندبريك .. هيا بسيطه جداً إنها تتفك لأنها ماسكه بقطع بلاستك بارزه و داخله فى فراغات على حجمها يمين و شمال .. هتحتاج مفك عدل تفك بيه ..

بعد ما تفكها نزل فرامل اليد (حررها) -مهم جداً- ..

بعد كده هتلاقى صاموله باينه قدام عينك .. إستخدم مفتاح 10 عشان تربط شويه لجهة اليمين .. أو تخفف الرجلاش شويه لجهة اليسار .. أهم حاجه إنك بعد ما تربط شويه بسيطه .. تتأكد إن الفرامل مش زانقه على الطنبوره و إن العربيه حرة الحركة -هااااااااااام جداً- .. ممكن تتأكد عن طريق إنك تطلع و تزق العربيه بإيدك و تشوفها ثقيله و لا عاديه .. رجع كل حاجه مكانها و إطلع جرب العربيه ... و مبروك ..
الملاحظات الى هتشعر بيها .. إن الهاندبريك قلة سنونه و أصبح أثقل .. و إن الفرامل عليت معاك .. بس لازم تتأكد تماماً إن الطنبوره حرة الحركه .. بالتوفيق و أى سؤال انا حاضر

[hoko]

شكرا على المعلومه ولكنى اعتقد ان التيل له دور فى الموضوع ده

[asas2]

شاكرين يا باشا ولو انى حروح التوكيل احسن .. الصوت دة مطلع عينى من اسبوع من ساعة ماغيرت تيل الفرامل عندهم وكلمتهم قالولى تعالى فحروح أول ما أفضى ان شاء الله .. وشكرا لحضرتك

[أبومعاذ]

صراحة موضوع جامد بس للناس اللي بتعرف تشتغل بأيديها في العربية لكن نصيحة بلاش حد يعمل الموضوع بنفسه إلا لو عارف كويس هو بيعمل أيه

[shakshak2011]

أى خدمه يا جماعه .. و صدقونى الموضوع سهل جداً .. و لللأخ العزيز asas2 .. أنا روحت التوكيل مرتين و ماحدش عرف الصوت جاى منين و غيرت الطنابير كلها و تيل فرامل جديد و الخبطه فضلت زى ما هيه .. فجرب الأول تعمل الموضوع ده قبل ما تروح التوكيل .. بس زى ما قولت سنه سنه .. و تجرب .. و إن شاء الله الموضوع يبقى بسيط و كله يبقى فل ..
و أنا كنت شاركت الناس فى جروب محبين بروتون على الفيسبوك .. و الأنسه وسام من التوكيل كانت أضافت معلومه هامه جداً من الكتالوج .. ألف شكر ليها عليه .. ياريت تقرأوها قبل موضوع الرجلاش

.................................................. ..............................................
I found this piece of info fel user manual beta3 el 3arabeya:

Parking Brake Lever Stroke:
---------------------------------
Pull the parking brake lever all the way up to check the number of "clicks" that the ratchet makes. One click represents a lever movement of one notch. The lever should move the specified number of notches for normal brake application.

Parking brake lever Stroke:
---------------------------------
3 ~ 5 notches.
If the parking brake lever stroke is not within the standard range, have the brake lever adjusted at an authorized PROTON dealer.
.................................................. ..............................................

بالتوفيق للجميع

[D . a .\ AYMAN]

موضوع جميل جدا وسهل ... والعلومة بتاعة الفرامل دي لكل العربيات ... يعني المفروض في أي عربية يكون عدد التكات اللى يد الفرامل تعمل لغاية ماتقف ما يعديش خمس تكات ومايقلش عن ثلاثة ..ده في أي عربية مش البروتون بس

هو مكان الريجلاش فعلا اللى غير متوقع بالنسبة لي وأول مرة أشوفه

الف شكر لصاحب الموضوع وجزاك الله خيرا

[abokoko]

رجلاش فرامل اليد فى اللادا من اسفل العربيه -- الميكانيكى بينزل تحتها --
بس هى فعلا بتجيب نتيجه كويسه فى علو الفرامل
لكن رجلاش العجل برضه مطلوب

[A. Ibrahim]

جزاك الله خيرا
تسلم علي المعلومه

[shakshak2011]

يا جماعه و الله تسعدنى جداً ردودكم .. يارب أكون أفدتكم باى شىء .. :d