التكييف هيجننى

[DESIGNER105]

السلام عليكم ..قبل اى شى احب اشكر كل الاعضاء والمشرفين فى هذا المنتدى الرائع بجد

عندى مشكله فى التكييف (جين 2 2007) من اول مالصيف جه والجو بقى حر اوى التكييف يدوب يشتغل 10 دقايق كويس وبعدين يفصل ويشتغل مروحه بس وتجيب هو سخن...روحت لواحد بتاع تكيفات قالى الفريون ناقص انا هشيل الفريون كلو واحطلك فريون جديد نوع كويس.؟؟ وهيتكلف 150 جنيه ..اولتلو على ضمانتك ..؟ قالى رقبتى ..اولتلو اتكل على الله اشتغل ..المهم حط الفريون ونضفلى فلتر التكيف وحطلى برفان كمان من عندو ..والتكيف بقه تلاجه وزى الفل...طبعا الكلام ده كان بليل ...ركنت العربيه وصحيت الصبح على مشوار للمعادى من المهندسين قلت بقه هشغل التكييف وعييييش ...اشتغل كويس ربع ساعه بالزبط بعد كده قلب ساونه جايب هوا سخن من الماتور عدل ...طبعا اتسلقت فى المشوار ده رايح جاى بدون تكيف ..قمت راجع للراجل تانى بتاع التكيف ..فتح الكبوت وحط العداد ..وقلى شغل ودوس بنزين وثبت رجلك ...لقيت التكييف اشتغل كويس ....اولتلو ماشى مهو هيفصل بعد عشر دقايق.....قالى طيب استنى عشر دقايق...فضلت مستنى والعربيه راكنه مفصلش ...وحسيت ان الراجل شمتان فيا ...اولتو لا انا هطلع الف لفه كده وارجعلك ... مجرد ممشيت بيها 100 متر التكيف جاب هوا سخن تانى .......؟؟؟؟؟!!!!!!!!!!!!!! اتجننت روحتلو تانى ...الولتلو جيبهالك متلبسه ...قالى تعالى نروح لمكانيكى ...المكانيكى قالى العربيه سخنا مولعا والردتير ناقص مايه وروح شيل ترمستات الكوعه عشان مسخن العربيه ...قولتلو انا شايله اساسا....قام بتاع التكيف قالى خلاص نحطها على جهاز كمبيوتر كشف اعطال ..بس النهارده الراجل قافل تجيلى يوم ونروحلو نشوف فيه ايه .....

اسف للاطاله ..بس بجد المشكله دى هتجننى وانو عرفين يعنى ايه عربيه من غير تكيف فى الجو الحر ده ..معاناة السنين .....

انا استنتجت استناج .. مش عارف صح ولا غلط ...ان العربيه لما بتسخن التكيف بيفصل ولما بتبرد بيشتغل كويس...بس معنا كده ان التكييف مش هيشتغل خالص طول منا ماشى ومش معقول كل شويه هركن شويه لحد مالعربيه تبرض؟؟؟؟؟؟؟؟؟

افيدونى يا خبراااء الجين 2 وشكرا جزيلا لكم

[ahmed_h_g]

أولا" أهلا" بيك أخى الكريم فى نايل موتورز

بالنسبه للتكيف أنا شاكك والله أعلم فى ترموستات التكييف
علشان هو المسؤل عن فصل وتشغيل الكباس
الظاهر ان الترموستات اللى راكب عندك بيعلق
بالنسبه للحرارة مؤشر الحرارة بيرفع معاك ولا ايه ؟

[DESIGNER105]

لا مؤشر الحرارة علطول فى النص على 90 ...مش بيعلى يعنى ..بس بعد مالعربيه بتبطل بتفضل مرواح الرداتير شغاله حوالى 10 دقايق لوحدها ...وسالت قالولى عادى ... بس هو لو ترمستات التكيف بيلعلق ده يبقى محتاج يتغير ولا ايه ؟؟؟ وهل العربيه لما بتسخن هو الى بخليه يفصل وميشتغلش تانى ؟؟؟؟ وشكرا على الرد

[macdiv]

لا مؤشر الحرارة علطول فى النص على 90 ...مش بيعلى يعنى ..بس بعد مالعربيه بتبطل بتفضل مرواح الرداتير شغاله حوالى 10 دقايق لوحدها ...وسالت قالولى عادى ... بس هو لو ترمستات التكيف بيلعلق ده يبقى محتاج يتغير ولا ايه ؟؟؟ وهل العربيه لما بتسخن هو الى بخليه يفصل وميشتغلش تانى ؟؟؟؟ وشكرا على الرد

مرواح الرداتير شغاله حوالى 10 دقايق لوحدها ....انا مليش خبره في الجين بس مش منطقي ان المروحه تفضل دايره ١٠ دقايق عشان المده دي تفيص اجدعها بطاريه ... اعتقد انك بعد ما تفحص كومبيوتر او قبل كده يستحسن تجيب ترموستات جديد اصلي و تتالكد ان دوره التبريد مفهاش هوا ولا تسريب و تجرب و لو الموضوع مضبطشي ،،روح شيك كمبيوتر

[egyseadragon]

اتأكد من موضوع الحرارة و سخونة الموتور الاول عشان دة الاهم....الكباس ممكن يفصل لكذا سبب منهم لو العربية سخنت او الثيرموستات او ضغط عالي

[DESIGNER105]

هو انا لما رحت للمكانيكى فضى الرداتير وفك مسمار كده جمب الماتور لحد مطلع مايه ...وقالى نضف سربنتينة التكييف بالهوا وشوف ايه النظام .....عملت كده بس لسه مجربتش العربيه مسافه طويله شعان اشوف التكيف هيفصل تانى ولا لا يدوب مشيه بيها ربع ساعه مشوار لحد الشغل والتكيف مفصلش ..... وشكرا لحضاراتك على الردور

[Al-Farooq]

ياريت تفيدنا فى الموضوع دة وصل معاك لإيه

[hadota_masreya]

يا باشا سيبك من التكييف دلوقت ده فى الاول و الاخر هاتقدر تظبطه ان شاء الله
لكن شوف مشكلة الحرارة
خد بالك الطبيعى بتاع البروتون انك اول ماتفصل الكونتاكت الممروحة تقف وقتى ماتشتغلش ولا دقيقة بعد ماتفصل الكونتاكت - معنى انها بتشتغل 10 دقايق ده معناه انها بتسخن فوق العادى و غالبا لو انت بعد مافصلت الكونتاكت و المروحة لسه شغاله لو جيت تدور العربية تانى - غالبا هاتلاقى مؤشر الحرارة على.

لازم و ضرورى تشوف مشكلة الحرارة دى فى أسرع وقت - و بكررها تانى ليك و لكل البروتاناوية و خاصة الجين و البيرسونا - اول ماتفصل الكونتاكت لو المروحة لسه دايره يبقى انت عندك حرارة الموتور أعلى من الطبيعى حتى لو أمبير الحرارة ماعلييش.
الكتيب بتاع العربية هاتلاقيه بيقول ان فى بعض الأحيان فى ظروف الجو غير العادية بعد ماتقفل الكونتاكت هاتلاقى المروحة شغاله - بس الظروف الغير عادية دى ماعتقدش انها حرارة أقل من 50.

راجع دورة التبريد كويس و اتأكد ان ماعندكش مشكله فيها.

[m_marmoush]

المشكلة دى ممكن تكون حاجة من أتنين:
1) ترموستات الكوعه (اللى أنت شايلة) هل شلتة كلة ولا عوجتة جوة الماسورة و بالتالى لسة موجود بس مش شغال؟
2) بوابة السخن بتاعة التكييف تكون بتعلق (ودى فايدتها أنها بتدخل ميا سخنة من الموتور على التكييف عشان التكييف يشتغل سخن فى الشتاء)

[DESIGNER105]

شكرا يا جماعه على الردود ..هقولكو وصلت لايه لحد دلوقتى ..انا روحت بنزينه ونضفت سربنتبنه التكييف بالهوا والمياه من قدام. زى مقولتلكو..وكان فيه هواء جو الرداتير طلعتو ..ميكانيكى فك مسمار كده جمب الماتور كان بيجيب هوا لحد مجاب مايه .....؟ ..وبعديها التكيف اشتغل كويس ومفصلش معايا غير مره وحده بس كنت ماشى سريع وخدت مطب وانا مش واخد بالى.. مش عارف ده كان ليه علاقه ولا التكيف فصل صدفه بعد المطب ده ...؟؟؟؟؟ لكن مروحه التبريد بتفضل شغاله شويه بعد فصل الكونتاكت لسه ...مع ان مؤشر الحراره مش بيعدى ال90 خالص .....

[DESIGNER105]

العداد عدى التسين وصل قبل ال130 بشرطه ....؟؟؟؟؟؟؟؟ طبعا بالنسبه لمشكله التكيف اتحلت ومبقاش يفصل غيره مره او اتنين فى اليوم ويشتغل تانى ....وبعدين امبارح كده وانا راجع من الشغل اعدت الف شويه بالعربيه.. المهم...وانا راجع اخر اليوم كنت واقف فى اشاره بضرب عينى على العداد لقيتو قبل 130 بشرطه طبعا اتفزعت ...ومكنش ينفع ابطل ولا اركن والاشاره فتحت ..... لحد ملقيت اول مكان اركن فيه بعد الاشاره وركنت...وبطلت العربيه ...وطبعا المروحه فضلت شغاله بتاعت الرداتير ...... وكل شويه اشغل وابطل واشوف الحراره وانا واقف طبعا ...لحد ملقيت العداد رجع قبل التسعين تانى .. وبعدين كملت مشوار حاجه بسيطه ولما وصلت استنيت شويه وبصيت على مية الرداتير لقيتو مليان مايه على اخرو ؟؟؟؟؟؟؟؟؟؟؟؟؟؟ .

[a7mad_mo7amad6]

حصل الموضوع ده قبل كده معايا وكانت المشكلة من كتاويت التكييف كان لما بيسخن بيفصل
جرب تبدله بكتاويت المراوح وشوف كده ايه النظام
المفروض لو حطيت ايدك على كتاويت التكييف وجيب تشغله او تفضله هتحس بتكة كده
بالنسبه لموضوع المروحة التفضل شغاله ده بتحصل معايا لما المياه بتاعة الريداتير بتكون ناقصة

[DESIGNER105]

المشكله يا جماعه كانت بسبب سخونىة العربيه وكان السبب الرداتييييير كان مسدود ....و الحمد لله حلتها والحرارة راحت و بتالى التكييف اتزبط ...وانشاء الله عهمل موضوع كام عن قصة الرداتير وازاى اكتشفتو وازاى اتصلح ......

[ismailnd]

المشكله يا جماعه كانت بسبب سخونىة العربيه وكان السبب الرداتييييير كان مسدود ....و الحمد لله حلتها والحرارة راحت و بتالى التكييف اتزبط ...وإن شاء الله عهمل موضوع كام عن قصة الرداتير وازاى اكتشفتو وازاى اتصلح ......

الرادياتير بيتسد لما بتحط مية عادية حط ميه زرقا موبيل او امريكاني خضرا واحسن محطة بتنضف الرادياتير موبيل اللي على الاتوستراد قبل منشية ناصر