السوست و المساعدين و مشاكل أخرى ....

[shakshak2011]

السلام عليكم و رحمة الله و بركاته ..

بقالى فتره عندى شعور إن العربيه بقت أوطى من ناحية الكاوتش الأمامى عن الخلفى .. كل فتره بحاول أقيس الفراغ الى ما بين الكاوتش الأمامى و جسم السياره و فعلاً بلاقى من قدام أقل من الخلف .. فهل ده سوست و لا مساعدين ؟؟؟؟ المشكله إنى بقعد أشكك نفسى إن الطريق مايل شويه .. و مش قادر أعرف بالضبط إيه الصح

نفسى أعرف إزاى ممكن أحدد هل العيب من السوست ولا من المساعدين بنفسى .. هل فيه طريقه حد يعرفها؟

أنا كنت غيرت من فتره طقم الدبرياج و من ساعتها و انا حاسس بالموضوع ده .. أو ممكن بتوهم بس مش عارف هل ممكن الحاجه ماترجعش مكانها كويس مثلاً ؟؟؟؟

مع المطبات مفيش أى مشكله و لا فيه حك ولا حاجه ..

حاجه كمان .. الدركسيون عندى بيرعش على سرعات بسيطه جداً و بيمسك على العالى .. يعنى لحد سرعة 50 كم بيكون بيرعش رعشه خفيفه قوى .. أوصل لحد 110 ثابت .. بعد 120 أحسه بيرعش بسيط .. أنا لسه كنت مرصص من أقل من أسبوع علشان أحل المشكله ديه و من ساعتها الكاوتش زى ما هو و لا خدت بيه مطب .. فالمفروض إنه يكون كويس و مش قصة ترصيص

ملاحظه أخيره الكاوتش تاريخ تصنيعه الأسبوع الأول من سنة 2009 و العربيه موديل 2009 برسونا .. عامله 44500 كم .. هل المفروض أغير الكاوتش على كام؟؟ خصوصاً إن بريدجستون العبور أكثر من مره فى خلال ال 5 شهور الى فاتت قالولى لازم تغير العجل عشان شقق تشققات بسطه كده ..

طلب أخير .. محتاج أعرف مكان عفشجى كويس يكون متجرب يكشفلى على العربيه كشف كويس و كمان حد بتاع زوايا مضمون .. أنا بروح على طول بريدجستون العبور .. بس بقول ممكن حد يكون عارف واحد أفضل ...

شكراً و أسف على الإطاله

م. محمد الشافعى

[haissam24h]

حسب نوع العجل ونوع الفئه بتاعته اذا كان سرعات فى او اتش بس طالما شقق والانصح تغيره على 40 الف مهما كان نوعه لان الى بينزل مصر خلاص مش بقا ذى الاول لان المستورد بينزل الاقل جوده وانا سالت ناس كثير فى حاجه اسمها تيلا فى تصنيع الكاوتش وبيقولو المفروض الكويس يبقى 8 تيلا وفى 12 بس كله بيفرق فى السعر ودول مش موجدين فى مصر
الاضمن حاليا بريدجستون من توكيلهم وبعدها جنرال الالمانى وبعدها جودير وياريت وانته بتركبهم تاخد ضمان ضدد عيوب الصناعه الى هى حورات الكورة الى بتطلع فى الجنب ويضحك علينا ويقولك ده مطب او بلاعه حسبى الله ونعم الوكيل لانها حصلت معايا فى 4 فرد كاوتش كومهو كانو جداد
بالنسبه للعفشه حاول تكشف على جلب المقسات +البيض
بالنسبه للوطو اقف بالعربيه على سطح مستوى اسفلت وانزل وبعد 4 متر وشوف الوطى من انى جنب
لو من ورا تعالى الى الجنب الواطى وحاول ترفع العربيه بايده سنه لو ظطبتت يبقى العيب من ورا
والعكس بالامام
وان شاء الله خير

[shakshak2011]

أخى الغالى هيثم .. ربنا يباركلك يا غالى على ردك و إهتمامك .. كلك ذوق و الله
أنا إن شاء الله هكشف على جلب المقسات +البيض زى ما حضرتك تكرمت و نصحتنى و برضه هغير الكاوتش بعون الله .. بس رأيك أجيب بريدجستون اليابانى ولا الأندونيسى .. و هل عندك فكره عن سعرهم؟
شكراً يا غالى

[haissam24h]

والله اخر سعر للبريدج كان 500 تقريبا للفرده فى التوكيل بتاعهم الى فى شارع مراد بس لو هتجيبه ركبه عندهم ومش تنسى ضمان ضدد الكور الى بتطلع من الجنب والحورات بتاعتهم
وكمان فى نوع اسمه دون لوب طبعا ده يبانى درجه اولى هو والتايو والياماها اى حاجه يبانى اشترى وانته مغمض

[haissam24h]

واحسن واحد بيبع كاوتش فى سعره اولاد بيومى فى الدقى او ابن سليمان فى شارع وادى النيل جنب اسماك وادى النيل ومش تنسى شترب من هناك شربه سى فود ^^

[shakshak2011]

تسلم يا غالى على الإفاده ... بس تفتكر توكيل بريدجستون هيكون أفضل ولا إيه رأيك ..

[ahmad--ezzat]

بص ياباشا
الموضوع ده عندي
الرفرف الامامي يمين المسافه بينه وبين الكاوتش الامامي يمين اعلي من الامامي شمال بحوالي 4 ملي
وعملت كل حاجه...غيرت مساعدين جداد
وغيرت سوست برضه جداد

والمشكله لسا موجوده...مش عارف اعمل ايه...وهتجنن....الحاجه الوحيده اللي ناقصه اني اغير كوبايات وبطاحات امامي ...يمكن عامله هبوط في ناحيه منهم

[eng.m7md.ali]

انا عربيتي مايلة بردو ناحية الشمال من ورا
وحاليا بقت من قدام كمان
وهغير 4 مساعدين في التوكيل بدون السوست
اعتقد دي من السوست

[shakshak2011]

مممممممممممم .. طب يا رجاله أنا بره الضمان دلوقتى .. تفتكروا مين الى ممكن يعرف فيه حاجه فى السوست ولا لا؟
عصام و صفا كويس؟ و لا الورشه فى فيصل كافيه؟

[haissam24h]

بالنسبه الاخ الى غير سوست ومساعدين والجنب لسه واطى انا عندى نفس المشكله
بس هقولك السبب بيكون من الكرتيره بتاعت العربيه
الحل بتروح لسمكرى شاطع ويشوفها
وتانى حاجه
هتاخد ماسات عربيه ذى عربيه الفرق فى الحوض والاتفارعات وتطبها بعربيتك
لو فيه فرق
السمكرى بيحلها بزرجينه للحته الى فيها المشكله لو كل حاجه تمام
تمل زى وتريح راسك
المكان الى واطى ركبله علايه بمسافه الفرق بس عشان تظبط العربيه ولو مركب عليات فى العربيه شيلها كلها
وشكرا
بالنسبه للموضوع بتاع حبيبنا
اى عفشجى يا باشا انته اشترى السوست والمساعدين وروح ركبهم وهو لما فك
لو لاقى حاجه تانيه يهقولك
والتكلفه من 20 الى 30 ج فك وتركيب جنب واحد

[fadl95]

المساعدين والسوست بكام ومكانهم فين

[fadl95]

مفيش رد ليه

[ahmad--ezzat]

بالنسبه الاخ الى غير سوست ومساعدين والجنب لسه واطى انا عندى نفس المشكله
بس هقولك السبب بيكون من الكرتيره بتاعت العربيه
الحل بتروح لسمكرى شاطع ويشوفها
وتانى حاجه
هتاخد ماسات عربيه ذى عربيه الفرق فى الحوض والاتفارعات وتطبها بعربيتك
لو فيه فرق
السمكرى بيحلها بزرجينه للحته الى فيها المشكله لو كل حاجه تمام
تمل زى وتريح راسك
المكان الى واطى ركبله علايه بمسافه الفرق بس عشان تظبط العربيه ولو مركب عليات فى العربيه شيلها كلها
وشكرا

يعني ايه من الكرتيره ؟؟
بالنسبه للعليات في جنب واحد ده مستحيل طبعا :)
علي فكره العربيه مش مايله ولكن بالنظر كده هتلاقي في جنب اعلي سنا بسيطه....يعني حتي لو ركبت علايه يبقي هبوظ الدنيا

يارب يطلع شغر سمكره فقط

[eng.m7md.ali]

مش شرط مدام السوست جديدة تبقى متساوية في الطول
ممكن تكون واحدة ريحت عن التانية
اعتقد المشكلة ياااحمد باشا في العفشة

[K3A]

بص ياباشا
الموضوع ده عندي
الرفرف الامامي يمين المسافه بينه وبين الكاوتش الامامي يمين اعلي من الامامي شمال بحوالي 4 ملي
وعملت كل حاجه...غيرت مساعدين جداد
وغيرت سوست برضه جداد

والمشكله لسا موجوده...مش عارف اعمل ايه...وهتجنن....الحاجه الوحيده اللي ناقصه اني اغير كوبايات وبطاحات امامي ...يمكن عامله هبوط في ناحيه منهم

حضرتك المشكلة ممكن تكون مش في العفشة أساسا ... ال 4 مملي دول أقل من نص سانتي وده ممكن يكون سببه ان فردة كاوتش أقدم من التانية في الناحية المنخفضة

هذا و الله أعلم