أجبها إن شاء الله ولا ايه ؟

[fat7elbab]

السلام عليكم

بإذن الله خلاص اتفقت إنى أجيب الجين 2

وهبدأ أمشى فى الأجراءات بإذن الله

وكلمت عز العرب

ها ايه رأيكوا ...اتوكل على الله وأدووووس

ولا ممكن يكون فى عربيه أحسن منها وفى نفس سعرها

أتمنى إنى أسمع الرد من الناس اللى عندهم العربيه

وشكرا

[immetwally]

tawakal 3ala allah
hya a7san 3arabya fe el fe2a beta3etha
we ba3den law 3ayz ay mosa3da fe el estelam aw ay so2al
contact me
Islam 010 1771337

[TAG_Turbo0]

فى نفس سعر الجين تو مفيش أى منافس
هى تعتبر الافضل من حيث الامكانيات مقابل السعر
بس خلى بالك انت مبتشتريش مرسيدس
يعنى ممكن ميعجبكش فيها شوية حاجات
بس على العموم أختيار موفق ان شاء الله

[tutankhamoun]

بُص ياباشا

العربية كأداء .................رهيبة
كماليات ................ رهيبة
تقفيل الصالون و خاماته .......... عادية جدا و ليست مميزة في أي شئ غير التابلوه الروعة
مش سيئة زي الناس ما بتقول و بتتساوى مع عربيات كتيرة جدا في نفس مستوى السعر في موضوع الخامات الداخلية للصالون

و إن شاء الله لما تنزل تستلم
تراجع على كل حاجة في العربية كويس جدا
و أقصد كل حاجة
جميع الأجهزة الداخلية ( تكييف - مشغل اسطوانات - انوار - .... الخ )
تُبص كويس على الدهان و تشوف فيه أي خرابيش أو تكحيتات
تُبص كويس الصالون و تشوف فيه أي خرابيش أو حاجة ملحوسة
و هكذا
تجرب الكراسي ترجعها ورا و تقدمها و تشوفها شغالة تمام


تفتح الكابوت و الشنطة و تشوف بيقفلوا كويس و لا لاءة

أتكل على الله و دوس ......... و أشتري
و ربنا يباركلك فيها إن شاء الله

[Qamar]

هي ممتازة لكن ممكن تحط الsunny في الاعتبار

[fat7elbab]

متشكر أووى ياشباب لأهتمامكم ومساعدتكم

وكان عندى سؤال

هى الجين تو facelift دى نزلت ولا لسه

يعنى الموجود دلوقتى فى عز العرب ...اللى هى العاديه اللى عند الناس كلها

ولا الجيدده الfacelift

[ahmedsiyam]

اخى الفاضل
انا من رايى تستنى الموديل بتاع شهر 9 الجديد و ساعتها تشوف و تقارن بنفسك و على ضوء السعر الجديد تقرر

[fat7elbab]

بصراحه انا ولدى قالى أخرك 80 ألف ....

ووصلتها معاه ل84 ألف بالعافيه لانى هجبها بإذن الله مانيوال

إنما الجديده أغلى من كده بكتير

هتكون بحوالى 100 ألف ....وده كتير جداا بصراحه

[ahmedsiyam]

خلاص اقفش القديمة بالسعر الحالى و ربنا يوفقك ان شاء الله

[khpopo]

السلام عليكم

بإذن الله خلاص اتفقت إنى أجيب الجين 2

وهبدأ أمشى فى الأجراءات بإذن الله

وكلمت عز العرب

ها ايه رأيكوا ...اتوكل على الله وأدووووس

ولا ممكن يكون فى عربيه أحسن منها وفى نفس سعرها

أتمنى إنى أسمع الرد من الناس اللى عندهم العربيه

وشكرا

هما الى معاك افضل حاجة بيهم فى الكماليات والشكل والاداء ..يعنى هاتاخد منها متعة هامة جدا القيادة المثيرة جدااااااااااا
اما بالنسبة الى مشاكل البسيطة الضمان كويس فيها اتوكل ...فى لون ابيض لسة شايفة جديد محدش راكبة فى المعرض الى فى اخر احمد عرابى
ربنا يوفق
سبحان الذى سخر لنا هذا وماكنا لة مقرنين وانا الى ربنا لمنقلبون

[arahman1110]

facelift in 9 or 12 ?

اخى الفاضل
انا من رايى تستنى الموديل بتاع شهر 9 الجديد و ساعتها تشوف و تقارن بنفسك و على ضوء السعر الجديد تقرر

يا استاذ احمد انا سألت بنفسى فى المعرض اللى فى الدقى وقالولى ان ال facelift هاتنزل فى شهر 12 مش 9 فياريت انا عاوز اتاكد هيا هتنزل امتى لانى كنت خلاص هاجيبها بس لو كانت هتنزل فى 9 هستناها طبعا.
وبالمره هي احسن ولا ال Yaris ولا ال Lancer 1300cc مع العلم انى هسافر بيها يوميا يعنى هعملى فى اليوم حوالى 130 كم
فارجو المساعدة من الجميع

[Boody8882]

ومعلش ممكن سؤال طالما الراجل بيسأل عن ال جين 2 لإنى أنا فى نفس الحيرة دى تقريبآ ناس كتير بيرشحولى الجين 2 وأنا دماغى كلها ما بين الجيتز والسيريون . فأتمنى أعرف رأيكم بجد لو التلات عربيات دول إتحطو فى مقارنة
(الجيتز ولا السيريون ولا الجين 2 )

ترجو الادارة من الأخ العضو الاحاطة بان اللون الأحمر مخصص لاستخدامات الادارة فقط، نرجو منكم التكرم برماجعة قواعد وقوانين المنتدى-الأدارة 4

[ahmedsiyam]

السلام عليكم

بالنسبة للاستفسار الخاص بميعاد نزول الاصدار الجديد للجين 2 تابع موضع الاخ جستس بخصوص نزول الفيس لفت الجديدة وانا لسه واصلانى المعلومة من عز العرب حالا انها فى شهر 9 بالكتير اوى اول شهر 10
وطبعا بما انك بتسافر كتير اساسى يبقى اختيارك لموتور 1600 هايبقى الاختيار الافضل
بالنسبة للمقارنة مابينها و مابين التويوتا و الميتسوبيشى ده يتوقف انت عايز عربية عائلية و لا لأ ؟
اما من حيث الكماليات فالبروتون طبعا اكتر بكثير
من حيث الاعتمادية و سعر اعادة البيع لا انصحك بالبروتون

بس انا لو مكانك موش هاخسر اى حاجة لو استنيت شوية وجبت الموديل الجديد و على فكرة التعديل فى الصالون جذرى و التعديل فى الموتور كويس جدا و ممتاز و طبعا انا موش جايب الكلام ده من النت انا جايبه من السخص اللى باثق فيه فى عز العرب و اللى جرب العربية بنفسه

بالنسبة لمقارنة الجيتز و السيريون و الجين 2 انا موش هاقارنهم ببعض
الجين 2 تكسب فى كل حاجة ماعدا استهلاك البنزين فقط و سعر اعادة البيع

[arahman1110]

السلام عليكم

بالنسبة للمقارنة مابينها و مابين التويوتا و الميتسوبيشى ده يتوقف انت عايز عربية عائلية و لا لأ ؟
اما من حيث الكماليات فالبروتون طبعا اكتر بكثير
من حيث الاعتمادية و سعر اعادة البيع لا انصحك بالبروتون

يا استاذ احمد موضوع سعر اعادة البيع ده انا فاهمه وده بسبب ان العربيه مش منتشره, انما ممكن توضحلى موضوع الاعتماديه ده؟
وبعدين انا خلا دماغى هتفرقع علشان انا امبارح كنت قررت اجيب lancer 1600 واخلينى فى المضمون ولما دخلت على صفحها هنا فى المنتدى اتصدمت لانى لقيت ناس بتشتكى منها جدا وبيقولوا ان انتشارها ده موضوع ادمان وان سعرها مبالغ فيه جدا وان فيها عيوب كتيره فى العزل والتكييف والامان والصوت العالى و........
فبصراحة انا مبقتش عارف اجيب ايه. انا كل متطلباتى عربيه AT,1600 وشكلها حلو (لانى بصراحة مش بحب شكل ال lancer اوى) بس قبل ده كله توكيل محترم وعربيه يعتمد عليها لانى مش عاوز اجيب عربيه زيرو علشان ادوخ بيها والا كنت جبت مستعمل وخلاص.
فارجوا من الجميع اقتراح عربيه فى حدود 100000 وتكون AT,1600
ومحترمه علشان اخوكم محتار جدا جدا جدا

[tutankhamoun]

مهندس أحمد عبد الرحمن
أولا أحب أقولك على حاجة مهمة جدا

العربيات دي قرف ........... لو أنت مرتاح لعربية أتكل على الله و هاتها بعد ما تتأكد أنها كويسة

نيجي للجين 2
الجين 2 عربية كويسة و ثمنها رائع و أكثر من رائع لما تقدمه مقابل ذلك الثمن
و الموضوع مش موضوع كماليات بس
لاءة ده كماليات ........... و عوامل أمان ....... و شكل جميل ...... و فوق ده كله ......... موتور و أداء رائعين

عايزين نعرف كلمة إعتمادي ؟؟؟
عربية إعتمادية يعني مش بتعطل .......... مش بتغلب صاحبها ......... متقفش منك في وسط الطريق و تبقى عطلانة و أنت مش عارف تعمل أيه

بروتون جين 2 ظهر فيها عيوب تقفيل .....تقفيل فقط لا غير
و لم يظهر أي عيب في المحرك أو العفشة أو الأجزاء الميكانيكة التي تؤثر على عمل السيارة
يعني برضه عربية إعتمادية و خصوصا إن كل السمعة القديمة كانت على العربيات اللي أول ما نزلت من الموديل لأن المويدل الخاص بالجين 2 موديل عمره قصير في السوق و عمره حوالي 4 سنوات فقط
و أول موديل الخاص بسنة 2005 و 2006 كان بيظهر فيهم مشاكل تقفيل كتيرة و مشاكل التقفيل دي تتمثل في الآتي
أزرار تعلق نتيجة لوجود سلك فالت مش راكب كويس
زجاج كهرباء يعلق لنفس السبب
يعني حاجات من دي

إنما موتور و عفشة و أجزاء ميكانيكية ........... لم يشتكي منها أحد

طيب نيجي للمشاكل اللي ظهرت مع زملائنا و أخوانا في المنتدى أو غيرهم
دايما المشكلة هي اللي بتكون ظاهرة و الناس تتكلم عليها كتير
إنما أغلب من أشترو الجين 2 لم يظهر معهم مشاكل و هذا ليس نكران لوجود بعض الحالات التي ظهرت بها مشاكل في التقفيل
بس أنا زي ما بقول لحضرتك
دايما الصورة الوحشة تغطي على الحلو و خصوصا لما يكون الناس عايزة تشوف الوحش
بمعنى إن العربية جديدة و من ماركة مش مشهور في السوق و مش من بلد مشهورة بصناعة العربيات
فلذلك ... الناس بتشوف أي عيب على أنه شئ ثابت أو شئ منتشر و هو عكس ذلك

حضرتك برضه ممكن تدخل على مجموعة و نادي مالكي الجين 2 على الفاس بوك
و أدخل شوف تجارب الناس اللي ملكت العربية و أستعملتها لمدد طويلة خصوصا الناس اللي أشترت موديل 2006 و عاملين دلوقتي أكتر من 70 و 80 ألف كيلومتر بدون أي مشاكل تذكر


و في الآخر ربنا يوفقك لأختيار موفق سواء كانت الجين 2 أو غيرها مثل تويوتا أو ميتسوبيشي أو أي ماركة تانية محترمة

ده رابط للجروب بتاع نادي الجين 2 في مصر
http://www.facebook.com/home.php?ref...gid=2250603 689