عتبة يمين جين 2 لونها اسود اتكسرت و عايز رأيكم

[Di2]

السلام عليكم

ياجماعة انا لسة عربيتى 2012 جديدة و فى ملف فى العيد حد حاطط حجر كبير كسرلى العتبة وانا بلف وسألت عليها فى التوكيل قالولى بتتباع لوحدها فى حدود 350 من غير رش و لازم تترش و تدفع ثمن الرش و التركيب فقولت اشوف لو حد عندة عتبة يمين جين 2 لونها اسود للبيع او قولولى على حل احسن من كدة

شكرا جزيلا :)

[Motarjim]

وعليكم السلام،

كل سنة وحضرتك طيب.

لو روحت الحرفيين، أكيد إن شاء الله هتلاقيها عند محل الراعي. وتقريبًا ثمن الناحية الواحدة 250 أو 200 جنيه استيراد، واعتقد أنك ممكن تلاقي اللون، بس مش أكيد.

وفي كمان محل اسمه النادي في شارع المرسيدس، ولكن هيتعامل معاك، وكأنك راكب بي إم دبليو، وأظن هيقولك - زي ما قال لواحد بيسأله عن عتب برسونا إليجانس - الناحية الواحدة جديدة غير مرشوشة بـ 600 جنيه !!!

وفي محل كذلك اسمه ملك البروتون، وزيرو، ممكن تسأل هناك برضه.

عناوين المحلات دي وتليفوناتهم هتلاقيها في موضوع مثبت بالقسم، وربنا يوفقك، وتلاقيها باللون المطلوب.

[D . a .\ AYMAN]

طيب هي مش بتتصلح عند حد بتاع فيبر ولا خلاص كدة هاتترمي

[Di2]

يا استاذ Motarjim شكرا جزيلا انا دلوقتى سألت فى الراعى و قالى سعر اغلى من التوكيل و من غير رش فصرفت النظر عنه و كلمت ملك البروتون قالى موجودة استيراد و لونها اسود ب 250 جنيه و مش هتحتاج رش فالافضل انى اصلح الاصلية بالفيبر عند بسام ولا اجيب اللى عند ملك البروتون واركبها وخلاص

[D . a .\ AYMAN]

أعتقد إنك تجيب اللى لاقيتها بـ 250 .. لأنها جديدة وسليمة وسوداء اللون كمان من غير رش وفي الآخر كدة سعرها كويس عن التوكيل كمان وتركبها

وبرضه تصلح اللى عندك وتشيلها احتياطي .. لأن العتب خبطاته دايما بتكون كتير ربنا يحفظك

[Motarjim]

يا استاذ motarjim شكرا جزيلا انا دلوقتى سألت فى الراعى و قالى سعر اغلى من التوكيل و من غير رش فصرفت النظر عنه و كلمت ملك البروتون قالى موجودة استيراد و لونها اسود ب 250 جنيه و مش هتحتاج رش فالافضل انى اصلح الاصلية بالفيبر عند بسام ولا اجيب اللى عند ملك البروتون واركبها وخلاص

أي خدمة يا ريس، أنا رأيي من رأي الدكتور أيمن، إنك تشتري الاستيراد أفضل، وممكن تصلح العتبة المخبوطة - إن كانت قابلة للإصلاح - وتحتفظ بها احتياطيًا.

فخيرًا إن شاء الله.

وأبقى طمنا عملت إيه، وربنا ييسر لك الأمر.

[Di2]

يا جماعة الف شكر جزاكم الله كل خير
ان شاء الله هاروح على يوم الجمعة و هبقى اقولكم اية الاخبار

[rahieb_100]

سؤال صغير
هو العتب بتاع العربية فيبر مش صاج؟!

[eng.m7md.ali]

ايوة العتبة فبر

[rahieb_100]

شكرا felix

[eng.m7md.ali]

العفو يا معلم :)

[amrelsha3er]

متابع

[Di2]

يا جماعة انا روحت امبارح لملك البروتون فى الحرفيين و جبت العتبة استيراد هيه هيه الاصلية بالظبط و ركبتها و مفيش اى فرق خالص زى الفل من غير ولا رش ولا مصنعية و اديتلو 200 جنية فيها :)

[Motarjim]

يا جماعة انا روحت امبارح لملك البروتون فى الحرفيين و جبت العتبة استيراد هيه هيه الاصلية بالظبط و ركبتها و مفيش اى فرق خالص زى الفل من غير ولا رش ولا مصنعية و اديتلو 200 جنية فيها :)

ألف مبارك يا ريس.

[Di2]

ألف مبارك يا ريس.

يا باشا تسلم والبركة فى نصيحتك