عصارة استخدام بروتون لمدة 3 سنين ( مميزات وعيوب )

[eng.m7md.ali]

ليكو وحشة والله

انا هعمل الموضوع ده بما ان ناس كتير في الفترة الاخيرة تسأل عن مميزات وعيوب سيارات بروتون سواء ساجا - جين2 - بيرسونا - واجا - ويرا عشان يبقى مرجع للي يحب يشتري جديد وان شاء الله نقول كل حاجة بمنتهى الشفافية عشان محدش يتهمنا ان احنا بنمجد في عربياتنا

وكمان بالنسبة لاي حد واجهته مشكلة ياريت يضيفها في مشاركة واللي عنده اي تعليق او استفسار عن اي حاجة انا تحت امره

عربيتي واجا موديل 2009 اوتوماتيك وبقالها معايا 3 سنين وشهر و6 ايام بالظبط عاملة فيهم 52 الف كيلو
واحب بردو احكي عن عربيات تانية غير عربيتي زي الجين2 والبيرسونا كمان بما اني سوقتهم وسافرت بيهم كلهم

نبتدي بالمميزات واللي اغلبنا عارفها

1- الثبااااااااااااات :

ودي اهم ميزة من مميزات سيارات بروتون عامتاً
الثبات مش بس السير في خط مستقيم عشان في ناس كتير بتفهم الثبات بطريقة غلط
الثبات عبارة عن قدرتك في التحكم الكامل في عربيتك في الملفات والمناورات وهو ده الثبات الحقيقي
بما اني معايا واجا وحافظها ثباتها في المناورات الديقة لحاد ال 150 اما المناورات الواسعة معاك لحاااد اخر العربية .. اما بالنسبة للجين2 تختلف كتير عن الواجا في الثبات للاحسن طبعا ومعاك بردو لحد اخر العربية وفي المناورات الديقة لحد ال 170 كيلو وطبعا منصحش حد بالسرعة اصلا والحمد لله ربنا الهادي والستار
سبب من اسباب الثبات هو شاسيه العربية تحت اشراف وتصميم شركة لوتس الانجليزية ودي شركة مشهورة جداً في عالم الثبات والسباقات
كمان مننساش العفشة ليها سبب رئيسي في ثبات العربية

2- السحب والموتور :

ثاني اهم ميزة في سيارات بروتون وهو الموتور اللي بيوفر سحب ممتاز على السرعات العالية
الموتور كامبرو 110 حصان وعزم 148 نيوتن عند 4000 لفة في الدقيقة
الموتور ده تم الاشراف على صناعته من شركة لوتس الانجليزية

في سنة 2008 بداية نزول موتور كامبرو بالتعديل الجديد في موديلات 2009 ووده عبارة عن تعديل في المنافولد وفلتر جديد اسمه iafm وده موجود في موديلات 2009 او اكتر
ميزة التعديل هيا ثبات العزم في السحب قبل 2.5 rpm
اما موديلات ماقبل 2009 كان بيبان فقد في العزم من 2.0 - 2.5 rpm ويبان اكتر مع التكييف ودي طريقة تقليل الموضوع ده هو استخدام فلتر هواء سبور زي ال k&N مثلا او سيموتا كاربون

وده فيديو لتسارع عربيتي من 0-180 بدون تكييف

waja 0-180 - YouTube

مع العلم ان الموتور 110 حصان ووزن العربية 1280 كيلو + 80 كيلو (انا) يبقى 1360 كم :))

منصحش حد بالسرعة لان التجربة دي كانت لمجرد تجربة العربية بعد اكتر من سنة من عدم السفر بيها

على فكرة اقصى سرعة جبتها بالعربية دي وهيا عاملة 4000 كيلو كانت 208 كيلو في طريق العين السخنة طبعا والعربية حلفت متكررهاش تاني وكانت اخر سرعة ليها 180 ( الحمد لله طبعا على كل شيء )

3-الخامات :

في ناس كتير مبتعجبهاش خامات بروتون ولا تقفيلها وناس بتضايق كتير من الاصوات اللي في كل حتة في العربية
انا الحمد لله الاصوات مش كتير اوي ههههههههههههههههههههههههههه يدوبك المشكلة كلها في التابلوه
وبمقارنة سريعة بخامات عربية نيو اكسنت موديل 2010 اكتشفت ان عربيتي بالنسبة ليها ماسكة نفسها اكتر من ناحية فرش الابواب وبلاستك القوايم في الجناب
يعني التقفيل يعتبر كويس والخامات كويسة الا خامات التابلوه هيا اللي فيها المشكلة بس الحمد لله الواحد بيعلي الكاست :))

4- الامان وقوة الصاج :

عربيتي للاسف مفيهاش ايرباجز ولا abs بس هتكلم عن الجين2 في النقطة دي
مشكلة توكيل عز العرب انه سمح بنزول عربيات مفيهاش وسائل امان زي عربيتي ودي فيها 3 فئات انا اقل فئة فيهم .. نفس الكلام كان على فئة من فئات البيرسونا بس كان فيها 2 ايرباجز بدون abs والحمد لله التوكيل بطل ينزل عربيات بدون وسائل امان

ناس كتير بتفتكر الفرامل ضعيفة وان طول مشوار بدال الفرامل ده عيب بالعكس فرامل البروتون قوية وده راجع لاستخدام فرامل خلفية ووامامية من نوع ديسكات مش زي عربيات تانية بتنزل طبل ورا وقدام ديسكات
دي ميزة كبيرة في بروتون خصوصاً مع الوزن الكبير
وبخصوص طول مشوار الفرامل ده طبيعي في كل عربيات بروتون
واما بالنسبة للصاج فهو من اقوى الانوع في الفئة السعرية دي اللي هيا 75 الف لحد 98 الف جنيه

ومتنسوش الايموبلايزر اللي بيمنع سرقة العربية وتدويرها غير بالمفتاح الاصلي

5-الكماليات :

كماليات السيارة تعتبر الاكتر في فئتها السعرية
العربية بتنزل بمراي في الصالون ودي من اهم المميزات عشان تشوف اللي ورا هههههههههههههههههههههههههههههههههههههههههههههههههه ههههههههههههههههههه

طبعا بجانب الازاز الكهربة ورا وقدام ومرايات كهربة والسنتر لوك وجهاز الانذار مع ريموت ومالتي فانكشن ومثبت سرعة في بعض الفئات ومرايات ضم في اعلى فئة من موديلات الواجا وفوجات ورا وقدام وكاسيت سي دي مع كاسيت من نوع كلاريون وسماعات كلاريون ده بالنسبة للواجا ( 4 او 6 سماعات حسب الفئة ) او الساجا وكاسيت بلوبانكت مع سماعات بلوبانكت بالنسبة للجين2 او البيرسونا
وال sturt bar بينزل اساسي في الجين2 وده بيساعد على الثبات

6-التصميم والشكل :

نيجي للتصميم الخارجي وشكل العربية وده شايفينه في كل عربيات بروتون وده ميزة كويسة جداً وبتميز بيها البروتون عن نيسان صني مثلا
التصميمات بتمنع مقاومة الهوا على السرعات العالية وده بيرفع الاداء اكتر وبيسهل على العربية في المناورات
اما التصميم الداخلي ده بقى من اجمل الحاجات اللي بتعجبني في العربية سواء جين2 او واجا ولون العدادات وشكل التابلوه والكونسول والابواب

7- سهولة قطع الغيار وتوافقها مع عربيات تانية :

زي اتيال الفرامل بتاعت الجين2 زي اتيال فرامل الفيات بترا والاوبل كورسا والفيات جراند بونتو 77 حصان وفلتر النزين والزيت تقريبا زي النوبيرا والاوبترا وتشابه بعض القطع الاخرى

اما العيوب العيوب

1- التوكيييييييييييييييييييييييل :

التوكيل للاسف سئ بالنسبة ليا انا ومن تجاربي معاهم
وفي ناس كتير مرتاحة معاهم بس للاسف التوكيل يفقر الى الحرفية والضمير من الصنايعية
بس مع ذالك احسن من توكيلات تانية والاهم في كل ده هو اخلاق المهندسين بتوع الاستقبال ودي احسن حاجة في التوكيل بصراحة وكلهم محترمين

2- العزل :

عزل العربية مش على المستوى المطلوب وده بيسمح لاصوات الهوا بالدخول على السرعات العالية زي ماشوفنا في الفيديو

3- صوت الموتور عالي على السرعات العالية وفي الحرق

.. ناس كتير بتعتبره عيب بس بالنسبة ليا مش عيب كبير وكله بيتحل انك تعلي الكاسيت وخلاص :))
3- اصوات التابلوه زي ماقولنا في نقطة سابقة ودي في اغلب عربيات بروتون وعلى حسب طريقة استخدامك للعربية وطريقة المشي في الشوارع مع العلم ان تم في التوكيل فك التابلوه بالكامل وتربيطه من جديد ولكن لمجرد اسبوع واحد بس كل حاجة رجعت زي ماكانت

4- مشكلة الطنابير واتيال الفرامل :

في عربيتي تم خرط الطنابير عند 17 الف كيلو بسبب سوء انواع الاتيال في التوكيل وده لاني استخدمت تيل سيء ومش اصلي

5- مشكلة مكن الازاز الكهربة

ودي اكبر مشكلة في الواجا بالتحديد لاني غيرت 4 ماكينات زجاج امامي يمين و 3 شمال وده طبعا على حساب الضمان وربنا يستر بعد خروج العربية من الضمان

6- فتيس العربية الاوتوماتيك

وهو نفس الفتيس اللي نازل في المتسوبيشي لانسر كريستالة
الفتيس سليم وعمره طويل بس المواتير دي كانت محتاجة فتيس احسن من ده شوية

7- استهلاك البنزين

كتير بالنسبة لعربيات تانية مع العلم ان عربيتي بتعمل 120 كيلو في الصفيحة الواحدة في الزحمة والاشارات
حاولت احل المشكلة دي مع التوكيل وتم تغيير كل شيء ليه علاقة بالموضوع ولكن المشكلة قائمة لسة والتوكيل عجز عن حلها بكل الطرق
لكن في عربيات تانية احسن من عربيتي بكتير وبتستهلك اقل منها
انا عارف ان الاستهلاك متعلق بطريقة السواقة والتكييف والزحمة بس بجد الاستهلاك مرعب بالنسبة ليا وبالنسبة لناس تانية جربو العربية لمدة يعني المشكلة مش مشكلة عامة في موديلات بروتون

8- العفشة

ناشفة شوية بالنسبة لبعض الناس وفي ناس تانيين تعتبر كويسة بالنسبة ليهم
بس عربيتي ناشفة بزيادة شوية وده عيب في عربيتي انا وهيتم تغيير ال4 مساعدين في الضمان

9- صوت الكاسيت

مش على المستوى المطلوب بالنسبة ليا شخصياً وبالنسبة للواجا .. طبعا الصوت احسن كتير في الجين2 او البيرسونا

10- علبة الدريكسيون

ودي مشكلة في موديلات قبل 2011 وغالباً اتحلت في الموديلات الجديدة
وتم حل المشكلة بعمل تعديل ولكن ده حل مؤقت مش حل نهائي بالنسبة للواجا
الحل الحقيقي هو تغيير علبة الدريكسيون بعلبة متسوبيشي لانسر بوما


11- تأثير التكييف على السحب :

وده في موديلات 2008 وماقبلها واتحلت بتغيير نظام فلتر الهوا iafm

12- الارتفاع عن الارض

وده زي ماهو ميزة في مصر اكيد هيأثر على الثبات
عربيتي ارتفاعها مبالغ فيه جدا بالنسبة للجين2


ماتم تغييره في الضمان :


1- عدد 4 ماكينات زجاج امامي يمين و 3 شمال
2- موتور مساحات
3- عدد 2 بلية عجل امامي ( بدون داعي )
4- عدد 4 مساعدين
5- مقص امامي شمال
6- فرش سقف
7- مفتاح الزجاج الكهربة الرئيسي بتاع السواق

وبكدة نكون خلصنا التقرير بمنتهى الحيادية والعربية في المجمل كويسة معايا جداً


ياريت اللي عنده اي اضافة او استفسار انا تحت امره

[eng.m7md.ali]

نسيت اضيف اني غيرت علبة الدريكسيون 3 مرات على حساب الضمان مع العلم ان سعر العلبة للبروتون واجا 4200 جنيه وسعرها للانسر بوما 3300 جنيه

[S O P H O S]

ما شاء الله تقرير وافي
ربنا يباركلك يا باشا ..

[pro_samir]

البروتون الوحيده اللي جربتها كانت بيرسونا ، وملاحظ ان حضرتك متكلمتش علي ثباتها

سفر حوالي 200 كم

بصراحه اتصدمت في ثباتها علي اللي بسمعه ، لدرجة كنت بخاف منها في الملفات

العربيه من ورا بتروووح .. لدرجة اني حصل موقف واضطريت انتش الدركسيون نتشه خفيفه علي سرعه 60 العجل اللي ورا صرخ وكانت هتعرض !

سألت صاحبها لو المساعدين بايظه او العفشه فيها حاجه قالي لأ !

مش عارف كل البيرسونا كده ولا ايه ؟

[misoalex]

شكرا على التقرير بس كده انا عرفت العربيه ليه مش منتشره بالرغم من مميزاتها اللى انا شايفها

[IronHead]

طيب يا عم مالتوكيل زى الفل, انت مغير نص العربيه على حساب الضمان والناس مقصرتش, فى توكيلات كتير مبتغيرش المساعدين والطنابير لانهم بيقولو ان ده عيب مستخدم

بس انا عندى فضول اعرف انت ليه غيرت فرش السقف

[hany63]

معلش سؤال بخصوص الفيديو حضرتك ازاي الار بي ام ابتدي يعلى و العربيه لسه و اقفه و المفروض انها اوتوماتيك هل كنت حاطط رجلك الشمال في بداية الطلعه على الفرامل؟

[Dr'AhmZZong]

ربنا يبركلك فيها يا بشمهندس .. عربية جميلة و بحترمها قوي ..

صحيح ايه سبب تغيير العلبة كذا مرة كده ؟ كنت بتحس بايه خبط يعني ولا حاجة تانية ؟؟

[Karim Ibiza]

بغض النظر عن مميزات وعيوب العربية انا بحييك على الحيادية وعدم التحيز

[Rambo10]

الف شكر على التقرير ممتاز
بس بصراحة انا شايف مجملا ان العيوب اكتر من المميزات

[SALAHHAKIM]

ياباشااااااااااااااااااااااااااااااااا تسلم ايدك تقرير فن الفون يامعلم مع التحفظ علي الحاجات الي انت عارفها . بس تمام يامعلم . سعر علبة الدريكسون 3000 دة مش في توكيل ميتسوبيشي دة في شارع دمشق لما اقارن اقارن بين توكيل وتوكيل . البنزين جرب تمشي علي عدد لفات محرك بين 2000 الي 3000 انا بردو الي حعلمك يا كبير . حتلاقي الصفيحة بتعمل معاك 260 كم وتحدي

[eng.m7md.ali]

ما شاء الله تقرير وافي
ربنا يباركلك يا باشا ..

ربنا يكرمك ياباشا :)

البروتون الوحيده اللي جربتها كانت بيرسونا ، وملاحظ ان حضرتك متكلمتش علي ثباتها

سفر حوالي 200 كم

بصراحه اتصدمت في ثباتها علي اللي بسمعه ، لدرجة كنت بخاف منها في الملفات

العربيه من ورا بتروووح .. لدرجة اني حصل موقف واضطريت انتش الدركسيون نتشه خفيفه علي سرعه 60 العجل اللي ورا صرخ وكانت هتعرض !



سألت صاحبها لو المساعدين بايظه او العفشه فيها حاجه قالي لأ !

مش عارف كل البيرسونا كده ولا ايه ؟

متكلمتش كتير عن البيرسونا لاني سوقتها مرتين بس ومرة سافرت بيها
واللي كان في البيرسونا دي اكيد عايزة ظبط زوايا .. حصلتلي كتير

شكرا على التقرير بس كده انا عرفت العربيه ليه مش منتشره بالرغم من مميزاتها اللى انا شايفها

العفو ياباشا .. اغلب العيوب دي واجهتني انا مش عيوب عامة في العربية .. ولعلم حضرتك انتاج بروتون كله اللي مخصص للسوق المصري بيتباع مبيفضلش منه حاجة .. يعني العربية مش محتاجة دعاية ومش هتبقى منتشرة اكتر لان الانتاج محدود

[eng.m7md.ali]

طيب يا عم مالتوكيل زى الفل, انت مغير نص العربيه على حساب الضمان والناس مقصرتش, فى توكيلات كتير مبتغيرش المساعدين والطنابير لانهم بيقولو ان ده عيب مستخدم

بس انا عندى فضول اعرف انت ليه غيرت فرش السقف

التوكيل بيماطل كتير جداً
مبيعملش حاجة غير انه بيطلب فلوس على كل حاجة
اختبار البنزين بتاع الطريق السريع على سرعة 90 كيلو عملتو 4 مرات وكل مرة ادفع 150 جنيه تنضيف بوابة وفلتر بنزين والمشكلة زي ماهيا
وعيوب التوكيل كمان ان القطع بتيجي متأخرة اوي
فرش السقف حجزته يوم 10-1 وركبته يوم 3-10 يعني حوالي 9 شهور مستنيه
وسبب تغيره انه هبط لوحده

معلش سؤال بخصوص الفيديو حضرتك ازاي الار بي ام ابتدي يعلى و العربيه لسه و اقفه و المفروض انها اوتوماتيك هل كنت حاطط رجلك الشمال في بداية الطلعه على الفرامل؟

لا ياباشا الطبيعي بيبقى على 0.8 rpm وانا كنت دايس فرامل ووسبت ودوست بنزين علطول بس عشان وزن العربية ممكن تكون اتأخرت في الطلعة

ربنا يبركلك فيها يا بشمهندس .. عربية جميلة و بحترمها قوي ..

صحيح ايه سبب تغيير العلبة كذا مرة كده ؟ كنت بتحس بايه خبط يعني ولا حاجة تانية ؟؟

ربنا يخليك ياباشا ويباركلك

سبب التغيير كان لمجرد الخبط وانا محسوك ومبحبش اسمع اصوات كتير

الخبط ده نتيجة عيب تصميم بسبب ان السواق في ماليزيا بيبقى يمين مش شمال زي مصر

وتغيير الاتجاه ده عمل مشكلة في ناحية الخبط بس اتحلت بعمل التعديل وادي الخبط رجع تاني اهو بس على خفيف

بغض النظر عن مميزات وعيوب العربية انا بحييك على الحيادية وعدم التحيز

ربنا يخليك يامعلم تسلم
انا مش عايز حد يفتكر اني راكب فيراري .. هيا عربية زي اي عربية ليها مميزات وعيوب وانا اتكلمت اكتر عن العيوب

الف شكر على التقرير ممتاز
بس بصراحة انا شايف مجملا ان العيوب اكتر من المميزات

العفو يا باشا

العيوب دي هيا اللي واجهتني ومش عيوب عامة
انا اللي حظي وحش وكل ده اتجمع في عربيتي :)

[eng.m7md.ali]

ياباشااااااااااااااااااااااااااااااااا تسلم ايدك تقرير فن الجون يامعلم مع التحفظ علي الحاجات الي انت عارفها . بس تمام يامعلم . سعر علبة الدريكسون 3000 دة مش في توكيل ميتسوبيشي دة في شارع دمشق لما اقارن اقارن بين توكيل وتوكيل . البنزين جرب تمشي علي عدد لفات محرك بين 2000 الي 3000 انا بردو الي حعلمك يا كبير . حتلاقي الصفيحة بتعمل معاك 260 كم وتحدي

ربنا يباركلك يا صلاح باشا

مش فاكر سعر العلبة بالظبط بس هيا ارخص من الواجا وبتركب عادي مكانها

بالنسبة للبنزين انا اصلا مبحرقش واخري 3000 rpm والنتيجة واحدة

[alaa m]

عيوب البروتون

الف شكر على التقرير ممتاز
بس بصراحة انا شايف مجملا ان العيوب اكتر من المميزات

حقيقى فعلا من مجمل التقرير واضح ان عيوب العربية لا تغتفر وهى فعلا اكتر من اى مميزات م

مع جزيل الشكر لصاحب التقرير لما فيه من حياديه