حادثه كبيره فى جين تو

[ESlamgandhi]

السلام عليكم
ده تانى موضوع ليا,انا لسه مشترى العربيه من شهرين وهى موديل السنه وجايبها كسر زيرو بس من اول يوم حاسس بحاجه مش طبيعيه فى الفرامل ولما عملت صيانه العشره عند عصام صفا قالى لا مفيهاش حاجه مع العلم انى مش اول مره اسوق عربيه فراملها اى بى اس!
المهم انا النهارده كنت فى نزلة الدائرى بتاعت الاوتوستراد وفجأه بوكس شركه كسر عليا اضطريت افاديه وكنت على سرعه والارض فيها حفر غريبه مع الفرامل لقيت العربيه عملت دريفت ودخلت فى السور بطريقه انا مش فاهمها لغايت دلوقتى ولولا الايرباج خرج كان زمانى فى العنايه المركزه والحمدلله
بس الغريب ان الاتنين ايرباجز خرجوا وانا كنت فى العربيه لواحدى!!!!!!!!!!!!!!!
المهم العربيه دلوقتى محتاجه
اكصدام امامى
رفرف
صدر امامى
ردياتير ولسه هنشوف السربنتينه
سمكرى شافها قالى مبدئيا الشاسيه داخل 20 سم :(
فانوس يمين
بربريز
ومش عارف اعمل ايه بصراحه انا قلت اروح التوكيل ناس قالولى هتدفع 20 الف عالاقل
وبصراحه خفت لما قالولى سمكرى هيرد الشاسيه وهيحل الموتور
قولولى اعمل ايه عشان مش عارف بجد واول مره اعمل حادثه فى حياتى والحمدلله وقدر الله ما شاء فعل

[ahmed_h_g]

معلش الحمد لله انك بخير
أعملها خارج التوكيل وأشترى قطع الغيار بنفسك وان شاء الله بسيطه
وأنصحك تغير ماستر الفرامل الرئيسى
بالنسبه لفردة الشاسيه أنصحك تعدلها بجهاز سحب هتلاقيه موجود فى الحرفيين فى ورشة سمير على

[S O P H O S]

الحمد الله انك بخير ..

[mhassan9]

قدر الله وماشاء الله فعل بس ممكن حضرتك تصلحها بره فعلاُ أرخص
بالنسبة للحدفة اللي حصلت دي ممكن تكون مشكلة أ ن عجل بيقفش عليه الفرامل أكتر من عجل وعشان كدا العربية عملت الدريفت اللي أنت بتقول عليه عامة لازم تكشف علي الفرامل قبل ما تمشي بالعربية تاني

ونصيحة للناس اللي بتروح التوكيل وبتشتكي من الفرامل وبيقولوهم أن الفرامل تمام أو أي حاجه تاني فيها عيب وبيقولوا عليه مش موجود خد تقرير مكتوب من التوكيل بأن الجزئيه دي من العربية مفيهاش مشكلة عشان لو حصل مشكلة بعد كدا بسبب أنهم صهينوا عليها ومحلوهاش يتحملوا بقا مسئولية الأهمل ويصلحهوها علي حسابهم

[Amrgamal1]

ربنا يعينك وتصلحها علي خير
مش عارف الايربجات اللي ضربت دي هتحتاج تغير التابلوة كله ولا ايه

[eng.m7md.ali]

قدر الله ومااشاء فعل

الفرامل ملهاش ذنب في الحادثة دي

ده طبيعي يحصل مدام فرملت في مكان مليان حفر او مطبات صغيرة او تكسير

المهم انك بخير وفي 60 الف داهيا العربية ياباشا ولا تزعل نفسك خالص

[monamize4]

الحمد لله ربنا ستر

[limo81]

قدر الله وما شاء فعل
ربنا يعوض عليك

[D . a .\ AYMAN]

قدر الله ومااشاء فعل

الفرامل ملهاش ذنب في الحادثة دي

ده طبيعي يحصل مدام فرملت في مكان مليان حفر او مطبات صغيرة او تكسير

المهم انك بخير وفي 60 الف داهيا العربية ياباشا ولا تزعل نفسك خالص

+1

العربية استحالة تعمل دريفت إلا إذا العجلتين اللى ورا انفصلوا عن الأرض ومش ماسكين فيها بإنهم يكونوا مفرملين وبتزحلقوا وده مش ممكن لأن العربية أصلا بتفرمل بالعجل اللى قدام إلا إذا كنت شديت الهاند البريك .. السبب التاني الوحيد هو الحفر الصغيرة اللى حضرتك بتقول عليها خلت العجل يتنطط على الأرض من غير ما يمسك فيها كويس خصوصا مع فرملة العجل اللى قدام عشان كدة لفت ودخلت في السور

... معظم قطع الغيار اللى بتقول عليها هاتها استيراد مش جديد هايكون أفضل

وفي واحد في امبابة اسمه أولاد علام ... هاتطلع الكوبري اللى في نهاية شارع جامعة الدول العربية في المهندسين وتنزل الناحية التانية هو هو في تاني شارع تقريبا بعد يمين بس تسأل عليه لأني ماروحتش هناك قبل كدة هو حاطط يافطة بروتون ... أنا معرفوش بس واحد لسة برضه كان عامل حادثة وصفهولي وقالي راجل محترم جدا في تعاملاته وأحسن بكتير جدا من الراعي وأمثاله اللى في الحرفيين بس السمكرة خلي الشغل عند حد بيفهم في الحرفيين لأنهم أفضل من غيرهم وخصوصا جهاز ضبط وشد الشاسيه


الحمد لله على سلامتك وربنا يخلف عليك خيرا منها يارب

[Nabil.M]

سؤال صغير لحضرتك انت عامل تامين على العربيه ولا لاء ولو فيه تامين شامل المفروض هوا الى يتحمل التصليح

[saryrabie]

الحمد لله على سلامتك وربنا يعوض عليك خير

[egyptiandiver]

الحمد لله على سلامتك...

[MoH.SaLaDiN]

حمدا لله على سلامتك