سؤال لملاك الساجا

[amir]

السلام عليكم و رحمه الله

شباب كنت عايز اعرف حاجه بخصوص الساجا

في عربيه مستعمله و ناوي اخلص فيها و لسه الميكانيكي هيكشف عليها بس حبيت اسئلكم

اولا هي العربيه باب السواق و الباب الخلفي من الناحيه التانيه بيفتحو من غير اي تقل في نص الفتح

زي ما يكون ضلفه شباك للتقريب

لكن الابواب التانيه فيها سنه التقل العاديه في منتصف الفتح

ده عادي ولا في حاجه مش مظبوطه؟

ثانيا

تقفيله الكبوت مع الرفرف من ناحيه مقفوله و من الناحيه التانيه في حوالي نص سنتي تقريبا فراغ

و صاحب العربيه بيأكد ان ده العادي في الساجا

فهل ده طبيعي؟

[D . a .\ AYMAN]

أنا ما شفتش الفرق اللى بتقول عليه .. بس مافيش عربية جديدة في أي حتة في الدنيا مهما كانت ماركتها ممكن يكون الكبوت فيها من ناحية مافيش فرق ومن ناحية تانية في فرق نص سم ... لازم يكون الفرق متساوي من الناحيتين

وبعدين أنا بحب أبص على الساجا جدا كل ما ألاقيها .. وعمري ما شوفت الفرق ده فيها نهائي ... وأكيد أكيد الساجا مش بتنزل كدة

...

تاني حاجة بالنسبة للباب .. بيكون في شداد بين الباب وبين العربية والشداد ده بيكون في جزء سميك في النص وهو ده اللى الباب بيقف عنده وبعد ما يعديه بيقف بعده عشان يمسك الباب وما يقفلش لوحدة

لو الباب مش بيعمل كدة احتمال يكون الشداد اللى الباب ده إما مش راكب ... أو مكسور ... النقطة هنا إن الشداد ده بيكون قوي جدا وصعب يتكسر إلا في حادثة قوية ... وممكن تبص عليه بنفسك .. هو بيكون دراغ مثبت في القائم بتاع العربية من عند منتصف الباب من الداخل من ناحية .. ومن الناحية التانية مثبت في الباب نفسه .. وفيه مساحة للدخول والخروج عشان لما الباب يقفل يدخل جوة الباب نفسه


....

توقعي من النقطتين دول إن العربية دي غالبا عاملة حادثة وهو مصلحها

[amir]

متشكر علي الرد الوافي ده و ان شاء الله الميكانيكي يبص عليها و ربنا يقدم اللي فيه الخير و مادمت بتحب الساجا كده ممكن تفيدني بخصوص قطع الغيار سواء سيور و فلاتر و الحاجات الدوريه و الفوانيس و الاكصدامات برضو هتغلبني ولا متوفره لان العربيه ان شاء الله هتقعد 5 او 6 سنين

[D . a .\ AYMAN]

بصراحة أنا بحب أتفرج عليها من برة لما ألاقيها قدامي لكن عمري ما ركبتها .. وما تعاملتش مع بتوع قطع غيارها ومعرفش تفاصيلها نظامها إيه

[amrseif]

بص يا استاذ امير هحاول ان أنا أفيدك بخبرة عملية و تجربة شخصية

العربية ساجا ليها مميزات و عيوب هبدأ بالمميزات : -

1 - العربية ثباتها رائع جدا فى الطريق الطوالى و الملفات حتى على السرعات العالية و حتى لو انت لوحدك .

2 - العربية واسعة و مساحة وضع الاقدام فيها رائعة حتى فى الكنبة الخلفية

3 - بالنسبة لسعرها فيها كماليات تتفوق بها على السيارات التى فى نفس الفئة مثل الايرباج و حساس الركن الخلفى و الفوج لايت امامى و خلفى و جنوط سبور و غيرها ...

4- على حد علمى ان معدل الامان فيها عالى بالنسبة لفئتها

5 - سحب العربية قوى حتى فى الاوتوماتيك

6 - العفشة ناعمة تخليك ماتحسش ان ظهرك بيوجعك على الارض المكسرة و المطبات يعنى العربية بتاخد و تدى اكثر شوية من العفشات الناشفة عشان تقلل احساسك بالارض المكسرة و تحافظ على ظهرك ..

العيوب : -

1 - استهلاك البنزين للأسف سئ لا يقارن ب 1300 سي سي خصوصا جوة البلد و الزحمة و الاشارات تقريبا 120 كيلو متوسط الاستهلاك فى الصفيحة بدون تكييف و لكن على الطرق السريعة و السفر جيدة من 250 الى 280 كيلو فى الصفيحة على سرعة 120 او 100 تقريبا بدون تكييف برضه - ديه تجربتى الشخصية ممكن في بعض الاعضاء تقول كلام مختلف شويه بس مش هيبقى الفرق كبير على ما اعتقد

2 - قطع الغيار غير متوفرة كتير هتتعب لما تلاقيلها قطعة غيار- ممكن كمان متلاقيهاش فى التوكيل و تقعد تحجز بالشهور لحد ما ييجى عليك الدور ممكن بعد كده المشكلة ديه تتحل لما العربية تنتشر اكثر

3 - بها بعض عيوب الصناعة ( حصل معايا ان البطارية ماااااتت فى اول 5 شهور !! روحت غيرتها فى الضمان ببطارية acdelco - المساعد الخلفى ضرب زيت و بقالى دلوقتى اكثر من 3 شهور حاجزه بس العربية بتمشى و لكن لازم يتغير

4- العربية تكنولوجيتها عالية شوية يعنى مش اي حد يفهم فيها و حساسة قوى للبنزين المغشوش اللى هو سمة اساسية فى بلدنا و لكن ماشية برضه

5 - الباور متوسط او جيد و ده عشان يخلليها ثابتة فى السرعات العالية لكن مش زى نعومة باور الكورى و اليابانى

يا ريت تكون استفدت من المعلومات ديه و ربنا يوفقك للخير ان شاء الله .....