الحمد لله استلمت ال Gen 2

[وليد عفيفى صابر]

الحمد لله استلمت ال جين 2
اللي استقرت عليها بعد تردد طويل
وكان لهذا المنتدي الفضل في اختياري لها
واللي أقنعني بيها كلام الأستاذ / توت عليها وكلام الأستاذ / أحمد صيام وغيرهم من الأخوة البروتونيون الأفاضل
واستلمتها من التوكيل من الصحراوي وكنت حاجزها في 17/7/2008 أوتوماتيك فضي واستلمتها في 31/8/2009
والحمد لله عاجباني جدا وعند الاستلام عملت عليها مراجعة لم أجد أي حاجة فيها مشكلة
ولقيتتها عاملة 22 كيلومتر
ودلواقتي عامل بيها 110 كيلومتر وان كنت لسه مارخصتهاش مستني جواب المرور بعد ما أخدوا مني 250 جنيه علشانه مش عارف ليه
وان كانت خبرتي في السيارات مش أوي كان معايا قبل كده 128 تعلمت عليها وقعدت معايا 4 سنوات ونص ثم دخلت أهوه علي ال جين 2 أوتو علي طول تلاحظ لي :
أن الفرامل لما بأدوس عليه أوي ثم أسيب بأحس انها يعني ناشفة أو بتكتف العربية ثم تسيبها المهم انها مش طبيعية هل ده علشان لسه بتلين

وأنا حريص علي عدم زيادة السرعة علي 80 وأشغلش التكييف

وهل من المفروض ان أنا أمشي بيها مسافات طويلة علشان التليين وعلشان أخلص ال 1000 كيلو بسرعة خصوصا اني أنا مشاوير قصيرة المسافة من الشغل للبيت حوالي 10 كيلو ولا أمشي براحتي لحد ما أخلصهم
أسف علي الاطالة ومعلش هل ضغط الاطارات محتاج ضبط وعلي كام وفين أفضل الأماكن وايه النيتروجين ده
وايه أفضل البنزينات للتموين
وشاكر جدا لهذا المنتدي الجميل ومعلش طولت عليكوا
وكل رمضان وأنتو بألف خير وصحة

[momenhamdy]

الف مبرووووووووووووك علي جميلة الجميلات و ربنا يبارك لك فيها ....... بالنسبة للموضوع الخاص بالتلين خد راحتك لغاية ما تخلص ال 1000 كيلو و مفيش اي مشاكل المهم ما تقرصش علي العربية و لا تزود عن 3 Rpm و لا تشغل التكييف

[khpopo]

الف مبروك عليك جين2 الجميلة وربنا يديك كل خير منها ويحفظها لك من كل شر
حاول تتطلع بيها مشوار طويل طريق مفتوح افضل من التلين داخل القاهرة لانة ماتور رياضى مع الالتزام 3 RPM

سبحان الذى سخر لنا هذا وماكنا لة مقرنين وانا الى الى ربنا لمنقلبون
__________________

[fahd_628]

الف الف مبروووووووووووووووووووووووك

[tutankhamoun]

أولا ألف مبروك عليك جميلة الجميلات
بالنسبة للتليين فكما أجاب الأخوة الكرام يُفضل الخروج على الدائري مثلا و عمل مشوار بتاع 15 كم يوميا أو أكثر و لكن لها قواعد و أصول

دي كانت مشاركة لي عن موضوع التليين و عن الطريق الي أتبعتها في التليين .......... أرجوا أنها تفيدك

بالنسبة يا أخي الكريم لموضوع التليين
المتفق عليه ما بين الشركات صانعة السيارات على مستوى العالم كله أن هناك فترة للتليين بتكون حوالي 1000 كم الأولى من عمر المحرك
و لكن كيف تقوم بالتليين ؟؟؟
في أول 500 كم
كنت أقود بسلاسة و بدون عنف نهائي مع السيارة و لا أزيد السرعة عن 90 كم / س و أقصى الظروف 100 كم / س
و لكن في فترة التليين يجب اتباع الآتي

لا يجب ابدا السير لمدة على سرعة واحدة
لذلك يجب تغيير السرعة بإستمرار ما بين النزول و الطلوع بها و أيضا تغيير عصا السرعات

فكنت أجري و أصل إلى 100 أو 90 و أستمر عليها لمدة دقيقة و بعدين أنزل ل 60 و أغير إلى الثالث و أنزل إلى 50 ثم 40 ثم الغيار الثاني و هكذا دواليك
طلوعا و نزولا
و بعدين أستمر على سرعة 80 مثلا لمدة 5 دقائق و بعدين أعلى إلى 90 ثم النزول إلى 70 و هكذا

و حتى الألف الأولى
و بعدين ذهبت إلى التوكيل
و قمت بتغيير الزيت و الفلتر
و بعد الألف الأولى كنت حريص على ألا أضغط على المحرك أيضا و أستمر هذا الحرص حتى 2000 كم تقريبا
و بعدها خرجت ليلة في الصباح الباكر و عندما كان الطريق فاضي تماما من السيارات لأصل إلى سرعات عالية لا أقوم بالقيادة عليها في الظروف العادية
و بدأت بالتسارع بالسيارة واحدة واحدة و حتى وصلت إلى سرعة 190 كم / س و من يومها و المحرك يعمل بكفاءة و ممتاز و تزداد كفائته كلما أرتفع مؤشر العداد إلى عدد كيلومترات أكبر
أي يرتفع أداء المحرك مع إرتفاع عدد الكيلومترات المقطوعة
و مع تغيير زيت و فلتر في صيانة 5000 ..... ستجد أن السيارة مختلفة تماما و تعمل بكفاءة أعلى و هكذا

بالنسبة لضغط الكاوتش
المفروض الكاوتش الأمامي يكون 30
و الخلفي 28

[Powert]

الف مبروك العربية وربنا يديك خيرها

[ahmedsiyam]

مبروك يا اخ وليد

والاخوة الافاضل ردوا عليك فى كل حاجة و خد راحتك و ربنا يكرمك بيها ان شاء الله

[zizo610]

ألف مبروك يا أستاذ وليد وربنا يديك خيرها ويكفيك شرها وتعينك على الطاعة في رمضان وفي كل وقت

الأخوة الأفاضل كعادتهم ردوا عليك بالمفيد
بس بالنسبة لموضوع الفرامل أه الي عملك إزعاج بالضبط أصل أنا برضك حاسيس أنه فيه حاجة مش مظبوطة عندي بس أنا الي عاملي إزعاج صوت الفرامل بس خصوصا وانا بلف الدركسيون مأنا دايس فرامل وطبعا ده بيبقي واضح وأنا بركن بالذات.

أخوك حازم

[adel1414]

ربنا يباركلك فيها

[MedaSam]

ألف ألف مبروك و ربنا يباركلك فيها يا رب
أنا عندي سؤال للأستاذ توت, أنا مش فاهم ليه ضغط الاطار الأمامي 30 و الخلفي 28. أعتقد ده ليه علاقه بتوزيع وزن العربيه و للا في سبب تاني؟

[وليد عفيفى صابر]

شكرا جزيلا لكل الأخوة الأفاضل الذين تفضلوا بالرد

[tutankhamoun]

ألف ألف مبروك و ربنا يباركلك فيها يا رب
أنا عندي سؤال للأستاذ توت, أنا مش فاهم ليه ضغط الاطار الأمامي 30 و الخلفي 28. أعتقد ده ليه علاقه بتوزيع وزن العربيه و للا في سبب تاني؟

'طبعا يا باشا
لأن وزن الموتور مع وزن الركاب الأمامين ( دايما بيبقى فيه ركاب في الأمام عكس المنطقة الخلفية )
فعلشان كدا لازم ضغط الإطار في الأمام يكون أكبر من الخلف قليلا

[hoza]

الف مبروك يا باشا وربنا يباركلك فيها
هو انا كنت عايز اسأل هو استلام العربية بياخد وقت طويل؟؟؟؟

[bassam nagy]

الف الف مبروك وربنا يباركللك فيها ويديك خيرها ويكفيك شرها

[وليد عفيفى صابر]

الف مبروك يا باشا وربنا يباركلك فيها
هو انا كنت عايز اسأل هو استلام العربية بياخد وقت طويل؟؟؟؟

الله يبارك فيك يا باشا
لا أبدا العربية متوفرة وموجودة في التوكيل وفي المعارض بس في ألوان بتكون قليلة فبتكون بالحجز